2 Tawarikh 28 - Eipomek

Ahas birye, ninye deiyoknye Raja kibuk yupu

¹ Ahas el keting tamun 20 tahun akunum kibuk talak ara, ninye deiyoknye Raja kibuk. Winibukce, Yerusalem mutuku talebuka ulamuk keting tamun nirya ara, 16 keting tamun deice arye mamuk. Elda ninye deiyoknye Raja Daud, el deipkirikdopnye birye, pia teleb ulamukak, Allah Yahweh arye Daud biti, kanye pia deiamuk touk kum ulamuk. Ahas el ulamuk talak ara, malye ning ton talebuka ulamuk ati, Allah Yahweh arye, el kanye tenina ara, ‘Na like,’ tenelamuk.

^2-3 Tonda, Ahas elce sik Israel nang talina ati, ninye deiyok kibuka, Raja-Raja kilamik nang arye, malye winin ning weik winilamik touk, el Ahas babye, Bahal isa si erena ati, talye ning urasin atonun, patung memepdeiamukce, isa si ati si erelamuk. Aning winilamuk talak noutam ara, el deiamuk mapu ton obuka, isa si erena ati, uku sekuka dongolamuk. Aning winilamuk ning ara, minop talak sik Kanaan mutuku noutam ulamik nang arye, yuk-yuk ning si erena ati malye pil dolamik ning ara, Allah arye, ‘Na tenen nang, Israel nang arye amutuku nirya talipnamakʼ tenen, sik Kanaan mutuku nang inibuka yakdonokamuk. Bukni, Ahas birye malye ning talebuka, si erelamik touk, el babye apiluk dolamuk.

⁴ Tonda, Ahas birye isa si erena ati, domba ato ning obuka, uku dongona ap, tonda siltong teleb nyan ning uku dongona ap ara, el taleamuk mutuku noutam bukni, mutuku deice ap, tonda weik yo tikamuka amu tam ap ara, domba basam ato ning obuka boyanarye, siltong teleb nyan ning ap, uku dongon pil dolamuk. Winibuka malye ulamuka ati ara, Allah Yahweh arye, anye biti ikin ning arebuk.

Siria mutuku ulamik nang ap, Israel nang ap, opdayik yupu

^5-6 Raja Ahas el isa si erelamukce, malye weik ulamuka deice arye, el si erelamuk Allah Yahweh arye wabukce, lo arebukba, Siria mutuku taleamuknye Raja birye obuka, sirya dakukce, Yehuda mutuku nang weik tonun tomobuka, Damasyik mutuku delilbinamuk. Tonda, Allah Yahweh arye, Ahas biti kum melibukopura, Israel mutuku taleamuknye Raja Remalya, el punubuknye, el mi Pekah birye, yuk talak ton yanuka, obuka sirya dakukce, tonok sum arye adiparyuk Yehuda mutuku yin talina mikip weik nang yupa ara, seratus dua puluh ribu (120.000) nang obuk. Deiyok ara, Yehuda tam ulamik nang arye, sik deipkirikdop nang si erelamik Allah ara, batakikce, yuk tam kipdobika atia. Winibika ati, Allah arye, sik kum melibukce, batakuk deice arye, aning ara winibuk. Ara, Yehuda mutuku ulamik nang nirya arye, Allah nyabuka touk, kum winibuka deice arye, sik deice uk ikin ning yayukba doprobik.

⁷ Tonda, Israel yin talin nang kan-kan, tonok kel weik bikamuknye, el si Zikri, elce Ahas el mi Maaseya ap, Raja Ahas el weik asik pil don nang ati, kalikna deiyok kiamuknye, el si Asrikam ap, tonda Raja Ahas el amu tam melibuka ulamuknye, el si Elkana ap, sik nirya ara obuk.

