2 Tawarikh 26 - Eipomek

Uzia birye, Yehuda mutuku talin ati, Raja kibuk yupu

¹ Amazia akunum dibukura, sik Yehuda tam ulamik nang nirya arye, Amazia el mi Uzia biti, ‘El li koproba punuplirye, nun Raja unamsilʼ tenen, wibuka erepdeibik. Erepdeibik talak ara, Uzia el keting tamun enam belas (16) tahun dem kibuk.

² Uzia bira, elce weik asik si, Elot mutuku nyalamik mutuku ara, yuk nang arye amutuku akunum ulubuka deiplomik bukni, elce, amutuku nirya lipsisikuka dolamukak arye, tonap tuba teleb kibuka dopdeibuk. Apil dolamuk ning ara, el li koproba Amazia akunum dibukba, el apu yapu weilamikak kunum deibikce, aminyan talak aryuk, apil dolamuk.

³ Uzia erepdeibik talak ara, el keting tamun, enambelas (16) tahun dem ubuk. Elda weik asik Yerusalem mutuku taleamukce, anoutamuk ulamuka ani, keting tamun yupa ara, limapuluh dua (52) tahun ulamukce, Yehuda tam taleamuk. Tonda, el lin bira, Yekholya, Yerusalem mutuku kil ulamuk.

⁴ Ura, el li koproba Amazia birye dipkoprob uk winilamuk atonun, Uzia babye, elce amutuku talebuka ulamuk talak nirya ara, pil teleb kibuka dolamuk ning ati, Allah el kanye teleb ulamuk.

⁵ Tonda, Allah el yupu laka nyan deiyoknye, nabi Zakaria birye, Uzia biti, Allah tam pil dona ati, “Aning ara malye ning, aning ara teleb ning. Allah arye anti nyapkilye yupu ara ani,” nyabuka, yupu lipsisilinanye ulamuk. Raja Uzia bira, el kam tuba ulamuk talak, Allah arye nyapdeiamuk yupu moubuka taleamukce, ‘Allah Yahweh arye, yata yupu nyapnamanil do?’ tenen, Allah nyalamuk yupu moubuka kekelamukce, teleb kibuka ulamuk. Winibuka ulamuk ati, aning atouk ulamuk talak noutam nirya ara, Allah arye el ap, el winilamuk ning ap ati, pia teleb kibuka delilamuk.

⁶ Uzia birye, Pilistin yala nang mutuku binuka obuka kum danaibuk talak ara, sik Pilistin nang arye weik asik dolamikce, kat keil arye cang weik poka dobuka ulamik mutuku ara, malye kibikce, amutuku-amutuku nirya antanap dongobuka domik keil poka nirya, ulubuka batakuk. Ara, Kat mutuku weik asik ap, Yabne mutuku weik asik ap, Asdod mutuku weik asik dam, ap nirya ara, dakuka batakuk. Akunum uluplobikura, elce Asdod mutuku tam ara, sik asik dam, winiryuk weik asik dobukce, cang keil poka ton dobuka antapdongobuk. Tonda aning atouk, Pilistin yala nang ulamik mutuku yuk tam babye, asik dobukce, cang keil poka dobuka antapdongobuk.

⁷ Allah arye elti, melibukba, sik Pilistin yala nang ap, Arab yala nang bukni, Meunim mutuku ulamik nang ap, Gur-Bahal mutuku ulamik nang ap, aninye nirya arye, elti, malye kibuka, opmanto kum anya arye, elce amutuku nang nirya, binuka obuka malye kibuk.

⁸ Sik Amon mutuku ulamik nang talilamik teleb bona nirya ara, Raja Uzia el pajak arena ati, dekna teleb ning bobuka, el dam arelyangalamik. Elda mikip weik arye taleamukba, sik dana-dana tam ulamik nang nirya arye, “Se, el anye bira pia mambule,” nyabuka, el siuk erelamik ati, pera Mesir mutuku ulamik nang babye, el si bikamik.

⁹ Tonda, Raja Uzia birye, ‘Nun mal olan nang arye, pera karin mutuku arye yanuka opsicakʼ tenen ati, ‘Perato yanganmaca ninye babye, elinamapʼ tenen, Yerusalem mutuku mikip kilina ati ara, amutuku asik dobuka ulamik sukum, sirik tam botodeiamik bublan winilye dopdeibuk. Ton ning ara, el si ‘Pintu Gerbang Sudutʼ ap, keil poka dobuka antalongolamikak ap, tonda, bitinye ning ara, keting komulban tam, anyaik batakuka, bai tam noutam, dana tam dana tam bisik bana ati, boteiamik bublan ton dopdeibuk. Abublan el si, ‘Pintu Gerbang Lembahʼ, cang weik aik ton dobuk. Winilye ning ara, acang keil poka deice deiamika, kwalipdongamik tam, asukum arye ninye kalekina ati cang weikto aik doamike. Apoka deice, sik mal olan nang kalikna ati, dobuk keil aik ara, Yerusalem mutuku cang weik keil poka antanap dongobuka domikak deice tam, cang keil aik winilye dopdeibuk.

