2 Tawarikh 15 - Eipomek

Ninye deiyoknye Asa birye, Yehuda mutuku winiryuk winibuk ati, sekik yupu

¹ Allah el Dip Kanye ara, ninye si Oded, elce deiamuknye nabi Asarya deice wekuka langdibukce unmok.

² Akunum wekuk ati, nabi Asarya birye, ‘Ninye deiyoknye Raja Asa abataknamneʼ tenen, biyuk. Biyukce nyabuk, “Se na deiyoknye Asa ap, Yehuda mutuku noutam unyak nang nirya ap, tonda Benyamin yala nang nirya ap ati, nyapsine! Moubuka kekeplulume! Allah Yahweh anggun dam usulule. Atonun, anggun babye el dam ululume. Ati, anggunce Allah Yahweh ati, El nyasilye yupu nirya adiparyuk moubuka dolonamabe, aninguk talinamabe ati, melipsilyame nyabuka moropmunyeura, elce anggun dam yanuka melisiliba, el ap neika unamlume. Bukni, anggunce elti, kum kekepmunyakarye, batakmunyeura, elce anggunti melina kumce, batakanamsile.

³ Pia minop talak arye, Allah elda diksukumnye, dipkoprob el tonok ulul bukni, sik minop talak ulamik Israel nang ara, elti, moubuka kum bikamik. El yupu moubuka kum taleamika ati, el ap sik ap, epdanuka neika kum ulamik. Atonun ton, el Allah ap, ninye ap elana ati, pil dona deiyok nang, imam-imam nang ton pia kum ulamika ati, sikce kum perelamik. Tonda, Allah arye, ‘Aning ara wininamlume, aning ara kum wininamlume nyapdeiamuk yupu moubuka kum tenelamikce, talebuka bita kum ulamik. Ati, anggun apu yapu ara, talye-talyeuk ulamik.

⁴ Talye-talye ulamikce, malye weik ap, ikin weik ning dololamikce, sik atalak ulamik nang nirya, malye kanye bobuka ulamikce, sik deiyoknye Allah si Yahweh, Israel nang wibuka kalekuka melilamuknye Allah ati, Melipsilyame nyabuka morobik. Sik Israel nang nirya arye, Kume, Allah elce nyasilye yupu moubuka talibibirye, el tonok ati si erenamabe tenelamikce, Melipsilyame nyabuka morobik. Morobikura, adiparyuk morobik touk, Allah Yahweh arye, yanuka melilamuk.

⁵ Atalak noutamak ara, aninye ap, yuk mutuku nang ap nirya ara, sik namin arye kanya lamapdongobuka teleb deice arye kum ulamik. Malye kanye bobuka, yu weik una ap, teilintona ap ulamik. Ati ara, ‘Yuk mutuku nang arye oplobsicak tenen, pia tenelamik ati, sik nirya arye talye luparabuka amutuku-amutuku noutam nirya ton kum balamik. Anoutam ara, amutuku noutam nirya ara, ninye weik arye olanauk ulamik ati, ninye olan mutuku dem uamuk.

⁶ Tonok weik mutuku tam ulamik nang arye, ton tam ulamik nang ati, opnarye yaniptabuka malye nyabuka ulamikce, obuka kum daneipdanuka ulamik. Tonda, ton mutuku noutam, ton weik asik ulamik nang arye, ton tam mutuku noutam weik asik dobuka ulamik nang ati, obuka kum danalilamik. Winilamika deiyok ara, ‘Allah arye, ‘Sik amutuku-amutuku nang ara, kanye imun weik ning yala-yala nirya ap, opdanamapʼ tenen, tulum kanye bona deiyok ning ap, areamuk arye malye weik kildalamik.

⁷ Sik minop talak ulamik nang ara, winibuka ulamik bukni, anggunda wini talak unmalum nang arye anang winilamik touk kum wininamlume. Anggun wini talak ulalum Israel nang ara, anggun ilil pia una kumce, namin arye, kanye darapdongobuka unamlume. Tonda anggun teleb pil donamluma ara, batakna kumce, pi dobuka pil donamlume. Anggun pil pia dobuka teleb pil donamlum ning ara, nong kipnamle. Tonda, Allah arye anggunti dekna ning arenamsilarya, nyapsine. Nabi Asarya birye, Raja Asa ap, sik Israel nang ap ati nyabuk.

