2 Tawarikh 23 - Eipomek

Imam Yoyada birye nyabukba, el melin nang arye, Atalye obik yupu

¹ Akil Atalye birye, Yehuda tam taleamuka ani, keting tamun tekbarye (7) akunum kibukura, imam Yoyada birye, ‘'Yoas erepdeibipnyeura, Raja kipnamsile,’ tenebukce, pin-pin ubuka deice arye, mikip kibukce, ‘Aning ara winiptinye,’ tenebukce, Yoyada birye, yin talina deiyok nang, pamubarye nang ati, ‘Winipnamabe,’ nyabuka nyalin yupu deice arye, kintinibik. Ayin talin nang ara, sik amu tam, yin nang ton, seratus (100) nang taleamikce, yupu nyalamik. Ayin talin deiyok nang ara, kung yuk-yuk ulamik. Ati, imam Yoyada ap, yin talin deiyok nang ap, kanye tonok bobuka, yupu tabik nang, sik si ara ani. Ara, Yoreham el mi Asarya ap, Yohanan el mi Ismael ap, Obed el mi Asarya ap, Adaya el mi Maaseya ap, tonda Zikri el mi Elisapat ap, sik nirya ap, Yoyada ap arye, ‘Yo aning ara, winipnamabe,’ nyabuka, nyalin yupu deice arye nyadayik.

² Nyapdayikura, sikce Yehuda mutuku noutam nirya biyikce, Lewi yala nang ap, sik Israel yala nang arye deipdanin yangalamik nang, sik yala yuk-yuk aulamik touk ati, deiyok kibuka, ayala-ayala nirya, yupu nyana deiyok nang nirya ap ati, yupu bobinuka nyabikba, kekebikce bulubikopura, adeiyok-deiyok nang nirya arye, sik nirya Yerusalem mutuku yayik.

³ Sik nirya bulubikce, Allah si eren aik dam, yanuka bulubuka weikikce, Raja Ahasia el mi Yoas ati, “Elce nun Raja kibuka talipsiliba, nunce el yupu kekenamabe,” nyabuka, nyalin yupu deice arye nyapdayik. Ayupu nirya nyabikopura, Yoyada birye aninye ati nyabuk, “Allah arye Daud biti, ance deipminbuk, dadeipdanin banamak nang aryuk, Israel yala nang nirya talin ati, ninye deiyok kibikirye, Raja unamuknye birye nyapdeiamuk touk, Raja Ahasia el mi atikmal atia! Wini talak arye dipdongobuka oyanamle talak ara, elda nun ninye deiyoknye, Raja kibuka talenamsile,” nyabuk. Anyabukce, ayupu ton ap dungobuka nyabuk.

⁴ “Nunce anyapnusiak touk winipnamabe. Sik imam yala nang ap, Lewi yala nang ap nirya ara, anggun abulupmalum nang noutam arye, bokmunyakarye, yupa winilye bobuka kintinipnulume. Ara, tonok yupa ara, Allah si erebuka kin sum, Sabat sum deice, Allah si erelamik aik pil dopnumunye nang ara, Allah si eren aik bublan-bublan dam nirya, ‘Talye nang wekekicakʼ tenen, kaleknamlume.

⁵ Aning atonun, anggun kan-kan bukni, ton nang ara bokukapmunce, yupa bitinye nang ara, Raja el weik teleb aik dam kaliknunyake. Ton nang bokukapmunce, yupa winilye nang ara, Yerusalem weik asik noutam bukni, wekelyangan bisik, Gerbang Dasar, ‘Talye nang wekecakʼ tenen, kalikinamnyake. Ton tuba batakmalum imam nang ap, Lewi yala nang ap, Allah Yahweh si eren aik dam bukni, dana-dana bai tamuk, Israel yala nang wekelbanyakak kaliknamnyake.

⁶ Anoutam nirya ara, tonok talinye babye, Allah Yahweh el si eren aik pum tam kum wekenamak. Bukni, sik imam-imam nang ap, Lewi yala nang ap, Allah si eren aik pum tam pil talebuka donamnyak ati, sikcuk anyaik weknamnyake. Deiyok ara, Allah arye, ‘Anang aryuk, na si eren aik pum tam pil dopnamakʼ tenen, ayala nang wipdeibuk ati, sik anang aryuk anyaik wekuka unamanyake. Sik yuk nang nirya ara, Allah arye, ‘Winipnamlume,’ nyapdeibuk touk, aninguk tenebuka bai tam unamanyake.

⁷ Sik Lewi yala nang ara, Raja kalikna ati, ninye on parang ya bobuka, Raja dam antanap dongobuka kalekinamnyake. Tonda, Raja yata tam do nirya, el biknulya babye, sik anang arye, el ap dipnilibuka banamnyake. Yatato talye nang nirya, Allah si eren aik weknulinye bira, adiparyuk opnamlume,” imam Yoyada birye nyabuk.

