2 Tawarikh 17 - Eipomek

Yosafat ninye deiyoknye Raja tikuk yupu

¹ Ninye deiyoknye Raja Asa akunum dibukopura, el li koproba pununa ati, Yosafat Yehuda mutuku talina ati wipdeibik. Tonda, sik Israel nang olbana ati mikip kipdeibuk.

² El yin talin nang nirya ara, ‘Yu nang arye olyasicak tenen, Yehuda tam noutam, ton weik asik cang keil arye antanabuka domika poka dam kintinip deibukura, binuka kaliklamik. Tonda, Yehuda tam bukni, yuk yin talin nang yupa ton, yuk-yuk dobuka poka balye tam kaliknamak tenen dopdeibuk. Tonda, el li koproba Raja Asa birye malye kibukce, dalubuka dopromuk mutuku, Efraim yala nang ulamik mutuku noutam babye, yin talin nang yupa ton dopdeibukba, sikce anyasik dobuka ulamik noutam binuka kaliklamik.

³ Yosafat kabunye tuba ulamuk talak ara, el apu koproba Daud birye diksukum kibuka ulamuk touk, el babye teleb kibuka ulamuk ati, Allah Yahweh arye, Yosafat biti pia melilamuk. Tonda, Yosafat elda, isa si Bahal, atalye ning ati, Yata wiripnamle do?’ tenen, elti, morobuka, si ton pia kum erelamuk.

⁴ Isa si pia kum erelamuk bukni, el li koproba Allah el siuk erelamuk touk, Yosafat babye Allah el siuk erelamukce, Allah atibuk, Yata winipnamne do?’ tenen, asilelamukce, morolamuk. Atouk, Allah arye, “Aning ara wininamlume, aning ara pia kum wininamlume,” nyapdeiamuk yupu talebuka ulamuk. Tonda, el tuba kam ulamukce pil dolamuk talak ara, Israel tam mutuku noutam ulamik nang arye, malye-malye weik ulamik ning ton, aning atouk kum ulamuk.

⁵ Allah si Yahweh arye, Yosafat biti, mikip weik kibuka ati, ‘Yehuda mutuku noutam ninye deiyoknye Raja Yosafat birye, ‘Yehuda mutuku talebuka unamleʼ tenen, mikip weik ning areamukak, atam nirya mikip arye talibuka ulamuk. Talibuka ulamuk talak ara, amutuku noutam ulamik nang arye, dekna teleb ning ap, arena teleb ning yala-yala nirya ap, urdem bobuka, el un dam arelyangalamik. Arelamikba elda, bona weiknye ulamukak, kanye pia delilamikce, elti, si erelamik.

⁶ Mikip deice arye el kanye tenen ning ap, el talima pum ap, Allah Yahweh deice deiamukce, Allah arye, “Aning ara wininamlume, aning ara pia kum wininamlume,” nyapdeiamuk ning ati, moubuka kekebukce, talebuka ulamuk. Tonda, Yehuda mutuku noutam isa-isa si erena ati, mutuku kon deice kintinibuka deiamikak nirya ulubuka bataklobukce, Asyerah si erena ati, cang weik yo arye ikdeiamik ning babye, kwinibuka bataklobukce, aning nirya kum kipdeibuk.

⁷ Yosafat birye, Yehuda tam taleamuka ani, keting tamun winilye deice, el amu tam pil melibuka dona deiyok nang ara, winilye wipdeibukura, Allah si Yahweh arye, “Aning wininamlume, aning ara kum wininamlume,” nyapdeiamuk mem yupu dobuka balamikce, perelamik. Sikce Yehuda mutuku noutam ulamik nang arye domik asik binuka petelamik. Yosafat birye wipdeibuk deiyok nang, sik si ara ani. Ara, Benhail ap, Obaja ap, Zakaria ap, Netanel ap, tonda Mikha ap wipdeibukba, peterelbalamik.

⁸ Sik aninye melina ati, neika balamik nang ara, sik Lewi yala nang toupne barye (9) ap, imam nang bitinye ap, wipdeibukura, balamik. Lewi yala nang sik si ara, Semaya ap, Netanya ap, Sebaya ap, Asael ap, Simiramot ap, Yonatan ap, Adonia ap, Tobira ap, Tob-Adonia ap, wipdeibuk. Atouk, sik imam nang bitinye si ara, Elisama ap, Yoram ap wipdeibuk.

⁹ Wipdeibukce, yupu nyapdeibukura, anang nirya ara, Allah arye, “Aning ara wininamlume, aning ara, pia kum wininamlume,’ nyamuk mem yupu bobuka neika peterepnin balamik. Yehuda mutuku noutam ulamik mutuku nirya balamik talak ara, Allah Yahweh elce, “Aning ara wininamlume, aning ara pia kum wininamlume,” nyapdeiamukak sekeiamik mem yupu buku bobuka balamikce, ‘Amutuku noutam ulamik ninye nirya, kekenamakʼ tenen ati, peterelbalamik.

