2 Tawarikh 14 - Eipomek

Ninye deiyoknye Raja Asa birye, Sudan mutuku obuka sirya dakuk yupu

¹ Ninye deiyoknye Raja Abia akunum dibukura, adiparyuk el nong bobuka ninye deiyok nang sik Raja Daud mutuku noutam weilbalamikak binuka weibik. Akunum weibikura, el pununa ati, el mi Asa birye, ninye deiyoknye Raja kipdeibik. Asa ninye deiyoknye kibuka ulamuk talak ara, Yehuda mutuku noutam nirya ara, keting tamun takubarye tahun (10) deice arye, yuk mutuku nang ap, olana kum aryuk, namin asa ulamik.

² Ninye deiyoknye Raja Asa bira el li koproba Allah si Yahweh arye, “Aning wininamlume, aning ara kum wininamlume,” nyapdeiamuk touk, aninguk talebuka ulamuk. Tonda, Allah kanye delin pil tonap tuba, ‘Aning teleb una ap, dip winin ning ani,’ tenilamuk ning, teleb pil dopra ulamuk.

³ Tonda, ton nang arye, Allah diba tenena kum arye, ‘Yuk talye ning atibuk, nun ni koproba aniʼ tenen, Asa birye taleamuk mutuku noutam, ninye arye aning si erena ati olamikce deiamik ning ap, si eren aik ap nirya ara, daklobuk. Tonda, yuk talye ning si dona ap, si erena ap ati, dolamik ning, el si mesba nirya ap, mutuku kon deice isa si erena ati dolamik aik ap, dakuka sice buklobuk. Tonda, isa si erena ati, mem keil deiamik dobuka teikuka kum kipdeibuk. Tonda isa si Asyerah, el si erena ati, cang weik yo iklamik ning ara, aning nirya kwinibuka, batakuk. Ton ning ara, koubuka yuk karen ak deibuk. Ara, ninye arye, Isa si erelamikak nirya babye, loplobuka yukak deibukce, ton ning ara, dakuka, sice buklobukce kum kipdeibuk.

⁴ Winibukura, atalak aryuk, Raja Asa birye, sik Yehuda mutuku noutam ulamik nang nirya ati, nyabuk. Ara, Nun ni yapu arye si erelamik Allah, nun ni koproba Allah Yahweh arye, ‘Aning ara wininamlume, aning ara pia kum wininamlume. Teleb uning ara, ani, diksukum winin ning ara ani,’ nyapdeiamsuk ning ap, peterelamsuk ning nirya ap, aninguk talebuka unamabe. Winibipyeura, el siuk, si erenamabe,” nyabuk.

⁵ Allah diba tenena kum nang arye, isa si erena ati, mutuku kon deice arye, isa si erelamik asik nirya ap, isa ati morona ap, si erena ap ati, siltong teleb ning uku dongonak nirya ap, dakuka, sice buklobukce, kum kipdeibuk. Amalye ning nirya ara, Yehuda mutuku arye loplubuka, yuk karin mutuku deibuk. Winibuk ati ara, el Asa birye Yehuda mutuku talebuka ulamuk talak nirya ara, amutuku noutam nirya, yuk mutuku nang olana kumce, namin aryuk ulamik.

⁶ Yehuda tam noutam nirya ara, yuk mutuku nang olana kumce, namin aryuk ulamik ati ara, amutuku noutam nirya, ‘Yuk mutuku yu nang arye yanuka opsicak tenen, weik cang keil poka domukce, weik asik domuk ning nirya ara, lipsisikuka dolamukak arye, teleb kibuka mikip kepdeibuk. Allah el si Yahweh arye, Asa biti, kanye pia namin arye dungobuka uning areamukba, adeice arye Yehuda tam noutam nirya, olana kumce, teleb asa namin aryuk ulamik. Winibuka ati, keting tamun ouku weik deice arye, ton kum olalamik. Teleb kanye deibuka ulamik.

⁷ Anoutam arye, ninye deiyoknye Raja Asa birye, Yehuda mutuku noutam ulamik nang nirya ati nyabuk. “Pia dipkoprob ning ara, ‘Yu nang arye yanuka opsicak tenen, nun nirya arye, amutuku noutam ara, aweik asik nirya, kat koprop keil dobibirye, cang pia weik poka, tembok antanap dongobuka dopnamabe,” nyabuk. “Tonda anyasik wekelban bisik ara, kat ning besi arye weik bublan ton memebuka tiriknamabe. Tonda, nun mutuku kalikna ati, anyasik dam ara, kat keil dobuka cang poka dona ati, menara weik tonun dopnamabe. Tonda, weik bisik bublan deice ara kat ning, besi beton arye, lelebuka mikip kipdeipnamabe. Amutuku noutam nirya, nun dem talebuka unamaba deiyok ara, nun nirya arye, ‘Nun deiyoknye Allah Yahweh ati, el siuk erebibyakarye, elce nyapdeiamsuk yupu nirya talibibirye, moubuka unamap tenen, akunum teleb kibuka unyaba ati, Allah Yahweh elcuk, ‘Yehuda mutuku noutam unamak nang ara, narye melisinyeba, ninye ton olana kumce, namin aryuk amutuku unamak tenyamsuk touk, lo akunum arepsuka ati, amutuku-amutuku nirya ara, tuba talebuka unamabe. Winipsuka ati ara, nun amutuku noutam nirya, apil donamabe.” Asa birye nyabuk ati, sik apil deiyok koubuka dopnin balamikce, sik winilamik ning nirya, nong kibuka ura, pia teleb arye ulamik.

