2 Samuel 7 - Eipomek

Allah arye, ‘Daud el bona ap, el unak ap, teleb upnamle’ tenen ati, nyabuk yupu

¹ Israel nang, sik ninye deiyoknye Raja Daud, el weik aik akunum dobikba, anyaik wekukce, daulamuka ani, el mal olan nang ati, Allah arye meliamukba, obisibukopura, talye mangkau arye, aik pia bukukce, kanye deiamuk.

² Atalak ara, Daud birye Natan biti, yupu nyabuk. Natan bira, talinye kume. Elda, Allah el yupu lak nyana deiyoknye, nabi ulamuk. Daud birye, Natan biti nyabuk. “Se, na mambul kanye bopne. Nara, ninye deiyoknye aik unune. Na aik ara, pia teleb yo arye dopnikba, asukumuk unun bukni, Allah nyapdeiamuk yupu sekuka, yo marikna pum bisik deiamik ning ara, talye sapi bol arye domik doltakne tenda aik pum bisik, dongobuka deibupu touk, tuba ulule,” nyabuk.

³ Nyabukopura, nabi Natan birye, Daud biti nyabuk. “Allah el si Yahweh ap, an ap neika ulamdume anya arye, Allah arye melikulule. Ati ara, an tenepminye touk, winipnamlyame,” nyabuk.

⁴ Nyabukura, asum lukunyan aryuk, Allah el si Yahweh arye, el yupu lak nyana deiyoknye, nabi Natan biti nyabuk.

⁵ Ance Daud biti, “An tenepminye touk winipnulyame,” nyapmalum bukni, aning ara, kume. Ati bimunce, na amu tam pil donanye, Raja Daud biti, ‘An ni koprop, Allah Yahweh arye nyapmakil ning ara, atia,’ nyapnulyame. Na Allah ati, aik donamnilanye bira, ance dopnamnilam do?

⁶ Israel nang, Mesir mutuku noutam arye, lyebuka boyase talak arye, dipdongobuka wini talak babye, na aik pum tamuk kum unune. Bukni, talye sapi bol arye domik doltakne tenda aikuk, wekuka unirye, tuba tamubuka banune. Anyaik deibikirye, tonap ulubuka, bol susunauk unyak talak noutamak ara, na babye obina ayana, kinune. Pia un aik ara, kum upmanile.

⁷ Na ap, Israel nang ap, neika uk ulamupu. Sik bisik balamik talak babye, tonok sukumuk ulamik talak babye, na ap neika ulamupu. Tonda, Israel ninye talibuka kalikna ati, narye, ninye deiyok nang kina ati, wepdeipse nang ati, “Na aik dopnulyame. Yata ati ara, yo cakuka, aik min kum dopmanulum do?” pia kum nyalamse.

⁸ Ati ara, Natan ance, na amu tam pil donilinye, Raja Daud biti nyapnulyame. “Na Yahweh ara, aning-aning nirya deice tam unirye, mikip weiknye unune. Narye, an Daud biti nyapkine. Daud an talye pil dolalumce, domba basam weilalum noutam arye, wibuka dopdeipkisirye, ‘Anda ‘Naʼ tenen ninye, Israel nang talibuka, sik ninye deiyoknye, Raja kepnulyame,’ nyabuka wipdeipkese.

⁹ Dan mutuku nirya, balalum mutuku nirya ara, narye pia meilyamkise. Tonda, anti, ‘Opnamabe,’ tenelamkik nang nirya babye, narye sikti, kanye walwalap sinipna arye, meilyamkisiba, ance anang nirya obuka, sirya daklalume. Narye anti, weik kanye deipkisa anya arye, tukwak mutuku ninye deiyok nang, ulamaka atonunye ereipnamakine. Yuk deiyok nang, mitik weik si aupmal bukni, an si weik arye erepdeipkiniba, ninye mutuku-mutuku nirya, ‘Raja Daud bira, weik mambul weiknye ulamuk,’ tenepnamkiake,” Allah arye nyabuk.

¹⁰ Nyabukce, ayupu ton nyabuk. “Narye, na mapu Israel nang, sik pia unamak mutuku ati, teleb mutuku arepnamsine. Na nyapnyeura, kanye lamapdongobuka, telebuk ubuka unamake. Yuk malye nang ara, Allah ati kum dib tenebik nang arye, minop talak Israel ninye ati, tuba olyangalamik atonun, kum wininamake. Aning nirya kum upliba, Israel nang ara, telebuk, talye kanye lamapdongobuka unamake.

¹¹ Minop talak, Israel ninye, sik yupu bokolina deiyok nang kina ati, narye sik deiyok nang wepdeipse. Atalak arye diprongobuka, anoutam talak nirya ara, malye nang arye, Israel ninye ati, ikin ning sik nong deice delilamikce, olyangalamik bukni, wini talak arye deiyok koubuka, doryanamle talak ara, aning ton kum wininamake. ‘Israel nang opnuyap’ tenen, kalikna nang nirya ati, kum kipdeipnamne. Aning atouk, malye nang arye, ‘Raja Daud opnuyap,’ tenenyak nang nirya ati, narye bisibuka, malye kipdeipnyopura, an babye talye kanye lamapdongobuka, telebuk unalame. Nara, Allah unune. Na si ara, Yahweh arye nyapkine. Ati, naryuk an Daud biti, nyapkine. Mapu weik arepkiniba, ninye deiyok nang pia unamake,” Allah arye nyabuk.

