2 Tawarikh 13 - Eipomek

Raja Abia ap, Raja Yerobeam ap, opdareka ati, sekik yupu

¹ Raja Yerobeam birye, ninye deiyoknye kibukce, Israel tam taleamuka ani, keting tamun weik delapan belas (18) tahun akunum ubuk ati, aketing tamun talak aryuk, Abia ninye deiyoknye Raja kibuka, Yehuda tam ulamik nang ati, taleamuk. Atalakuk Abia bira, ninye deiyoknye kibuka, Yehuda yala nang ulamik mutuku noutam taleamuk.

² Abia birye, ninye deiyoknye kibuka, Yerusalem mutuku noutam ulamik nang nirya ati, taleamuk keting tamun ara, winilye (3) ulamuk. Abia el lin koprop, el si ara, Mikhaya ulamuk. Mikhaya bira, Uria el kilmu ulamuk. Akil ara, Gibea mutuku kil ulamuk. Atalak noutam ara, Yudea tam taleamuknye Abia ap, Israel tam taleamuknye Yerobeam ap, bokukaprikce, olalamdik.

³ Yudea tam ninye deiyoknye Raja Abia birye, el yin talin weik kel nang ara, yupa pia weik, empat ratus ribu (400.000) nang kintinibuka deibukce, olbalamuk. Atonun ton, Israel tam taleamuknye Raja Yerobeam babye, el yin talin nang, yupa pia weik delapan ratus ribu (800.000) kel weik bikamik yin nang arye, kintinibuka deibukce, ‘Abia ap, el tam nang ap, opnamneʼ tenen, binuka kintinibuk.

⁴ Abitinye yin deiyok nang arye, wibuka deipdik yin talin nang nirya ara, kikliman otam arye, atam arye kibuka deipdikce, eitam iknapnye dam tam, Efraim tam kibuka deipdiknye Raja Abia bira, elce Zemaraim mutuku deice kintinibuka tikuknye, Yerobeam ati, yukubuk. Tonda, Yerobeam birye taleamuk nang, sik Israel tam ulamik nang ati, yukupnin banmokak, kekebik. Abia birye nyabuk. “Sikda Yerobeam ap, elce talilul nang, anggun Israel tam ululum nang ap, kekepnululume!

⁵ Na nyapsise yupu ara, min kum biklum do? Kume, na kele, anggun akunum bikamlume. Ara, Allah Yahweh arye, nun Israel nang yala-yala nirya ati melilamsuk Allah arye, akunum nyalin yupu deice arye nyapdeiamsuk yupu ara, garam uwa deice arye koubuka, sulamaka atonun uamuk ning ara, Daud biti nyabuk. ‘Daud ance deipminbuk, deipdanin banamak nang nirya ara, sik Israel yala-yala nang nirya ati, deiyok talebuka, ninye deiyok nang kibuka, Raja pia unamake. An nang arye, ‘Naʼ tenen, nang, Israel yala ninye ara, kum talinamake. Ayala nang aryuk talinamake. Ura, sik kele, Allah arye, Winipnamake nyabuka, nyalin yupu deice arye nyapdeiamuk ning ara, pia aupnamlarya. Ninye arye, ‘Aning ara, kume,’ nyaptinga babye, pia kume kum kipnamle. Pia ati unamle.

⁶ Allah arye ayupu akunum nyapdeiamsuk bukni, yuk yalanye Nebat, el mi Yerobeam bira, el deiyoknye Raja Salomo ati, pil dolamuk bukni, Salomo biti batakukce, ayupu deice bisina uk ulamukce, yanilamuk.

⁷ Winilamukura, ‘Raja upnamneʼ tenen, erepdayukce, tikuk ning ara, malye unyak nang ara, bai tam talye-talye unyak nang weik arye bulubuka, el ap bulupnarye, libuka delilamik, Raja Rehabeam ati yanibik. Tonda, sikcuk tenepnarye, sik deiyoknye Salomo, el mi Rehabeam biti, tuba welnye ulamuk talak ara, elce kum tenepmanbuk, sikce, ‘Aning ara, winipnuyabe,’ nyalamik. Sikce aning ulamik talak ara, Rehabeam bira, kanye pia moubuka tenena kum, el mikip mitikto aryuk ulamuk talak arye, ‘Aning ara, olyanusiyakeʼ tenen, nang ara, pia moubuka kum tenelamuk.

