2 Tawarikh 20 - Eipomek

Yudea mutuku nang arye, Moab mutuku nang ap, Amon mutuku nang ap, obuka sirya dakik yupu

¹ Mitikto talak akunum ubikura, Moab mutuku yin nang ap, Amon mutuku yin nang ap, tonda, sik melina ati yayik nang, sik Meunim mutuku yin nang ap, neika ansinibuka, ‘Yehuda mutuku nang ap, Yosafat ap, opnamap tenen, olyayik.

² Ton nang arye, aning kekebikopura, sik anang arye yupu bobuka, Yudea mutuku taleamuknye, Raja Yosafat dam nyalyayik. Ara, “Edom mutuku tam bukni, weik laut mekwen buk akunum dibuk laut mekwen otam arye, sik yin nang weik arye yangamake. Sikda, yin nang yupa pia weik arye yanganmakce, an ona ati akunum yangamake. Sik anang aryuk, Asezon-Tamar tam dam akunum yanganmake,” nyabuka laka nyabik. Ura, Asezon-Tamar mutuku atibuk, amutuku yuk si ton nyalamik ning ara, En-Gedi mutuku nyalamik.

³ Ayupu ara Yosafat kekebukce, ilil ubuk ati, elce, “Allah Yahweh, ance na winipnamne ning ati, Aning winiplyame nyabuka, ance teleb kibuka nyapnilyame,” nyabuka, deiyok koubukce Allah ati morobuk. Yosafat birye, ‘Allah moropnuyapʼ tenen, kintinibuk talak ara, elce taleamukak ulamik nang nirya ati, “Na mutuku noutam ululum nang ati, nun nirya ara, din ning dina kumce, si tebuka bulang bukuka, Allah Yahweh el siuk erebuka ubirye, Yata wiripnuyap do?’ tenen, elti, moropnuyabe,” nyapdeibuk.

⁴ Nyapdeibukura, Yehuda tam noutam ulamik mutuku-mutuku nirya ap, sikce dolamik weik asik nirya ap, mitik asik ap arye, amutuku noutam ulamik nang nirya ara, Yerusalem mutuku binuka bulubikce, sik nirya ara, “Se, nun ni koproba Allah Yahweh, ancuk melipnusilyame. Nunda yata wiripnamap do?” nyabuka moronmek.

⁵ Yehuda mutuku noutam ulamik sukum arye bulupmek nang ap, Yerusalem weik asik noutam ulamik nang ap, Yerusalem mutuku bulubikce, Allah el si erena ati winiryuk domik aik dam bukni, anyaik urasin tam binuka bulubuka wekik. Awekmek nang urasin tam ara, Raja Yosafat nebuka tikukce, Yupu nyapnun tenen, kintinibuk.

⁶ Raja Yosafat tikmokce, yupu mikip arye, nyabuk. Ara ani. “Allah Yahweh, nun Israel yala nang, nun apu yapu arye anti si erelamkikba, ance sikti, pia kalekuka melilamlum nang ara, nun kele. Ance im deice tam erebuka ulyamce, an mikip deice arye, tukwak mutuku, mutuku sirya, im sirya nirya unyap nang ap, nunti talisinyak ninye deiyok nang, Raja-Raja nang ap nirya ara, ancuk talisilyame. Ninye mutuku sirya im sirya nirya ara, an amu tam unyabe. Anda ninye ati mikip weik kilinanye ap, mikip weik deice arye mambul pil dona deiyok ning nirya ap, ara an taruk arye talilyama ati, yatato nang do nirya, ninye tukwak nang arye anti, malye kum kipketinge. Nun nirya ara, an amu tam unyabe.

⁷ Se, dipkoprob nun kele. Nun ni koproba Allah Yahweh, An tenen nang, an mapu Israel yala nang ati ara, Anang arye amutuku nirya talibikirye asukumuk unamak tenen, nun apu yapu arye amutuku yanuyik talak ara, minop talak arye sik amutuku noutam ulamik nang nirya ara, ancuk duknupdomlume. Ara, ance Israel nang ati, mikip weik areamlumba, adeice arye, amutuku ulamik nang nirya ati, obikce kum kipdeiamike, ton nang ara, yakdonokikba yuk mutuku bindomik. Winipluma deice arye, amutuku ara ance dobuka, an kwit Abraham birye deibukba, dadeipdanin yangalamikce, ulamik nang, sikti, areamlume. Ara, sik aninye arye, amutuku nirya ara, pia talebuka unamak tenen, areamlume.