¹² Nyabukce, ayupu ton nyabuk. “An wisi akunum deipmince, an deiyok nang diamikba, tuku palyamik atonun, an dipminyeba, tuku palipkicopura, an nong pununa ati, anong arye deipnalam mi wibuka, ninye deiyoknye ereipnamne. Winipnirye, tonda el pia talinamle mutuku ati, mikip weik kipdeipniba, elce pia talinamle. Yuk nang arye, el bisibuka kum opnamake. El mutuku kum talinamake.

¹³ Winipnyopura, anye birye, na aik dopnamnile. Anyaik dopnilyopura, Israel nang arye, anyaik pum bisik, na si erepnamniake. Tonda an deipnalam mi, el talinamle mutuku ara, narye yuk talak nirya, pia una ati, mikip kipnamne. Winipniba, yuk yala nang arye, elti, kum bisibuka opnamake.

¹⁴ Winipnyopura, nara, el Li Allah unamne. Elda na mi unamle. Winibuka unanam bukni, el mitik malye ton uplyopura, wenen ning mapu, sik ni yapu ou tapu arye, litukuka wenelamaka atonun wininamne. Ara, narye arepnibuk, yuk nang arye, elti, wenebikirye, el nong deice ikin ning dipnamake. Aning nirya ara, narya.

¹⁵ Malye uplyopura, wenepnamne bukni, elti, bicoe tenenamna ara, tuba tenenamne, pia kum bataknamne. An min kum erepdeipkise talak ara, Saul malye ubukba, narye, el wenebuka kum kipdeipse. An min kum erepdeipkise talak arye, Raja Saul dopdopsirye, amu tam deipse. Aning winipsa atonun, an deipnalam mi babye, aning atonun, pia kum wininamne. El ti tuba bico tenenamne.

¹⁶ An deipmin mapu ap, ance dipminbuk, dadeipdanin banamak nang ap, na damak pia unamake. Aning atouk, an talipnalam mutuku ap, talinalam nang ap, an mapu nirya talinamak ning nirya ap, narye mikip arepnibuk, keting tamun weik arye talipnamake. Winilaminya, ance deipnalam mi arye, an taliplum mutuku, elce anti punubuka, aning nirya talinamle. Ance dipminbuk, dadeipdanin banamak nang nirya ara, an yala nang ati, ‘Weik ninye deiyok nang unamak’ tenen, pia ereipnamne.” Allah arye nabi Natan ati, laka nyabuk. Laka nyabukce, “Anda, Raja Daud laka nyalbilyame,” nyabuk.

¹⁷ Nyabukba, nabi Natan birye, Daud biti, Allah nyapdeiamuk yupu nirya, laka nyalbiyukura kekebuk.

Raja Daud birye, “Na ni Allah, ance melinamnilama ati, telebe nyapkine,” nyabuka, Allah morobuk yupu

¹⁸ Nabi Natan birye, Daud biti, Allah nyapdeibuk yupu akunum laka nyabukba, kekebukopura, Allah dam biyukce, bukuka, Allah morobukce, nyabuk. “Na ni Allah, anda Yahweh ulyame. Aning-aning deice tam umince, aning nirya talibuka, Weik Erena Deiyoknye umince, an tenelyam touk, aning nirya ninye winipmanto kum pil dolyame. Pia weiknye ulyam bukni, na ap, na kilapu ap, na mapu ap, nun nirya ara, mambul kum ninye unyabe. Nunda talye ninye anya arye, yata deice arye, nun weik arye meilyamsulumce, weik arye erepdeipmasilam do?

¹⁹ Weika arye akunum meilyamsuluma anya arye, ance, ‘Akunuma,’ nyabuka, bataksutum bukni, na yala ninye ati, aminyan talak ara, teleb kipnalam ning ton, laka nyapnilame. Na ni Allah, an si Yahweh ulyamnye bira, aning-aning nirya talilyamce, Weik Erena Deiyoknye ulyamce, an tenelyam touk winilyame. Aminyan talak teleb kipdeipnamnilam ning ati, laka nyapnilama ati ara, na ilil kanye bopne. Nara, an amu tam talye pil donanye ununa atia. Se, na nio, yuk tukwak nang nirya ati, winibuka weik arye melibuka ulyam do, kum do? Pia teleb kipdeipnamnilam ati nyapkine na nio.

²⁰ Se, na ni Allah, yata yupu ton nyapkitinye do? Nara, an amu tam talye melinanye ununa anya arye, na unye ning nirya ara, an akunum kel kiamnulume. Aning ara, an damnye aryuk, aning-aning talibuka, deice tam Weik Erena Deiyoknye umince, an tenelyam ning nirya, ninye winipmanto kum pil dolyamnye biti nyapkine.

