2 Tawarikh 25 - Eipomek

Amazia birye Raja kibuka, Yehuda mutuku taleamuk ati, sekik yupu

¹ Amazia el keting tamun dua puluh lima (25) tahun kibuk talak ara, Raja kibukce, Yudea tam nang taleamuk. Atalak ara, Yerusalem mutuku weik asik noutam talebuka ulamuk. Ninye deiyoknye Raja kibuka taleamuk keting tamun ara, dua puluh sembilan (29) tahun arye, Yerusalem mutuku weik asik noutam ulamuk. El lin si ara Yoadan, elda Yerusalem mutuku kil ulamuk.

² Amazia birye, Yudea tam talebuka pil dolamuk ning ara, Allah Yahweh arye, ‘Aning ara telebe,’ tenyamukce, el kanye teleb tenelamuk ning ulamuk. Bukni, Amazia birye, el kanye talima noutam arye, aning nirya teleb piluk kum dolamuk. Ton talak wilibuka teleb pil dolamuk, bukni ton talak ara, wilibuka malye ning ton, pil dolamuk.

³ Ninye deiyoknye kibuka, bukukura, el mikip weik ubukce, Amazia el amu tam pil dolamik deiyok nang arye, el li koproba ati omik nang nirya ara, ton kum batakuk, anang nirya wibuka oplobuk.

⁴ Bukni, el amu tam pil dolamikak, oplomuk deiyok nang, sik mapu ara, kum obuk. Ara, Allah arye Musa dam nyabukba, buku noutam sekeiamuk ning ara, ani. “Sik ni yapu arye malye winibikce ning ati, sik mapu kum onamlume. Aning atouk ton, sik mapu arye, malye winibikce ning ati, sik ni yapu kum onamlume. Yatanye do nirya, el babye malye winipmalinye uk, elcuk malye ning winipmalinye ati, wenebuka onamlume,” nyapdeiamuk touk, Amazia birye winibuk.

Edom mutuku obuka, sirya dakik yupu

⁵ Raja Amazia birye, Yehuda yala nang ap, Benyamin yala nang ap, sik nirya bulupdeibuk. Bulupdeibukura, sikti, nyabuk. “Anggun yala yuk-yuk aumunye touk, nuksibirye, yupa yuk-yuk kipdeipnusine. Na amu tam deiyok nang arye, yupu nyapsikirye, talinamsiak ati, ton bulupmunyopura, ninye yupa weik, seratus (100) ati, deiyok kibik nang arye, talinamsiake. Tonda, seribu (1.000) nang ati deiyok kibice nang arye, anggun kan-kan bukni, yuk yupa ton talinamsiake. Ati, yuk-yuk mamukuka tiklulume,” nyabukba, anyabuk touk winibik. Winibikopura, Amazia birye, ‘Yin talepmanto nang ara, yata barye unyak do?’ tenen, mal olanak bikcak arye, ninye opmanto nang, sik keting tamun ara, dua puluh (20) tahun eitam akunum kiamuk nanguk nukdobukce, bikuk. Ara, sik anang nirya yupa ara, tiga ratus ribu (300.000) nang nukuk. ‘Anang ara, ninye on tombak ap, mal opsicakʼ tenen, nong lelin ning, el si ara perisai bobuka, yuk mutuku nang binuka, opmanto nanguk wipdeibuk.

⁶ Sikuk kum bukni, el ulamukak arye dabu tam, arah selatan arye, sik Israel tam mutuku ulamik yin talin nang ati, “Ninye olana ati, sikda na dam yanuka melipnamnulume,” nyabuka morobukba, yayik nang yupa ara, seratus ribu (100.000) nang ton yukubukba yayik. Yukubukak yayikura, sik anang nirya duknubuka dengna arena ati, dengna teleb ning, perak, el ikin tiga ribu empat ratus (3.400) kilo dobuka, sik anang dekna ati arebuk.

⁷ Winibuka arebuk bukni, Allah arye yupu nyapnyopura, laka nyana deiyoknye, tonok nabi ton, Raja Amazia dam yayukce nyabuk. “Se na nio, Israel tam mutuku yin talin nang ati, ‘Sikce, na melipnuniyakʼ tenen, dolona kume. Ara, utam dabu tam mutuku unyak Efraim yala nang nirya ara, Allah arye anang ati, ‘Na like,’ tenelul ati, anang ati kum melipnamle.”

