2 Samuel 5 - Eipomek

Israel mutuku nang, sik ninye deiyoknye kina ati, Daud wipdeibik yupu

¹ Atalak ara, Israel yala ninye nirya, Daud dam Hebron mutuku noutam yayikce nyabik. “Biksilyame, nunda an yala nang koproba, an ining nanguk unyabe.

² Pia minop talak, Saul birye taleamsuk talak babye, ance ninye mal deiyoknye ulalumce, Israel yala ninye ap, yin nang ap bobuka, yuk mutuku nang, nun opmanto nang ati, ninye olbana deiyoknye ulamsulume. Tonda, Allah el si Yahweh arye anti, ‘Na mapu Israel nang, domba basam weilamak atonun umince, sik ninye deiyoknye kipnalame,’ nyamkuknye ulyame,” nyabik.

³ Nyabikopura, amutuku-amutuku nirya, sik wisi nang ara, sik deiyok-deiyok nang nirya, Daud dam Hebron mutuku dam yayik. Akunum yayikopura, Daud birye ayanmek nang ati, Hebron mutuku dam arye, Allah kekena ak, lak nyabuk. “Anggunda winibuka-winibuka unamlulume. Nara, anggun ninye deiyoknye Raja unamsine,” nyapdeibuk. Nyabukopura, anang arye Daud biti, “Anda Israel mutuku nang, nun ninye deiyoknye Raja unamsilame,” nyabuka wipdeibike.

⁴ ‘Nun Sisinanye unamsil’ tenen, anang arye, Daud erepdeibik talak ara, keting tamun yupa tonok kepropnye, pamubarye (30 tahun), akunum mabuk bukni, atalak anirye dukdongobuka, Israel mutuku nang, sik weik deiyoknye, Raja kiamuk talak nirya ara, keting tamun yupa tonok kepropnye, koklom deikin, (40 tahun) kiamuk.

⁵ Daud birye, Hebron mutuku ulamukce, Yehuda yala nang ati taleamuk ara, keting tamun tekbarye (7) ap, tonda keting tamun tonok ton anoutamuk, wala nakub barye (6) ap, aninye taleamuk. Ara, tekbarye ap, tonok tahun noutam ap deice arye, Yehuda yala nang taleamuk. Tonda, Yerusalem mutuku noutam ulamukce, Israel yala ninye nirya ap, Yehuda yala ninye nirya ap ansinibuka, taleamuk talak ara, yupa tonok kepdopnye, pinbarye (3) ap, tonda keting tamun, nirya ara, 33 tahun aninye nirya taleamuk. Ati ara, aninye nirya ansinibuka taleamukce, sik weik deiyoknye ulamuk talak nirya ara, 40 keting tamun deice arye ulamuk.

Daud Yerusalem biyukce, amutuku bisibuka, pia talibuka ulamuk yupu

⁶ Akunum ninye deiyoknye, Raja kibuk talak ara, Daud birye el ap, el mapu yin nang ap, amutuku ulamik nang ap arye, ‘Yebus yala nang, Yerusalem mutuku noutam unyak ninye ara, obuka sirya daknamap’ tenen, Yerusalem mutuku biyik. ‘Yebus yala nang opnuyap’ tenen, biyikbuk, amutuku ulamik Yebus yala nang arye, Daud biti nyabik. “Anda amutuku ara, yata ning mikip deice arye, yanuka wektum do? Anda mikip kumnye biti ara, talye nang, asing malye nang ap, yan malye nang ap aniryuk, anti obuka dobolbiketinge. Anda talinye biti ara, amutuku noutam kum wektume,” nyabuka nalibik. Sik tenebikce nyabik ning ara, ‘Daud elda mikip kumnye biti ara, amutuku kum wekuka opsutue’ tenen, nyabik.

⁷ Utenebuka nyabik bukni, Daud ap, el yin talin nang ap arye, Yerusalem mutuku noutamak bukni, mutuku si Sion mutuku, aik dobuka, keil deibuka ulamikak binuka, obuka malye kibikce, anang nirya oplobikopura, amutuku doprobukce, sik talibik. Akunum doprobukura, ninye arye anyasik si ara, “Ara Daud el ning,” nyalamik.

