2 Tawarikh 27 - Eipomek

Yotam birye, Yehuda mutuku taleamuka ati, ninye deiyoknye Raja kebuka ati, sekik yupu

¹ Yotam bira, el keting tamun yupa ara, dua puluh lima (25) tahun akunum kibuk talak arye, deiyok kibuka, ninye deiyoknye kibukce, Yehuda mutuku taleamuk. Elda, weik asik Yerusalem mutuku noutam ulamukce, Yudea mutuku taleamuka ani, keting tamun ara, enam belas (16) tahun deice arye, amutuku taleamukce, ulamuk. El lin koproba Yerusa bira, ninye si Zadok, elce deibuk kilmu, el si Yerusa ulamuk.

² Yotam birye, el li koproba, Raja Uzia bira, Allah Yahweh arye, “Aning ara wininamlame, aning ara pia kum wininamlame,” nyapdeiamuk ning ati, talibuka ulamuk touk, Yotam babye aninguk talebuka pil dolamukce, teleb ulamuk. Allah el kanye ara, ‘Aning ara telebe,’ tenelamlum ninguk, Yotam birye aninguk talebuka winilamuk. Bukni, Raja Uzia birye, Allah Yahweh, el si eren aik pum tam talye lukdanuka wekuk touk, Yotam birye, aning atouk pia kum ulamuk. Elda teleb winilamuk bukni, elce taleamukak, amutuku noutam ulamik nang arye, malye un ning tuba talibuka ulamik.

³ Yotam elce, Yerusalem weik asik wekelban ati bisik bublan tam, eitam, deice tam ning ara, lipsisikuka dobuka, teleb kipdeibuk. Tonda, Yerusalem mutuku asik domikce noutam arye, mitik mutuku kon deice, Ofel mutuku tam ati, keil poka lipsisikuka, domikce, kintinip deibik.

⁴ Tonda Yotam birye, Yehuda mutuku noutam bukni, mutuku kon weik uamukak ara, ninye una ati asik ara, weik domuk. Atouk, ‘Ninye olyasicakʼ tenen, kalikna ati aik aruma mikip weik ning ap, tonda ‘Olyanamsiak nang yaceura, yukak arye eiptibyeʼ tenen, weik cang keil aik ap, amutuku bai tam bukni, yo palpal uamuk noutam ton, weik dobuka kintinibuk.

⁵ Yotam birye, Amon mutuku taleamuk ninye deiyoknye ap, el yin talin nang ap, sik nirya ati, ‘Opnamabʼ tenen, olbiyuk. Winibukopura, sik Amon mutuku ulamik nang nirya ati, malye kibukba, sikce el arena ap, si erena ap ati, “Pajak yo bok bulubuka, na dam boyanuka arepnamnulume,” nyabuka, pia mikip arye nyabukba, sikce aning arelyangalamik. Elce, “Pajak yo bok arepnamnulume,” nyapdeibuk keting tamun arye, deiyok koubuka, arelyangalamikce, tuba keting tamun winilye ton nirya ara, batakna kumce, adiparyuk bobinuka arelyangalamik. Sik Amon mutuku nang arye, elti, arelamik ning ara, ani. Ara, dekna weik ning, el si perak, el ikin ara, yupa weik, tiga ribu empat ratus (3.400) kilogram ap, roti kwaning deiyok ning, el si gandum, el yala bitinye ulula atouk, yuk-yuk bukni, seribu kilo (1.000 kg) tonap elti, arelyangalamik.

⁶ Yotam elcuk amutuku noutam nirya ara, mikip aryuk taleamuk. Ara, batakna pia kumce, el li koproba, Allah Yahweh arye, nyapdeiamuk ninguk pia moubuka taleamuka deice arye, Allah arye elti, mikip kipdeibukba, elce amutuku mikip arye talebuka ulamuk.

⁷ Ura, Yotam el taleamuk talak mambul pil dolamuk ning, yuk-yuk ning nirya ara, mal olbalamuk ning ap, ton yuk pil dolamuk ning ap nirya ara, Israel mutuku ap, Yehuda mutuku ap, ninye deiyok nang Raja kibuka, taleamikce ulamik nang, sik winilamik ning nirya sekuka delilamik buku, el si ara, ‘Sejarah Raja-Raja,’ nyalamik buku noutamuk, sekuka deibik.

⁸ Yotam el keting tamun dua puluh lima (25) tahun kiamuk talak ara, ninye deiyoknye Raja kina ati, deiyok kiamukce, amutuku taleamuk. Winibukce, Yerusalem mutuku weik asik noutam ulamukce, amutuku talebuka, Raja ulamuk keting tamun nirya ara, enam belas (16) tahun deice arye mamuk.

⁹ Aminyan sirya talak ara, Yotam bira el li yapu diplamik touk, el babye dibuk. Winibukopura, Raja Daud birye, minop talak taleamuk mutuku uk binuka, el nong weibik. Yotam dibukopura, el mi Ahas birye, el apu yapu pununa ati, ninye deiyoknye Raja kibuk.