⁸ Wini talak ara, anggun abulubuka yanmalum nang nirya arye, Allah el si Yahweh arye, Daud biti areamukak, bukni Daud yala nang arye talebuka ulamik mutuku nirya ati, ‘Obibyakarye, amutuku nirya alubuka doropnuyab,’ tenebik. Daud yala nang ati, amutuku noutam talye nyaltakna yupu kum nyaptume. Dipkoprop nun eipmabe. Yerobeam birye, dekna weik ning emas arye, sapi basam urasin atonun ara, memebuka deibukce, ‘Aning ara, nun ni koproba ulule, tenen, “Atalye ning si erenamabe,” nyalamukba, anggunce aning si erelulum ning ara, weik arye memebuka boyanamlume. Tonda, dipkoprop, anggun yin talin nang ara, yupa pia weik arye bulubuka yanmalumakarye, kintiniplulume. Aning nirya ara, nun eipmabe.

⁹ Anggunda, Allah Yahweh, el si eren aik pil dona deiyok nang, sik dipkoprob imam-imam nang, ara Harun birye deibukba, dadeipdanin yangalamik nang ati, anggunce, ‘Anang ara, nun like. Sikda pia kume,’ nyabuka, akunum bataklume. Tonda atouk, anggunce Lewi yala nang, imam-iman nang pil melin nang babye, akunum bataklume. Winilamlum ning ara, anggunce nyalamlume. ‘Kume yatanye do nirya, ‘Nara imam pil doptinye,’ tenelamtumnye bira, sapi basam nena mitikto ning ap, domba basam nakub barye ap arye, bobuka yan areptunye bira, el anye birye, Allah el si eren aik pum tam pil dolamak nang arye, pil dolamaka atonun, doptue,’ nyalulume. Aning ato nang ara, erepdeipmunyakarye, ‘Sikda imam pil talye lukdanuka doptinge,’ nyalulume. Anyalulum yupu ara, yuk talye-talye unyak mutuku nang ulamak touk ululume. Bukni, nun ni koproba Allah arye, ‘Lewi yala nang aryuk, na aik pil dopnitingeʼ tenen, wibuka deiamuk nang kum unyak ati, malye weik ululume. Bukni, nun amutuku noutam ara, awinilulum ning atonun ara, ton pia kum wininyabe.

¹⁰ Anggunda, winilulum bukni, nun atam unyap nang ara, aning atouk, pia kum wininamabe. Nunce si erenyap Allah ara, yuknye ton kume. Nun ni koproba Allah, el si Yahweh ati, nun melibuka kaliksilinye, Allah Yahweh atibuk, el siuk erebibyakarye, el piluk donamabe. Tonda, winibipyeura, elti, pia ton kum batakanamabe. Nun kele, Allah arye nyapdeiamsuk touk, dipkoprob imam-imam nang ara, nun apu koproba, Harun elce deibukba, dadeipdanin yangalammika ani, yanuka deibik yala nang uka. Yuk yala nang ton kume. Winibikceura, sik Lewi yala nang ara, melibuka pil dona uk unamake.

¹¹ Sik anang arye, asum-asum beren tam talak babye, inipnamalye talak babye, kum bataknamake. Sik siltong teleb nyan ning, el si dupa ap, tonda kam ning ap, obuka boyakaceba, ‘Allah arye, nun malye unyap ning, kum kibuka deipnamsilʼ tenen, Allah Yahweh el kina ati, tonda el siltong kekena ati, aning dobuka, uku dongonamake. Tonda, anang aryuk, minggu-minggu nirya ara, nena kum roti kwaning winiryuk memebuka, pia teleb meja deice deilin pil donamake. Atonun, asum-asum lukunyan noutam nirya ara, sik anang aryuk emas arye kintinibik weisa delinak ara, el yan tam arye awesa uku unamake. Unamak talak noutam nirya ara, nun nirya arye, Allah el si Yahweh arye, ‘Aning ara, wininamlume, aning ara pia kum wininamlume,’ nyapdeiamuk yupu nirya ara, pia moubuka tenibuka talipnamabe. Bukni, anggunce Allah ati, akunum batakalulume.

¹² Ati ara, nun kele. Nun ninye deiyoknye bira, el Allah uka. Tonda, sik imam nang babye, asukumuk unyak ati, sik anang arye, lelim len ning, el si terompet, ‘Lelim nyapnamapʼ tenen, akunum kintinibuka deibik. Ara, nunce sik olyangan talak ati, lelim nyan ning akunum kintinibuk ninge. Aning ati ara, anggun Israel tam ululum nang nirya ati ara, nyapsine. Anggun ni koproba Allah, el si Yahweh ati, ‘Batakuka, bisipnuyapeʼ tenena pia kume. Anggun ni Allah ati, kum bisinamlume. Anggun kele, aning ara, kum winipmanto. Ayupu nirya ara, Raja Abia birye, sik Israel tam nang ap, Raja Yerobeam ap ati, nyabuk.

