2 Tawarikh 18 - Eipomek

Nabi Mikha birye, Israel tam nang deiyoknye Ahab biti, “Awinipmalam touk winina meme,” nyabuk yupu

¹ Yosafat Yehuda mutuku ninye deiyoknye Raja ulamuk talak ara, weik bona talinanye ulamuk. Tonda, el aning talilamuka deice arye, weiknye ulamukba, Yosafat el tam nang arye elti, si erelamikce, ‘Elda weik mambulnye,’ tenelamikce, elti, kanye delilamik. Raja Yosafat ap, Raja Ahab ap, ‘Nunda, teleb ubuka neika unamapʼ tenen, yupu taliprik ati, Raja Ahab birye, el kilmu Raja Yosafat bak arebukba, Yosafat el mi arye, akilmu dobuk. Awiniprik ning ara, Yehuda mutuku nang ap, Israel mutuku nang ap, olana kumce, teleb ubuka neika unamapʼ tenen, winiprik.

² Weiknye Raja kibukce, daulamuka ani, yata barye keting tamun ton akunum kibukura, Yosafat birye Ahab Samaria mutuku noutam ulamukak dilbiyuk. Dilbiyuk talak ara, el ap, el melin nang ap nirya arye, binuka sik unmekak, Ahab tam nang arye, sikti, si erebik. Akunum binuka wekelbiyil talak ara, Israel tam taleamuknye Raja Ahab birye, ‘El ap, nun ap, weik kwalya kwalibuka dipnamapʼ tenen, el melin nang ati nyabukura, sikce domba basam ap, sapi basam ap obuka, Yosafat biti, arebik. Anoutam bukni, lo aubuk talak aryuk, Ahab birye, Yosafat biti nyabuk. “Kume wini talak ara, Ramot mutuku bukni, Gilead mutuku nang olbinamlume,” nyabuka morobuk.

³ Nyabuka morobuk ati, biyukce asipdeyuk. “Yosafat anda na Ahab ap neika Ramot mutuku nang ati olbinanam do?” nyabuk. Nyabuk buk, Yosafat birye nyabuk, “''Yo teleb, ati an yin talin nang ap, na yin talin nang ap nirya, neika tonok nang atonun ansinibibirye, an ap, na ap tonok kanye bopnaname. Utenenuna ati, nun neika arye, Ramot mutuku nang olbinamabe,” nyabuk.

⁴ Nyabuk bukni, Yosafat birye Israel tam taleamuknye Raja Ahab biti nyabuk. “Pia teleb ning ara, nunce, nun ni koproba Allah el si Yahweh arye, yata nyapnamsil do? Ramot nang olbinamap do, kum do?’ tenenun ning ara, Allah ati asipdenamne,” nyabuk.

⁵ Yosafat birye nyabuk ati ara, atalak, Israel tam ninye deiyoknye Ahab birye, el mutuku noutam ulamik nabi nang, yupa weik empat ratus (400) nang yukubukura, sikce bulubuka yayik. El un dam yayikura, elce sikti, asipdeyuk. “Ara dipkoprob na ap, na tam nang arye, Ramot mutuku nang olbitinye do, kum do?” nyabuka asipdeyuk. Nyabuka asideyukura, sikce nabi-nabi nang arye tamubuka nyabik. “''Yo telebe. Nun deiyoknye amutuku ati ara, Allah arye mikip arepsiliba, ance amutuku nang ap, sik mutuku ap, malye kipmince, aning nirya dopropnalame. Allah arye aning nirya arepnamkile,” nyabik.

⁶ Nyabik bukni, Yosafat birye Ahab biti, tamubuka asipdeyuk. “''Yo, anabi-nabi nang arye, nyapmakiak bukni, nun mutuku noutam ara, yuk nabi nang ton aunyak do? Ara, dipkoprob Allah Yahweh arye nyalul yupu kekebuka laka nyana deiyoknye ton aulul do, kum do? Aupmalyeura, anye atibuk, asipdenamane,” nyabuka, ninye deiyoknye Yosafat birye nyabuk.