⁸ Amutuku nirya dobuka, nun Israel nang ati areamlumba, nunce amutuku ulamupak arye, wini talak ara, an si eren aik ara, nun akunum domupak arye, nunce anti si erekinyabe. Otalak noutam nirya arye nyalamupu touk, tuba nyanyabe.

⁹ Winipmanto ara, nun dam kanye imun weik ning yanamsil talak ara, nun malye ubikyeba, nun wenena ati, ance yuk mutuku nang dopdeipminyeba, nunti mal olyanganamsiak do, kanye ikin arye nun benelan ninguk, din deiyok ning yanamsil do, din patana deiyok ning arepsiminyeba, nun din ning kum dalyopura, din patan ning yaliba dopropnamap ning ara, nun minopce an dam yanuka moronamkiyabe. Tonda, Allah an si eren aik arye, an si erena ati, anyaik noutamuk ulaluma ati, kanye imun weik ning nun dam yalyeura, An urasin tam tikuka, anti moropkiyabe, ance kekebuka lyenamsilameʼ tenen, moronamkiyabe,’ nyapkupu. Nyalamupu atouk, wini talak babye, na nio, ance melibuka lyepnusilamʼ tenen, moropkiyabe.

¹⁰ Wini talak ara, Amon mutuku nang ap, Moab mutuku nang ap, Edom mutuku nang ap, sikce nunti, olyanmasiake. Nun apu yapu Mesir mutuku arye amutuku dam yayik talak ara, ance sikti, Amutuku nang ulamik mutuku ara, kum olbinamlume nyapdeiamsulume. Ati nun apu yapu arye, sik Amon mutuku ulamik nang ap, Moab mutuku ulamik nang ap, Edom mutuku ulamik nang ap, amutuku-amutuku noutam ulamik nang ati, ton kum olbinamike. ‘Daunamakʼ tenen, batakamikba tuba ulamuk touk, tuba aunyake.

¹¹ Bukni, wini talak ara na nio, sikce nunti malye wininamsiak ara, dinamsilyame. Sik amutuku unyak nang arye, nunti ikin ning deipnamsiyake. Ara, ance nunti areamsulumak tuba asukumuk unyap mutuku noutam arye, sikce nunti, ‘Israel yala nang ara, amutuku noutam arye yakdonoknamapʼ tenen, yanuka warikmasiake.

¹² Se, nun ni koproba Allah, an siuk erekinyabe. Ati, anda nun ni koproba Allah, nun mikip mitang nang unyaba ati, sikda yin nang yupa weik yanganmakce, ‘Israel nang obuka kum daneipnamab tenen, yanganamaka adano. Ati, ance wenebuka, ikin ning sik nong deice deipnalame. Nunda, nun mikip deice arye yata winiptibye do? Aning ara, nun walwal upsile. Bukni, ‘Allah arye yata wiripsilya deice arye lyepnusil do?’ tenen, antibuk dinmabe. Nun melina ati, yanuka moropkiyabe. Raja Yosafat birye, sik Israel yala nang bulubuka tikmekak arye tikukce, Allah ati yanuka morobuk.

¹³ Ayupu nyanmok talak ara, sik Yehuda yala nang ara, sik sal ap, kilapu ap, sik mapu ap nirya ara, bulubuka ‘Allah Yahweh arye asukumuk dinmasilarye, kekenamasil tenen, el si eren aik dam neika yanuka tikmikce kekenmek.

¹⁴ Sik nirya asukumuk tikmikce, kekemekak aryuk, ninye weik wekmika kan-kan arye, Lewi yalanye tonok, el si Yahasiel aunmok ati, atalak ara Allah el Pia Teleb, Lek Dip Kanye arye, Yahasiel el talima noutam wekuka landibukce, anye birye yupu nyabukura, Yahasiel, el li koproba, Zakaria ulamuk. Ninye si Benaya birye, Zakaria deiamuk. Benaya el li koproba, Yeiel ulamuk. Yeiel el li koproba, Matanya ulamuk. Matanya ara, el li koproba Asab birye deiamukak ulamuk. Ati ara, aninye nirya ara, Lewi yala nang arye deiamikak, dadeipdananin yangalamik nang ulamik ati, Yahasiel babye Lewi yalanye ulamukce ayupu nyabuk.

¹⁵ Yahasiel birye nyabuk, “Na deiyoknye Raja Yosafat ap, na kayapu nang, anggun Yehuda tam ululum nang ap, Yerusalem weik asik noutam ululum nang ap, anggun nirya ati nyapsine. Wini talak ara, nun ni koproba Allah Yahweh arye nyapsile. Ara anggun ona ati yin talin nang yupa pia weik arye yanganmacak, eipmunyakarye ilil una ap, kanye bokoltona ap, una kume. Deiyok ara, ayanganmak nang ona ati ara, anggun mikip deice aryuk, kum opnamalume. Allah aryuk, anang opnamale.