⁸ Yoyada birye, “Winipnamlume,” nyabuk touk, aning ara, sik Lewi yala nang ap, Yehuda yala deiyok nang ap, elce wipdeibuk nang nirya ara, sikce anyabuk touk winibik. Ara, anang yupa yuk-yuk ati, deiyok kibuka ulamik nang arye, sik amu tam nang dobuka kaliklamik. Tonda, sikce, Allah si eren sum arye, sik pil erenmek nang ati, “Anggun aik tamubuka kum binamlume. Asukumuk mapnamalume,” nyabuka yukupdanuduka deibik. Tonda, minop talak apil donmik nang punubuka, ‘Anyaik pil donuyapʼ tenen, yayik nang babye, asukumuk bulubuka wekmik. Allah si eren aik damuk unmik. Sik aik tamubuka kum biyik.

⁹ Unmek talak noutam ara, imam Yoyada birye, sik yin nang yupa yuk-yuk ati, deiyok kibuka taleamik nang, sik amu tam seratus (100) yin nang taleamik deiyok nang ati ara, ninye olan talak ning ton, bokuka arebuk. Ara, minop talak, Raja Daud el babye bolamuk ninye on kama (tombak) ap, ‘Mal olan talak arye, opsicakʼ tenen, nong lelina ati bolamuk ning, el si ara perisai, weik ning ap, mitik ning ap, aning nirya bobuka, ayin talin nang, sik deiyok nang ati arebuk. Aninye on ning nirya ara, minop talak Raja Daud birye aning nirya, Allah si eren aik noutam, dokola deiamuka ati, atalak ara, imam Yoyada birye, aning dobuka, sik ayin deiyok nang ati arebuk.

¹⁰ ‘Raja obicakʼ tenen, kalikna ati ninye on ya parang ap, ninye on tombak ap, bopmek nang ara, Allah si eren aik dam bukni, urasin tam ap, tonda Allah arena ati, kam ning obuka, uku dongona ati kintinibik ning, mesba deice tam ara, imam Yoyada birye, aLewi nang bobuka wipdeipmokba, sikce kalikmek. Sik nirya ara, dungnubuka tikmikce, dabu tam, arah selatan arye, dipdongobuka iknapnye tam, arah utam tikmikce, kalikmek.

¹¹ Aning-aning nirya akunum winipmekce, kintinipmek ning ara, imam Yoyada birye, Raja Ahasia, el mi Yoas bobuka, bai tam yayukce, awekmek nang urasin tam deibuk. Winibuk ning ara, Yoas el kisok deice ara, ninye deiyok nang, Raja nang galulamik topi, el si ara mahkota, kalupdeibuk. Tonda, Allah arye sik Raja nang ati, ‘Aning wininamlume, aning kum wininamlume,’ nyapbukba, sekamuk yupu ton dobuka, Raja Yoas biti arebuk. Winibuka deice arye, Yoas bira Israel nang nirya, sik ninye deiyoknye kina ati, erepdeibukba tikuk. Erepdeibukura, Yoyada ap, sik deiyok-deiyok nang arye, ‘Yoas bira, nun Raja unamsilʼ tenen, lakakin ning ati, Yoas el kisok deice minyak zaitun mek dikilin pil dobik. Atalak ara, sik awekmek nang nirya, weik yupu deice arye, “Telebe, anda nun deiyoknye Raja, keting tamun yupa weik arye, kam unalame!” nyabuka, si kinmekce nyanmik.

¹² Nyanmik talak ara, yupu lelim weik nyanmika ati, Atalye birye alelim kekebukce, ‘Yata wirinmak do?’ tenen, pola Allah el si eren aik dam, sik aninye weik wekmikce, Raja si erena ati, obinuka yanuka kinmekce, weik yupu arye nyamekak binuka dinmok.

¹³ Biyukopura, dilamukak, Raja winiryuk wipdeibiknye Yoas bira, Allah el aik noutam wekelyangalamik bisik bublan dam, weik ayukumna yo dam tikmukak eibuk. El atikmuka dana-dana tam nirya ara, sik yin nang yupa yuk-yuk deiyok kibuka ulamik deiyok yin nang ap, lelim len ning terompet bolamik nang ap, sikcuk Raja warikdongobuka tikmek. Tonda, Raja si eren ati, amutuku noutam ulamikce, apil dolamik nang ara, anyaik dam bulubuka wekmek nang nirya ara, kanye weik deipmekce, terompet bobuka, si arye pulunmekce, si erenmek. Tonda, kanye delina mot sena deiyok nang arye, bung-bung an ning ap, alat-alat musik yuk yala nirya ap, bopmekba mot senmekce, weik yupu deice arye si erenmek. Atalak ara, Atalye binuka eibukce, el kanye pia malye ubuka ati, el kenekmuk baju adiparyuk kwilikuka batakukce, mikip yupu arye nyabuk. “Se, Se, dipkoprob na tonok arye amutuku talebuka, ninye deiyok kil unun ati, anggunce awinipmaluma deice arye, na yanipmanulume,” nyabuka, weik yupu arye malye nyabuk.