⁷ Nyabuka asideyukura, Ahab birye tamubuka nyabuk. Kume, tonoknye ton tuba aunmale. Ara ninye si Yimla, elce deibuk nye, el si nabi Mikha aulule. Anye birye Allah Yahweh arye nyalul yupu kekelula ati, elak asipdeminyeba, elce, ‘Allah Yahweh arye nyapsile nyabuka, laka nyapsutue. Bukni, narye anye biti ara, ‘Na like,’ tenenune. Deiyok ara, elce nati teleb yupu ton pia kum nyanulule. Elce nati, Pia malye upnamleʼ tenen ninguk nyanulule ati, anye birye nyalul yupu ara, na like,” Ahab birye nyabuk. Nyabuk buk, Yosafat birye tamubuka nyabuk, “Se, na ka Ahab, ayupu atonun ara nyana kume!” nyabuk.

⁸ Nyabuka ati, Ahab birye, aning akunum kekebukce, Ahab el amu tam melibuka pil dolamuk deiyoknye tonok ati, “An adiparyuk Yimla, elce deibuknye, nabi Mikha dam pola binuka nyapminyeba, tamubuka na dam anggun bitinye neika yanudurume,” nyapdeibukba, anye birye Mikha dam laka nyalbiyuk.

⁹ Aminyan talak ara, anye birye binuka nyabukba, Mikha tamubuka Ahab dam yayuk talak ara, sik ninye deiyok nang bitinye, Ahab ap, Yosafat ap, ninye deiyok nang kiniklamak baju pia teleb ning kinikmarikce, sik weik nang bulamak ning deice yuk-yuk bukmarik. Sik anang bukmarikak ara, gandum duk wina ap, teikna ap pil dolamikak, ara Samaria mutuku bana ati, bisik bublan dam binuka bukmarik. Bukmarik buk, aminyan winipnamuk ning yupu laka nyana deiyok nang ara, yupa pia weik, sik bitinye dam yanganmikce, yupu weik arye tanmek.

¹⁰ Atalak ara, Ahab el mutukunye, el si Kenana birye deiamuknye, el si Zedekia birye, yupu ton nyanmok. Ara, sik aminyan talak winipnamuk ning yupu nyapdeipne touk laka nyan nang, Israel tam ulamik nabi-nabi aunmek bukni, tonoknye nabi Zedekia birye, sapi basam tace dana-dana belyalamuk urasin atonun, kat ning besi arye, teleb arye kintinibuk ning bopmoka arye, Ahab dam yayukce nyabuk. “Kume, anda na deiyoknye. Allah Yahweh arye nati nyapnuk touk yanuka nyapkine. Na bopman kat ning atonun arye, dobuka bobiminyakarye, sik Siria mutuku unyak nang obuka, sirya dakmince, sik unyak mutuku nirya alubuka dopropnalame, nyapkine. Zedekia birye nyabuk.

¹¹ Ura, anye Zedekia birye nyapmok touk, sik awekmek nabi-nabi nang nirya, Ahab taleamuk mutuku ulamikce laka nyana deiyok nang, nabi-nabi nang arye, ayupu atouk nyanmik. Ara, “''Yo, aning ara pia dip nyapmasile,” nyabik. “Nun ni koproba ance Ramot Gilead mutuku noutam unyak nang nirya olbimince, malye kipnamlame. Ara talye kume, Allah Yahweh arye, mikip weik arepkiliba, anyapman touk dipkoprob winipnamlame,” nyanmik.