Yehuda mutuku nirya ara, Yosafat elcuk taleamuk yupu

¹⁰ Allah Yahweh arye Yehuda mutuku noutam nirya ara, mikip weik kibukce, sik dana-dana tam yuk mutuku nang ati, ilil deiyok ning weik arebukba, atam nang nirya ap, sik ninye deiyok nang nirya arye, Yehuda tam nang ati ilil weik ubuk. Ilil weik ubuka ati, sik yuk mutuku dana-dana tam ulamik nang ap, sik deiyok nang Raja-Raja arye, Yudea tam ninye deiyoknye Yosafat biti, ilil ubuka ati, sikce Yudea mutuku noutam ninye ati mal pi yangana ara, batakamik. Batakamikce teleb aryuk, talima lamabuka ulamik.

¹¹ Sik ton, olana kumce, teleb kibuka neika unamabe. Tonda, Raja el uk si erenamap tenen, sik Pilistin mutuku nang arye bulubuka boyangalamik dekna weik ning perak ap, yuk-yuk dekne ning nirya ap boyayikce, Yosafat biti arebikba, elce bobuka delilamuk. Atonun tonda, sik Arab tam nang arye boyangalamik ning ara, domba basam yupa weik tujuh ribu tujuh ratus (7.700) ap, tonda atonun, kambing basam tujuh ribu tujuh ratus (7.700) ap boyanakarye arelamik.

¹² Ati, anoutam ara ninye deiyoknye Raja Yosafat birye, teleb kibuka amutuku talibuka bukamukce, ninye deiyok kinanye mikip weik kiptabaknin balamukce, mikip arye talebuka ulamuk. Yehuda mutuku noutam nirya ara, ‘Yu nang arye olyasicak tenen, weik asik dana-dana tam, kat keil arye cang poka dobuka, antanapdongamikce mikip kipdeibik. Tonda amutuku noutam ara, sik aminyan talak dipnamik ning ap, dekna teleb bona ap, teleb tenen aik pum deilin ning ap, anirya dobuka aik domikak bobinuka delilamuk.

¹³ Winibuka elcuk Yudea mutuku noutam nirya ara, amutuku nang patapnamle tenen ning yala-yala nirya weik arye, sik weik asik noutam delilamuk. Ara, el tam nang patapne talak dobuka arin ning ati, kintinip deiamuk mutuku bobuka delilamuk. Tonda, ‘Yerusalem asik kalinamak tenen, sik olan talak kel weik kiamik yin talin nang ton weik wipdeibuk.

¹⁴ Sik ayin talin nang, sik yuk-yuk bukni, sik deiyok kibuka, sik amu tam yin nang ara, yupa pia weik seribu (1.000) yin talin nang sik deiyok kibuka talibuka unang ulamik. Elce sik anang ton wipdeibuk. Ayin talin deiyok nang ara ani. Ara, ninye si Adna, elda yin talin nang sik deiyoknye panglima wibukce, yupa weik tiga ratus ribu (300.000) yin nang taleamuk.

¹⁵ Bitinye ara, el si Yohanaan wipdeibuk. Elda sik yin talin nang yupa weik dua ratus delapan puluh ribu (280.000) yin nang talebuka ulamuk.

¹⁶ Winilinye bira, el si Amasia wipdeibuk. Eli koproba ara Zikri ulamuk. Elce sik yin talin nang yupa ara, pia weik dua ratus ribu (200.000) yin nang taleamuk. Anye Amasia elda, minop talak el babye kanye aryuk, “Narye Allah Yahweh si erena ati, el pil talye melibuka yin talin pil dopnamne,” nyabukce, yanuka deiyok kibuka melilamuk.

¹⁷ Tonok yin talin deiyoknye, el si Elyada, Benyamin yala nang arye deiamikba, dadeipdanin yangalammika ani, deibiknye ulamuk. El Elyada, pia ilil kumce, pin-pin weik ulamukce, yin talinanye ulamuk. El amu tam ara, yin nang yupa weik, dua ratus ribu (200.000) yin nang ton taleamuk. Sik anang ara, ninye olana ati, mal ap, ninye olban talak nong lelin ning, perisai ap, kintinibuka talilamikce, aning talin deiyok nang ulamik.

¹⁸ Anoutamak arye tonoknye ton wipdeibuknye bira, Yosabad wipdeibuk. El amu tam talebuka ulamik yin nang ara, yupa pia weik, seratus delapan puluh ribu (180.000) yin nang taleamuk. Sik ayin nang nirya ara, adiparyuk ninye olan ning yala-yala nirya kintinibuka taleamik. Aning ton wipdeibuk.

¹⁹ Asukum arye deice tam sekamuk nang nirya ara, Yosafat birye wipdeibukura, sikce Yerusalem mutuku ap, Yehuda tam noutam ap talebuka kaliklamik. Awinilamik touk, ninye deiyoknye Raja arye, yin talin nang yuk-yuk nang ton, yupa tonok-tonok kipdeiamukba, sik Yehuda tam noutam bukni, ‘Yu nang arye olyasicak tenen, weik asik dana-dana tam cang keil poka dopdeiamikak ati, kaliklamik.