¹⁰ Aning atouk, tonda Uzia elcuk, ninye kum ulamik sukum bukni, weik mutuku bai tam noutam arye, ‘Nun mal olan nang eipnamapʼ tenen, keil arye ninye kalikna aik ton dopdeiamuk. Tonda, weik mutuku dup mek binman kum mutuku bukni, ‘Ninye arye mek ton dipnamakʼ tenen, ‘Mok cebuka mek balirye, deipnamleʼ tenen, tuku lukuka, mek delinak sumur kintinip deiamuk. Mek ati tuku lukik deiyok ara, amutuku tuku noutam ara, el pil melin nang arye, domba basam ap, sapi basam ap, pia weik weilamik ati, Yudea mutuku bukni, keting komulban tam, mitik mutuku kon tam ap, lu mutuku ap nirya ara, ‘Mek deipnamleʼ tenen ati, tuku lukamik. Tonda, Raja Uzia bira, tuku telebak ara, sukun tuku ton wa win nang weik wipdeibukba, el anggur wa ap, elti, koulamik ning yala-yala nirya ara, anang arye, el melina ati, wa weilamik. Uzia bira, wa win ning ati, pia kanye delilamuk, ‘Aning ara, telebe,’ tenelamukce, ulamuknye atia.

¹¹ Tonda, Uzia el yin talin nang ara, pia weik kintinyamik ati, olana atibuk tuba kintinibuka ulamik. Sikda ninye weik bukni, yupa tonok-tonok kibuka ulamikba, Raja el melibuka si sekna nang, bitinye arye, sik yin talin nang nirya ati, si seklamdik. Apil talebuka dolamdik nang, sik si ara, Yeiel ap, Maaseya ap ulamdik. Yeiel bira, yin talin nang ati, ninye si sekna deiyoknye ulamuk. Maaseya bira, yin talin nang, sik deice tam deiyoknye ulamuk. Sik abitinye nang ara, sik talebuka una deiyoknye, el si ara Ananya ulamuk. Sik winilye nang ara, Raja Uzia el amu tam pil don nang ulamik.

^12-13 Yin talin nang, sik nirya yupa ara, pia weik, tiga ratus tujuh ribu, lima ratus (307.500) nang ulamik. Sik ayin talin nang, sik deice tam ara, dua ribu enam ratus (2.600) nang arye, deiyok kibuka talibuka ulamik. Sik ayin nang ati, yupu nyan deiyok yuk-yuk kiamik nang, sik yala-yala yuk-yuk ulamik touk ara, mikip arye ninye olbinmanto nang ulamik. Tonda, Raja Uzia el mal olan nang ona ati melin nang kintinibuka, deibukba ulamik.

¹⁴ Raja Uzia birye, ‘Ayin talin nang nirya ati, kintinibuka mikip kipdeipnamneʼ tenen, sik aren ati ara, ninye on ning yala yuk-yuk ning nirya kintinibuka deibuk. Akintinibuk ning ara, ani. Ara, ninye on tombak ap, sik kisok kaluna ati, kat ning besi arye memebik. Tonda, kisok kalun ning topi besi ap, ‘Mal opsicakʼ tenen, kat ning besi arye, kat baju kiniklamak ning ap, yin ap, mal ap, keil duk deibuka don ning, el si umban ap, aning nirya dobuka, ayin nang ati arebuk.

¹⁵ Yerusalem mutuku weik asik domik noutam ara, elce amutuku taleamuk talak arye, yin bona kel weik nang arye, ‘Mal marapnamikʼ tenen lelildan ning ap, tonda ‘Keil arye donokuka copnamikʼ tenen, lelildan ning, dobuka cang weik aik domikce, cang poka keil arye, dikuka domika sirik tamak dobuka deibik. Allah arye Raja Uzia biti, pia weik melibukba, el mikip pia weik ubuka ati, sik dana-dana tam ulamik nang nirya arye, ‘Se, elda dipkoprob mikip weiknye ululeʼ tenen, bikamikce, “Elda mambul weiknye,” nyabuka, elti, si erelamik.

Uzia mikip weik kibuk ati, talima erebukce, maknya kintinebuka kwalibuka ati, wenebuk yupu

¹⁶ Uzia birye, amutuku noutam mikip weik tonun ton ap tabakdeibukce, amutuku taleamuk ati, el talima erebukce, maknya kintinildalamuk deice arye, el winilamuk ning nirya ara, pia malye kipdayuk. Elce Allah Yahweh arye, “Wininamlume, aning ara, pia kum wininamlume,” nyapdeiamuk yupu atouk talebuka kum ulamuk. Ati, Raja Uziah bira, imamnye kum ulamuk bukni, el kanye aryuk, Allah Yahweh si eren aik pum tam, Teleb Lek Aik wekuka, Allah el morona ati, kinggin tong teleb len ning uku dongona ati, uku dalamik sukum binuka, elcuk uku dongobuk. Winibuka deice arye, malye weik ubuk.