¹² Nyanmik ning ara, sik amutuku noutam wekmek nang nirya arye, kekenmek. Atalak ara, Ahab birye dopdeibukba Mikha dam laka nyalbinmoknye birye, ton ap Mikha biti nyabuk “Naio, dipdelyame. Amutuku yupu nyana deiyok nang, aminyan winipnamne ning ati, laka nyana deiyok nang nirya arye, sik amutuku nabi-nabi nirya ara, “Dipkoprop, Siriya tam nang olbimince, malye kipnalame,” atouk nyanmake. Ara sik nirya arye, ‘Ahab dipkoprob Ramot Gilead mutuku nang nirya obuka sirya daknalame. Allah arye mikip arepkiliba, anang obuka, sirya daknalame,’ nyanmaka ati, Mikha ance, ayupu atouk ton, teleb yupu binuka nyapnamlyame. Yuk yupu nyana kume. Ance aninguk binuka nyapminyeba, sik ninye deiyok nang kanye pia teleb kipnamle. Ance ton, Teleb yupu uk binuka nyapnulyam tenen ati nyapkine,” nyabuk.

¹³ Nyabuk bukni, sik bitinye Ahab dam kabul kum yanapdik talak ara, Allah Yahweh el yupu dipkoprob laka nyana deiyoknye Mikha birye, el dam laka nyalbanmoknye biti nyabuk. “Kume, nara yuk ning ton kum nyapnune. Allah si Yahweh ara, dipkoprob kam ulula ati, yuk talye yupu kum nyaptinye. Na ni koproba Allah Yahweh elce nyapnunil yupu uk, dipkoprob aninguk binuka nyapnune,” nyabuk.

¹⁴ Nabi Mikha birye akunum ayupu nyabukura, sik abitinye nang Ahab bukmukak birikura, Israel nang sik deiyoknye, Raja Ahab birye asipdeyuk, “Mikhao yatato yupu nyapnunilam do? Na ap, Yosafat ap, nun bitinye arye Ramot Gilead mutuku nang ati olbinanam ning ara, teleb nyapsiminyeba olbinanam do? Kume, nyapsiminyeura, bataknanam do?” nyabuka asipdeyuk. Nyabukura, Mikha birye tamubuka nyabuk, “''Yo, olbana uka. Omutuku unyak nang olbiminyeura, malye kipnamlame. Na deiyoknye Allah elce anti, mikip arepsilirye, melipkilyeura, ance Ramot Gilead mutuku nang opminyakarye, sik unyak mutuku noutam nirya ara dalubuka dopropnamalame,” nyabuk.

¹⁵ Mikha birye nyabukba, Israel nang sik deiyoknye Raja Ahab birye, tamubuka Mikha biti nyabuk. “Dipkoprop Allah Yahweh si deice arye pia dipkoprob ninguk nyapnamnilyame. Talya yupu pia kum nyanamnilyame. Yata barye talak nirya ara, narye anti, aning akunum nyabkise do? Ati, Allah Yahweh, si deice arye, pia dipkoprob yupu uk nyapnunilyame,” Ahab birye nyabuk.

¹⁶ Nyabukura, nabi Mikha birye tamubuka nyabuk, “Dipkoprop ning ara ani. Na dinmasinak Israel mutuku yin talin nang ara, domba basam weinanye, ton kum ati bokwalwalap danuka, talye-talye mutuku yuk-yuk balamak touk unmekak eipse. Aning eipmaseba, nun ni koproba Allah Yahweh arye nyapnuke. Wini talak ara, sik Israel tam unyak nang ara, sik weik deiyoknye bira akunum kum kipmala ati, sik anang nirya ara, sik talye kanye bokuka, sik mutuku uk tamubuka binamake. Teleb ning ara, ton ap olana kum arye, talye kanye bobuka sik mutuku uk tamubuka binamake Allah Yahweh arye nyapdeipnuke” Mikha birye Ahab biti nyabuk.

¹⁷ Raja Ahab birye ayupu akunum kekebukura, elce Yosafat biti nyabuk. “Arando kao, na akunum nyapmakunu touk, anye birye, nyapmasile. Anye Mikha din ning ara, atalak-atalak pia nirya ara, elce na dam teleb yupu ton kum nyanulule. Malye yupu uk nyanulule ati, asum babye, malye yupu nyapnile,” nyabuk.