⁸ Tonda, sik Samaria tam ulamik Israel nang arye, sik kayapu nang Yudea tam ulamik kilapu ap, sikce deiamik mapu ap, sikce deiamik kilmapu ap ara, weik tonun tomobuka, sik mutuku tamubuka, Samaria bobinamik. Aning diamuk kum bukni, tonda, yata yala ning do nirya, sikce bona alubuka doprobikce, sik mutuku tamubuka, Samaria bobinuka deibik.

⁹ Winilamik bukni, sik Samaria mutuku noutam ara, Allah el yupu laka nyananye tonok, el si ara nabi Odet ulamuk. Atalak ara, Israel yin talin nang arye, Yehuda mutuku nang weik tonun tomubukabikce, sik mutuku Samaria mutuku bana ati yayik talak ara, bisikak binuka eibukce, anang ati nyabuk. “Anggunce, Yehuda tam nang ati opdanmaluma deiyok ara ani. Allah el si Yahweh, sik apu yapu nang si erelamiknye birye, sik Yudea tam nang ati, ‘Malye weik ulamik ati, wenepnamneʼ tenen, akunum batakuka ati, lo arepsilyeba, anggunce opmalume. Bukni, anggunda yu weik deice arye, Yehuda mutuku yin talin nang nirya ikin ning deibuka oplum ning ara, Allah im deice ululnye birye, akunum eibuka biknamasile.

¹⁰ Tonda, atalak ara, Yerusalem mutuku ap, Yudea tam ulamik nang ap, kilapu ap ara, sikti, sik Israel nang arye, ‘Nun nyapmap yupu uk kekebuka, nun amu tam ukirye, nun ikin pil dibibyeba, nun pil melin nang ubikirye, arena kumce, talyeuk pil donamsiake,’ tenepmalumce, anang tomobuka anggun mutuku Samaria boyanamlume. Bukni, anggun ton tenipdelulume. Anggun Israel nang babye, dipkoprob anggun ni koproba Allah Yahweh ati, malye kipdeipmalum ning ara, moubuka bita kum bikmalum do?

¹¹ Ati ara, anggunce na yupu bita kekepnuse! Allah Yahweh arye anggunti, el yu weik ubuka ati, anggun deice deipnamsile. Ati, anggunce Yudea tam nang ap, kilapu ap tomopmalumce, tapu koubuka amutuku boyanmalum nang nirya ara, batamunce, ‘Anggunda tamubuka anggun mutuku talye bindoplulume,’ nyapmunyopura, sikce tamubuka, Yudea tam binamake.

¹² Tonda aning atouk, Efraim yala nang ati, deiyok kibuka taleamik dumbarye nang ara, sik si Yohanan el mi Asarya ap, Mesilemot el mi Berekhya ap, Salum el mi Yehiskia ap, tonda Adlai el mi Amasa ap, sik anang arye, Israel yin talin nang, Yudea mutuku olamikak arye, Samaria mutuku yanganmik nang dam biyikce, “Yata ati, aning ara winipmalum do?” nyabuka, derebikce, wenebik.

¹³ Sikce anang ati nyabik. “Wenena ati tomobuka boyanmalum nang ara, amutuku boyangana kume! Anang bataklulume! Winipmunyopura, nunce Allah Yahweh, el dam akunum malye winipnuyabe. Tonda, nun malye winibupe ning ara, akunum weik kipsuk ati, tabakna meme. ‘Ara ikin ning pia weik dopropnamapʼ tenen ati, nyababe. Anggunce aning winipmaluma deice arye, ikin ning tonap tabakuka nun deice yanmalba dopropmabe,” nyabuka, yupu arebik.

¹⁴ Nyabikopura, Israel tam nang, sik yin talin nang arye, sik atomobuka boyanmik nang ap, bona alubuka boyanmik ning ap, nirya bobuka, Israel mutuku taleamika deiyok nang ap, amutuku unmik Israel nang ap, sik dinmek sukum arye, dobuka deibik.

