2 Tawarikh 24 - Eipomek

Yoas birye, Yehuda yala nang talin ati, Raja kibuka taleamukce, pil dobuk ning ati, nyabuk yupu

¹ Yoas el keting tamun tekbarye (7) tujuh tahun kibuk talak ara, Yehuda yala nang talin ati, erepdeiamikba, deiyok kibuka, Raja kibukce, amutuku noutam taleamuk. Yoas birye Raja kibuka, amutuku talebuka, Yerusalem weik asik noutam ulamuk keting tamun ara, empat puluh (40) tahun deice arye talebuka ulamuk. Yoas bira, Bersyeba mutuku kil, Zibya birye deiamuk.

² Imam Yoyada, kam tuba ulamuk talak ara, Raja Yoas birye, pil yala-yala nirya talebuka dolamuk ning ara, Allah arye, ‘Aning ara, teleb,’ tenelamuk touk, dipkoprob uk ulamuk ati, Allah Yahweh el kanye teleb ulilamuk.

³ Imam Yoyada birye, Raja Yoas dopnamuk kilapu ara, bitinye wipdeibukura, Yoas birye akilapu bitinye dobukce, sal mapu ap, kilmapu ap, deiamuk.

⁴ Akunum Raja kibukba, ouku weikto akunum mabukopura, Yoas birye, ‘Allah Yahweh, e; si eren aik malye kiyamik ning ara, tonap tamubuka, teleb kibuka dopnamne,’ tenebuk.

⁵ Tenebuka ati, Yoas birye imam-imam nang ap, Allah aik pum tam pil melibuka dolamik nang, Lewi yala nang ap ati, “Sikce, Yehuda nang aik dobuka unyak mutuku bimunyakarye, yo bok ton moropmunyeura, sik nirya arye bulubuka deibikceura, Allah Yahweh si eren aik, malye ubuk ning nirya ara, memebuka dopnamabe. Ati, Israel nang arye, aketing tamun, aketing tamun noutam nirya ara, yo bok bulubuka arelamice ning ara, bulubuka deipmunyeura, aning bobuka na dam boyanamlume. Ayo bok deice arye, Allah si eren aik dolamak ning nirya dekikcak arye, anyaik lipsisikuka donamabe. Ati, aning ara, minopce winipnamap ati, anggun pola apil doplulume. Aning ara, batakna meme,” Yoyada birye nyabuk. Nyabuk bukni, Lewi yala nang arye, apil min pola kum dolamik.

⁶ Lewi yala nang arye, nimalyap dolamik ati, Raja Yoas birye, imam nang, sik deiyoknye Yoyada biti, “Yalyame,” nyabukba, yayukura, asipdeyuk. “Allah Yahweh el pil donanye Musa birye, Allah si eren aik dona ap, lipsisikuka memena ap ati, amutuku unyak Israel nang nirya ati, ‘Pajak yo bok bulubuka deiplulume,’ nyapdeiamuk ning ara, amutuku nang arye tuba kum delinyak do? Yata deiyok ati, sik Lewi nang arye, ayo bok bobuka, na dam kum boyanganyak do? Wini talak ara, ance Lewi yala nang nyapminyeba, sikce Yehuda tam unyak nang ap, Yerusalem mutuku weik aik noutam unyak nang ap, sik dam bicak arye, apajak yo bok bobuka boyanamake. Ayo bok ara, talye ati kum bukni, Allah arye, ‘Aning wininamlume, aning ara kum wininamlume,’ nyapdeiamuk ning, weik pala keil deice sekuka arebukba, el si eren ati, tenda bol aik pum tam dongobuka deiamik ning lipsisikuka dona ati, arenamsiake.” Raja Yoas birye nyabuk.

⁷ Atalak ara, pia malye ulamuk kil, Atalye melilamik nang arye, Allah si eren aik ara, anang sik mikip deice arye, anyaik pak-pak donokuka wekelbiyik. Wekelbiyikce, Allah si eren ati kintinibuka deiamik ning, pia teleb ning weik tonun, ubula doprobikce, Bahal isa el si erena ati bobinamik.