¹⁸ Ayupu nyabukura, Mikha birye tamubuka nyabuk, Ati ara na nyapnusin yupu, moubuka kekepnururume! Dipkoprop yupu nyapmakine. Ati Allah Yahweh arye nyapdeipmakil yupu ara, moubuka kekeplyame. Aning-aning nirya deice tam ulirye, elcuk talilulnye, el si Allah Yahweh, el im deice arye mambul bunak bukmokba, el pil don yin talin nang malaikat nirya ara, el taruk kwanim tam ap, sirik tam ap, bukikce tikmekak eipse.

¹⁹ Eipse talak ara, Allah Yahweh arye nyabuk. “Yatanye birye tilila yupu deice nyapmanilba, Ahab birye, diba tenepnirye, ‘Ramot-Gilead mutuku olbinamanʼ tenen, bisik banmokak, sik olan talak ara, amutuku nang arye el oplopnamak do?” nyabuk. Nyabukura, abulupmek yin talin malaikat kan-kan arye, tonok, tonoknye yuk-yuk arye, “Aning winipnuyap do? Aning winiptibye do?” nyabuka, yupu yuk-yuk arye nyabik.

²⁰ Nyanmika ani, aminyan talak ara, yin talin malaikat tonoknye tukwak arye, Allah si Yahweh dam tikukce nyabuk. “Narye Ahab el kanye tamuna ati, kekena teleb yupu deice arye, Winipnalam nyalbinamne. Nyabukura, ‘Na nyapmakin touk winipnamlyame nyapnamne,” nyabuk.

²¹ Ayupu nyabukba, Allah Yahweh arye amalaikat tonok ati asipdeyuk. “Yata wiripminye deice arye, el Ahab kanye ara tamupnamle do?” nyabuk. Nyabukba, amalaikat arye tamubuka nyabuk. “Aning ara, Ahab dam yupu nyalinamak nang, sik nabi-nabi ati, sik kanye noutam tilila yupu nyapnyeura, binuka kekebikirye, atalye yupu Ahab dam binuka nyalinamake,” nyabuk. Amalaikat arye nyabukba, Allah el si Yahweh arye tamubuka, amalaikat ati nyabuk. “Aning binuka nyapminyeba, anabi-nabi nang arye Ahab ati, talye yupu nyabikceura, dipkoprob kekebuka Ahab el kanye tamupnamle. Ati adiparyuk winipnamle,” nyabuka, Allah arye amalaikat ati nyabuk. Anyabuk ning nirya ara, Mikha birye Ahab biti laka nyabuk.

²² Mikha birye ayupu nyabukura, ayupu ton tabakuka nyabuk. “Ayupu nyanmik ning nirya ara, akunum kekepse ati, na kele. Sik amutuku unyak nabi-nabi nang nirya arye, yanuka nyanmik yupu nirya ara, talye yupu nyanmakiake. Ara talye ati kume. Allah Yahweh arye nyabukak, el malaikat tonoknye birye, talye yupu talibuka, sik nabi-nabi nang dam nyabukba, anang arye an dam yanuka talye yupu nyanamakiake. Bukni, aning ara Allah Yahweh elce tenepmal touk wininmake. Ati ara, anda Raja Ahab biti ara, dipkoprob kanye imun weik ning dopropnalame. Allah Yahweh arye tenepmakil touk akunum winipnalme.” Mikha birye Raja Ahab biti nyabuk.

²³ Mikha birye ayupu akunum nyabukura, Kenana elce deiamuknye, nabi Sedekia arye ayupu kekebukce adiparyuk yu ubuk ati tikuka yayukce, nabi Mikha el katum yanuka bokuk. Winibukce Allah Yahweh arye dopdeipmok malaikat ara, na dam yanuka nyapnukce, na dam arye lopdakuka an dam binmok talak ara, dan tam bisik binmokce nyapmakuk do?” nyabuka asipdeyuk.