¹³ Ura, Yehuda tam taleamuk Raja, Abia birye, ayupu nyamuk talak ara, Israel tam taleamuk ninye deiyoknye, Yerobeam birye nyapdeibukba, el yin talin nang ton bobukabikce, Yehuda tam yin talin nang olbana ati, sik donga tam arye ubuka, sik urasin tam biyik. Atonun, ton yin talin nang yupa tonok, Yehuda tam nang, sik urasin tamuk, menekuka, olbana ati kintinipmek.

¹⁴ Atalak aryuk, Yehuda tam yin talin nang arye dinmekce, sik Yerobeam tam nang arye, sik Yehuda urasin tam babye, donga tam babye, warekuka antapdongopmikak eibik. Winipmekba eibikura, lukdayikce, Allah Yahweh ati, “Se, nun ni melipsilyame,” nyabuka, weik yupu ngalukna deice arye nyabik. Nyabuka, sik imam nang ara, lelim nyan ning terompet pong-ponganmek.

¹⁵ Terompet lelim nyan ning, pong-ponganmek talak aryuk, Yehuda yin talin nang nirya arye, ninye olbana ati, lak kilina ati, weik yupu deice arye, ngaluka nyanmek. Weik lelim nyanmekura, sik dana-dana tam yin talin nang arye yayikura, olanmek. Bukni, sik Yehuda nang nirya arye, ‘Allah melipsilyame,’ nyanmek ning kekebukura, Allah arye, adiparyuk mikip arebuk deice arye, sik Yehuda tam nang arye, Israel tam ulamik nang ati, obuka sirya dakik.

¹⁶ Allah arye Yehuda tam nang ati, mikip arebukba, sik Israel tam yin talin nang arye, ilil ubuk ati, adip bikbik abuka biyik. Bikbik abuka biyik bukni, sik Yehuda tam nang arye, moropmek touk, sik Israel tam nang nirya obuka sirya dakik.

¹⁷ Raja Abia ap, sik Yehuda tam yin talin nang arye, Yerobeam ap, el Israel tam yin talin nang ap ati obik. Ara, sik Israel tam nang yupa pia weik arye obik. Sik Israel tam yin talin nang obik nang ara, sik pia weik kel bikamik yin talin nang yupa pia weik, lima ratus ribu (500.000) nang obikba dibik.

¹⁸ Aning ati ara, sik Yehuda tam yin talin nang arye obik. Sik Israel tam ulamik nang ara, sik amu tam kibik. Yehuda tam nang arye, Israel tam nang ati obika deiyok ara, sik Yehuda tam nang arye, sik ni koproba Allah Yahweh ap, neika dukdongobuka ulamik ati, sikce, ‘Kume, Allah Yahweh arye melipsutua deice aryuk, mikip kiptibyeʼ tenen, diba tenenmeka deice arye, Israel nang obuka sirya dakik. Ara, sik apu yapu arye, si erelamik Allah, sik deiyoknye Allah Yahweh arye, sik Yehuda tam nang meliamuka deice arye winibik.

¹⁹ Ura, winibikura, Raja Abia ap, el yin talin nang arye, Raja Yerobeam el yin talin nang ati dobolbiyik. Dobolbanmeka ani, amutuku noutam ulamik weik asik ap, anyasik dam mitik asik ap, amutuku noutam uamuk wa tuku ap, binuka alubuka doprobuk. Abinuka doprobik mutuku si ara, ani. Ara, Betel mutuku ap, Yesana mutuku ap, Efron mutuku ap, binuka alubuka doprobuk.

²⁰ Abia birye, Yehuda tam talebuka ulamuk talak ara, Raja Yerobeam elce amutuku noutam nirya ati, tamubuka dopropmanto kum ulamuk. Ila tonap, mikip kum ulamuk bukni, Allah el si Yahweh arye, aminyan talak anye obukba dibuk.

²¹ Yerobeam bira, akunum dibuk bukni, Abia bira, amutuku noutam nirya talebuka ulamukce, el mikip tonap tabakuka, mikip weik arye ulamuk. Amutuku taleamuk talak ara, Abia elce, kil empat belas (14) domuk. Winibuka, elce deiamuk mapu ara, duapuluh dua (22) deiamuk. Tonda, el kilmapu ara, enam belas (16) deiamuk.

²² Ura, Abia doulamuk talak arye dipdongobuka, pil dolamuk ning ap, tonda el yupu nirya nyalamuk ning ap, aning nirya kel kina ati, nabi Ido birye sekeiamuk buku noutam aubuka ati, asukum arye lak nyabuka sekeiamuk buku noutamuk wini talak babye tuba abuk.