2 Tawarikh 21 - Eipomek

Yehoram birye ninye deiyok kibuka, Raja ulamuk talak ati, sekik yupu

¹ Yosafat akunum dibuk talak ara, Daud ulamuk mutuku, Yerusalem mutuku noutam tuku lukik. Ara, Yosafat el apu yapu nang ton, sik ninye deiyok nang, Raja-Raja dipniba, weilamik sukumuk, el ton tuku lukik. Tuku akunum lukikopura, Yehoram el pununa ati, el miuk wibuka erepdeibikba, ninye deiyoknye Raja kipdeibikura, amutuku nirya taleamuk.

Yehoram bira, Yehuda mutuku noutam ninye deiyoknye, Raja kiamuk talak winilamuk ning ati, sekik yupu

² Yosafat el mi Yehoram bira, Yehuda mutuku ninye deiyok kibuka, Raja ulamuknye bira, el weit ap, du ap ton daulamik. Ara, el li koproba, Yosafat birye deiamuk mapu ara, nakub barye (6) nang deiamuk. Sik anang si ara, ani. Ara, Asarya ap, Yehiel ap, Zakaria ap, Asariahu ap, Mikhael ap, tonda Sefaca ap, deiamuk. Aning nirya ara, Yehuda mutuku taleamuknye, ninye deiyoknye, Raja Yosafat birye deiamuk nang ulamik.

³ Yosafat birye, winibuka deiamuk nang nirya ati, dekna weik ning weik tonun arye talye areamukba, sikce dekna weik kat ning emas ap, perak ap, tonda yuk-yuk bona yala-yala nirya, sik ni yapu arye mambul tenelamik ning nirya ara, pia weik tonun dopromik. Tonda, sik ni koproba Yosafat birye, ninye asik ton bokuka arebukura, dopromik. Ara, ‘Nun mal olan nang arye yanuka opsicak’ tenen, Yehuda mutuku noutam, anyasik nirya dana-dana tam ara, cang keil arye deibuka, keil poka antanap dongobuka domikce asik ara, Yosafat birye areamukba, el mapu sik anang nakub barye nang nirya arye dopromik. Bukni, Yehoram el mi tonoknye biti, Yosafat elcuk, ‘Na mi Yehoram bira, ninye deiyoknye Raja kiplirye, Yehuda mutuku nirya talipnamle’ tenen, wipdeibuk. Deiyok ara, el Yosafat birye, ‘Kume, ami ara, na min talak arye deiamse mi aulula ati, elcuk Yehuda mutuku talipnamle,’ tenelamuka ati, Yehoram erepdeibikba, elcuk Yehuda mutuku tam taleamuk.

⁴ Ura, Yehoram akunum ninye deiyoknye kipdeibukce, Yehuda mutuku nirya talina ati, akunum mikip weik kibukopura, elce el tam nang ati, “Winamlume,” nyapdeibukba, el tam nang arye, el du ap, el weit ap ulamik nang koproba nirya ara, parang ya doprobikce, anang nirya, adiparyuk obuka sirya dakik. Tonda, yata barye nang ton, sik Israel tam ulamik deiyok nang ton, sik deiyok kibuka taleamikce ulamik nang babye, obuka sirya dakik.

⁵ Yehoram bira, Yehuda mutuku tam talina ati, ninye deiyoknye Raja kina ati, deiyok kibuk talak ara, el umur keting tamun tiga puluh dua (32) tahun kibuk talakuk arye, el ninye deiyoknye kibuk. Yehuda mutuku tam taleamukce, amutuku nang ati yupu nyalamukce, ninye deiyok kibuka, pil dolamuk keting tamun nirya ara, pin barye (8) tahun deice arye, apil dolamukce ulamuk.

⁶ Yehoram bira, Yehuda mutuku tam taleamukce, ninye deiyoknye Raja ulamuk talak ara, pia malye-malye weik winilamuk. Ara, min talak, sik Israel mutuku tam yuk-yuk ninye deiyok Raja nang ulamikce, sik babye pia malye-malye weik winilamik touk, el Yehoram babye, amalye ninguk talibuka winilamuk. Tonda, min talak ulamuk ninye deiyoknye, Raja Ahab birye taleamukce, malye weik winilamuk touk, el Yehoram babye, atonun malye winilamuk. Elce pia malye weik winilamuka deiyok ara, el aninye deiyoknye, Ahab birye deiamuk kilmu, Yehoram birye domuka ati, akil el li koproba, Raja Ahab birye winilamuk ninguk, Yehoram babye, aninguk talibuka winilamuk. Aning winilamuka deice ara, Allah Yahweh el dam ara, pia malye ulamukba, Allah arye, ‘Aning nirya ara, na pia like,’ tenelamuk.