¹⁵ Aning nirya tamubuka arebikopura, amutuku talebuka, deiyok kibuka ulamik nang arye tomobuka boyanamik nang, bobana ati, anang binuka doprobik. Sik anang arye, baju alubuka dopromik ning nirya, tamubuka baju kum nang ati, bokuka arebikopura, doprobik. Tonda, sik anang arye yan ongona sepatu ap, din ning ap, mek ap, bokuka arebik. Atomobuka boyanamik nang, sik nong bola deice dila weik upmok nang kwetena ati ara, minyak zaitun mek arye likdeibik. Tonda, nong mitang kibuk arye bisik kum binmanto ubik nang ara, keledai basam balye deice deibuka, sik atomobuka boyanamik nang nirya bobuka, Yeriko mutuku ulye Kurma yo weik tikamuk mutuku damuk bobiyik. Ara, sik mutuku Yehuda tam asik dobuka ulamik mutuku uk, bana ati winibik. Sik anang akunum bobinuka batakikopura, Israel nang ara, tamubuka Samaria mutuku uk yayik.

Ahas birye, Asyur mutuku deiyok kibuka taleamuknye Raja biti, “Melipnilyame,” nyabuka morobuk yupu

¹⁶ Atalak ara, Raja Ahas birye, otam Asyur mutuku deiyok koubuka taleamuknye biti, “Se, na mal olan nang arye olayanamaniaka ati, anggunce yanuka melipnululume,” nyabuka morobuk.

¹⁷ Winibuka deiyok ara, sik keting kumulban tam ulamik nang, Edom mutuku nang arye, Yehuda tam noutam ulamik nang nirya ati, obuka sirya dakice, amutuku ninye tomobuka boyayika ati, “Se, sikda na dam yanuka melipnetingeʼ tenen, Raja Ahas birye, Asyur tam nang ati morobuk.

¹⁸ Atalak aryuk, sik Pilistin yala nang arye, Yehuda mutuku keting kumulban tam mutuku pia mambul weik asik dolamik ning ap, tonda, iknapnye tam bukni, mek pia kum sukum ap warikilyayik. Sik warikilyayikce, ninye obikce, malye kibuka doprobik mutuku ara, Bet-Semes mutuku ap, Ayalon mutuku ap, Gederot mutuku ap, tonda weik asik dolamik mutuku, Sokho mutuku ap, Timna mutuku ap, Gomso mutuku ap, tonda awinilye mutuku dam dolamik mitik asik ap nirya, ninye obuka, alubuka doprobikce, yanuka ulamik.

¹⁹ Aning winibika deiyok ara, Yehuda mutuku talebuka ulamuk ninye deiyoknye Raja Ahas elce, Allah nyabuk ning ara, moubuka kum kekebukce, batakuk. Tonda, elce, ‘Yatanye birye nati wenepmantonye, ton kum ulule. Ati, nara talye malye winin ninguk, luparabuka wininamne,’ tenelamukce, Yehuda mutuku noutam ara, pia malye weik winilamuk. Tonda, Allah ati batakuka, yuk talye ning talebuka, talye isa si erelamuk. Tonda, elda diksukum pil ton kum dolamuka ati, Allah Yahweh arye, Yehuda mutuku noutam ara, kanye imun weik ning weika arye, areamuk.

²⁰ Ati ara, Allah arye lo arebukba, Asyur mutuku taleamuk ninye deiyoknye, Raja Tilgat-Pilneser birye, Yehuda tam yanuka, Ahas ap, elce taleamuk nang ap ati, olyanamukce, ikin weik ning, sik nong deice delilamukba, amutuku nang nirya ara, ikin asa ulamik.

