2 Tawarikh 12 - Eipomek

Mesir mutuku nang arye, Yehuda tam ulamik nang olbiyika ati, sekik yupu

¹ Raja Rehabeam ninye deiyok kibuka Yehuda tam taleamuk talak ara, mikip weik kipdeiamukba sik amutuku noutam ulamik Israel yala ninye ap, el ap, Allah Yahweh arye, ‘Aning ara winipnamlume, aning ara pia kum winipnamlume. Aning ara pia meme,’ nyapdeiamuk yupu ara, sikce ayupu ara talye yupu,’ tenebuka ulamikce, dip yupu ara, yanilamikce pia malye weik winilamik.

² Winilamik talak ara, Allah Yahweh ati, kanye deipnarye kum ulamik. Ati ara, Allah si Yahweh arye, wenen ning dobuka, sik deice deibukce, lo arebukba, Mesir mutuku ninye deiyoknye birye, ‘Yerusalem mutuku noutam nirya ara opnamne tenen, yayuk. Ara, ninye deiyoknye Raja Rehabeam birye, deiyok kibuka, Yehuda tam taleamuka ani, keting tamun pamubarye akunum ubukura, aketing tamun noutam ara, ninye deiyok kibuka Raja Mesir mutuku taleamuknye, Sisak, elce, ‘Yerusalem mutuku weik asik unyak nang ati olbinamap tenen, biyuk.

³ Sisak birye olbiyuk talak ara, ninye olbana ati kuda basam arye tuku deice libuka balamle ning, el si kereta kuda, yupa pia weik, seribu dua ratus (1.200) arye bobuka olbiyuk. Tonda, el yin talin nang ara, yupa pia weik enam puluh ribu (60.000) yin talin nang ton, kuda basam balye deice bukuka olbiyik. Tonda, ninye olbana ati yin talin nang, pia nukmanto kum ubik. Ayin talin nang ara pia weike, nukmanto kum ulamik. Sikce mutuku si Libia mutuku ap, Suki mutuku ap, Sudan mutuku ap, amutuku-amutuku arye yanuka, Raja Sisak biti melibikce, Yehuda tam ulamik nang ati olbiyik.

⁴ Yehuda tam mutuku noutam nirya ara, obikce, Yehuda tam nang ‘Yu nang arye opsicak tenen, memebuka domik mutuku nirya, obuka yakikce, alubuka doprobik. Ara, cang weik kat keil arye poka dobuka antanapdongamik mutuku ati, malye kibuka olbinmeka ani, Yehuda mutuku arye dipdongobuka binamika ani, Yerusalem mutuku weik asik dam olbiyik.

⁵ Atalak ara, Yehuda tam ninye deiyoknye Raja Rehabeam ap, Yehuda mutuku noutam ulamikce, ninye deiyok kibuka ulamik nang ap, Mesir mutukunye birye, oplopsilyak tenen, Yerusalem mutuku noutam bulubuka tonokak yanuka ulamik. Winilamik talak ara, Allah el yupu lak nyalamuknye, el si nabi Semaya bira, sik anang dam yayukce nyabuk. “Allah el si Yahweh arye nyabuk yupu ara ani. ‘Anggunda adiparyuk nati kunum batakanulume. Winipnuluma ati ara, narye anggun babye bataknamsine. Winibuka bataksiniba, Mesir mutuku ninye deiyoknye Sisak birye opsilirye, anggun Yehuda tam ululum nang nirya talinamsile Allah arye nyapsile.” Nabi Semaya birye nyabukba kekebik.

⁶ Ayupu akunum kekebika ati, atalak ara Yehuda tam ninye deiyoknye Raja Rehabeam ap, tonda amutuku noutam deiyok kibuka taleamik nang nirya ap arye, Se, dipkoprop, nun akunum malye winibabe tenebik. Winibuka tenebikce, sikce nyabik. “Kume, Allah el si Yahweh arye nyapmasil ning ara, dipkoprob merekuka nyapsile. Nunce malye ubupe. Bukni, Allah arye winilul ning nirya ara, diksukum ulule ati, merekuka wenepsile,” nyabikce, ikin kanye bobuka, sik kanye amu tam kipdayikce malye nyanmek.

⁷ Atalak ara, sik anang arye kanye talima nirya, amu tam kibuka nimalyap arye tenibik ning nirya ati, Allah el si Yahweh arye eibukce bikuk. Eibukura, elce nabi Semaya biti nyabuk. “Deiyok ara sikce malye ulamik ning nirya ara, dungnubuka una kumce, tukwak arye lak nyabikce,sik kanye talima lungnupdongobuka nyabik. Winibik ati, narye sikti, obuka sirya kum daknamne. Na adiparyuk sikti, lyepropnamne. Tonda, sik malye ulamik ning ati, yu unulul bukni, wini talak aryuk, Mesir mutuku ninye deiyoknye Sisak birye olyanmal deice arye, ‘Yerusalem mutuku nirya babye, obuka sirya daklirye, uku sice buklopnamleʼ tenepse ning ara, kum winipnamne.

⁸ Bukni, lo arepniba Mesir mutuku deiyoknye Raja Sisak, elcuk sikti, malye kibuka sik Yehuda tam nang nirya talipnamle. Winiplyeura, sikce moubuka biknamake. Na Yahweh arye talesununa ara, teleb kilisiniba, pia kanamuk ululume. Bukni, yuk mutuku Raja nang arye, talipsikirye, ikin ning anggun nong deice delinamsiak nang ara, ikin weik upsiliba, imun kanye bobuka unamlume. Adeice arye moubuka bita biknamlume.” Allah arye nyabuk yupu ara, nabi Semaya birye lak nyabuk.

