2 Samuel 6 - Eipomek

Allah arye nyapdeiamukba, Musa birye, ayupu sekuka, yo lakase arye, memamik marikna pum bisik deiamuk ning, amarikna bobuka, Yerusalem mutuku bobiyik yupu

¹ Yuk talak ara, Daud birye Israel nang ulamika noutamak arye, pia teleb yin talin nang, yupa-yupa koupne winilye (30.000) nang bulupdeibuk.

² Daud ap, Daud birye wipdeipmok yin talin nang ap, Allah arye nyapdeiamuk yupu sekuka, marikna pum bisik deiamik ning bolbana ati, Yehuda tam noutam bukni, mutuku si Bala mutuku batakuka biyik. Ara, nun ni Allah, el si Yahweh. Elda aning-aning deice tam ulirye, pia mikip weiknye ulule. Amarikna ara, Allah el si Yahweh, el ‘Naʼ tenen marikna nyanyabe. Amarikna deice bukni, im deice pil don nang, malaikat urasin atonun ning puturubuka, dana-dana memebuka deibik ning noutam ara, Allah el mikip ap, el dirina ap, arepliba yangalule.

³ Allah arye nyapdeiamukba, Musa birye sekamuk yupu, marikna yo pum bisik deiamik ning ara, ninye si Abinadab, el aik arye doprobik. Abinadab el aik ara, mitik mutuku dup deice uamuk. Doprobikce, winiryuk dobik ning ara, tuku deice ban ning deice deibikopura, sapi basam arye, aning libuka banmokba, Abinadab el aik arye yanganmek. Winibuka yanganmek talak ara, Abinadab el mapu Usa ap, Ahiyo ap arye, atuku deice ban ning dam yanganmarike. Ara, ‘Ayo marikna saklirye, malye uplyak’ tenen, moubuka kalikmarikce, menekuka yanganmarike.

⁴ Yanganmarika ani, Ahiyo bira menekuka banmokba, aning ara, sapi basam arye libuka, aminyan yanganmoke.

⁵ Winibuka yanganmarikce, amem ning bobanmarikba, Daud ap, el mapu Israel nang nirya ap arye, mikip weik asa arye, Allah kibuka si erena ati, mot sepnin banmek. Mot sebuka banmek karin ara, bung-bung ana, yala-yala weik arye nyanmek. Aning si ara, kecapi ap, gambus ap, rebana ap, kelentung ap, tonda ceracap ap arye, lelim weik nyabuka yanganmekce, Allah el ati kibuka, si erenmeke.

⁶ Banmeka ani, ninye si Nakon, el gandum kwalamukak biyikopura, asapi basam yan dum dukukba, ‘Allah el yupu dongamik mambul marikna, tukwak saklyak’ tenen, Usa birye, taruk dopkwetebuka, amem ning talibuk.

⁷ Winibuka ati, atalak ara, Allah arye Usa biti, yu ubukba, adiparyuk Allah arye, Usa oplobuka, abobanmarik mem marikan damuk batakuk. Usa bira, talinye binya arye, amem marikna, talye mangkau arye, dobuka talibukba, Allah arye Usa obukba dibuk.

⁸ Allah el si Yahweh arye, Usa obuk ning ati, Daud birye Allah ati, ‘Lik,’ tenebuka, yu kanye bobuk. Ati ara, atalak aryuk, amutuku ati si dobuk. Ara, Peres-Usa mutuku nyabuka si dobuk. Amutuku si ati ara, wini talak babye, asi uk tuba sinyake.

⁹ Winibukba, Daud birye Allah el si Yahweh ati, ilil weik ubuk. Ilil weik ubukba, Daud birye Allah ati nyabuk. “Se, yata wiribukap deice arye, Allah arye nyapdeiamuk yupu, libuka deiamik marikna ara, na dam yatu do?” nyabuka asipdeyuk.

¹⁰ Daud ilil weik ubuka ati, aboyangalamik ning ara, dobuka Daud birye, “Na domse aik, na unye mutuku, Yerusalem mutuku kum bobinun bukni, Gad mutukunye, el si Obet-Edom, el aik pum deipnamne,” nyabuk.

¹¹ Nyabuka ati, Allah arye nyapdeiamuk yupu, sekuka deiamik marikan, yo marikna ara, bobalamik ani, Gad yalanye, Obet-Edom aik bobinuka deibikba, wala winilye asukumuk ulamuk. Atalak noutam nirya ara, Allah el si Yahweh arye, Obet-Edom ap, el aik ulamik ninye nirya ap ati, kanye deibukce, teleb kipdeibukba, sik nirya pia telebuk ulamike.

¹² Allah arye, Obet-Edom ap, el aik un ninye nirya ati, kanye deibukce, teleb kipdeibukba, yuk nang arye, “Allah el nyapdeiamuk yupu liamik kwemdina ara, Obet-Edom aik ulula ati, Allah arye anye ap, el aik unyak nang ap, el talilul ning nirya ap ati, pia teleb updeibuk,” nyabuka, Daud biti laka nyabikba, kekebukopura, bikbik abuka biyukce, aning Obet-Edom aik arye doprobikce, tuba tamubuka, el mutuku koprop bobiyuk. Ara, Daud el mutuku, Sion nyalamik mutuku noutam, amarikna boyanuka deibuk.