⁸ Oded el mi nabi Asarya birye, ninye deiyoknye Raja Asa biti, ayupu laka nyabukce, aminyan talak winipnamuk ning ati laka nyamuk ning ara, Asa birye ayupu kekebuk. Kekebukopura, el kanye pia deibuka si erebukce, ilil tenena kumce, kil-kil weik ubuk. Kanye deibukura, Yehuda tam noutam nirya ap, Benyamin yala nang sik ulamik mutuku noutam nirya ap, ninye arye, ‘Nun ni koproba aniʼ tenen, isa si erena ati, aik dobuka deiamikak nirya ara, Asa birye uluplobukce, aning kisikdakuka pia yuk karen ak binuka deibuk. Tonda sik Efraim mutuku nirya obuka kum danamik mutuku-mutuku dana-dana tam nirya ara, sik aninye babye isa si erena ati, kintinip deiamikak nirya ulubuka kisikdakuka yukak deibuk. Asa birye, ‘Winipnulume,’ nyapdeiamukba, el pil don nang arye, winibuka pil dolamik ning ara, adiparyuk Allah Yahweh, si erena ap, el arena ap ati delina ati, mesba ara, minop talak malye kiyamik bukni, Asa birye amesba tonap tuba lipsisikuka dobukce, teleb kipdeibuk. Amesba ara, Allah Yahweh el si arelban aik dam bukni, urasin tamuk, aning memepdeibukce dobuk.

⁹ Apil nirya akunum dobuka, sirya dakukopura, Asa birye sik Efraim mutuku ulamik nang nirya ap, Manasye mutuku ulamik nang ap, tonda Simeon yala nang ap, sik Yudea tam yanamikce, neika ulamik nang nirya, sik nirya ati yukubukura, Asa tam mutuku nang nirya yanuka bulubik. Tonda, sik anang nirya, ninye deiyoknye ulamuk aik damuk ulamik. Deiyok ara, sik ayala-ayala ninye ara, Israel tam noutam ulamik bukni, Asa birye teleb winilamukak, anang arye, Se, dipkoprob Asa birye si erelul Allah ara, Allah Yahweh arye Asa ap, sik Yudea tam unyak nang ap ati, kalekuka melilule tenen, bikamikce, sik aninye arye elilamik. Ati, Asa birye yukubukura, minopce yanuka bulubik.

¹⁰ Sik ayala-ayala nang nirya bulubuka, Yerusalem mutuku uk wekelyayik. Ara, wala winilye sum deice arye, bulubuka wekelyayik talak, ara Asa birye keting tamun lima belas (15) tahun deice arye Yudea tam taleamukce ulamuk.

¹¹ Atalak noutamak ara, Allah Yahweh bobuka arena ap, el si erena ap ati ara, yupa pia weik obuka Allah ati arelamik. Ara, sapi basam tujuh ratus (700) ap, tonda domba basam ap, kambing basam ap, tabakuka arebik ning ara, yupa pia weik, tujuh ribu (7.000) bulubuka, Allah ati obuka arebik. Aining ning nirya ara, Sudan mutuku yin talin nang, ninye olbinmikak arye, malye kipdeiamikce, aning-aning dalubuka doprobikce, tamubuka Yerusalem mutuku boyanamik ning tuba uamuk ati, aning nirya bobuka, Allah Yahweh ati arelyayik.

¹² Arelyayikce, Allah Yahweh ati nyabik. Ara, “Nun kanye tenen ning nirya ap, nun talima nirya ap, nun nong ap nirya ara, nun ni koprop Allah Yahweh anti arepkiyabe. Nun kanye talima an deice uk delinamkiyabe. Ance, ‘Wininamake,’ tenesiminye touk, aning talebuka unamabe. Ara, nun apu yapu arye, an si erelamkikba, ance sikti, melilamlumnye, Allah Yahweh antibuk tenenmabe. Ansiuk erenamkiyabe nyabuka, nyalin yupu deice arye nyapdeibik.