¹⁴ Nyabukba, imam Yoyada birye, yin nang yupa yuk-yuk ati deiyok kibuka, seratus (100) yin nang taleamik deiyok nang, sikti, nyabuk, “Atalye bira, tomunyakarye, bobilulume. Ara, tomopmunce, Allah Yahweh si eren aik dam arye ona kum bukni, akil tomopmunce, adiparyuk bobuka, bai tam bobilulume. Winibobuka bamunyebuk, yatanye do, Atalye tam kiplirye, ‘Akil lyeipnunʼ tenen, yupu seklinye bira, ona dem upnamlume,” nyapdeibuk.

¹⁵ Sik anang arye ninye deiyoknye Raja, el aik dam akil ati enmeka ani, Raja el weik aik dam bukni, bisik wekelbanak si ara, ‘Kuda Basam Bisik Bublan,’ nyabuka sekiamik tam arye, akil unmokak eibikce, binuka dobikura, adiparyuk oplobik.

Imam Yoyada birye, ‘Nun nirya ara, Allah el tamuk tamubuka kipdopnamabeʼ tenen, nyabuk yupu

¹⁶ Ura, aning nirya akunum winibikura, imam Yoyada birye, nyalin yupu deice nyapdeibuk. Ara, elce, “Na ap, nun winiryuk Raja Yoas ap, amutuku unyap ninye nirya ap, nunda Allah Yahweh el mapu unamabe. El tibuk si erenamabe. El yupu uk kekebuka wininamabe,” nyabuka, nyalin yupu deice nyapbukba, sik aninye nirya kekebikce, ‘'Yo, aninguk wininamabe,” nyabik.

¹⁷ Ayupu akunum nyabukopura, sik aninye nirya arye, isa si Bahal, si erelamik aik dam biyikce, anyaik nirya dakuka batakik. Winibikce, isa si erelamik kam ning obuka, uku dongona ati bopdeiamik ning, mesba ara, ulubuka bataklobik. Tonda, isa do, ninye do, ‘Atalye ning si erenamabʼ tenen, ninye urasin atonun kibuka, memebuka deiamik ning nirya babye, dakuka batakik. Tonda, isa Bahal, si eren aik deiyok kouamuknye, Matan bira, obik. Ara, isa Bahal, el arena ati kintinyamik mesba dam binuka, anye obik.

¹⁸ Obikopura, imam Yoyada birye, Allah Yahweh si eren aik kalikna ati, “Sik imam-imam nang ap, Lewi yala nang ap, sikcuk anyaik kalekuka unamake,” nyabuk. Ara, min talak Daud birye, Allah si eren aik pil talebuka dona ati, imam-imam nang ap, Lewi yala nang ap, sikti, pil yuk-yuk dobuka deibukura, talebuka dolamik touk, ‘Wini talak babye atouk pil dobuka unamakʼ tenen, Yoyada birye anang wipdeibuk. Sik anang arye, Allah si eren ati, kam ning obuka uku dongona ati pil dopnuceura, “Musa birye, ‘Winibuka-winibuka wininamlume,’ nyabuka sekeiamuk touk wininamake,” nyabuk. Tonda, “Sik anang kanye teleb deice arye mot senmakirye, apil donamake,” nyapdeibuk. Ara, min talak Daud birye wibuka deiamuk touk, Yoyada babye, atouk winibuk.

¹⁹ Tonda, Allah Yahweh si eren aik bublan dam kalikna ati, Yoyada birye ninye ton wipdeibuk. Ara, Allah arye, “Aning ara na lik ati, aning winibice nang do, adin ning dibice nang do, amalye ning mangkau arye bol pibica babye, na si eren aik dam pia kum yatinge,” nyamuk ning, akunum winipmakce nang, ‘Anang ara, malye nang unyake,’ tenebuka ati, ‘Anang ara, el si eren aik wekicakʼ tenen, kalikna ati, ninye ton weibukba, anang arye anyaik bublan dam nirya kaliklamik.

²⁰ Aning akunum winibukopura, Yoyada birye, yin nang yupa yuk-yuk ati, deiyok kibuka ulamik nang ap, Israel yala nang yuk-yuk ati, deiyok kibuka taleamik nang ap, amutuku ulamik nang nirya, deiyok kibuka taleamik nang ap, tonda amutuku ulamik nang nirya ap, imam Yoyada ap, sik nirya arye, winiryuk erepdeibik nang deiyoknye Raja Yoas bira, Allah Yahweh si eren aik dam arye bobuka, Raja un aik dam bobiyik. Ara, weik bisik bublan botopdeiamuk, el si ara, ‘Deice tam Bublan,’ damuk wekel biyik. Biyik talak ara, Raja birye, ninye deiyok nang bun ning, el si ara takhta, aning deice binuka bukuk.

²¹ Aning nirya akunum winibikura, Atalye obikba akunum dibukura, amutuku ulamik nang nirya ara, kanye deibik. Amutuku weik asik Yerusalem ulamik mutuku ara, ton ap olana kum aryuk, talima lamabuka, teleb arye ulamik.