²⁴ Nyabuka asideyukura, Mikha birye anye Sedekia biti nyabuk, “Anda, ‘Malaikat arye dipkoprob yanuka nyapmanue tenepmalam bukni, talye yupu nyaltakna isa arye yanuka nyapmakuk adano. Ati, ance nati, asipdenmanilam ning ara, otalak upnamle ning ara, anda moubuka biknamlyame. Otalak ara, an ilil upkilya ati, aik pum tamuk duknupnalam talak aryuk, anda biknalame.” Mikha birye nyabuk.

²⁵ Ayupu nyabukba, Israel tam ninye deiyoknye Ahab kekebukce, adiparyuk el mapu ati nyabuk. “Anggunce anye tomobuka anyaik deiyok kibuka talilyak arye, yupu bokona deiyoknye, Amon dam bobilulume. Tonda, na mi Yoas, amutuku deiyoknye ap, sik dam bobilulume,” nyabuk. Nyabukura, adiparyuk Mikha tomobik.

²⁶ Ahab birye ayupu nyabukcuk, yupu ton tabakuka nyabuk. Aning bitinye, sik dam bobimunyak, el wenen aik deibikceura, din ning pia teleb ning ton kum arenamlume. Mikha biti ara, talye roti ap, talye mek ap arenamlume. Anye el din ati ara pia mitikto aryuk arenalum bukni, na Ramot Gilead mutuku nang dam olbinamnya ani, teleb arye tamubuka yanyopura, anye eipdananame. Ati, sik Amon ap, Yoas ap ati, sik dam narye nyapmasin yupu bobuka nyalbinamlume,” nyapdeibukba, Mikha tomobuka bobiyik.

²⁷ ‘Wenen aik bobinuka deipnamapʼ tenen, kintinibikura, el nabi Mikha birye yupu tonok Ahab biti nyabuk. “An Ahab bira kekepnilyame! An kum opkikirye batakikceba, teleb aryuk tamubuka yaminyeura, anggun nirya arye biknamlume. Ara, ‘Allah si Yahweh arye Mikha deice nyapdeiamuk ning ara, Allah arye kum nyapdeiamukʼ tenen, biknalame. Bukni, an kum tamubuka yaminyeura, ‘Se, ara Allah arye, dip nyapdeiamukʼ tenen, an kel biknamlyame. Ati, ayupu nyapman ning ara, anggun akekenmalum nang nirya moubuka bikmunce, dinamlume. Narye nyapman yupu ara, dipkoprob upnamle,” Mikha birye nyabuk.

Raja Ahab Ramot-Gilead mutuku arye, obik yupu

²⁸ Israel tam deiyoknye Raja Ahab ap, Yehuda tam taleamuknye Raja Yosafat ap, sik bitinye adiparyuk, ‘Ramot-Gilead mutuku noutam ulamik nang nirya ati mal pi binunam tenen, pi birik.

²⁹ Sik abitinye nang mal pi binurik talak ara, Israel tam deiyoknye Raja Ahab birye Yosafat biti nyabuk, “Kume, nara yin talin nang koprop atonun kibuka, ninye olbinun ati, ninye deiyok nang kiniklamak baju ara, na kum ongopnune. Amutuku nang kum biknamniyak tenen, talye yin nang kiniklamak ninguk kiniknaman. Bukni, an Yosafat biti ara, ninye deiyok nang kiniklamak ning, teleb baju ara anuk kiniklyame,” nyabuk. Akunum nyabuk ati, Israel nang sik deiyoknye Raja Ahab bira, ‘Yuk nang arye eibuka bikicak tenen, yin nang koprop kiniklamak baju arye kinikuka, Ramot-Gilead mutuku ulamik nang ati olbiyuk.