¹³ Nyapdeiamikce winibuka ulamik ati, atalak ara yata nang do nirya, wel nang do, wisi nang do, kilapu do, weik nang babye, kankan nang babye, sikce, Kume, Allah Yahweh arye nyasilye ning ara, nun like. El tibuk kum tenenamabe tenelamik nang nirya ara, atalak aryuk oplobikak dibik.

¹⁴ Bukni atalak ara, sik Allah Yahweh ati, nyalin yupu deice arye, “El tibuk talinamabe. El siuk erenamabe,” nyapdeiamik nang nirya arye, weik yupu deice arye, “Allah Yahweh el si deice arye, nun akunum nyapmap touk, dipkoprob unamabe,” nyabuka, nyalin yupu deice arye nyapdeiamik. Nyanmik talak ara, kanye pia deibikce, bung-bung ana lelim len ning, terompet ap, yim domba basam el kisok tace ning bobuka, lelim weik nyamekce unmik.

¹⁵ Sik Yehuda mutuku ulamik nang nirya arye, pia kanye deibik. Ara, sik aninye arye, “Kume anyalin yupu nyapam ara, talye nyaltakna kum bukni, nun kanye talima nirya arye, pia dipkoprob nyababe. Aninguk wininamabe,” nyabuka, pin-pin kanye deibik. Sik anang ara kanye deibuka, Allah Yahweh ati si erelamik. El si erelamikba, Allah Yahweh el babye kanye pia deibuka sikti, doprobuk. Elce sikti, amutuku noutam pia namin arye kanye lamapdongobuka un ning arebuk. Ati, sik ap, sik dana-dana tam ulamik nang ap, mal olana kumce, teleb kanye bobuka, namin arye lamapdongobuka, neika ulamik.

¹⁶ Aning-aning nirya akunum winibikura, anyapce dikdongobuka, ninye deiyoknye Raja Asa birye, el lu kil Maakha biti, “Weik deiyok kil, Raja kil tuba kum unamlyame,” nyabuka, dobukce el amu tam deibuk. Ati, akil el pil dona kum kipdeibuk. Adeiyok kil Maakha, amu tam deibuk deiyok ara, ani. Ara minop talak akil Maaka birye, isa si Asyera, si erena ati cang weik yo tikdeiamuka deice arye, pia malye weik ulamuk. Winyamuk ati, el wenena ati ara, Asa birye akil bobuka, amu tam kepdeibuk. Winibukopura, aisa si erena ati cang yo iklamuk ning ara, kwinibukce, loklobuka bataklobukce, mutuku si Kidron mek duman bukni, Kidron Banak bobinuka, uku dabukba, uku arye dibuk.

¹⁷ Yehuda tam ninye deiyoknye Raja Asa bira, el kam ulamuk talak nirya ara, el kanye talima nirya deice arye, Allah el si Yahweh ati, pia talebuka ulamukce, el siuk erelamuk. Winibuka ulamuk bukni, Israel nang ulamik tam noutam ara, ton nang ara, isa-isa si erena ati, mutuku kon deice bobuka deiamikak ara, elce aning nirya ton kum uluplomuk. Aning ara, teleb kum uamuk bukni, yuk pil dolamuk ning ap, winilamuk ning ap, teleb ulamuk.

¹⁸ Tonda, teleb arye ulamuk ning ara, el li koproba Abia ap, tonda el babye Asa ap, sik bitinye arye, Aning ara Allah el si erena ati, el ninguk pia aunamle tenen, dekna weik ning emas nirya ap, perak nirya ap, anyaik pum tam pil dona ati yala-yala ning nirya ap, Allah Yahweh el si erena ati, aning nirya bobuka, Allah si eren aik pum tam boyanuka deibuk.

¹⁹ Deibukce daulamuka ani, keting tamun tiga puluh lima (35) tahun deice ara, ninye deiyoknye Asa birye taleamuk tam noutam nirya ara, ninye olana ati deiyok kina ton pia kum kilamikce, teleb kanye bobuka, kanye lamapdongobuka ulamik.