⁸ Allah Yahweh el aik lipsisikuka don ning ap, yo bok ap, kum ubuk ati, aning patabukura, ninye deiyoknye Raja Yoas birye, el melin nang ati nyabukba, sikce yo bok moubuka delina ning, yo lakase arye marikna ton memebikce, Allah Yahweh si eren aik bisik bublan wekelyangalamik damak, kintinip deibik.

⁹ Yerusalem mutuku ulamik nang ap, Yehuda yala nang ap, sik nirya ati, yupu arebik ning ara ani. “Sik amutuku ulamik nang nirya ara, Allah Yahweh el aren ati, pajak yo bok bulubuka boyalulume. Ara, Israel nang weik pata mutuku noutam balamik talak ara, Allah el pil donanye, Musa birye, ‘Allah si eren aik dona ap, lipsisikuka memena ap ati, pajak yo bok kintinibuka boyaganamlume nyapdeiamukba winilamik touk, wini talak babye winipnamlume,” nyabuka lak nyalamik

¹⁰ Ayo bok deilin marikna memebuka deibik ning ara, amutuku ulamik nang ap, amutuku nang talebuka ulamik deiyok-deiyok nang ap, Raja Yoas birye nyabuk yupu, sik nirya kekebikce, kanye teleb ubuk. Ati amutuku ulamik ninye nirya ara, kanye deibuka Allah arena ati, pajak yo bok bobuka lildongon ning, ara kotak marikna bobuka deiamikakuk dongolyangalamikba, langdibuk.

¹¹ Asum-asum nirya ara, amutuku nang arye, yo bok dongolamikba, amarikna langdibukura, sik Lewi yala nang arye akotak bobuka, Raja Yoas el pil don nang arye dilina ati, sik dam bobalamik. Akunum bobinuka dipdenakarye, amarikna ara, yo bok weik wekamneura, Raja el mambul ning sekna deiyoknye ap, imam deiyoknye el amu tamnye ap, sikce ayo bok wekman ning nirya ara nuklamdik. Nuknarye, akotak ara, tamubuka min arye deiamikak delilyangalamik. Sik anang arye, tuba-tuba winilamika deice arye, yo bok ara, weik bulubuka delilamik.

¹² Bulupdeipneura, Raja ap, imam Yoyada ap, sikce ayo bok bobuka, Allah si eren aik malye uamuk ning lipsisikuka dona ati deiyok kiamik nang, sik deice deipdik. Deiprikura, Allah si eren aik dona ati, urasin teleb keil arye kintinina kel nang ap, yo cakne nang ap, yo arye aik dona kel nang ap, tonda kat ning besi ap, tembaka ap arye, aik lipsisikuka dona kel nang ati, arebik. Ara, sik pil dolamika dengna ati arepdik.

¹³ Adeice arye, Allah si eren aik malye uamuk ning ara, sik aik dona kel nang arye lipsisikuka dona deiyok kibuka, pil pia dobuka, teleb kibuka apil dolamik. Sik anang nirya arye moubuka dolamik deice arye, anyaik ara min arye domikak, mikip ubuka, kamo pia teleb winyamuk touk kibuka, tonap tuba tamubuka dobikak, teleb kibuk. Tonda, ‘Anyaik mikip weik ton upnamleʼ tenen, mikip kilin ning ton, tabakuka dobikak, teleb kibuk.

¹⁴ Apil akunum sirya dakikbuk, tuba abuk dekna weik ning emas ap, perak ap tuba sirya abuk ning ara, tamubuka boyayikce, Raja ap, imam Yoyada ap, sik tibuk tamubuka arebik. Anyaribik emas ap, perak ap bobuka aning-aning dona kel nang ati arebikba, aning deice arye Allah si eren aik pum tam noutam pil dona ning ati, alat yala-yala nirya ap, mitik mek makau mangkok-mangkok ap kintinibuka deibik. Tonda imam Yoyada birye, tuba kam ulamuk talak noutam nirya ara, sik Israel nang arye, ‘Allah arye nun malye un ning namin kepsilirye, kum kipdeipnamsilʼ tenen, kam ning obuka, arelyangalamikba, imam-imam nang arye, Allah Yahweh ati, el si eren aik pum tam arye arelamik.

Imam Yoyada dibuk ati, sekik yupu

¹⁵ Imam Yoyada wisi akunum dayukce, el keting tamun ara, seratus tiga puluh (130) tahun akunum kibukba ura, dibuk.

