2 Samuel 9 - Eipomek

Daud ap, Mefiboset ap ati, nyabuk yupu

¹ Daud birye, “Saul el tam nang ton tuba daunyak do? Saul el mi Yonatan bira, na kwit koprop ulamnuka anya arye, ‘Sik yala nang ati, teleb kipdeipnamne’ tenen, sik yala nang noutamak, yata nang tuba unyak do?” nyabuka asipdeyuk.

² Ura, atalak ara, Saul el aik pil melinanye, el si ara Ziba, tuba ulamuka anya arye, yuk nang arye yukubikba, Daud dam biyukura, asipdeyuk. “Anda Ziba do?” nyabuka, asipdeyukura, “Diba nara, an amu tamnye aunun atia,” Ziba birye nyabuk.

³ Nyabukopura, Daud birye, Ziba biti nyabuk, “Saul el tam nang ton, tonok babye tuba kum unyak do? Ara, Saul el tam nang ara, ton ulamicopura, narye sikti, teleb kipdeipnamne. Ara, Allah melipnilya deice arye, anang ati teleb kipdeipnamne,” nyabuk. Nyabukopura, Ziba birye, Daud biti nyabuk. “Kume, Saul el tamnye bira, tonok ton daulule. Ara, Yonatan birye deiamuknye, yan mata malinye binya arye, aik bululnye tonok daulule,” nyabuk.

⁴ Nyabukba, Daud birye Ziba biti asipdeyuk. “Ami ara, dan mutuku ulul do?” nyabuka asipdeyuk, Ziba birye tamubuka nyabuk. “Ami ara, Lodebar mutuku noutam arye, ninye si Amiel, el mi Makir, el aik ulule,” nyabuk.

⁵ Nyabukba, Daud akunum kekebukopura, el pil don nang ati, “Anye bira, Amiel el mi Makhir, el aik Lodebar mutuku ulul anya arye, anyaik binuka, Yonatan el mi dobuka boyanamnulume,” nyabuk.

⁶ Nyabukba, boyayikopura, Saul mi Yonatan birye deiamuknye, el si Mefiboset, Daud dam yayukce, Daud el si erena ati, gutam tuku diprongobuka, kisok lungnupdongobuka kibuk. Kibukba, Daud tuba tamubuka, nyabuk. “Anda Mefiboset do?” nyabukba, anye birye, “Diba nara, an amu tamnye, aunun atia,” Mefiboset birye nyabuk.

⁷ Nyabukopura, Daud birye anye biti nyabuk. “Ance nati, ilil una kume. An ni koprop Yonatan bira, na kwit koprop ulamnuka anya arye, narye anti, kanye deibuka, teleb kipdeipnamkine. An ni Saul bira, minop talak, el wa wilamuk wa bun nirya ara, anuk arepkiniba, talinalame. Tonda, na ap tonok, mek ap, din ning ap, tonokak uk dipnimirye, neiktoto unaname,” nyabuk.

⁸ Nyabukopura, Mefiboset tuba tamubuka, gutam tuku diprongobuka nyabuk, “Yata deiyok ati, nati teleb kibuka, melipnamnilam do? Nara, an pil donanye bukni, nara ninye batakice, kam atonun ununa anya arye, yata ati, nati ereipnamnilam do?” nyabuk.

⁹ Nyabukba, aminyan talak ara, Daud birye, Saul el pil donanye Ziba biti yukubukba, yayukopura, nyabuk. “An deiyoknye Saul bira, mince akunum diamuka bukni, el ap, el mapu silip ap, sik talilamik bona batakik ning ap, tonda sik taleamik tuku nirya ara, Mefiboset biti, akunum arepmane. Mefiboset bira, Saul el mi, el si Yonatan birye deibuk mi atia.

¹⁰ Ati ara, an ap, an mapu ap, tonda an melin nang ap, anggun nirya arye, Mefiboset el melina ati, el wa win pil donamlume. El wa win pil dolamunya ani, nong akunum uplyopura, aning nirya libuka, Mefiboset dam boyanamlume. Ara, Yonatan birye deibuk mi, Mefiboset birye, diplirye teleb unamle ati nyapkine. Bukni, an deiyoknye Saul, el mi Yonatan birye deibuk mi, Mefiboset tonok ara, na ap unimirye, neika dinaname,” nyabuk. (Ara, Ziba el mapu ara, koglom deikin, (15) mapu deiamuk. Tonda, el aik pil don nang ara, nagup deikin nang (20) ulamik.)

¹¹ Daud birye, ayupu nirya akunum nyabukopura, Ziba birye, Daud biti nyabuk, “Naio, anda weik deiyoknye Raja ulyame. Nara, an amu tamnye ununa anya arye, ance nyapnilam ning nirya ara, adiparyuk melibuka, pil dopnin banamne,” nyabuk. Atalak arye diprongobuka, dotalak nirya ara, Mefiboset ap, Raja Daud ap neiktoto, tonok sukum din dilamdik. Ara, Daud el mapu koprop bukuka, din dilamik atonun winilamuk. Deiyok ara, Daud birye, anye bira Mefiboset biti, weik arye bicoe ulamuka ati, el mi koprop atonun kiamuk.

¹² Aminyan talak Mefiboset birye, el mi tonok deiamuk. Ami el si ara, Mikha. Tonda, Saul el pil melinanye Ziba ap, el aik ulamik nang nirya ap, Mefiboset el pil don nang ulamik.

¹³ Mefiboset bira, yan bitinye malye uamuknye bukni, Yerusalem asik dolamikakuk ulamukce, amutuku weik deiyoknye, Raja Daud, el aikuk din dibuka, tonokak ulamdik.