2 Tawarikh 2 - Eipomek

Allah Yahweh el si eren aik dona ati, Raja Salomo birye, aning-aning nirya, kintinibuk yupu

¹ Ura, ninye deiyoknye Raja Salomo birye, “Allah Yahweh el si eren aik ati dopnirye, na un aik ton dopnamne,” tenelamuk.

² Anyaik dona ati ara, Raja Salomo birye pil dona kel nang ton wipdeibuk. Ara, anyaik don ning dobuka bolsusuna ati ara, tujuhpuluh ribu (70.000) nang wipdeibuka dopdeibuk. Ton nang ara, mutuku kon binuka, urasin pia teleb keil teleb uka kintinip deipnamak nang ara, ninye yupa weik, delapan puluh ribu (80.000) nang ton wipdeibuk. Tonda, sik ninye yupa pia weik, tiga ribu enam ratus (3.600) nang ara, apil dona ati, “Anggunce winipnamlume, winipnamlume,” nyabuka, pil dona deiyok nang ton wipdeibuk.

³ Ninye deiyoknye Raja Salomo birye ayupu dobuka, Tirus mutuku nang deiyok kibuka ulamuknye, el si Hiram biti, el dam nyapdeibuk. “Diba na kwit, teleb aik dona ati, ance na ni koproba Daud, el ap yupu taleamdumce winilamlum touk, urasin teleb kat yo, el si ara kipyal yo kintinibuka dopdeipminba, narye urasin pia teleb aik dopnamne. Ara, ance na ni koproba ati melilamlum touk, na babye melipnamnilamʼ tenen, moropkine,” nyabuk.

⁴ Raja Salomo birye Tirus mutuku nang deiyoknye, el si Hiram biti nyabuk. Na ning ara, na si erenun Allah, el si Yahweh, el si erena ati, teleb aik dopnamne. Ara, Yahweh, el si erena ap, si erebuka kina ap ati, tonda, nun Israel nang ara, nun malye un ning ati, Allah arye kum kipdeipsuturye, lyepsetuʼ tenen ati, domba basam nirya bobuka arelyapye ura, Allah el arena ati uku dongonamabe. Tonda, siltong teleb ning boyanuka uku dabibiba, uku diplibuk tulum weleplyeura, kekepnamle. Tonda, anyaik pum tam ara, roti din ning dabikirye, meja deice laksukum delinyak roti kwaning arena ati, anyaik dopnamne. Tonda sirik ning ara, nun ni koproba Allah Yahweh arye, Anyapnusin ning ara, anggun Israel nang nirya arye, batakna kum aryuk, pia ati winipnin banamlume. Ara, awala ara, aning ton kintinibuka na si erebuka kina ati arelyanganamlume nyapdeiamsuk touk, aning tuba-tuba arenamabe. Tonda, elce, beren tam talak ap, inipnamalye talak ap domba ato ning opmunyakarye, uku dongonamlume ‘nyamuk ning ap, tonda, Winiryuk tiknamle wala talak ap, aning kintinibuka arenamlume,’ tonda, ‘Talye pil dona kumce, dikdik sen sum, Sabat sum deice aning ton winipnamlulume,’ nyapdeiamsuk touk, nunce, ‘Pia aninguk wininamapʼ tenen ati, el si eren aik dopnamneʼ nyabuk.

⁵ Na teninun ning ara, Allah Yahweh el si eren aik ati, narye dopnamne ning ara, weik aik ap, tonda pia urasin teleb kibuka dopnamne. Winipnamna deiyok ara, yuk nang im sirya, mutuku sirya nirya arye, ‘Nun ni koprobaʼ tenen, yuk talye ning ap, isa ati si erenamak ning ara, talye ulul bukni, nun si erenyap Allah ara, weik mambul ap, mikip weik ap ulule.