³⁰ Winibuk talak ara, Siria tam nang taleamuka deiyoknye birye, el tam yin talin nang ati, akunum nyabuk. Anggun anang ara, ninye olbinuyap talak ati, kuda basam tuku deice libuka balul ning, kereta kuda perang, el tam nang kan-kan arye, aning nirya taleamikce balamik nang ati, yupu nyapdeibuk. Ara, “Anggun ninye olbinumunye talak ara, weik nang babye, mitik amu tam nang babye, yuk talye nang kum tenepnamlume. Bukni, sikda Israel tam nang talebuka ulul ninye deiyoknye Raja Ahab, el tibuk dobuka opnamlume,” nyapdeibuk.

³¹ Ayupu akunum nyapdeibuk ati, el tam yin deiyok nang ap, sik mapu yin talin nang ap, sik neika minopce pola biyik. Ninye mal olbana ati biyikura, adiparyuk Yosafat ara ninye deiyoknye Raja nang kiniklamik baju pia teleb baju kinikukak eibik. Eibikce, ‘E, ara weik nang kiniklamak baju pia teleb kipmalnye bira, elda dipkoprob Israel nang sik deiyoknye Raja Ahab ara akunum tenen, dobolbiyik. Dobolbinuka warikik. Warikikbuk Yosafat birye, “Se, nara Israel nang sik ninye deiyoknye Raja kume. Nara Raja Ahab kum unune,” nyabuka ngalukukce, Allah ati morobuk. Ngalukuka morobukura, Allah Yahweh kekebukce melibuk. Melibuk deice arye, Siriya mutuku yin talin nang, aopdanmik nang dobuka, yuk tam yakukba, anang arye Yosafat biti, tuba dobolbana kumce batakik.

³² Ati, elce ngalukuk ning ara, sik abinuka warikik yin talin nang ap, tonda ayin talin nang sik deiyok nang ap, Yosafat el urasin eibika bikikce, “Kume, elda diba, sik Israel nang sik deiyoknye Raja Ahab kum ati, Kum olbinuyap tenen, dobolbana kumce batakik.

³³ Yosafat batakikce, yuk nang ap olanmika ani, atalak ara, Siria mutuku yin talinanye tonok arye, ‘Israel nang sik deiyoknye Ahab ara ani, ‘Ahab bira asukum banmale tenena kumce, talye mangkau arye, mal talye turukuka dobukba, Ahab banmok buk el nong ak bikilbiyuk. Amal Ahab nong deice bikilbiyuk ning ara, Ahab elda ninye olan talak kiniklamik kat baju kinikmokce banmok bukni, agat baju pakudakaldongolamak bisik kin-kin mitik lo uamuk arye, mal asukum bikilbiyukce kulubuka dana tam panabuk. Raja Ahab mal bikukak ikin weik ubuk anye binmanto kum ati, el melinanye, kereta kuda perang bopmuknye biti nyabuk. “Se, amutuku ara ninye weik olanmak tam batakuka, yuk karin tam bikbik abuka binuname. Sikce mal dobakba, na nong marapniyake atie,” nyabuk.

³⁴ “Otam karen ak binuname,” nyabukura, sik adiparyuk bai tam sakuka kum birik. Ara, sik mal olanmikak arye, otam mitik karen ak banmarika ati, anoutam nirya ara, sik Siria tam nang ap, Israel tam nang ap olanmikce unmek sukum, mitik karen ak arye binuka unmarikce dinmarik. Ara, el kuda arye libuka tuku deice balamuk ning, kereta kuda perang dam baribuka bukmokce, asukumuk unmarikce, dinmarik. Atalak ara, Ahab el nong mal arye bisikapmek, dila oupmok tam arye, ining pia weik banmok. El ining nirya banmoka ani, keting akunum komubukce, lukunyan kibuk talak ara, ninye deiyoknye Ahab, adiparyuk dibuk.