¹⁶ Ati anang ara, alukunyan mapnulume. Mapmamunya bereklyeura, anggun mal olan nang Zis mutuku bisik welebuka yangace talak uk binuka, wareknamalume. Warekuka sekdongopmunyeba, sik anang ap, anggun ap ara, Yeruel pata mutuku mouse belelbiyuk tamak, epdanamlume.

¹⁷ Nyapdeipman mutuku akunum wekelbimunyeura, anggunce anang ati, ‘Nun babye mikip arye opdanamabe tenen kum kaleknamalume. Anggunda, anang olana ati kalikmasicak uk binuka dipra buknamlulume. Dipra wekmamunye buk, anggunti Allah Yahweh arye ninye obuka sirya daknamal ning ara, anggunce eipnamlume. Ati ara, anggun Yerusalem mutuku ululum nang ap, Yehuda tam ululum nang nirya ap, anggunda ilil una ap, kanye bokoltona ap, talima dakalsakna ap, una meme. Mapmamunya bereklyeura, mal olanak ara, talye mangkau kanye bobuka weknamalulume. Ara anggunti, Allah Yahweh arye dipkoprob melibuka lyelonamasile.” Yahasiel birye nyabuk.

¹⁸ Nyabuka ati, Yudea tam ninye deiyoknye, Raja Yosafat, elce taleamukak ulamik nang nirya ap, el ap, Allah el si erena ati, kutam tuku dipdongobuka sik urasin tuku deice uk deibuka, sikce Allah ati si erenmek.

¹⁹ Allah si tuba erenmek talak ara, Kehad yalanye birye deiamuk nang Lewi yala nang ap, tonda Korah yalanye birye deiamuk Lewi yala nang ap, sik nirya arye tikuka, Israel nang sik ni koproba Allah si erena ati, mot weik yupu deice arye senmek.

²⁰ Akunum mapmika, berekukopura, beren tam koproba arye, sik Israel nang nirya ara, Tekoa pata mutuku tam biyik. Sik aninye binuyik talak ara, Raja Yosafat birye, ayupu nyabuk. “Yehuda tam noutam ululum nang ap, Yerusalem weik asik noutam ululum nang ap, anggunce Allah Yahweh tonok ati, dib tenepnamlulume. Dip tenepmunyeura, Allah arye melipsiliba, anggun adiparyuk talima darabuka, mikip tuba unamlume. Tonda, sik nabi-nabi nang arye nyalilamsik yupu ara, moubuka talebuka, dib tenepmunce, teleb umunyeura, anggun winin ning nirya ara, nong unamsile.” Yosafat birye, sik Israel nang ati nyabuk.

²¹ Raja Yosafat birye, el mapu Israel nang ap, akunum yupu talibikce, ninye deiyoknye Raja birye, mot sena deiyok nang ton wipdeibukce, nyabuk. “Anggunce nun ni Allah Yahweh ati, el si eren mot ton senamlume. Ara, ‘Nun ni Allah Yahweh, malye uning tonok babye kum ulirye, elda pia teleb, leknye ulule,’ nyabuka, si erena ati mot, weik yupu deice arye senamlume,” nyapdeibuk. Nyabuka ati, sik mot sena deiyok nang arye, pola minopce menekuka banmekbuk, sik yin talin nang nirya ara, aminyan banmikce, ninye olbana ati biyik. Sik neika biyik talak ara, sik mot sen nang arye, “Allah Yahweh ati, weik arye Nun ni telebe nyanamabe. Allah arye pia kalekuka melisilyakarye, ton kum batakasulule, weik arye bico tenesilirye, melibuka lyelosulule,’ nyabuka, mot senmekce, amot senmek talak aryuk, sik yin nang bita lelebuka tikmekce, neika banmik.

²² Yosafat el tam yin talin nang, bisik tuba banmik talak uk, Allah si eren mot sena deiyok nang ara, weik yupu deice arye deiyok koubuka, mot senmek talak aryuk, sik otam mutuku olana yin talin nang arye, Opnamap tenen, yanganmik nang ara, sik kan-kan noutam ara, Allah arye lo arebukba, sik Edom mutuku nang duknupmikce, ayanganmik yin nang ati, mal dobuka onmek. Olanmek talak ara, Allah arye lo arebukba, sik Moab mutuku yin nang ap, Amon mutuku yin nang arye, sik Edom mutuku yin nang ati nirya obuka, sirya dakik. [Akunum Raja Yosafat birye, Allah yupu mot sebuka Allah ati teleb nyabuka kinamak tenen wipdeipmok nang menekuka, weik yupu deice arye mot sepnin bayik talak ara, Allah Yahweh arye, sik ‘Opnamapʼ tenen, yanganmek nang yin talin nang, sik kan-kan arye, ilil un ning ap, kanye bokol walwalan ning ap arebukba, yuk-yuk bai sakuka baloyik buk, dopkirikuka obikce, kum daneibik.]