²¹ Ati ara, an yupu ap, an kanye talima noutam arye, ‘Wininamne,’ tenelyam ning ap ati, apil donalame. Ati ara, anyapmanilam mambul ning winipnalame. Tonda, an amu tam talye pil donanye, nati akunum laka nyapnilame.

²² Na nio, anda Yahweh ulyame. Aning-aning talibuka, deice tam Weik Erena Deiyoknye umince, an tenelyam ning nirya, ninye winipmanto kum pil dolyamnye. Yuk tukwak mutuku nang noutamak, an atonunye ton kum ulule. Anda Allah tonoka, Yahweh ulyame. Yuk nang ton nyanyakba, nun amul arye, ton kum kekenyabe. Yuk Allah ton pia kum ulule. Ati, nun kele, nun ni Allah atonunye, ton kum ulule, an tonoka.

²³ Tonda, dan mutuku nang ton, an mapu Israel nang atonun unyak do? Kume, yuk yala nang nirya ara, sik atonun kum unyake. Yuk yala nang, mutuku-mutuku nirya, noutam daunyak bukni, Israel ninye tonok ara, ‘Naʼ tenen nang unyakce, ‘Na si erepnamniak’ tenen, ance dobuka lyepsulume. Tonda, sik Mesir mutuku noutam ikin weik ulamikbuk, sik lyebuka bobana ati, ninye winipmanto kum pil ap, ninye kum winipmanto ning, mikip weik pil ap doplum deice arye lyepsulume. Winiplum deice arye, an si weik arye erenyabe. Tonda Israel nang, sik mal olan nang ap, anang sik Isa Mutuku Dongonye ap nirya, sik mutuku noutam arye, yakweteplumba, an mapu Israel nang ati arepsulumba, telebuk ulamik. Aning nirya winilalum deice arye, ninye nirya kekelamikce, ‘Se, Allah el si Yahweh ara, weik mambulnye’ tenen, kel bikamik.

²⁴ Ancuk, ‘Israel ninye na mapu, ‘Naʼ tenen ninye unamak’ tenen, Israel yala nang ati, wipdeiamsulumce, an ‘Naʼ tenen ninye pia unamabe. Na nio, an si Yahweh, nun ni koprop Allah pia unamsilame.” Daud birye, Allah ati nyabuk.

²⁵ Nyabukce, ayupu ton dukdongobuka nyabuk. “Na ni Allah, an si Yahweh, wini talak na, an pil donanye ap, na yala nang nirya ap ati, ance nyamsulum atonun, ‘Pia teleb ubuka melipsinirye, atalak-atalak nirya, mambul pil donamsine,’ nyamsulum touk, ‘Pia wininamsilam’ tenen, moropkine na nio.

²⁶ Ance nyapdeiamsulum touk, winisiminyopura, na ni Allah, an si weik arye, pia ati si erepkikirye, nyanamkiyake, ‘Allah el si ara Yahweh, elda Israel ninye, sik ni koprop Allah ulule. Elda, im ap, tuku ap, aning-aning nirya ap talilya, weik deice tam deiyoknye ulule,’ nyabuka nyapnamake. Tonda, winipsiminba, Daud na yala ninye nirya ara, ance mikip weik arepsiminba, ninye deiyok nang pia unamake. An tibuk, pil dobikirye, an si erenamkiyake.

²⁷ Ati ara, na ni Allah, anda aning-aning deice tam umince, aning-aning nirya talilyamce, mikip weiknye ulyame. Nun ni koprop Allah, an si Yahweh, ancuk Israel ninye talibuka melisilyame. Ance an talye pil donanye biti nyamnulum ning ara, ‘An mapu arepnamkine. Weik deiyok nang, pia unamake,’ nyamnulume. Ati ara, na talima kwa barepnilam deice arye, ilil kumce, na ni Allah, anti moropnukine.

²⁸ Na nio, anda Allah ulyame. An si ara, Yahweh ulyame. Anda aning-aning talibuka, deice tam Weik Erena Deiyoknye umince, mikip weiknye ulyame. Tonda an yupu nirya nyasilyam atonun, aning nirya ara, dipkoprob ulyame. Teleb una ati, teleb yupu nirya, ancuk an pil donanye biti, akunum nyapmanilama ati, aning nirya dipkoprob wininamnile.

²⁹ Na nio, anda Yahweh ulyame. Anda aning-aning talibuka deice tam Weik Erena Deiyoknye umince, pia mikip weiknye ulyama anya arye, an tenepmince, nyalyam yupu nirya ara, dipkoprob ulule. Na Raja Daud bira, an amu tam pil donanye unune. ‘Na ap, na yala nang ap nirya, ancuk melinamsilam’ tenen, moropkine. Winipsiminba, nun yala nang ara, atalak-atalak nirya, an damuk melibuka unamabe. Na ni Allah, ancuk ateleb yupu nyapdeipmasilama ati, ancuk teleb kipdeipsiminba, na yala nang nirya, atalak ap, yuk talak ap, keting tamun weik arye, telebuk pia unamake.” Raja Daud birye, Allah ati nyabuk.