⁶ Elda pia mikip weik ulula ati, dipkoprob ning ara, yata tonye birye elti, teleb aik dopting do? Kume, ninye tonoknye birye Allah el si eren aik ati kum doptue. Na babye kum winiptinye. Aning deiyok ara im tam nirya babye, pia im deice ulul ning babye, el ulul ning nirya ara, wekuka kum uptue. Tukwak mutuku noutam nirya ap, im deice noutam nirya ap, asukumuk kum ulule. Ati ara, nara yata tonye ubtinirye, Allah ati, el aik doptinye do? Kume na Salomo biryuk, aning kum winiptinye. Tonok ning ara, Allah Yahweh el si erena ati, kambing ato ning obibirye, uku dongopnamabak ap, tonda, siltong teleb ning uku dongobibiba, uku diplirye, siltong teleb ning weleplyopura, Allah arye kekeplirye kanye deipnamsile. Ati, Allah el aren sukum ara, narye dopnamne.

⁷ Anyaik dopnamne ati ara, wini talak Hiram ance aik dona ati weik kel nang ton, dopdeipnutumba, sikce melinamsiyake. Ara, dekena weik ning emas ap, perak ap, tembaka ap, tonda kat ning besi ap, tonda urasin pia teleb baju bol kain lelan warna unggu ap, baju bi bol ning ap, wina pia kel weiknye ton dopdeipnunilyame. El anye bira keil ap, yo ap ati pia urasin teleb ubuka delinanye dopdeipnilyame. Apil winibuka donamle talak ara, Yerusalem mutuku noutam ap, Yudea tam noutam ap, na ni koproba Daud elce akunum wipdeiamuk nang ara, na ap, neika pil dopra unamake.

⁸ Tonda, narye akunum bikamse. Ara an mutuku nang ara, yo wena ap, aik dona ati yo kintinina ap ara kel weik bikinyake. Ati ara, na kwit Hiram, ance yo yala-yala nirya wibuka kintinipmince, dobuka na dam boyanamnilyame. Ara kepyal yo ap, cendana yo ap, Libanon mutuku arye na dam boyanamnilyame. Ance nyapminyeba, winipnamak talak ara, narye na pil melibuka doninyak nang ati nyapniba, na kwit Hiram an mutuku noutam arye apil donyak nang, sik amu tam ubikirye, an mutuku nang ati melilbinamake.

⁹ Urasin teleb yo kintinipnamak ning ara, mitik tonun kum bukni, pia weik tonun kintinibikirye, na dam boyanamake. Aning deiyok ara, ani. Ara, ‘Allah Yahweh el si eren aik ati dopnamne,’ tenepse ning ara, urasin pia teleb ap, nong weik aikak dopnamne.

¹⁰ An mutuku nang arye, urasin teleb kat yo webuka kintinip deipnamak ning dekna ati ara, gandum duk teikicak arye, gandum tepung, yupa weik, dua ribu (2.000) ton (2.000 kg) arepnamne. Tonda, din ning el si jelai ara, atonun dua ribu ton (2.000 kg) tabakuka arepnamne. Tonda, anggur duk mek ninye dibikiba kanye wangalamak mek ara, empat ratus ribu (400.000) liter dopdeipnamne. Tonda, minyak zaitun ton empat ratus ribu (400.000) liter tabakuka dopdeipnamne,” Raja Salomo birye Tirus mutuku weik deiyoknye Huram biti nyabuk.

¹¹ Nyabukopura, Huram birye ninye deiyoknye Raja Salomo biti surat seken ning sekuka kintinibukce, Salomo dam tamubuka deibuk. Huram birye tamubuka sekeibuk surat noutam arye, ayupu nyabuk. “Allah Yahweh ara, elce el ‘Naʼ tenen nang, sik Israel nang ati, weik tonun bico tenelule. Winilya ati, elce an Salomo biti erepdeiamkukba, ance aninye talebuka sik ninye deiyoknye Raja ulyame.

¹² Allah Yahweh ati ara, Anda pia telebe,’ nyabuka, nun nirya arye kanye deibuka elti, si erebuka kinamabe. Elce, im ap, tukwak mutuku ap, aning-aning yala-yala ulamle ning ap, kwepdeiamuk. Elcuk, ‘Israel nang talipnamleʼ tenen, minop talak ulamuknye, an ni koproba Daud biti erepdeibukba, ninye deiyok talebuka Raja ulamuk. Tonda, Allah arye areamukba, an ni koproba Daud birye, kel weik mi an akunum deiamkuk. Tonda, Salomo anda kel weik bikina deiyok ning ap, ‘Teleb una ara, ani, Malye un ning ara ani,’ tenen ning ap, tonda, ‘E, diksukum un ning ara aniʼ tenena ap, pil dona deiyok ning ap, aning nirya ara, an Salomo biti areamkuke. Ati, Israel nang unyak mutuku nirya ara, teleb ubuka moubuka talinamlyame. Ati ara, an Salomo birye, an ni koproba Allah ati, ‘El si eren aik doptinye,’ tenena ap, tonda ‘Na un aik babye wini talak aryuk doptinyeʼ tenen, kintinipmalame,” Huram birye Salomo biti nyabuk.