⁷ Yehoram bira, malye winin ning weik winilamuk bukni, Allah Yahweh ara, Raja Daud elce deibukba, dadeipdanin yangalamik nang nirya ati, obuka sirya kum dakuk. Aning kum obuka deiyok ara, ani. Ara, Allah Yahweh arye, Daud el yala nang ati, nyalin yupu deice arye, “Daud birye deiplyeba, dadeipdanin banamak nang arye delinamak nang, sikcuk ninye deiyok kibuka, amutuku talibuka, Raja nang pia kipnin banamake,” min talak nyalin yupu deice arye akunum nyabuka ati, ‘Aning ara, akunum nyapdeipsa ati, sik Daud yala nang aryuk, amutuku talibikirye, Raja nang unamake,’ tenelamuk. “Pia aninguk wininamake,” nyalin yupu deice arye, Yahweh akunum nyapdeiamuka ati, aninye deiyok nang ara, obuka sirya kum dakuk. Ara, Allah arye, “Daud el yala nang aryuk, amutuku nirya talibikirye, ninye deiyok kibuka, Raja nanguk unamake,” nyalin yupu deice arye, min talak akunum nyapdeiamuka ati, ‘Daud el yala nang nirya ara, kum obuka sirya daknamne,’ tenelamuk.

⁸ Ura, Yehoram ninye deiyoknye Raja ulamukce, yupu nyalamuk talak ara, Edom mutuku tam ulamik nang arye, ‘Kume, Yehoram birye nyalul yupu, tuba kum kekenamabe. El anye birye, nun mutuku tam nirya, tuba kum talinamsil,’ tenelamikce, el yupu yanibikce, ‘Nun tenenyapnye, nun mutukunye binyak wipdeibibyeba, el anye birye, nun mutuku tam taliplirye, yupu nyapnamsile,’ tenebikce, sik mutuku talina ati, yuknye ton wibuka erebikba, anye birye, ninye deiyok kibuka, Raja ulamukce, Edom mutuku tam nirya talilamuk.

⁹ Edom mutuku tam ulamik nang arye, winilamika ati, el ninye deiyoknye Raja Yehoram birye, ‘Sik Edom mutuku tam nang olbinuyabe,’ nyabukce, el ap, el yin talin nang, sik deice tam deiyok ulamik nang nirya ap, el talye yin talin nang ap, tonda, ninye olbana ati, kuda basam arye libuka, tuku deice ban ning, el si ara kereta perang, aning talin deiyok nang ap, sik nirya arye, Edom mutuku tam ulamik nang ati olbiyik. Yehoram tam ninye nirya ati, antanabuka waredongobik. Winibik bukni, Yehoram ap, el yin talin nang ap, el kereta perang talin deiyok nang ap, Edom mutuku nang arye Yehoram tam nang ati antanabuka waredongobik. Winilamik bukni, Yehoram ap, el yin talin nang nirya ap arye, sik Edom mutuku nang nirya ati, obukabikce, alukunyan arye, sik Edom mutuku tam nang arye, kutuksakuka biyikce, bikbik abuka bindobik.

¹⁰ Atalak ara winilamika ati, atalak arye deiyok koubuka, anyapce dipdongobuka, atalak noutam nirya bukni, wini talak babye, sik Edom tam unyak nang ara, sik Yehuda nang amu tam kipnirye, Yehuda mutuku tam taleamik ninye deiyok nang arye nyanyak yupu, pia moubuka kum kekenyake. Sikce, ‘Kume, nun yuk unamabe,’ tenebuka unyake. Yehuda mutuku tam talibika deiyok nang, amu tam pia kum unyake. Tonda, atalak deice aryuk, sik Libna mutuku noutam ulamik nang babye, malye kibuka ulamikce, ‘Kume, nun babye Yehuda mutuku tam talinyak deiyok nang, sik Raja nang arye nyanyak yupu, pia kum kekenamabe,’ tenepnarye, aRaja nang ati bataklamik. Aning nirya winilamika deiyok ara, Yehuda mutuku tam taleamuk ninye deiyoknye, Raja Yehoram birye, el apu yapu nirya arye si erelamik Allah, el si Yahweh ati, pia batakuka, Allah el yupu yanilamukce, malye winin ninguk winilamuka deice aryuk, aikin ning el dam yangalamuk. Ara, el apu yapu arye si erelamik Allah, el si Yahweh ara, Yehoram batakuka atia.