⁸ “Ati ara, na deiyoknye, ance sik Efraim yala nang dopropminye ura, an tam yin nang ap, sik ap, ansinibuka mikip deice arye, ilil una kumce, pin-pin deibuka, ‘Yuk mutuku nang olbinuyap,’ tenemince, ninye opmanto nang weik aunmace babye, Allah arye melipsilya deice arye, sik yuk mutuku nang ati, obuka sirya dakanamlume. Bukni, ance, ‘Se, anang nirya obuka sirya kum daktibye,’ tenepmince, ilil upkilyeura, Allah arye melina kumce, bataksilye ati, an mal olan nang, sik yuk mutuku nang arye, obuka sirya daknamsiake. Ara, talye ati kum nyapkine. Deiyok ara, Allah el mikip weik aryuk melipsiliba, nun mal olan nang ati, obuka sirya daktibye. Allah el mikip weik ulula deice arye, ‘Amutuku nang arye, yuk mutuku nang ati, obuka sirya daknamake,’ teneplyopura, aninguk wininamake. Aning kum opura, Allah arye, ‘Atam nang arye, sik ortam nang ati, obuka sirya daknamake,’ teneplyopura, aninguk wininamake. Aning nirya ara, Allah arye tenelye touk winilule,” Allah el yupu lak nyananye birye nyabuk.

⁹ Allah yupu laka nyana deiyoknye, nabi arye nyabukura, Raja Amazia birye nyabuk. “Se, aning kekepmakin bukni, na dekna weik ning, perak weik tonun boyanuka, sik Efraim yala yin nang, Israel mutuku unyak nang ati, akunum arepse ning ara, wini talak yata winiptinye do?” nyabuka, Amazia birye asipdeyuk. Asipdeyukbuk, anabi arye tamubuka nyabuk. “Aning ara, tenena kume. Ance arepmalam ning ara, mitik bukni, Allah Yahweh arye arepnamkil ning ara, weik tonun tabakuka arepnamkutue!” nyabuk.

¹⁰ Nyabukura, Raja Amazia birye, sik Israel mutuku tam ulamik yin talin nang, ‘Sikce na melipnamaniakʼ tenen, dekmok nang ara, “Na kayapu, nun ap neika, mal kum pibinamap ati, tamubuka anggun mutuku bilulume,” nyabuk. Nyabukura, sik tamubuka biyik bukni, sik anang arye, Yudea mutuku ulamik nang ati, yu weik ubukba, yu asa sik mutuku tamubuka biyik.

¹¹ Amazia birye, ‘Aning ara winipnuneʼ tenen, mikip kanye bobukce, el yin nang nirya bobuka, mutuku si, Asing mutuku lyuak bobiyuk. Amutuku biyikura, sik mal olan nang ap olamika ani, Edom tam noutam bukni, Seir mutuku arye yanmek yin talin nang ara, yupa pia weik sepuluh ribu (10.000) nang obik.

¹² Atalak aryuk, ton yuk takubarye ribu (10.000) nang, kam kipman tomobuka, tapu koubik. Sik anang ara, mutuku keil kon deice bobuka biyikce, amutuku deice arye, kot dopkwetebikba, sakuka obukba, sik anang nirya dibik.

¹³ Ura, anoutam ara, Israel tam arye yayik yin nang ara, ‘Nun ap melibibyeba, ninye olbinamaba,’ tenepmekbuk, Amazia birye, “Kume, anggunda tamubuka anggun mutuku uk binamlume,” nyabukba, binmek nanguk, tuba tamubuka yanyikce, Yehuda tam noutam bukni, mutuku si, Samaria mutuku weik asik domikak dipdongobuka, yuk tam Bet-Haron mutuku mitik aik ap, wililonak aik dolamik dam yanuka, ninye weik obik. Yayikce, sik amutuku ulamik nang yupa ara, tiga ribu (3.000) nang yanuka obikce, sik bona nirya, pia weik dalubuka doprobik.

¹⁴ Edom nang akunum obikopura, Edom mutuku ulamik nang, sikce puturubuka deiamikce, isa si eren ati puturubuka deiamik ning, el si ara patung-patung, Amazia birye, aning dobuka boyayukce, Yehuda mutuku yanuka deibuk. Boyanuka dibikce, aning ati, ‘Na ni koproba ani,’ tenebukce, atalye ning si eren ati, kutam tuku deice dinikdongobukce, kam ning obuka, boyanuka uku dongobukce, aisa si deice arelamukce, ‘Melipnamniyakʼ tenen, morolamuk.