⁹ Allah arye nyabuk ati, elce nyabuk touk, lo arebukba, Mesir mutuku ninye deiyoknye Raja Sisak birye, Yerusalem weik asik dolamikak nirya obukabukce, atam ulamik nang nirya ara, el amu tam kibuk. Tonda, Sisak birye Allah Yahweh el si eren aik noutam deiamik weik mambul ning, dekna weik ning ap, tonda ninye deiyoknye Raja Rehabeam, el aik noutam deiamuk dekna weik ning ap nirya ara, alubuka doprobuk. Atonun tonda, ninye olbana ati, yin talin nang, sik nong lelin ning kelapye, el si ara perisai nirya ap alubuka doprobuk. Ara, minop talak ninye deiyoknye Raja Salomo birye, dekna weik ning emas arye memebuka deiamuk perisai nirya ara, adiparyuk alubuka doprobuk.

¹⁰ Sisak birye aning alubuka doprobuka ati, Yehuda tam taleamuknye Raja Rehabeam birye, emas arye deibuka domuk perisai, el pununa ati, yuk kat ning, el si perunggu arye punubuka deibuk. Ara, elce, “Aning ara anggunce kintinibuka deipnulume,” nyabukura, el pil don nang arye aning perisai memebuka delilamik. Ati sik yin talin nang, sik nong lelin ning, el si perisai, kat ning perunggu arye memebuka delilamik,ning ara, Rehabeam birye aning bobuka, Allah el si eren aik bisik bublan dam kaliklamik nang ati arebukba, aperisai dobuka talibikce, anyaik bisik bublan dam nirya kaliklamik.

¹¹ Tonda, ninye deiyoknye Raja Rehabeam birye, Allah Yahweh el si eren aik ara, pia tuba balamuk talak ara, el melin nang arye aning el si perisai nirya bobuka neika balamik. Winilamikce, Raja akunum punubuka sirya dakukopura, tamubuka el aik biyuk talak ara, anang arye adiparyuk aning perisai bobuka, sik kaliklamik nang ulamik aik pum tam uk bobinuka delilamik.

¹² Aning nirya winilamuk ati, ninye deiyoknye Raja Rehabeam birye, Allah Yahweh el dam kanye talima darapdongobuka ulamuka ati, aning ara teleb kibuka una ara, Allah Yahweh arye eibuka ati, el yu weik ubuk ning ara, batakukce, lo arebukba, Yehuda mutuku noutam tuba awamuk. Ara, Allah Yahweh arye ninye deiyoknye Raja Rehabeam ati, wenen ning mitikto aryuk wenebuke. Tonda, elti, obuka sirya kipmatu bukni, lo ton arebukba, Raja babye tuba kam ulamuk. Dipkoprop ning ara, atalak Yehuda tam noutam ara, teleb un ning mitik tonun ton tuba awamuk.

Israel nang deiyoknye, Rehabeam pil dolamuk ning ati, sekuka deibik yupu

¹³ Ura, ninye deiyoknye Raja Rehabeam birye, Yerusalem mutuku talebuka ulamuk. Tonda, elce ninye deiyoknye kibuka taleamuk keting tamun empat belas (14) tahun Yehuda tam talebuka ulamuk. Winilamuk talak ara, el ninye deiyok talebuka deiyok kouamuk talak ara, el nena umur ara, keting tamun empat puluh satu (41) tahun nemuk. Winyamuk talak arye, Yehuda tam taleamuk talak nirya ara, keting tamun weik, tujuhbelas (17) tahun deice arye, pia Yerusalem mutuku weik asik noutam ulamukce pil dolamuk. Israel mutuku noutam uamuk mutuku kan-kan ara, weik asik weik auamuk bukni, Allah Yahweh arye, Amutuku Yerusalem noutam ara, na si deipnirye, asukumuk unamne tenelamuk ati, el si eren aik ara, asukumuk memebuka deiamikce domik. Raja Rehabeam bira, el lin koproba el si Naama ulamuk. Naama, elda Amon yala kil ulamuk.

¹⁴ Rehabeam birye pia malye weik kiyamuka deiyok ara ani. Ara, Allah si Yahweh arye nyapdeiamuk ning ara, Aninguk, talebuka dobolbana uk unamne kum tenelamukce, pia pi deibuka kum ulamuk arye, aning bisibuka batakukce, malye pia weik ulamuk.

¹⁵ Ninye deiyoknye Raja Rehabeam, el pil deiyok kibuka dolamuk ning nirya ara, asukum arye dipdongobuka sirya dakuk ning ara, elce deibukba, deipdanin balamik nang ap, aning nirya kel bikna ati, nabi Semaya birye sekamuk buku noutam arye sekeiamukak, wini talak noutam nirya babye, tuba aulule. Tonda, elce pil dolamukce, winilamuk ning nirya ara, aminyan talak winipnamuk ning lak nyananye, el si Ido, elce sekuka deiamuk buku ara, asukum ton sekuka deiamuk. Ati, sikce sekeiamdik buku noutamuk, Raja Rehabeam pil dolamuk ning babye, sekuka deipdik. Raja Rehabeam ap, Raja Yerobeam ap, sik ulamdik talak noutam ara, olana uk ulamik.

¹⁶ Ura, aminyan talak ara, Rehabeam akunum dibukopura, sik ninye deiyok nang Raja kiamne nang dipneura, Daud mutuku weilbalamik sukum bobinuka weibik. Bobinuka weibikopura, el pununa ati, el mi Abia erepdeiamikba, Yudea mutuku tam talebuka ulamuk.