2 Tawarikh 19 - Eipomek

Nabi tonoknye, Yosafat dam binuka wenebuk yupu

¹ Yehuda mutuku taleamuk ninye deiyoknye Raja Yosafat bira, Siriya mutuku nang akunum onmoka ani batakuka, el mutuku Yehuda tam noutam bukni, Yerusalem weik asik noutam ninye deiyok nang ulamik ak, teleb deice arye tamubuka yayuk.

² Nabi tonoknye, el si Hanani, birye deiamuknye Yehu, elce ninye deiyoknye Raja Yosafat dam nyalyayuk. Anabi arye nyabuk. “Na deiyoknye, anda yata wiripnalam do? Sik malye-malye ning talebuka unyak nang ati, yata deice arye, aning tenebikce nang ati melilyam do? Tonda, aning atonun, nun ni koproba Allah Yahweh ati, ‘Nun like, elda nun like,’ tenebikirye, kanye bokoltolye nang ati, sik anang ap, na ap, neika arye yuk mutuku nang ati, mal olanamabe. Anang melipnamne,’ tenelamlirye neika banmalum nang ara, yata ati do? Na deiyoknye, ance utenenmanilama deice arye, nun ni koproba Allah Yahweh arye, anti yu weik upliba, elce na deiyoknye anti wenepnamakile.

³ Bukni, anoutam ara teleb ning ton tuba aupmakile. Ara an areplum mutuku noutam nirya arye, talye ning si erena ati, amutuku nang arye, isa si Asyerah, el si erena ati, cang weik yo dobuka iklamik ning nirya ara, ance nyaplumba, an pil dona deiyok nang arye, aning nirya loklobuka yukak deibikce, kum kipdeibik. Aning winiplum ning ara, teleb. Tonda, an babye, Nun ni koproba Allah Yahweh ati, el siuk erenamne tenen, El yupu uk kekepnilirye dobolbanamne. Elce, Yata yupu nyapnamnil do?’ tenen, el tenebukura, dinirye, kekenamne tenelule. Aning babye teleb winilyame,” nabi Yehu birye Yosafat biti nyabuk.

Raja Yosafat birye, Yehuda mutuku ulamik nang ati, yupu lipsisikuka bokolina deiyok nang wipdeiamuka ati, nyabuk yupu

⁴ Yehuda tam taleamuk ninye deiyoknye Yosafat bira, el ulamuk mutuku ara, weik asik Yerusalem mutuku noutam ulamuk. Winibuka, elce taleamuk mutuku noutam nirya ara, pia dabu tam noutam, arah utam uamuk mutuku, Bersyeba mutuku arye dipdongobuka bilamuka ani, iknapnye tam, arah selatan tam uamuk, Efraim tam noutam bilamukce pil dolamuk. Winilamuka deiyok ara, ‘Na mutuku nang arye, sik malye un ning batakicak arye, nun apu yapu ati, kalekuka melilamuk Allah, Allah Yahweh el uk tamubuka talipnamap tenen, dipra bilamukce, yupu nyalamukba, anang kekelamikce, Allah el tam tamubuka balamik.

⁵ Tonda, el amutuku Yehuda mutuku noutam nirya ara, ‘Yuk mutuku nang arye olyasicak tenen, weik asik domikce, anyasik dana-dana tam, cang keil arye poka domikak binuka, sik amutuku ulamik nang melina ati, binuka yupu tanah deiyok nang erepdeibuk.

⁶ Tonda, yupu tanah deiyok nang erepdeibukce, ayupu nyapdeiamuk. “Ura, ‘Aning ara, wininamlume, aning ara, pia kum wininamlume,’ nyan yupu nyabuka, ninye yupu lipsisikuka nyanamlume. Ayupu nyanamlum talak nirya ara, moubuka tenepmunce, teleb ninguk yupu bokuka delinamlume. Ara, anggun kanye talima noutam aryuk, moubuka tenepmunce, aning nirya, yupu lipsisikuka bokolinamlum nirya ara, anggun ninye koprop aryuk tenibuka nyana bukni, nun ni koproba Allah, el si Yahweh arye tenelul touk, yupu bokolinamlume. Amutuku nang ati, yupu lipsisikuka bokolinamlam talak nirya ara, Allah Yahweh arye melibuka talipsiliba, anggunce, ‘Winipnamabe,’ tenebuka, yupu moubuka talinamlume.”