¹⁵ Aning nirya awinilamuka ati ara, Allah yu weik ubuk. Ati, Allah arye, el yupu laka nyana deiyoknye, nabi ton dopdeibukba, Amazia dam yayukce nyabuk. “Se, Raja Amazia, anda yuk mutuku nang arye, talye ning bukni, isa si erenyak ning ati, an babye aisa siuk erenmalame. Ara, yata deiyok ati, awininmalam do? Moubuka tenipdelyame. Ance sik Edom mutuku nang ati, obuka sirya daklumce, aninye ap, sik mutuku ap, taliplum ning ara, aisa ara, el mikip pia kum ati, elce sik Edom mutuku nang ati kum lyepdomuke atia. Ati, anda yata wiripmalam do?” nyabuka, asipdeyuk.

¹⁶ Nyabuka asipdeyukce, yupu tuba nyamuk talak noutam ara, Raja Amazia birye, adiparyuk anabi biti, “Se, ayupu nyaplam touk, tonap nyana meme! Kumopura, nunce anti opnukiyabe! Tonda nunce anti, ‘Raja yupu lipsisikilina deiyoknye unamleʼ tenen, anti kum wibuka deipkubu,” nyabukba, anabinye adiparyuk yupu weik tonun ton kum nyabuk. Bukni, min talak ara, anabi birye nyabuk, “Wini talak anda na akunum kel kipkine. Allah arye anti, ‘Kume anye bira, isa si erenmala ara, pia malye un ning akunum winipmala ati, narye el obuka, kum kibuka deipnamane,’ akunum tenepmale. Tonda, Allah arye na bobuka, an dam dopdeipmanilba, an dam yanuka nyanmakin yupu nirya, ance pia kum kekepmanilamce, batakmanila ati, ‘Allah arye anti dipkoprob oplopnamkilʼ tenen, akunum bikmakine,” nyabuk. Nyabuk bukni, Amazia bira, mandipna kanye bubukce, ayupu babye kum kekebuk.

Israel tam mutuku ulamik nang arye, sik Yehuda tam ulamik nang obika ati, sekik yupu

¹⁷ Yehuda yala nang, sik deiyoknye Raja Amazia ap, Raja elti, yupu lipsisiklamik deiyok nang ap, sik nirya arye, ‘Israel tam unyak nang opnamapʼ tenen, yupu tabik. Yupu tabikopura, Raja Amazia birye, ‘Raja Israel ati tenepce tilila yupu nyapnunʼ tenen, elce laka nyalban nang ton dopdeibukba, Israel mutuku ninye deiyoknye Raja Yoas dam biyik. Ara, Yehu birye deiamuknye, Raja Yoas dam biyikce nyabik. “Amazia birye, anti, ‘Anda na dam yaminyeura, nun bitinye neika buknimirye, yupu talipnaname,’ nyabuka, ayupu nyapdeipkile,” nyabik.

¹⁸ Nyabuka, tenepce arye, tilila yupu nyabik bukni, Raja Yoas birye tamubuka, Amazia biti, adomon yupu deice arye nyapdeibuk. “Tonok sum ton, Libanon mutuku noutam uamuk tatce ning arye, Libanon mutuku noutam tikamuk keipyal yo ati, yupu dopdeibuk. Ara, “Se, ance deiplum kilmu ara, dobuka arepniminyeba, narye deipse mi arye, akil dobuka, neika unamdak,” nyabuka morobuk. Bukni, atatca ning uamukak ara, aminyan talak bai tam talye balamuk kam ning arye, atatca ning yaniplobuka biyuke.

¹⁹ Aning atouk ton, Amazia an ning ara, ‘E, nara Edom mutuku nang ara, akunum obuka batakmana ati, na mikip weiknye unune,’ tenepdanmalamce, maknya kintinipdanmalamce, mandipna kanye bobuka nyapmanilame. Bukni, teleb ning ara, an adiparyuk yupu tunim abuka, an aik damuk unamalyame. Yata deiyok ati an nong ap, ance taliplum mutuku nang ap, ‘Nun deice ikin ning yasiliba, dopropnamapʼ tenen, bisik enmalum do? Winipminyeura, an babye, ance taliminye nang nirya babye, ‘Yuk mutuku nang arye, obuka sirya daksitingʼ tenen, patanmakilba, ayupu nyapmalam do?” nyabuk.

²⁰ Israel tam nang taleamuknye, Raja Yoas birye, nyabuk bukni, Yehuda mutuku nang talebuka ulamuknye, Raja Amazia birye, ayupu ara, pia kum kekebuk. Ayupu kum kekebukura, talye ati kume. Deiyok ara, Allah el kanye babye, ‘Raja Amazia bira, Edom mutuku nang obukce, Edom mutuku nang arye memebuka deiamikce, isa si erelamik ning, patung-patung ara, el mutuku Yehuda tam tamubuka boyanamukce, el ap, el talilamuk nang ap, atalye ning si erenyaka ati, ‘Sik Israel tam nang arye, Yehuda tam nang daopnamake,’ tenebuka ati, Allah arye Raja Amazia biti, moubuka tenina kumce, pia malye tenen ning arebuk deice arye, teleb yupu ton kum kekebuk.