⁸ Atalak ara, Yerusalem mutuku ninye, obuka kum daneipnuyik sum ara, Daud birye, sik Yebus nang nalinmeka ati, el yin talin nang ati ayupu nyabuk. “Yata nang do nirya, ‘Yebus yala nang optibye,’ tenebice nang ara, Yerusalem mutuku keil poka, antanabuka dobika noutam bukni, kin-kin botobikba, din mek wekelbalul bisik weknamalulume. Abisik weklinye binyuk, sik amutuku asing malye nang ap, yok malye nang ap ara, na mal olan nang unyaka anya arye, anang opnamalume,” nyabuk. Yu ubukba, Daud arye ayupu nyabuka anya arye, atalak ara, yuk nang nirya arye nyanyake, “Yok malye nang ap, asing malye nang ap, nun Raja Daud, el ninye deiyoknye aik kum weknamake,” nyanyake.

⁹ Yerusalem mutuku noutam bukni, mutuku si Sion mutuku, aik dobuka, keil dikuka ulamikak, Daud birye, “Amutuku unamne ati, amutuku ara, Daud mutuku,” nyabuka si dobuk. Akunum si dobukopura, ‘Amutuku nirya, mikip kipdeipnamne’ tenen, tonda, ‘Nun keil poka luluklirye, ulupsaklyak’ tenen, amutuku keil poka kup-kup keil ap, tuku ap, weik tabakuka deibikba, erebuk. Erebuka baripdayikba, mikip weik kibuk. Winibukopura, apoka noutamak ara, sik aik dolamik. Milo mutuku arye, dipdongobuka, anoutamak ara nirya, keil poka dobuka denepdongamikce, ‘Mikip kiplirye, kat kipnamle’ tenen, apil dolamik.

¹⁰ Allah ara, aning-aning nirya, deice tam ulirye, mikip weik ululnye ati ara, Allah el si Yahweh arye, Daud biti weik arye melilamukba, Daud el mikip weik, tonap tabakuka upnin balamukce, el winibuk ning nirya ara, ninye winipmanto kum ulamuke.

Daud el ninye deiyoknye aik ap, el tam ninye unamik aik dopnamika ati, nyabuk yupu

¹¹ Tirus mutuku sik ninye deiyoknye, Raja Hiram birye, Daud el aik dona ati, aik don yo teleb ning, el si kayu besi, yo weik ap, aik dona kel nang ap, yo cakna nang ap, tonda keil memen nang ap, aik dona yo ap, dopdeibukce, anang nirya dopdeibukba, sik nirya Daud dam yayikopura, Daud el weik aik dobik.

¹² Atalak ara, Daud birye bikukce, ‘Aning nirya ara, Allah el si Yahweh arye, teleb kipdeipmanile.’ Ara, Allah arye, ‘Anye bira, ‘Naʼ tenen ninye talibuka, weik deiyoknye Raja unamle,’ tenelamnuk touk, ‘Ninye deiyoknye kipdeipnuke,’ tenebuk. Tonda, ‘Israel yala ninye teleb unamak’ tenen, Allah arye ninye deiyoknye, Raja kipdeipnukce, na talinun ning nirya, pia teleb kilinulule. ‘Awinipnuk ning nirya ara, na dem ati kume. Deiyok ara, el ‘Naʼ tenen ninye, Israel ninye sik melina ati, winipnuke,’ tenebukce, Daud bikuk.

¹³ Daud min yuma ulamuk mutuku, Hebron mutuku batakuka, Yerusalem mutuku akunum yayukopura, Israel mutuku ulamik kilapu, weik tonap tabakuka dolamuk. Dolamukce, neika daulamika ani, el mapu ap, kilmapu ap, weik arye tonap delilamuk.

¹⁴ Daud Yerusalem mutuku yayukce, deibuk mapu si ara, atia. El mapu sik si ara, Syamua ap, Sobab ap, Natan ap, Salomo ap deibuk.