¹⁷ Bukni, imam Asarya ap, ton imam nang yupa pia weik, delapan puluh (80) imam ap, mikip arye malye kibuka binuka, “Awinipmalam ning ara, pia malye weik winipmalam ati, tuba kum winiptume,” nyabuka, ‘El ti wenepnuyapʼ tenen, uapnamek nang ap melibuka, sik neika anyaik wekel biyik.

¹⁸ Raja Uziah birye Allah si eren aik wekuka, kinggin tong teleb ning, uku danak binuka tekuk talak ara, sik anang arye binuka nyabik. “Nai, Rajao, ance Allah arena ati, kinggin tong teleb ning ara, anyaik pum tam uku kum dongoptume. Deiyok ara, anda imamnye kum ulyama atia. Nun ka imam Harun birye deiamukba, dadeipdanin yangace nang tonok, ‘Apil donamakʼ tenen, akunum wipdeiamik imam nang, ‘Apil sikcuk talebuka donamake. Yuk talye nang ton pia kum doptinge,’ nyapdeiamuka ati, sik imam nang aryuk, apil dopnamtinge. Ati ara, Raja anda, Teleb Lek Aik noutam aryuk batakuka, bai tam binulyame! Nun ni koproba Allah Yahweh arye nyapdeiamsuk touk, kum winipmalama ati, elce, ‘Telebe,’ kum tenepnamakile,” nyabik.

¹⁹ Sikce ayupu nyabik talak aryuk, Uzia bira Allah si eren aik, kinggin tong teleb ning uku dan ning bobuka talipmukce, aning uku dalamik kata, mesba deiamik ning dam tikmuk. Winipmukce, kinggin tong teleb lena ati uku dan ning, el taruk arye talebuka bopmuk. Sik imam nang arye, ayupu nyabik ning ara, elce sikti, yu ubuk ati wabuk. Atalak aryuk, Allah arye arebukba, talye arena arye, Raja Uzia el asok, bola deice, ilil weik ning, el si kusta uk weik dibuk.

²⁰ Kusta suse telibuk ati, imam Asarya ap, sik yuk imam nang ap, sikce el awinibuk ning ati eibikce, weik min lopman kum suse, el si ara kusta, el asok deice ubuk ati, sik anang nirya arye Uzia biti, “Se, aning wamlye nang ara, anyaik pum tam malye kilinyaka ati, anyaik ara pia kum wektinge. Ati, anda Allah si eren aik pum tam arye minpola bai tam bilyame!” nyabik. Nyabikura, el adiparyuk bai tam biyuk. Weik min lopman kum suse, ilil weik suse el asok deice dilul ning deiyok ara, Allah Yahweh arye el wenena ati, el nong deice ikin ning deibuk. Ara, el bikna atia. Ati ara, el babye, ‘Se anyaik pum tam kum unamne,’ tenebukce, minpola anyaik batakuka bai biyuk.

²¹ Raja Uzia bira kusta suse dilamuk ning ara, kwetepmanto kum uamuk arye, tuba uk dilamukba, daulamuka ani, aminyan dibuk. Elda bola deice kusta suse talebuk ning ara, sik yuk nang arye, ‘Kume aning ara, nun deice dakdongopsilyakʼ tenen, yuk aik dopdeiamikak, el yuk ulamuk. Atalak noutam nirya ara, “Elda Allah Yahweh, si eren aik noutam yangana pia kum. Allah arye, ‘Aning ara pia meme, na si eren aik pum tam ara, malye ning kum wektue,’ nyapsuka ati, aning pia kum wininamle,” nyabikura, elda, anyaik dam ton kum yangalamuk. Tonda, el talebuka pil dolamuk ning nirya ara, batakuk. Winibuk talak ara, Uzia el mi Yotam birye, el li koproba pununa ati, el amu tam bulamuk bukni, minop talak Raja el weik aik ulamukak ara, taleamukce, amutuku nang ati, deiyok kibuka taleamukce, yupu nyalamuk.

²² Uzia birye, amutuku talina ati, ninye deiyoknye kiamukarye, yuk pil yala-yala nirya talebuka dolamuk ning ara, Amos el mi nabi Yesaya, el seklamuk buku deice arye akunum sekuka deiamukba aulule.

²³ Aminyan talak, Raja Uzia akunum dibukura, minop talak noutam arye, Raja-Raja weilamik tukwakuk bukni, mitik yuk karenak binuka weibik. Ara, el nong deice ara, barye suse, kusta, dilamukba, daulamuka ani, dibuk ati winibik. Winibikopura, el mi Yotam birye, el punubuka, ninye deiyoknye kipmukce, amutuku nirya taleamuk.