¹¹ Aning kum bukni, Raja Yehoram birye, talye ning isa si erena ati, Yehuda mutuku noutam bukni, mutuku kon deice arye, isa si eren aik weik tonun dolamuk. Winilamukba, sik Yerusalem mutuku ulamik nang nirya babye, Allah ati batakuka, malye weik winilamik. Aning atonun ton, sik Yehuda mutuku noutam ulamik nang nirya babye, Allah arye nyalamuk yupu yanilamikce, Allah ati batakuka, malyeuk winilamik. Aning nirya ara, Yehoram el deiyok atia.

¹² Ura, winibuka daulamuka ani, yuk talak ara, Allah el yupu lak nyana deiyoknye, nabi Elia birye, mitik sekna ning, el si ara surat ton, sekuka dopdeibukura, ninye deiyoknye Raja Yehoram birye doprobukce, eibuk. Nabi Elia birye, asurat noutam sekuk yupu ara ani. “An apu koproba Raja Daud birye, si erelamuk Allah, el si Yahweh arye, anti nyabuka uapkile. ‘Ura, ance pia malye-malye ulyame. Anda, an ni koproba Yehosafat birye, teleb kibuka ulamuk touk, pia kum winilyame. Tonda, min talak Yehuda mutuku taleamuknye, ninye deiyoknye Raja Asa birye, teleb ulamuk touk, ance pia kum ulyame. Aninye deiyok nang arye teleb ulamikba, kanye deiamse bukni, sik winilamdik atonun, anda pia kum winilyame. Anda pia malye-malye winin ninguk winilyama ati, narye an ap, an talilum nang ap, ikin arye wenepnamsine.

¹³ Anda, sik min talak Raja nang arye, teleb winilamik touk, kum winilyam bukni, anda sik Israel mutuku tam talibuka, ninye deiyok kibuka, Raja ulamikce, pia malye-malye weik ulamik nang arye winilamik ninguk winilyame. Tonda, ukubuka winilyama deice arye, sik Yehuda noutam unyak nang nirya ap, Yerusalem weik asik noutam unyak nang ap, sik nirya arye, an winilyam ning eipkikirye, ‘Nun deiyoknye birye, malye weik winilye touk, nun babye aning atonun wininamabe,’ tenebikirye, sik babye pia malye winin ninguk talibuka wininyake. Sik nirya arye, na Allah arye nyanun yupu yanibikirye, batakaninyake. Sik nirya arye, na Allah ati, diba tuba kum teneninyake. Aning nirya ara, min talak ulamuk ninye deiyoknye Raja Ahab winilamuk touk ulyame. El Raja Ahab babye, malye weik ulamika deice arye, sik Israel noutam ulamik nang nirya babye, na yupu yanibuka batakamnikce, na Allah ati, diba tuba kum tenelamnik. Sik babye, malyeuk ulamik. Aninguk kum bukni, anda Yehoram bira, an kwitcapu nang koproba nirya babye, oltaknauk uplume. Ara, an ni koproba, Yehosafat birye deiamuk nang, an du ap, an weit ap koproba ulamik bukni, ance anang nirya oplume. Sik anang nirya ara, teleb winin nang ulamik bukni, an Yehoram bira, malye winin ninguk winilyame. Allah Yahweh arye nyapkila ati, narye lak nyapkine,” nabi Elia birye, asurat deice arye nyabuk.