¹⁵ Tonda, Yibhar ap, Elisua ap, Nepeg ap, Yapia ap,

¹⁶ Elisama ap, Elyada ap, Elitelet ap deiamuke.

Daud birye, Pilistin yala nang obuka, kum danaibuk yupu

¹⁷ “Daud bira, Israel nang, sik ninye deiyoknye Raja kipmale,” nyapdeibikba, Pilistin nang kekebikce, ‘Adiparyuk, anye bira, malye kibuka tomopnamap’ tenen, ninye yupa weik arye bulubuka, ‘Daud dan tam do?’ tenen, dilyayik Daud akunum kekebukce, adiparyuk, el duknulban aik dungnul biyuk. Ara, Yerusalem mutuku noutam bukni, keil poka dobuka, mikip weik dowamik mutuku wekelbiyuk.

¹⁸ Winibuk talak ara, Pilistin nang weik arye yayikce, mutuku si Refaim mutuku, lyu weik mutuku nirya, sikcuk langdibuka, sik tenda arye, doltakna aik dobik.

¹⁹ Winibikopura, Daud birye, Allah el si Yahweh ati, asipdeyukce, “Na adiparyuk Pilistin nang olbinamana ati, an mikip, na taruk deice deipnutumce, ance melipniminye deice arye, sikti, malye kibuka opyaknaman do?” nyabuk. Nyabukba, Allah arye Daud biti nyabuk. “Ance Pilistin nang olbinulyame. Na mikip nirya, an taruk deice deipkiniba, Pilistin nang nirya opnamalame,” nyabuk.

²⁰ Allah arye, Daud biti akunum nyabukopura, Daud birye, mutuku si Bahal-Perasim dam yayukce, Pilistin nang nirya obuka, sirya dakuk. Akunum obukopura, nyabuk. “Na ni Allah, ance melipmanilamba, na mal olan nang nirya, sik unak ap, sik nong ap nirya ara, mek obuka walalamla atonun, akunum winipne. Ance menekuka banmomce, melipmanilamba, na aminyan yanuka, anang nirya obuka, sirya dakmane,” nyabuk. Daud birye nyabuka ati, anang obukak, el mutuku si ara, Bahal-Perasim mutuku nyalamik.

²¹ Daud birye, sik Pilistin nang obukopura, atalak arye Pilistin nang arye, sik isa si erelamik ning, asukumuk akunum batakuka, bikbik abuka bindobikce, Daud ap, el mapu yin nang ap, sik bataklobik ning dobuka bobiyike.

²² Aminyan talak ara, sik Pilistin mutuku nang, tuba tamubuka, tonap yayikce, Refaim mutuku lyuak, sikcuk yanuka langdibik.

²³ Winibikopura, Daud birye Allah ati, “Naio, yata wiripnaman do?” nyabuka asipdeyukura, Allah el si Yahweh arye, tamubuka nyabuk. “Asukum, ‘Sik urasin tam adiparyuk, talye luparabinuka optinye’ tenena kume. Aning kum bukni, anggun aminyan tam dungnubuka bimunce, sik asik dam tam, yo si kertau yo tam arye, kipmamunya arye, wekuka anang opnamalume,” nyabuk.

²⁴ “Winibuka warikuka dinmamunce, kekenamunba, yin nang nepmakirye, yan lelim nyalamak atonun, kertau yo dubak lelim nyapliba kekepmunyopura, an babye adiparyuk, yin dopropnulyame. Ara, alelim kekepminye talak ara, anggunce, ‘E winira, Allah el si Yahweh arye, menekuka banmala anya arye, nunti meneksilya deice arye, Pilistin mutuku nang nirya opnuyabe’ tenen, adiparyuk olbinululume,” nyabuk.

²⁵ Aning-aning nirya ara, Allah arye Daud biti, ‘Winipnamlume,’ nyapmok touk, winibukce, Pilistin nang olbiyuk. Ara, Gibeon mutuku arye, deiyok koubuka, anyapce dipdongobuka, Geser mutuku dam, Pilistin ninye nirya obuka, sirya dakuke.