2 Tawarikh 10 - Eipomek

Israel nang arye, Raja Rehabeam ati, “Nun like, el yupu kum kekepnuyabe,” nyabuka yanibik yupu

¹ Atalak ara, Rehabeam adiparyuk Sikhem mutuku biyuk. Deiyok ara, sik Israel ninye nirya bulubikce, ‘Rehabeam bira, nun ninye deiyoknye unamsila ati, erepdeipnamabe tenebikce, sik nirya Sikhem mutuku biyik.

² Winibik talak uk, ninye si Nebat, el mi Yerobeam bira, Se, Raja Salomo birye opnilyak tenen, minop talak Mesir mutuku binuka, dungnubuka ulamuka ani, tupa amutuku unmok. Amutuku uk unmok bukni, sik yuk nang arye, ‘Rehabeam bira ninye deiyok talebuka Raja unamsilʼ tenen, “Erepdeipnamap,” nyabik ati, el kekebuk. Ayupu akunum kekebukura, el adiparyuk Mesir mutuku batakuka, Israel mutuku noutamuk yayuk.

³ Yerobeam tamubuka yayukopura, sik Israel mutuku ulamik nang arye, Yerobeam biti yukubikba yayuk. Yayukopura, Yerobeam ap, sik Israel ninye ap, nirya ansinibuka, Rehabeam dam biyik. Biyikura, sikce Rehabeam biti nyabik.

⁴ “Ani Salomo bira, nunti ikin ning pia weik arye delilamsuke. Weik ikin pil weik arye aruklamsukba, kanye imun ulamsuke. Bukni wini talak ara, ance kanam kib deipsiminyakarye, nun kanye imun usilye ning nirya, kum kipdeipnamsiminyeura, an amu tam ubirye, ance nyasiminye touk wininamabe,” nyabik.

⁵ Nyabik bukni, Rehabeam birye sik anang ati tamubuka nyabuk. “Wini talak tamubuka binmamunya ani, like winilye sum mapmunyakarye, osum ara tonap tamubuka, na dam yanamlume,” nyabuk. Nyabukura, sik aninye nirya tamubuka bindobik.

⁶ Sik anang akunum bindobikura, Rehabeam el li koprop, Salomo kam ulamuk talak, el ap ulamik nang wisi nang ati, “Winipnamlame,” nyabuka, yupu moulina ati, ‘Sik dam asipnamneʼ tenen, sik un dam biyuk. Sik anang ara, wisi nang ati, min arye el li koproba Salomo ap neika ulamik talak arye, ‘Raja ati winipnalame,’ nyalamik nang ati, Rehabeam anang sik dam binuka asipdeyuk. “Anggunce nyapnululume. Nara, arup nyapmaniyak ninye ati, yata yupu nyapnamne do?” nyabuka asipdeyuk.

⁷ Nyabukura, sik awisi nang arye tamubuka nyabik. “Kume amio, an kanye pum tam ara, ‘Ninye kan-kan noutam arye ninye melinanye unirye, anang melinamne,’ tenepmince, teleb yupu nyabuka, aninye sik patalye touk aninye sikti, telebe nyabuka melinalame. Melipminyeura, aminyan talak nirya ara, anang arye anti, pia dipkoprob melinamkiake. Sikce, ‘An amu tam ukirye, an yupu kekebuka melinamkiake,’ nyabik.”

⁸ Nyabik bukni, Rehabeam sik wisi nang arye nyabik yupu kum kekebukce batakuk. Wisi nang nyabik yupu batakukce, yuk nang, el mitikop ulamuk talak neika nepnin balamikce, el ap pil dolamik nang dam biyuk. Biyukce, sik awel nang ati, asipdeyuk. Awel nang ara, el Rehabeam ap, anang ap, keting tamun nena ara, sik neiktoto uk nemik. Mitik mapu ulamik talak arye dipdongobuka, atalak ara neika nepnin balamik ati, elce sik yupu dem kekebuk.

⁹ Awel nang ati asipdeyukce, nyabuk. “Kume, arup talak moropmaniyak ninye ara, An ni koproba arye nun nong deice ikin ning pia weik deililamsuk bukni, ance aning nirya bobuka, kanam kipdeipsutum do?’ nyapmaniak ara, aninye ati ara, yata nyapnamne do?” nyabuka asipdeyuk.

¹⁰ Asipdeyuk bukni, awel nang arye tamubuka nyabik. “Kume anang arye, ‘An ni koproba arye nun nong deice, ikin ning deipsuke,’ nyapmakiakce, ance namin kipdeipsilyame,” nyabuka moropnamak ninye ati ara, sik dam nyapnulyame. Kume, na ni koproba arye taleamsuk talak ara, kanam atonun ulamlum bukni, narye talipnamsin talak ara, pia ikin weik unamlume.