²³ Ara, sik Amon mutuku yin nang ap, Moab mutuku yin nang ap, sik neiktoto arye Edom mutuku yin nang obuka kum danaibik. Sikce Edom mutuku yin nang nirya ati obuka, kum kipdeibik. Atalak aryuk, Allah arye, kanye walwalan ning arebuk deice arye, sik Moab mutuku yin nang ap, Amon mutuku yin nang ap, sik mamun, olanmek. Ara, tonye birye, ton tamnye biti, tamubuka olamika ani, kum danaipdanmanto kipdayik.

²⁴ Winibikura, mitik tonun aminyan talak, Yehuda tam yin talin nang ara, bisik banmeka ani, pata mutuku eipmanto ak, mutuku kon deice arye binuka, utam mutuku dinmekce, sik mal olan nang unmik tam nirya ara, binuka dinmekce, ninye pia weik obuka deipmek nang eibik. Ara, sik Moab mutuku nang ap, Amon mutuku nang ap, sik mamun olanmek nang nirya ara, tonok ton kam tuba unmekak kum eibik. Ara, sik ‘Yudea mutuku nang opnuyap tenen, arup talak yanganmek nang nirya ara, akunum obuka kum danaipdanmek ati, amutuku noutamak nirya, dipmek nang eibik.

²⁵ Ayin talin nang nirya arye, akunum obukabikce, nirya kum kipdeibika ati, Raja Yosafat ap, el mapu ap neika biyikce, sik mal olan nang nirya akunum dibikce, bona batakmek ning nirya ara, dalubuka doprobik. Adoprobik ning ara ani. Sikce sik pil don ning ati alat yala-yala nirya ap, sikce kiniklamik baju ap, sikce talilamik bona ap, tonda dekna weik ning nirya ap, yupa weik nukmanto kum arye doprobik. Sik taleamik bukni, dibikce batakmek ning nirya ara, pia weik ati, se winilye sum deice arye, sik Yudea tam nang arye bulubuka delinmek. Tonda, sikce batakmek bona pia weik uamuka ati, Yudea tam nang arye, ton tam nang kum doprobikce batakik.

²⁶ Winibuka bona dobuka delinmeka ani, like dumbarye sum akunum ubukura, sik aninye nirya arye, tonokauk bulubuka wekik. Ara lyu weik mutuku, si Ara, mal olbinuyik talak, mot sena deice arye, Allah si erebupnya ati, amutuku biyikce bulubuka wekik. Abulubuka weikikce, Allah el mikip deice arye, awinipmuk ning nirya eibikce, Allah ati, si erenmek. Amutuku lyu ati ara, ‘Allah el pia teleb ulula ati, Allah si eren mot sebik mutuku ati, atalak babye, wini talak babye, amutuku si ati, Telebe nyana weik mutuku lu tenen, sik yupu deice arye, ‘Baraka mutukuʼ tuba nyanyake.

²⁷ Aning-aning nirya akunum bulubikura, Raja Yosafat birye deiyok koubuka banmokura, sik Yudea mutuku yin nang ap, Yerusalem mutuku yin nang ap, sik nirya weik arye kanye deibikce, tamubuka Yerusalem mutuku tamubuka biyik. Kanye weik deibik ning deiyok ara, Allah Yahweh arye sik mal olan nang nirya obuka sirya dakdongobuk ati, kanye deibikce, sik mutuku tamubuka biyik.

²⁸ Aning nirya, Yerusalem mutuku weik asik tamubuka weknuyik talak ara, bung-bung ana (terompet) ap, musik lelim lelamle ning (kecapi) ap, gambus ap, aning bona kel nang arye bobikce, mot senmekce, Allah si eren aik dam biyik.

²⁹ Atalak ara, yuk-yuk mutuku ulamik nang nirya ara, “Allah arye Israel yala nang, sik mal olan nang nirya ati, mambul weik pil dobuk deice arye, sik mal olan nang nirya obuka sirya dakle,” nyabikba, kekebikce, Se, yata wiribuka opmal do? Aning ara weik mambuleʼ tenen, ilil weik ubuk.