²¹ Ati ara, Allah arye lo arebukba, Raja Yoas birye, sik Yudea tam nang ati olbiyuk. Ati ara, Raja Yoas ap, el yin talin nang ap arye, Raja Amazia ap, el yin talin nang ap ati, ‘Yudea tam noutam, mutuku si Bet-Semes mutuku arye, olbinuyapʼ tenen, biyik.

²² Israel tam yin talin nang arye, Yehuda mutuku yin nang nirya ati, obuka kum kipdeibikba, sik Yudea tam tuba kam unmik nang arye, ‘Nun nirya obuka, sirya daksicakʼ tenen, ilil ubuk ati, bai sakuka sik mutuku yuk-yuk tamubuka bindobik.

²³ Winibikura, Raja Yoas birye, Yudea tam taleamuknye, Raja Amazia tomobukce, Yerusalem mutuku tamubuka boyayuk. Ara, Amazia, el li koprop Yoas ulamuk. Tonda el apu koproba ara, Yoahas ulamuk. Israel tam taleamuknye, Raja Yoas birye, Amazia tomobukce, Yerusalem mutuku tamubuka bobiyuk talak ara, Yerusalem weik asik dana-dana tam, cang weik keil poka arye dobuka antanapdongamik ning ara, seratus delapan puluh (180) meter anyak dakuka bataklobuk. Akeil poka dona ati deiyok koubika ara, “Efraim yala nang, sik wekelban bublan ani,” nyabuka, botopdeiamikak arye dipdongobuka, dabinamuka ani, sirya tam ara, atam poka, otam poka dukdongamik ning, el si ara, “Sudut bublan,” nyalamikak, botopdeiamik sukum binuka batakuk.

²⁴ Tonda, Raja Yoas birye, ninye si Obet-Edom, elce dekna weik kat ning, emas ap, perak ap, Allah si eren aik noutam, ‘Naʼ tenen delilamik ning yala-yala nirya ap, deiamikak kalilamuk ning nirya, eibukura, dalubuka dorobukce, el mutuku, Samaria mutuku tamubuka bobiyuk. Tonda, Raja Amazia, el asik noutam deiamuk teleb bona nirya babye, dalubuka doprobuk. Winibukopura, Raja Yoas birye, amutuku nang ton, kam kipman nang ara, tomobuka deipmokce, wenemuka ani, tapu koudongobukce, anang bobuka, el mutuku Samaria mutuku tamubuka bobiyuk.

²⁵ Israel tam mutuku taleamuknye, Raja Yoas akunum dibukura, Yoas el li bira, Yoahas ulamuk. Raja Yoas dibukura, Yehuda mutuku Raja kibuka, atam taleamuknye, Amazia bira, kipna koplom deikin (15) deice arye, tuba kam ulamukce, Yudea tam taleamuk.

²⁶ Amazia birye, Yehuda mutuku taleamuk talak nirya ara, deiyok kibuka, pil dobuka ulamika ani, Raja kina ati, sirya dakuk talak ara, Yehuda mutuku talilamik Raja-Raja nang ap, Israel mutuku talilamik Raja-Raja nang ap arye, amutuku talilamik talak arye winilamik ning nirya ap, tonok mambul buku noutam sekuka deiamik. Abuku ara, Israel tam Raja-Raja ap, Yudea tam Raja-Raja ap, sikce winilamik ning sekuka delilamik buku noutamuk sekuka deibik.

²⁷ Yudea tam taleamuknye, Raja Amazia birye, Allah Yahweh si erelamuk ning nirya, batakuk talak arye dipdongobuka, otalak nirya ara, sik Yerusalem weik asik noutam ulamik nang arye, elti, “Anye bira nun opnamabe,” nyabuka, yupu sisilakmik. Ati Amazia birye, el mutuku arye batakuka, bai sakuka Lakis mutuku binuka unmok. Unmok bukni, el mal olan nang arye, aminyan dobolbanmeka ani, omutuku, Lakis mutuku noutam arye binuka obik.

²⁸ Oplopmekak, el nong ara, kuda basam balye deice arye deibuka, Yerusalem mutuku tamubuka boyayikce, Daud ulamuk mutuku noutam bukni, Raja-Raja nang dipneura, weilamikak, el babye yanuka weibik.