2 Tawarikh 16 - Eipomek

Yehuda tam ulamik nang ap, Israel tam ulamik nang ap, olalamik yupu

¹ Keting tamun yupa pia weik, tiga puluh enam (36) deice arye ninye deiyoknye Raja Asa birye Yehuda mutuku noutam tuba taleamuk. Atalak ara, ninye deiyoknye, el si Baesa, elda Israel tam mutuku taleamuknye birye, Yehuda mutuku noutam ulamik nang ati olbiyuk. Tonda winiryuk ning ara, weik asik si, Rama mutuku, anyaik noutam ara, ‘Yerusalem mutuku nang ikin weik upnamak’ tenen, Rama mutuku mikip weik kililbiyuk. Ara, ‘Yehuda tam ulamik nang, sik binmana, yanmana kibicak’ tenen, tonda, ‘Yuk mutuku nang arye, Yerusalem mutuku unyak nang ati, yanuka melipnuyap’ tenen, sik balamik bisik ara, lelina ati binuka, Rama mutuku malye kibukce, amutuku talebuka, mikip weik kililbiyuk.

² Ati ara, Yehuda mutuku taleamuknye Raja Asa birye, dekna weik ning emas ap, perak ap, Allah Yahweh si eren aik noutam mambul ning delinak ara, ubula doprobuk. Tonda, el aik pum tam arye deiamuk dekna weik ning weik tonun ton doprobuk. Aning-aning bobuka, Damasyik mutuku ulamuknye Raja Benhadad, anye bira, Siria mutuku nang ati, ninye deiyoknye Raja ulamukce, Siria mutuku talebuka ulamuk. Ati, Asa birye adekna weik ning, Raja Benhadad talina ati, dopdeibukura, bobiyik.

³ Aning bobiyik nang arye, Raja Asa birye nyabuk yupu ton laka nyalbiyik. Asa birye Raja Benhadad biti nyabuk. “Nun bitinye ara, kanye tonok bobuka, olana kumce, dam kipdanuka teleb kanye bobuka neiktoto unamabe. Ara, nun ni yapu, sik olana kum arye, teleb kibuka neika ulamik touk, unaname. Ati ara, an dekna weik ning ara, narye anti, emas ap, perak ap, adobuka deipkine. Ati ara, narye anti moropkine. Ara, wini talak sik Israel tam mutuku noutam unyak nang talebuka ululnye, Raja Baesa ap, an ap, ‘Ninye mal olana kumce, teleb kibuka neika unamabe,’ nyabuka, minop talak pil neika dolamlum ning ara, bataknulyame. Winipminyeura, Baesa el yin talin nang arye, na mutuku yanuka alabuka unyakak ara, batakuka, bindopnamake. Nati, kum olyanamniake,” nyabuka morobuk.

⁴ Amorobuk yupu ara, Benhadad birye, aning ara kekebukce, ‘Telebe,’ tenebuk. Kekebukce el yin talebuka ulamik nang yuk-yuk ati, deiyok kibuka taleamik yin nang nyabukba, sik amu tam taleamik yin nang ap, sik ap nirya arye, Israel tam mutuku noutam ulamik nang ati binuka obik. Binuka obuka, sirya dakik mutuku ara ani. Ara, Iyon mutuku ap, Dan mutuku ap, Abel-Bet-Makha mutuku ap, tonda Naftali yala nang, sik bon ning ap, aminyan talak dipnamap tenen ati asik delilamik ning ap, amutuku-amutuku nirya ara, binuka obukce kum danaibik.

⁵ Winibik ning ara, ninye deiyoknye Raja Baesa birye, alaka nyanmik yupu akunum kekebukura, ‘Se,’ tenebukce, ikin kanye bobuka, Rama mutuku talebuka mikip kililamuk ning ara, adiparyuk batakukce, bindobuk.

⁶ Batakuka bindobukura, Raja Asa birye nyabukba, Yehuda yala nang nirya ara, tonoknye babye ton kum batakuk. Sik aninye nirya biyikce, Raja Israel tam ulamik nang, sik deiyoknye Baesa birye, Rama mutuku mikip kilina ati keil ap, yo ap, bobuka deipmuk ning nirya ara, Dopdakuka bilulume nyabukba, aning nirya dobuka bobiyik. Atalibuka biyik ning nirya ara, Raja Asa birye dobuka, sik Mizpa mutuku ap, Geba mutuku ap, ulamik nang melina ati binuka mikip kipdeibuk.