²¹ Allah arye, winibuka wenebuka deiyok ara, talye ati kume. Deiyok ara ani. Ahas birye, Allah el si eren aik pum tam delilamik dekna weik ning nirya ara, alubuka ubula doprobuk. Tonda, amutuku noutam ulamik deiyok-deiyok nang, sik aik nirya ap, amutuku ninye deiyoknye Raja ulamuk aik ap, anyaik pum tam uamuka teleb ning ap, alubuka ubula doprobuk. Doloamukce, ‘Aning dobuka, Asyur mutuku ninye deiyoknye Raja biti, arepnyopura, elce na mal olan nang ap, olan talak ara, elce milipnamnilʼ tenen, dengna weik ning arelamuk. Arelamuk bukni, Asyur mutuku taleamuknye birye, Ahas biti yanuka kum melilamuk. Tonda, Allah Yahweh arye, Yehuda mutuku noutam ulamik nang nirya, sik wenena ati, pia kanye imun weik ning arelamukba, amutuku ulamik nang nirya ara, pia ikin kanye bobuka ulamik.

Ahas birye, malye weik ulamuk ning ati, tabakuka sekik yupu

²² Atalak ara, pia kanye imun ubuka ati, Ahas bira, ila tamubuka, talye ning si erelamukce, Allah el dam malye weik kililamuk. Raja Ahas, elcuk, ‘Allah arye nyalul yupu nirya ara, pia kum kekenamne,’ tenelamukce, ton ap tabakuka, malye weik winin ninguk winilamuk.

²³ Elce malye weik winilamuk ning ara, ani. Ahas el tenebuka ara, ‘Siria mutuku noutam bukni, pia mambul weik asik, el si ara, Damsyik, amutuku unyak nang arye, sik si erenyak isa mikip deice arye, malye kipnika ati, narye aisa ati, domba basam ato ning obuka arepnirye, el si erepnya deice arye, sik anang meliplyeba, mal olan ning atouk, na babye aning winipnyeba, melipnamnile,’ tenebuk. Utenebuk bukni, dipkoprob ning ara, Siria mutuku nang, sik si erelamik ninguk, Ahas birye, si erebuka deice arye, el ap, Yehuda mutuku noutam ulamik ninye nirya ap, tonda Israel tam ulamik ninye nirya ap, Allah arye kanye imun weik ning arelamukba, doprobikce, ikin asa ulamik.

²⁴ Aning winibukopura, Allah el si eren aik pum noutam uamuk pil don ning nirya dobuka, bai tam deibukce, colobuka sice buklobukce, anyaik ara, bublan tirikdongobuk. Ara, ‘Anyaik binuka, Allah si kum erenamabe,’ tenebukce, abublan tirikdongobuk. Winibukopura, Yerusalem mutuku noutam nirya ara, dana-dana tam balamik bisik dakalongonak ara, isa si erena ati arelyanganak, aning el si ara mesba ati, dobuka kintinibukce, domba ato ning obuka delilamuk.

²⁵ Aning dem kum bukni, tonda, Yehuda mutuku noutam weik asik dolamikak ap, mitik asik dolamikak nirya ara, yuk mutuku nang arye, si erelamik isa si erena ati, amutuku-amutuku deice tam ara, domba basam ato ning obuka, uku dongonak, el si ara mesba, bobinuka deipnin balamuk. Aning winibuk deice arye, el apu yapu nang arye, si erelamiknye Allah Yahweh arye, elti, yu ubukba, derebuk.

²⁶ Ahas birye, ninye deiyok kibuka taleamuk ning ap, el pil dolamuk ning ap nirya ara, deiyok kouamukak arye dipdongobuka, sirya dakuk ning nirya ara, Yehuda mutuku ap, Israel mutuku ap, anoutam ninye deiyok kibuka talilamik nang, sik pil dolamik ning ati, seklamik buku noutamuk, akunum sekuka deibik. Abuku el si ara, ‘Sejarah Raja-Raja Yehuda dan Israelʼ nyanyake.

²⁷ Raja Ahas akunum dibukopura, el nong bobuka, Yerusalem mutuku uk binuka weibik. Bukni, elda ninye deiyok nang, dipneba weilamikak ara, kum weibik. Yuk sukum weibik. Ahas dibukopura, el pununa ati, el mi Hizkia birye, Raja ninye deiyoknye kebuka, Yehuda tam nang ati taleamuk.