¹⁴ Nyabukopura, surat noutam arye ayupu ton dukdongobuka nyabuk. “Malye weik ulamluma ara, Allah Yahweh arye, kanye imun ning arepnamsile. Anda moubuka kekepnulyame. Allah Yahweh arye, sik amutuku noutam unyak nang nirya ati, pia weik kanye imun uk, kibuka talilamle uk deiyok yanuka, anggun nong deice deipnamsile. Ayupu nyaplyeura, akanye imun uk arye, taleamlya ani, anggun kilapu nirya ap, anggun mapu nirya ap, anggunce weilulum kam ning nirya ap, auk talipsilirye, pia talipnamle. Tonda, anggunce, ‘Aning ara, mambul ning’ tenen, talelulum bona yala-yala nirya ap, adiparyuk kum kipdeipnalamle.

¹⁵ Akanye imun uk talipnamle talak ara, an babye, Yehuda ninye deiyoknye Raja Yehoram bira, an deisuruk noutam ara, asum deice ara, weik kanye imun uk talipnamkile. Auk taleamlya ani, an dei yanalam talak ara, an deisuruk babye, yapnalame!” nabi Elia birye, Raja Yehoram biti, asurat deice arye nyabuk.

¹⁶ Atalak noutam ara, Allah arye sik Pilistin mutuku tam ulamik nang ap, sik Arab yala nang ap, sik Sudan mutuku nang bukni, sikda laut mekwen lilun mutuku noutam yanuka ulamik nang ap, sik kanye talima noutam, yu tenen ning ap, lik tenen ning ap arebukba, anang nirya arye, Yehuda mutuku tam nang ati, ‘Nun lik’ tenen, binuka olyangalamik.

¹⁷ Aning-aning nirya arye, Yehuda mutuku tam nang olyangalamikce, adiparyuk Yehuda mutuku tam ulamik nang obuka malye kibik. Tonda, anang arye, Yehuda mutuku tam ninye deiyoknye Raja birye, el aik dobuka ulamukce, talilamuk ning nirya ara, adiparyuk alubuka doprobik. Aning kum bukni, aning nirya winibikopura, adiparyuk ninye deiyoknye Yehoram birye deiamuk mapu nirya ap, el domuk kilapu nirya ap, tomobuka tapu koubuka bobiyik. Winibikopura, ninye deiyoknye Raja Yehoram, el mapu silip nirya ara, ton tuba kum ulamik. Bukni, Yehoram birye sirya deiamuk mi, el si ara Ahasia, tuba aubuk.

¹⁸ Aning nirya akunum winibuka ura, Allah Yahweh arye, ninye deiyoknye Raja Yehoram, el pia kanye weik imun uk deiyok ning arebukba, el deisuruk noutam dilamukba, kwetepmanto kum uk arebukba, pia taleamuk.

¹⁹ Akanye imun uk pia taleamuka ani, keting tamun bitinye akunum kibuk talak ara, ninye deiyoknye Raja Yehoram, el deisuruk kanye imun uk taleamuka deice arye, el deisuruk nirya tamubuka, weik uk arye donmoka ani, el adiparyuk akunum dibuk. Akunum dibukopura, sik amutuku noutam tuba ulamik nang nirya arye, el si erena ati, uku pia kum lapdeibik. Ara, sik amutuku nang arye, Yehoram el apu yapu diamik talak, sik si erena ati, weik uku seklamik touk, el Yehoram akunum dibukba, sikce, ‘Dauplye’ tenen, elti, uku pia kum sekik.

²⁰ Yehuda mutuku tam taleamuk ninye deiyoknye, Raja Yehoram dibuk ning ara, amutuku noutam ulamik nang ara, tonoknye birye ton, ‘Se,’ pia kum tenebik. Akunum dibukopura, ‘Dauplye,’ tenebik. Ura, Yehuda mutuku tam taleamuk ninye deiyoknye, Raja Yehoram birye, ninye deiyok kibuka, Raja kina ati deiyok koubuk talak, el keting tamun ara, tiga puluh dua (32) tahun akunum kibuk. Ubuk ning ara, elce Yerusalem mutuku noutam ara, keting tamun pinbarye (8) keting tahun deice arye, amutuku talibuka ulamuk. Raja Yehoram akunum dibukopura, Raja Daud ulamuk mutuku, Yerusalem asik dam bobinuka weibik. Amutuku binuka weibik bukni, amutuku nang arye, ‘Anye nun lik’ tenen, sik yuk ninye deiyok nang, sik Raja-Raja nang dipneura, weilbalamikak ara, Yehoram kum weibik. Yuk talye sukum weibik.