Nabi Hanani biti, nyabuk yupu

⁷ Anoutam ara, aminyan talak winipnamuk ning bikilamuknye, nabi Hanani birye, ninye deiyoknye Raja Asa, el dam yayukce nyabuk. “Anda an ni koproba Allah Yahweh, elti, kanye deibuka kum ulyame. Elcuk lyepnutue,’ kum tenelyame. Bukni, ninye deiyoknye Raja Siria mutuku talebuka ululnye tonok, Elcuk lyepnutueʼ tenen, kanye deibuka ulyame. Ati ara, ance sik Israel tam unyak nang, sik ona ati lo ara, akunum wangaplume. Ati, Siriya mutuku ninye deiyoknye bira, akunum bindobuka ati, elti, tomobuka kum tapu kouptume.

⁸ Anda tonap tuba moubuka teinidebuka! Ara sik Sudan mutuku yin talin nang ap, Libia mutuku yin talin nang ap, sik weik yin talin nang nirya ara, mikip weik yin talin nang kum unyak do? Tonda, sik ninye olbana ati, sik ning kereta perang buknarye, tuku deice carabuka ninye olban ning talebuka kum ulamik do? Tonda yin talin nang bun ning, kuda libuka kum balamik do? Aning-aning nirya talibukablirye, sik mutuku nang ara, yuk mutuku nang atonun kum bukni, sik yin nang, sik mikip ara pia weik arye yanganmik. Bukni, ance, Kume, na ni koproba Allah Yahweh, elcuk ninye ona deiyok ning ara, nun dam deilisula ati, el mikip arepsilya deice arye, ‘Nun mal olan nang ati, obuka malye kipnamabe,’ tenemince, Allah el mikip deice arye anang nirya obuka kum kililyame.

⁹ Ance amal olan nang obuka, sirya daklum ning ara, talye dem kume. Allah Yahweh arye tukwak mutuku noutam mutuku sirya im sirya nirya unyak nang ati, pia moubuka dilirye, el weik mikip dobuka, elti, teilintona kumce, pia pi dobuka, diba tenebuka unyak nang, sik deice uk ninye ona deiyok ning delilule. Anda, ‘Aning ara pia teleb ning,’ tenena kumce, walwal un ning ap, malye un ning ap, uminya ati ara, an dam ara, wini talak arye dipdongobuka, dounalam talak nirya ara, mal olan ning, an deice uk upnamkile. Yuk mutuku nang ap pia olana uk unamlume. Allah el yupu laka nyananye, nabi Hanani birye, Raja Asa biti nyabuk.

¹⁰ Atalak ara, nabi Hanani elce nyabuk yupu ati, ninye deiyoknye, Raja Asa bira yu ubukce wabuk. Wabuka ati, anabi ara adiparyuk dobuka, wenen aik dongobuk. Atalak noutam babye, ninye deiyoknye Raja Asa birye, el talebuka ulamuk mutuku nang kan-kan, ton nang ati, ikin ning bobuka, sik anang deice deibukba, imun kanye weik bobuka ulamikce, ikin deice uk ulamik.

Ninye deiyoknye Raja Asa ulamuka ani, sirya dakuk talak ati, nyabuk yupu

¹¹ “Ninye deiyoknye Raja Asa, el yuk pil deiyok koubuka dolamuk bukni, sirya talak nirya ara ani,” nyabuka sekeiamik ning ara, weik buku noutam sekuka deiamik. Abuku ara, Yehuda tam ulamik nang taleamik Raja-Raja nang ap, tonda Israel tam mutuku noutam ulamik nang talebuka ulamik Raja-Raja nang ap, sik ulamik ning si sekna buku noutam akunum sekuka deiamik.

¹² Keting tamun yupa pia weik tiga puluh sembilan (39) tahun deice ara, ninye deiyoknye Raja Asa, el weik uk yan bitinye dana-dana dilyamukba, aik bulamuk. Neiklamuk talak babye, tonok talak babye ton, Allah Yahweh ati, “Se na nie melipnilyame,” nyabuka, min morolamuk bukni, ninye kweten nang, sik dokter atibuk morolamuk.

^13-14 Aik bukamuka ani, keting tamun bitinye ubukura, akunum dibuk. Akunum dibukura, el nong nirya ara, yo deice deibikce, nintong teleb len ning, rempah-rempah ap, tonda atouk nintong teleb lena ati wangi-wangi ap, obat ramuan ap dobuka, el nong deice likeibik. Likibikura, Daud el talebuka ulamuk mutuku noutam bukni, ninye deiyok nang Raja-Raja dipneura, weilamikakuk bobinuka weibik. Asa weibikak ara, el damnye nyapdeiamuk ati, el pil don nang arye, akunum memebuka tuku lukik. Tonda, Asa el taleamuk mutuku nang nirya arye, el si erena ati, weik uku el si unggun deice arye kintinibik.