2 Tawarikh 22 - Eipomek

Ahasia birye, Yehuda mutuku ninye deiyoknye kibuk yupu

¹ Yerusalem mutuku ulamik nang arye, Ahasia ninye deiyoknye, Raja wipdeibik. Ara, Yehoram el mapu du nang nirya ara, Arab mutuku nang, yu weik nang arye yanuka, Yehoram el min deiamuk mapu nirya obukabikce, kelesiryanye tonok batakik. Ati, el li Yehoram pununa ara, el kelesiryanye Ahasia uk, ninye deiyoknye Raja una ati wipdeibik.

² Ahasia ninye deiyoknye, Raja deiyok kibuk talak ara, keting tamun dua puluh dua (22) tahun kibuk. El amutuku noutam ninye deiyoknye, Raja kibuk ara, keting tamun tonok 1 tahunuk talebuk. Ahasia el lin koproba ara, Atalye ulamuk. Atalye bira, Israel tam ninye deiyok kiamuknye, Raja Omri birye deibuknye birye, deiamuk kil ulamuk.

³ Ahasia el ulamuk ning ara, Raja Ahab el mapu silip, sik malye-malye weik ulamik atouk, el Ahasia babye winilamuk. Deiyok ara, el lin koproba arye, malye un ninguk peteryamukba, aninguk talebuka ulamuk.

⁴ Ahasia birye, Allah el kanye ara, ‘Aning pia malye una ati,’ tenelamuk ninguk, amalye ning weik, Allah dam tenepce winilamuk. Ara, Raja Ahab el mapu silip, sik malye weik winilamik atouk, sikce, “An babye aninguk winipnamlyam,” nyabukba, kekebukce, winilamuk. Ahasia el li akunum dibukura, Ahab el mapu silip sikce elti, “Winipnulyame,” nyabuka, yupu arelamikak kekelamukce, aninguk winilamuk. Sik ayupu arelamik nang aryuk, el nong deice ikin ning, pia weik deibik.

⁵ Tonda, Ahab el mapu silip, sikce Ahasia biti, “Winipnulyame,” nyabuka, yupu arelamika deice arye, Israel tam ulamik nang, sik deiyoknye Raja Yoram, el tam kipdobuk. Ahasia birye winibukba, sik neika arye, Siriya mutuku taleamuk ninye deiyoknye, Raja Hazael biti, mal pibirik. Ara, Gilead tam bukni, Ramot mutuku mal pibinuka olanmek. Aolanmek noutam arye, sik Aram mutuku nang arye marabikba, Yoram el nong deice dila sakuk.

⁶ Dila weik sakuk ati, Yoram tamubukce, Yisreel mutuku kweten ati yayuk. Ara, el ap, Aram mutuku ninye deiyoknye Hazael ap, mal olanmarik talak arye dila dobuka ati, ‘Na dila kwetepnamnilʼ tenen, Yisreel mutuku biyuk. Atalak ara, Ahasia bira, el dina kamubuka kweten ati, Yisreel mutuku tamubuka biyuk.

Yehu birye, Ahasia obuk yupu

⁷ Allah Yahweh arye, ‘Aning ara winipniba, Ahasia dipnamlarya tenyamuk touk, Ahasia birye Yoram el dam biyuk talakuk, ninye arye obikba dibuk. Anya arye Ahasia, Yoram dam biyuk talak ara, ninye tonoknye si Nimsi, elce deibuknye Yehu, ‘Anye epdanamabe,’ tenepdikce birik. Anye Yehuda, Allah Yahweh arye, ‘Raja Ahab ap, el mapu silip ap, nirya obuka sirya daknamle,’ tenyamuka ati, Allah arye anye Yehu akunum wibuka deiamuk.

⁸ Allah arye, ‘Anye Yehu birye, Ahab ap, el mapu silip ap opnamle,’ tenyamuk touk, lo arebukba, Yehu birye, Raja Ahab el mapu silip ati onmok talak ara, yuk nang ton eibuk. Ara, Yehuda mutuku ninye deiyok nang nirya ap, Raja Ahasia el kayapu nang arye deiamik mapu ap, sikce Ahasia ati melibuka banmik. Atalak Yehu birye, anang nirya eibukura, adiparyuk anang nirya ara, obuka kum danaibuk.

⁹ Winibukopura, Yehu birye ninye ton dopdeibukba, Ahasia ara, Samaria mutuku noutam duknupmoka ati, ebuka dolbiyik. Ahasia akunum eibuka dobikura, Yehu dam tamubuka boyayikba obuk. Akunum obukura, sikce el nong bobuka weilbiyik. Ara, sikce, ‘Kume, Raja Yosafat bira, el kanye talima nirya arye, Allah Yahweh ati si erelamukce, ‘Allah arye yata nyapnunil do?’ tenen, pia kekelamukce patalamuka ati, ‘Yosafat birye anye deiamuk ati, el si erena ati, el deibuknye Ahasia, el nong weipnamabe,’ tenebikce weibik. Sik Ahab ap, el mapu silip ap, Ahasia ap, el melibuka balamik nang ap nirya, akunum obika ati, Ahasia el mapu silip nirya kumdayik arye, el tam nang ton, Amutuku noutam ninye deiyok nang kibuka, Raja kiptingce, amutuku talepmanto nang ton, pia kum ulamik. Tuba kam ulamik nang ara, sik mikip kum ati, Raja kum kipmanto nang ulamik.

Raja Ahasia el lin koproba, Atalye birye, tia talak ati, Yehuda mutuku deiyok kibuka, talebuk yupu

¹⁰ Atalak ara, Yehuda tam taleamuk Raja Ahasia, el lin koproba Atalye birye, ‘Se, na deipsinye Raja Ahasia akunum obikba dibukʼ tenen, akunum bikukura, elce nyapdeibukba, el melin nang arye, Yehuda yala nang, Raja kiamik nang arye deiamikak, dadeipdanin yangalamik nang, Raja kipmanto nang nirya ara, ‘Sik ton Raja kibuka sisi nang tikicakʼ tenen, anang nirya obuka, kum kipdeibuk.

¹¹ Winilamik bukni, Raja Yehoram birye deibuk kil, ara Ahasia el makal kil tonok, el si Yoseba ulamuk. Tonda, Allah el si eren aik pum tam pil dolamuknye, imam Yoyada birye, akil domukura, akil Yoseba birye, Ahasia deibuk mi, el si Yoas dobukce duknubuk. Ara atalak, Yehuda yala nang arye, deiamik mapu, Raja kipmanto mapu nirya ara, Atalye birye nyabukba, el tam nang arye wibuka olamik ati, ‘Ami Yoas ton obicak,’ tenebukce, Yoseba birye, sal mi nyana kumce, Ahasia deiamuk mi Yoas doprobuk. Yoas doprobukce, el ap, el kalekuka melin kil ap, tonok man aik noutam arye, dungnubuka daulamdik. Winibuka ati, Allah el si eren aik noutam ara, tonok aik noutam koprop arye, dungnubuka deiamukba, aulamdik. Yoseba birye, ami lyepdobuk deice arye, Atalye birye, ami kum obuk.

¹² Atalye birye ninye deiyok koubuka, Yehuda tam talibukce ulamuk talak ara, keting tamun nakub barye (6) noutam nirya ara, Yoas biti Allah el si eren aik noutam, dungnubuka deiamikak, teleb kibuka daulamuk.