⁷ “Ati ara, ayupu bokuka nyanamlum talak ara, Allah el si Yahweh ati, ilil tenalume. ‘Aning ara, winipnuyap do, yuk ning winipnuyap do, kum do?’ tenen, moubuka teininamlume. Deiyok ara, nun deiyoknye Allah el si Yahweh aryuk, yuk nang nirya ati, dipkoprob sik ulamikce touk yupu lipsisikuka bokolilule. Ton tam nang ati, ‘Na kanye deipne,’ tenebuka, yuk tam nang ati, ‘Aning ara na like,’ tenena kumce, atouk teleb kibuka yupu bokolilule. Elce ninye mutuku sirya, im sirya nirya ati, malye kum kilule. Tonda, ‘Aning ara, na like,’ tenena kumce, ton tam nang ati, ikin kipdeiplirye, ton dana tam nang ati, cakman ning kum arelule. Moul ning dolona kumce, ninye nirya ulamikce touk tenebuka, yupu lipsisikuka bokolilule. Sikda, el tonok apil talebuka donamluma ati, sik babye, el ulye touk kibuka, teleb yupu lipsisikuka bokolin pil dona deiyok ning talebuka, pil teleb don nang unamlume,” nyabuk.

⁸ Aning atouk ton, sik Yerusalem mutuku noutam ulamik nang nirya ati, Yosafat birye sik Lewi yala nang ap, Yehuda mutuku noutam ulamik yala-yala nang ulamik touk, deiyok talina ati deiyok-deiyok nang ap, tonda sik imam-imam nang ap, ‘Yupu lipsisikuka bokolina pil talebuka donamakʼ tenen, wipdeibuk. Aning nirya ara, Allah Yahweh arye, “Aning ara winipnamlyame, aning ara, kum wininamlume,’ nyapdeiamuk yupu, dipkoprob talibuka, ‘Yupu bokolina deiyok nang unamakʼ tenen, wipdeibuk. Tonda, sik Yerusalem mutuku noutamuk ulamik nang arye, malye kanye bobikirye, yu uplyeura, yupu deice arye waldanamak talak ara, ‘Adeiyok nang aryuk, yupu lipsisikuka nyanamakʼ tenen, anang wipdeibukba, Yerusalem mutuku noutam ulamikce, apil talebuka dolamik.

⁹ Tonda, Yosafat birye, wipdeibuk nang ati, ayupu ton nyapdeibuk. “Anggun anang nirya ara, anggun apil talebuka ulamlum talak nirya ara, aninguk tenebuka wininamlume. Ara, Malye winibibyak, Allah arye wenepsilyak tenen, nun ni koproba Allah Yahweh ati, ilil ubuka unamlume. Tonda, anggun kanye talima nirya batakna kumce, pia moubuka umunce, kanye pia deibuka, apil talebuka donamlume.

¹⁰ Anggunce apil talebuka yupu bokolinamlum talak nirya ap, yupu lipsisikuka bokonamlum talak nirya ap, anggun kayapu nang, amutuku unyak nang ati, nyanamlume. Ara, anggun nirya arye, Allah Yahweh ati malye-malye kum wininamlume. Elce, ‘Aning ara wininamlume, aning ara kum wininamlume nyaipsuk yupu ara moubuka wininamlume. Ati, yata ning do nirya, ninye arye opdakceba, ining saklamle ning ap, wenen yupu deice arye mem nyalin ning ap, Aning winina meme, aning ara winina telebe nyan ning ap, Aning-aning nirya ati akunum nyapdeibuk ning ap nirya ara, aning nirya moubuka wininamlume. Nun mutuku noutam unyak nang nirya ati, nyanamlume. Sik nirya arye, Allah Yahweh ati malye kilina ara, pia meme. Malye ning winipmunyeura, ‘Allah el yu ara, anggun deice ap, anggun kayapu nang deice ap, ikin ning deipsilyak arye, wenepsilyakʼ tenen ati nyapsine. Bukni, narye, ‘Winipnamlume,’ nyapdeipsin yupu, moubuka winipmunyeura, anggunce malye un ning talebuka, kum wininamlume.

¹¹ Tonda, sik imam-imam nang, sik weik deiyoknye, el si Amarya ara, anggun deice tam deiyoknye unamsile. Yata winin ning do nirya, Allah Yahweh el dam yupu lipsisikuka bokolinalamlum ning nirya ara, anye birye melinamsile. Aning atouk, amutuku taleamuk deiyoknye, Raja biti aning nirya ara, Yehuda yala nang, sik deiyoknye Zebaja, elce anggun deiyoknye uplirye, melinamsile. Zebaja el li bira, Ismael ulamuk. Tonda, sik Lewi yala nang arye, sik deice tam kina ati, sik deiyok nang atonun unamsiyake. Sikce talipsikcak arye, ‘Aning ara winipnulume nyan yupu ara nyanamsiake. Ati ara, narye sik yupu bokolina deiyok nang wibuka deipmasin nang nirya ara, Ilil una kumce, anggunce kanye talima eren deice, mikip weik arye apil talebuka unamlume. Teleb kibuka umunyeura, aning winibikce nang ati, Allah Yahweh ara, anggun ap neika unamlume. Elce anggun kanye talima noutam arye melinamsile.” Yosafat birye, sik Yudea tam yupu lipsisikuka bokolina deiyok nang ati nyabuk.