¹¹ Na ni koproba Daud, ‘Elce taleamsuk talak ara, elce ikin ning nun nong deice delilamsuk,’ tenelamlum bukni, nara na ni koproba arye winilamuk atonun kume. Elce anggun deice delilamsuk ning ara, dipkoprob kanam uka. ‘Narye anggun nong deice delinamsin nang ara, pia ikin weike unamsile. Tonda, na ni koproba arye anggun wenena ati, talye tapu arye, litukuka olamsuk bukni, nara, anggun wenena ati, taca ning dopropnirye, anggun nong bol deice litukuka onamsine,’ nyapnulyame. Anyapmasin touk, wininamsene, nyapnulyame,” nyabik. Ara, sik awel nang arye, sik kwit Rehabeam biti nyabik.

¹² Ura, otalak arye, Rehabeam birye nyapdeiamuk touk, like winilye sum akunum ubukura, ninye deiyoknye birye, like winilye sum akunum uplyeura, na dam yanamlume nyapmok touk, Yerobeam ap, el kayapu nang nirya ap, tamubuka ninye deiyoknye Rehabeam el dam biyik.

¹³ Biyikura, Rehabeam birye anang ati, weik yu yupu deice arye, anang ati mikip arye nyabuk. Ara, Rehabeam el li koproba ap ulamik nang wisi nang ara, ‘Yupu namin arye nyapnamlyame,’ nyapmek ning ara, atonun kum bukni, weik yupu deice arye talye-talye binuka nyaplobuk.

¹⁴ Rehabeam birye nyabuk ning ara, el ap neika ulamik wel nang arye nyapmek touk, sik anang dam binuka nyabuk. “Na ni koproba arye anggunti, weik ikin pil deibuka, talye tapu arye, litukuka olamsuk bukni, nara aning atonun kume. Nara, dipkoprob ikin pil arukusinirye, tace ning, kat weik ning arye dopropnirye, wenebuka onamsine,” nyabuk.

¹⁵ Ati ara, Raja Rehabeam birye, el dam yanuka morobik nang ati, kum kekebukce, malye yupu nyaplobuk. Winibukce, elce moubuka kum tenebuk bukni, dipkoprob awinibuk ning ara, ani. Ara, aning-aning nirya winibuk ning ara, talye ninye aryuk kume. Allah Yahweh arye, ‘Winipnamle,’ tenelamuk touk winibuk. Tonda ninye tonok, Silo mutuku ulamuknye, el li koprop Ahia biti, Allah Yahweh arye, ‘Winipnamle,’ nyapdeiamuk touk winibuk. Aning ara, Allah arye Ahia biti nyapdeibukba, ‘Nebat el mi Yerobeam ati, nyapdeiamuk ning ara, dipkoprob winipnamle’ tenen, winibuk. Anya arye, aning nirya ara, ‘Nun ni koprop Allah, elcuk anye nirya winipsuke,’ tenebik bukni, Rehabeam ara, aning nirya ara, moubuka kum tenebuk.

¹⁶ Ura, sik Israel ninye nirya arye, dipdeyikce, ninye deiyoknye Rehabeam, Israel wisi nang, sikce nyabik yupu kum kekepmanto ubuk ning ara, sikce adeiyok nang ati nyabik. “Rehabeam el yala nang ara, sik Daud yala nang uka,” nyabik. “Anya arye, nun yata wiriptibya deice arye, Daud el yala nang ap neika upnamtibye do? Isai birye, deiamuk nang, sikce deiamikba, deipdanin yangalamik nang nirya ara, nun ap neika kum unamabe. Ati ara, nun yuk Israel ninye yala-yala nirya ara, bindopnamabe! Rehabeam bira, el yuk daunamle. El ap, el yala nang, Daud birye deibukba, deipdanin yangalamik yala nang nirya ara, sik tam nang ati, kalekuka melildanamake. Nunda nun dem yuk unamabe,” nyabik. Nyabik ati ara, sik Israel yala ninye bukni, yuk yala ninye nirya ara, sik asik tamubuka bindobikce, Daud el yala nang dem amutuku noutamuk batakik.

¹⁷ Winibik talak ara, Rehabeam el yuk Israel yala ninye bukni, Yehuda yala nang, sik ulamikak tamubuka biyuk. Tonda, Rehabeam tuba sik ninye deiyoknye Raja tikukce, sik Yehuda yala ninye talebuka ulamuk.

¹⁸ Aminyan talak, Rehabeam ninye deiyoknye ulamuk talak ara, el amu tam ulamik nang, sik pil arukuna ati deiyoknye, el si Adoniram ulamuk. Rehabeam birye, anye Adoniram biti, ‘Israel ninye ikin pil aruknamleʼ tenen, wipdeibukba, amutuku noutam biyuk bukni, sik Israel nang nirya arye, Rehabeam ap, el mapu silip ap nirya ara, ‘Nun like,’ tenebikce, keil arye cobuka, anye Adoniram obikba dibuk. Dibukopura, Rehabeam elda aning eibukce, minopce el kuda tuku deice libuka ban ning, el si ara kereta kuda deice bukukce, Yerusalem mutuku tamubuka, bikbik abuka bindobuk.

¹⁹ Aning nirya winilamika ati, asum arye deiyok koibikce, atalak ubuka otam sekenyap talak ara, sik Israel ninye ara, Daud yala nang ati, ‘Nun like,’ nyalamikce, sik ninye deiyok nang nyalamik yupu nirya ati, pia kum kekelamikce, bataklamik.