¹³ Atalak ara, Allah arye nyapdeiamuk yupu sekuka, yo marikna pum bisik deiamik ning bobuka, ‘Daud aik binuyap’ tenen, banmek nang arye, yan yanina kuku nakub barye, yanibuka banmekba, Daud adiparyuk, “Bana kume,” nyabuk ati, lamapdongobuka, tikmek talak ara, elce yim sapi basam, wisi ning ap, sapi basam mi meta uamuk ning ap, ton obuka, Allah el si erena ati arebukce, el si erebuk.

¹⁴ Aning bobanmek talak ara, Daud bira, pia teleb kurun baju ongopmokce, kanye weik deipmokce, Allah ati si erebuka, kilamak mot sepnin banmok.

¹⁵ Winibuka banmoka ani, el ap, Israel nang nirya ap, kanye deibuka pong-pong ana, el si terompet nyabikce, mot senmeka ani, Allah arye yupu nyapdeiamukba, Musa birye sekamuk yupu, ayo marikna pum bisik deiamik ning boyayikce, Daud birye dolamuk asik bobiyike.

¹⁶ Aning bobuka, Daud mutuku, el si ara Sion mutuku, akunum wekelbinuyik talak ara, Saul el kilmu Mikael, Daud domuk kil arye dinmokba, Daud bira Allah el si Yahweh ati, el si erena ati merebuka, yantangkalye denmokce, mot senmokba eibukce, Mikael el talima pum arye, ‘Daud bira na like, aning ara, yata ning ati unmal do?’ tenebuke.

¹⁷ Allah arye nyapdeiamuk yupu, deiamik yo kwemdina ara, bobanmeka ani, Daud arye, ‘Aning deipnamap’ tenen, doltakne tenda aik domika pum bisik benduka deibik. Deibikopura, Daud arye Allah ati, kina ap, el si erena ap ati, kam ning obukce, uku dongobuk. Ton ning ara, ninye ap, Allah ap, ansinina ati ara, kam ning obuka, tup kalibukabukce, ton bokuka, Allah ati arebukce, ton tam ning, sik ninye arye dibik. Winibikce, Allah el si Yahweh ati arebukce, el si erebik.

¹⁸ Daud arye, aning nirya akunum winibukce, Allah ati si erebukopura, ‘Allah arye, Israel mutuku nang nirya ati, teleb kipdeipnamle’ tenen, teleb yupu uk nyapdeibuk. Ara, “Nun ni koprop Allah, el si Yahweh, aning-aning nirya deice tam ulirye, pia mikip weiknye ulula anya arye, el si deice arye nyapne. ‘Elce Israel nang nirya ati, teleb kipdeipnamle’ tenen, Allah moropsine,” Daud birye nyabuk.

¹⁹ Nyabukopura, din ning pia tup teleb ning ara, awekmek ninye, ati yuk-yuk bukni, sal babye, kilapu babye nirya ara, roti ap, kue kismis ap, arebukba dibikopura, sik aik yuk-yuk tamubuka biyik.

²⁰ Ara, aning nirya, akunum winibukura, Daud arye, ‘Na kilapu ap, na mapu ap, na aik unyak nang nirya ap ati, teleb yupu nyaipneba, Allah arye anang nirya ati, teleb kipdeipnamle’ tenen, el aik tamubuka biyuk. Biyukba, el kil Mikael, ara Saul el kilmu arye, aik pum tam arye, bai tam yanuka epderikce, ayupu nyabuka wenebuk. “An dano? Asum ara, narye akunum kel bikine. Anda Israel mutuku nang, sik deiyoknye Raja ulyam bukni, asum winipmalam ara, pia malye nang winilamak touk, akunum winipmalame. Ara, mot senmom talak ara, an cang baju ongolyama ara, kwiryapna ongapna kinmomce, nong banang merenmomba, an bomok ap, nong ap, laka unmakue. Awinipmakilba, an aik talye pil don nang, sik amu tam unyakce, pil melin kilapu arye, dinmakiyakba, ninye alye dakalinto unmome. Winipmalam ning ara, weik deiyok nang, aning atonun ubikiba, sik amu tam nang eibikirye, kibuka erenyak do, akutunyak do?” nyabuka wenebukce, nalinmok.

²¹ Mikael arye, nyabuka wenebukba, Daud arye tamubuka nyabuk. “Kume, na mangkau kanye arye, alye dakne ning unmanue. Bukni, na ni koprop Allah, el si Yahweh dinmanilak, el si erena ati, mot sebuka, mot sepmanue. Yuknye ati kume. Ara, Allah arye, ‘Israel ninye, sik weiknye biknamnil’ tenen, wipdeipnuke. Atalak ara, Allah arye an ni Saul, kum wepdeibuk. Tonda, aning atonun, Saul el yala nang ton, anang-anang nirya ara, Allah arye kum wepdeibuk. Anang nirya ati, mot kum sepmanue. Anang ati kume. Kibuka si erebuka, mot sepmanua ara, Allah el si erena ati unmanue. Yuk deiyok ati kume. El si erepmanu touk, tuba wininamne.

²² Bukni, yuk nang ara, nati weik yu tenenamniyake babye, ‘Aning ara, mambul,’ kum tenepnamne. Aning atouk, naryuk, na damnye ati, ‘Malye upmane,’ tenepdatinirye, alye dakdatinye babye, aning mambul kume. Bukni, anda atalak ara, nyapmanilam kilapu ara, sikce nati, ‘Elda weik mambule,’ tenepnamniakca,” Daud arye nyabuk.

²³ Nyabukura, daulamika ani, keting tamun yupa weik daulamika ani, Saul el kilmu, Mikael bira, mi tonok babye kum deiamuk diparyuk dibuk.