³⁰ Ati ara, Yudea tam taleamuka ninye deiyoknye Raja Yosafat birye, taleamuk mutuku ulamik nang nirya ara, pia teleb aryuk talima lamabuka teleb arye ulamik. Sik ap yuk mutuku nang ap ton kum oldalamik. Ara urdem arye kume. Yosafat birye si erelamuk Allah arye, talima lamabuka una deiyok ning arebukce, lo arebukba, Yosafat birye taleamukak ulamik mutuku nirya ara, Allah arye meilyamukba, teleb ulamik.

Raja Yosafat birye taleamuka ani, sirya dakuk talak ati, nyabuk yupu

³¹ Yosafat bira, keting tamun tiga puluh lima (35) tahun kibuk talak ara, deiyok kibukce, Yehuda yala nang, sik deiyoknye Raja kibuka taleamuk. Yosafat birye Yerusalem mutuku weik asik noutam talebuka ulamuk keting tamun nirya ara, dua puluh lima (25) tahun mabuk. Yosafat el lin bira, Asuba ulamuk. Asuba el li bira, ninye si Silhi, elce akil deiamukba ulamuk.

³² Raja Yosafat ara, el li koproba, Asa ulamuk atonun, Yosafat babye, batakna kumce, teleb pil dobuka ulamuka ati, Allah Yahweh arye, ‘Aning ara telebe tenelamlum ninguk talebuka, diksukum piluk dolamuk.

³³ Yosafat el babye teleb ulamuk bukni, el taleamuk tam noutam ulamik nang, sik kan-kan arye, ton nang arye isa si eren ati, mutuku deice kintinibuka delilamikak ara, “Kum kipdeipmunce,” ulubuka bataklulume kum nyalamik. Tonda, amutuku noutam ulamik nang babye, sik apu yapu nang arye si erelamik Allah ati, Dipkoprob tenebuka, el siuk kum erepnarye, sik kanye talima nirya el deice uk kum delilamik.

³⁴ Ura, Yosafat birye ninye deiyoknye kibuka taleamukce, deiyok kibuka pil dopnin yangalamuka ani, el winilamuk ning sirya dakuka nirya ara, weik buku noutamuk sekuka deibik. Ara, Hanani, el mi Yehu, el ulamuk ning ati sekeibik buku noutamuk, sekuka deibik. Abuku babye, Israel nang talebuka ulamik deiyok-deiyok nang, sik Raja-Raja si sekuka delilamik buku noutamuk, Yosafat winilamuk ning babye, sekuka deibik.

³⁵ Tonda, yuk talak noutam ara, Yehuda tam taleamuknye, Raja Yosafat daulamuka ani, tonok talak ara, yuk Raja ap, tonok kanye bobuka neika pil dolamdik. Ara, el ap, Israel tam mutuku ulamik nang ati, ninye deiyok kibuka taleamuknye, Raja Ahasia ap, sik bitinye arye tonok kanye bobuka, ‘Nun olana kumce, teleb kibuka neika ubirye, pil neika donanamʼ tenen, nyalin yupu deice arye, yupu nyapdarik. Bukni, Israel tam ulamik nang taleamuk deiyoknye Raja Ahasia ara, talima pia malinye ulamukce, malye un ning ton pia talebuka ulamuk.

³⁶ Winilamuk bukni, sik bitinye arye, yupu sisikdikopura, Raja Ahasia ap, Raja Yosafat ap, sikce, laut weik mekwen deice ban ning, kapal laut doprik. Ara, dekna weik bona yala-yala nirya, okaren mutuku, ‘Tarsis mutuku bobuka dekenamakʼ tenen, doprik. Sikce akapal dona ara, mutuku si Ezion-Geber mutuku arye doprik.

³⁷ Akapal laut akunum doprikura, Maresa mutukunye Dodawa, elce deibuknye, el si Eliaser birye, Yosafat dam yayukce, el winipnamuk ning ati, yanuka laka nyabuk. Nabi Eliaser birye nyabuk yupu ara ani. “Anda, pia malye unanye Ahasia ap neika yupu neiktoto siriklamdumce, pil neika dolamduma ati, Allah Yahweh arye, anggun akapal pil dolamrum ning ara, ulubuka sirya daknamle. Nyabuka atouk, aminyan talak ara, sik bitinye arye kapal laut bolamdik ning ara, laut mekwen deice banmekak, mek arye dibukba, kum kibuk. Aning nirya akunum sirya dakdongobuk ati, Tarsis mutuku bona ton kum dekelbinamik.