¹⁶ Yoyada akunum dibukura, el kayapu nang arye, el nong bobuka, Raja Daud ulamuk mutuku ara, Sion mutuku noutam, sik Israel yala ninye talilamik Raja-Raja nang dipneura, weilamikakuk, el nong babye bobinuka weibik. Imam Yoyada bira, Allah si eren aik moubuka taleamukce, teleb pil dolamuk ning nirya ap, Israel yala nang ati teleb kibuka melilamuk ning nirya ap ati ara, akunum dibukura, el nong bobuka Raja Daud weiamikak, binuka weibik.

Raja Yoas birye, pia malye weik ulamuk ati, sekik yupu

¹⁷ Imam Yoyada akunum dibukura, Yehuda tam ninye deiyok kibuka ulamik nang nirya arye, sik deice tam nang deiyoknye Raja Yoas dam yayik. Yayikce, elti, kanye deibuka, keken yupu nyanmikce, elti, kibuka, “Aning-aninguk winipsilyame,” nyabuka, yan morobikba, sikce ayupu nyabik touk, deiyok kibuka arelamuk arye, Yudea tam ulamik nang ara, pia malye weik winilamik.

¹⁸ Ara, Yehuda mutuku ulamik nang nirya ara, sik deipkirikdop nang arye si erelamiknye, Allah Yahweh si eren aik wekuka, si kum erelamikce, bataklamik. Winilamikce, sikda talye isa siuk erelamikce, Asyera, el urasin ato ning kibuka puturyamikce, el si erelamik. Tonda, aisa si kina ap, si eren ap ati, cang weik yo ton ikdeiamikce, asukum aryuk, Asyerah si erelamik. Adeice arye sikda malye weik ulamik ati, Yehuda yala nang ap, Yerusalem mutuku weik asik noutam ulamik nang ap, sikti, Allah arye, ‘Aning ara, na like,’ tenebukce, yu weik ubuk.

¹⁹ Allah arye sikti, yu tenebuka anye, ‘Anang ara tamubuka, na tam kipdopnamakeʼ tenen, Allah arye el yupu laka nyana deiyok nang, nabi-nabi nang dopdeibukba, sik aninye dam yayikce, “Anggun malye ululum ning ara, batakmunce, tamubuka Allah dam yamunyakarye, el siuk erenamlume,” nyabuka laka nyalamikce, wenelamik. Wenelamik bukni, sik amutuku ulamik nang arye anyalamik yupu ati, ‘Nun lik ati kum kekenamabeʼ tenen, ayupu pia kum kekelamik.

²⁰ Winibuka pia malye weik ulamik ati, Allah el Pia Teleb, Lek Dip Kanye arye, imam Yoyada elce minop talak deiamuknye, Zakaria, el nong noutam yan wekuka langdibukba, sik amutuku ulamik nang unmikak binuka, sik urasin tam tikukce nyabuk. “Allah arye anggunti nyapdeipmasila ara, ani. Yata ning deiyok ati anggunda Allah Yahweh arye, ‘Aning ara, wininamlume. Aning ara, pia kum wininamlume,’ nyapdeiamsuk yupu ara, moubuka kum taliplum do? Anggunce na yupu moubuka kum talipluma deice arye, narye yuk ning arepsiniba, anggun deice ikin ning upnamsile. Anggunce winilalum ning nirya ara, malyeuk kipnamle, teleb kum upnamle. Anggunce, na Allah Yahweh ati batakmanulum atouk, narye anggun babye bataknamsine,’ Allah arye nyapmasile,” Zakaria birye sik Yudea tam nang nirya ati nyabuk.

^21-22 Allah el Pia Teleb, Lek Dip Kanye arye Zakaria biti, “Nyalbinulyame,” nyabuk touk, ayupu bobuka nyabuk bukni, amutuku ulamik nang nirya yu ubuk ati, sikce, “Kume, anye bira nun like. El Zakaria bira, minopce opnuyabe,” nyabuka, yupu nyapdayik. Ayupu nyanmik talak ara, Raja Yoas babye, ‘Yo, sikce anye opnuyaka ara, teleb uka,’ tenebuk. Ati, amutuku ulamik nang arye, Allah Yahweh, si eren aik dam bukni, bai tam ninye weklamikak, Zakaria el nong deice keil arye donokuka obik. Onmika ani, kabul kum dibuk talak ara, Zakaria birye ayupu nyabuk. “Se, anggunce keil arye dobuka na nong deice dobuka opnulum ning ara, na ni Allah Yahweh arye, akunum eibuka bikmanil ati, ‘Aminyan kwang daknamsilʼ tenen, Allah ati moropne,” nyabukce, Allah si eren aik damak dibuk.