¹³ Nyabukopura, ayupu ton dukgobuka nyabuk. “Ance moropmanilam touk, nara tonoknye, el si Huram Habi, wipdeipkine. Elda, kel weiknye ton ulule. Anye bira, pia kel weiknye ap, pia teleb pil donanye ap ulula ati, anye dobuka an dam dopdeipnamkine.

¹⁴ Adopdeipnamananye el lin bira, Dan yala kilapu ati, el lin koproba ara Dan yala kil arye deiamuk. Tonda, el li bira, Tirus mutukunye ulamuk. Huram Habi bira, dekena weik ning, emas ap, perak ap, perunggu ap, kat ning besi ap, urasin teleb keil ap, yo ap, aning nirya ara, puturuna ap, memena ap ara, kel weiknye ulula ati, an dam dopdeipnamkine. Atonun, anye elda, im kalum baju bola kain biru ap, kain unggu ap, kain bi ning merah ap, ton urasin pia teleb kain el si lenan ning ap ara, elce abaju doproplirye, urasin teleb ning memeptue. Tonda, urasin teleb ubuka puturun ning dona ara, ninye arye moropne touk aning nirya ara doptue. Telebe na kwit Salomo, an amu tam pil melin nang ap, na tam nang arye, dopdeipnamkin pil melin nang ap, sik neika pil donamaka ati, dobuka arepne. Ara, na deiyoknye Salomo, anang ara, an ni koproba Raja Daud biti, el morolamuk touk pil dolamik nang ati, sik ap, an Salomo dipnalam pil don nang ap, neika pil donamake.

¹⁵ Ati ara, wini talak ara, gandum yala bitinye ap, anggur mek ap, minyak zaitun mek ap ara, nun deiyoknye Salomo birye, winibuka arepnamsine,’ nyapdeiamsuk ning ara, dopdeipsiminyeba, nun an amu tam pil don nang arye, ‘Dan talak arye yanamsil do?’ tenen, dinauk unamabe.

¹⁶ Winipsiminyopura, Libanon mutuku iknapnye tam arye, keipyal yo ap, yuk yala yo ap webuka deibipyeura, nun deiyoknye an patanmakil touk webibirye, boyanuka perahu memebuka adeice ayo koubuka deibipyeura, weik laut mekwen deice arye boyanuka Yope mutuku boyanamabe. Yope mutuku akunum delilyapyoura, na ni ance ayo nirya boyanuka, Yerusalem mutuku bobinamlyame. “Raja Huram birye Raja Salomo biti nyabuk.

Salomo birye, Allah Yahweh el si eren aik dona ati, deiyok koubuk yupu

¹⁷ Ninye deiyoknye Raja Salomo birye, yuk mutuku nang bukni, Israel mutuku noutam ansinibuka neika ulamik nang ati, sik si sekena deiyok koubuk. Aning ara, minop talak el li koproba Raja Daud birye winyamuk touk winibuk. Winibuka si sekuk bukni, yuk mutuku ninye asik nang yupa ara, seratus lima puluh tiga ribu, enam ratus (153.600) nang kibuk.

¹⁸ Sik anang kan-kan bukni, ton yupa tujuh puluh ribu (70.000) nang ara, anyaik don ning bolsusuna ap, boyangana ap ati, anang ati apil arebuk. Atonun delapan puluh ribu (80.000) nang ara, ‘Urasin teleb keil memebuka deipnamakʼ tenen, mutuku kon keil teleb uka boyanganamak tenen wipdeibuk. Tonda, tiga ribu enam ratus (3.600) nang ara, ‘Apil winibuka dopnulume,’ nyana deiyok nang ap, tonda apil deiyok kibuka donamakʼ tenen, wipdeibuk.