⁸ Atalak ara, ninye deiyoknye Raja Asa, el Yehuda tam noutam ulamik yin talin nang, sik yupa ara, pia weik tiga ratus ribu (300.000) nang ulamik. Ayin talin nang, ninye olan tam ati, sik nong lelin ning, el si perisai, weik ning ap, kintinibuka taleamik. Tonda, cang yo taca deice arye, lun ning el si tombak ap talilamik. Tonda sik Benyamin yala nang noutam arye, sik yin talin nang ara, yupa weik dua ratus delapan puluh ribu (280.000) nang babye, sik nong lelin ning ara, perisai bukni, mitik ning ap, mal ap, yin ap nirya taleamik. Memebuka kintinibik ati, sik ayin talin nang nirya ara, pia ilil una kumce, ninye olan ning weik kel bikamik nang ulamik.

⁹ Aminyan talak ara, Sudan mutukunye el si Zerah birye, Yehuda mutuku olbana ati, el yin talin nang ara, yupa pia weik, nukmanto kum, beribu-ribu nang arye bobuka, Yehuda tam nang ati olyayuk. Tonda ninye tiknarye olbana ati, kuda basam arye libuka tuku deice balamik ning, kereta kuda ara, tiga ratus (300) arye boyanuka olyayuk. ‘Yudea tam nang opnunʼ tenen, kinitininmok talak ara, bisik yanganmika ani, mutuku si Maresa mutuku dam arye, kisikdakuka otam wekel biyik.

¹⁰ Wekelbiyik buk, Yudea tam ninye deiyoknye Asa adiparyuk panabuka, Zerah dam biyuk. Biyukura, sik anang arye, yuk-yuk sik mapu kintinibuka wekmeka ati, Merasa mutuku dam bukni, mutuku si Zepata mutuku tamak binuka, ‘Ninye opdanuyapʼ tenen, kintinibuka tikik.

¹¹ Wininmarik talak ara, Yudea mutuku ninye deiyoknye Asa birye,el si erelamuk Allah, Yahweh ati morobukce nyabuk. “Se, na ni koproba Allah Yahweh, ancuk ninye mikip kum nang ati melisilyame. Nun babye, mikip kum nang unyap bukni, otam mikip weik nang dam binuka opdanuyap ati, ancuk nunti Melipsimince, mikip arepnusilam tenen, moropkine. Ati wini talak ara, nun melipsilyame. Ara talye ati kum nyapne. Nunce an tonok, ‘Allah Yahweh aryuk melipsutueʼ tenen, unyaba ati moropkine. Tonda, nun ni koproba Allah Yahweh, wini talak ara, nunce ‘Ancuk melipsutumʼ tenen, dinauk ukinyaba ati, nun ni koproba, an si deice arye yanuka, otam yin talen nang, mikip weik nang, sik yupa nukmanto kum arye kintinibuka, otikmakce, kama ap, yuk ninye olan ning nirya ap bobuka tikmake. Ati, Allah Yahweh, anda nun ni koproba ulyama ati, ‘Naio, otikmak nang arye, obuka malye kipsicakʼ tenen, tonda an tenen nang ap, an ap ati, ‘Malye kipsitingce, obuka sirya kum daksitingʼ tenen ati, moropkine. Tonda, ‘Ance mikip arepsiminyeba, nunce anang obuka sirya daktibyeʼ tenen, moropkine na nie.” Raja Asa birye nyabuka morobuk.

¹² Nyabuka, morobukura, ninye deiyoknye Asa ap, Yehuda tam yin nang ap arye, Sudan mutuku yin talin nang dam olbiyik. Atalak ara, Allah si Yahweh arye, mikip weik arebuk deice arye, sik Yehuda tam nang arye, Sudan mutuku yin talin nang nirya ati, oplobikce, kam tuba unmek nang ati, dobonmekbuk, bai sakuka bindobik.

¹³ Anyapce Asa ap, el yin talin nang ap arye, obuka dobolbanmika ani, pera mutuku, otam Gerar mutuku biyik. Sudan tam nang ara, pia weik arye obikba dibik. Ati, sik Sudan mutuku yin talin nang nirya ara, mikip pia kum binan ubuk ara, Allah si Yahweh arye, Yudea tam nang ati, mikip arebuk deice arye, sik Yudea tam yin nang arye, Sudan mutuku yin nang obuka kum danaibik. Tonda, sik Yehuda tam yin talin nang arye, sik Sudan tam yin talin nang arye talilamik bona nirya, dalubuka doprobik.

¹⁴ Doprobikura, Yehuda tam yin talin nang arye, Gerar mutuku nang ap, aweik asik ap, anyaik dam uamuk mitik mutuku-mutuku nirya ap, obuka malye kibuka, bataklobik. Ara, Allah Yahweh arye amutuku ninye nirya ati, sik talima noutam ilil un ning arebukba, sikce, Allah Yahweh ati, Se tenebikce, lukunyan ara ilil weik ubuk. Winibuk talak aryuk, sik Yehuda tam yin talin nang arye, amutuku noutam ulamik nang arye talilamik ning, sik bona yala-yala pia weik buk alubuka doprobik.

¹⁵ Aninguk kum bukni, tonda aunmek talak aryuk, sik amutuku nang arye talebuka weilamik domba toto ning aik dam nirya babye oplopra biyik. Winibik ati, amutuku-amutuku noutam nirya, sik domba basam ap, kambing basam ap, unta basam ap pia weik arye dalubuka doprobikce, bobiyik. Aning nirya akunum winibikura, Asa ap, el yin talin nang ap, adiparyuk tamubuka, Yerusalem mutuku uk biyik.