Yoas birye Raja kibuka, taleamuk ning ara, sirya dakuk ati, sekik yupu

²³ Ura, sik nirya daulamika ani, aketing tamun sirya dakukce, winiryuk keting tamun yayuk talak ara, Siriya mutuku yin talin nang arye, Yehuda tam noutam ulamik nang ap, Yerusalem mutuku weik asik noutam ulamik nang ap ati, ‘Opdanamabʼ tenen, mal pi yayik. Siriya mutuku yin talen nang, sikce, Yudea mutuku ninye deiyok kibuka taleamik nang nirya, obuka sirya dakice, sik obik nang arye talilamik bona nirya, dalubuka doprobikce, sik mutuku taleamuk deiyoknye Damasyik mutuku Raja dam bobinuka arebik.

²⁴ Siriya mutuku yin talin nang kong mitik tonun yanmik bukni, Allah Yahweh arye, Yudea tam nang sik wenena ati, sik Siriya mutuku yin nang deice mikip weik arebukce, lo arebukba, sik Yehuda mutuku yin nang ara, yupa weik ulamik bukni, oplobik. Ara, Yehuda mutuku ulamik nang ara, sik apu yapu arye, ‘Nun ni koprobaʼ tenen, si erelamik Allah Yahweh ati batakuka, isa siuk erelamika deice arye, malye weik ulamik ati, Allah arye aninye wenebukce, ikin ning weik sik nong deice deibuk. Allah arye, ‘Aikin ning arepnamna deice arye, Raja Yoas bira, obuka wenepnamne,’ tenyamuka ati winibuk.

²⁵ Atalak ara, sik Siriya mutuku yin nang arye, Yoas bira mal marabikce, oplobuka bindobikba, dila weik ubuka ati, dipmanto kibuk. Ati, sik olyayik yin nang nirya, sik mutuku tamubuka biyik talak ara, Yoas el amu tam pil dona deiyok-deiyok nang kan-kan, bitinye arye, ‘Yoas opnanamʼ tenen, yupu nyapdadik. Yupu tapdarikce, sik anang arye, Yoas mapmuk dam birikce, lukuka opdongopdik. El oplopdika deiyok ara, Yoas birye Yoyada el mi Zakaria biti, “Oplulume,” nyabukba, omik ning kwang dakna ati, oprik. Yoas el nong ara, dopdakuka Daud el ulamuk mutuku noutamuk binuka weibik bukni, sik Israel nang taleamik Raja-Raja nang weilamikak ara, kum weibik. Aning kum bukni, talye yukak binuka weibik.

²⁶ (Ura, Yoas biti, “Opnamanam,” nyabuka, yupu sirikinmarik nang ara, tonye bira, el si Zabad, el lin koproba ara, el si Simeat, Amon mutuku kil ulamukce, Zabad deiamuk. Zabad biti yupu nyabuknye, ton yuknye bira, Yozabad, el lin koproba ara, Moab mutuku kil, el si Simrit ulamuk. Sik bitinye Yozabad ap, Zabad ap, sikce, “Yoas opnamanam,” nyabuka yupu talipmarikce opdik.)

²⁷ Yoas birye deiamuk mapu arye ulamik ning ap, tonda nabi-nabi nang arye Yoas biti, “Aminyan talak el Yoas biti, aning ton, winipnamlarya,” nyalamik ning ap, tonda Yoas birye, Allah si eren aik malye uamukak, lipsisikuka dopdeiamuk ning ap, aning nirya ara, mambul buku noutam sekik. Ara, Israel yala nang bukni, Yudea mutuku taleamik deiyok nang, Raja-Raja nang ulamik ning ati, sekna buku noutamuk, sekuka deibikce, laka nyabik. Yoas akunum dibukura, atalak ara, Amazia birye el li koproba Yoas punubukce, Yudea tam ati, talibuka, Raja kibuk.