2 Samuel 4 - Eipomek

Isboset obik yupu

¹ Aminyan talak, yuk nang arye, “Se, Hebron mutuku dam arye, Yoab ap, el weit koproba Abysai ap, sikce Abnar ati oplobik,” nyabuka laka nyabikba, Saul el mi Isboset birye kekenmokce, el teleb kanye bobuka, mikip ulamuk ning nirya ara, kum kibuka ura, malye kanye bobuk. Winibukba, Israel mutuku nang nirya arye, Isboset ‘Seʼ tenen, malye kanye bobuk ning akunum kekebikce, sik nirya ilil ubuk.

² Isboset el melina ati, yin talin nang ara, bitinye nang, sikce yuk mutuku nang olbana ati, deiyok nang kipdik. Anang sik si ara, ani. Tonoknye el si ara, Baana, tonye el si ara, Rekhab. Sikda, Rimon el mapu ulamdik. Sikda, Benyamin yala nang bukni, Berod mutuku ulamdik. Berod mutuku ara, Benyamin yala nang taleamika ati, ‘Sik Berod mutuku unyak nang babye, Benyamin yala nang atonun unyake,’ tenelamik.

³ Ura, ‘Berot mutuku ara, Benyamin yala nang mutuku akunum wekik,’ nyabuka, si sekamik mutuku, sik dipkoprop, amutuku aulamik nang ara, minop talak noutam arye, Berot mutuku arye batakuka, Gitaim mutuku yayikce, pia amutuku ulamik touk, abuku sekibye talak babye, tuba asukumuk unyake.

⁴ Ura, Saul el mi Yonatan birye deibuknye, el si ara, Mefiboset, ami el yan ara, malye uamukba, teleb ubuka, el yan deice kum balamuk. Winilamuk ning deiyok ara, ani. Ara, Mefiboset, el keting tamun pamubarye kibuk talak ara, ninye Yisreel mutuku arye yayikce, “Ninye olan talak ara, Saul ap, el mi Yonatan ap ara obikce, akunum dipmarake,” nyabikura, ami el melin kil arye kekebuk. Atalak ara, Mefiboset mitik mi tuba ulamuka ati, el melilamuk kil kekebukce, ilil ubukura, ami iribuka talibukce, bikbik abuka bayukak, sakukace, tukwak poulbinuka, Mefiboset el kel yok cebukba, binmanto kum ati, aikuk ulamuk.

⁵ Ura, Berot mutukunye, el si Rimon ara, mapu bitinye deiamuk. Sikda, yin talin nang, sik deiyok nang bitinye nang ulamdik. Sik si ara, Rekhab ap, Baana ap ulamdik. Abitinye nang ara, Isboset el aik dam birik. Anyaik birik ara, keting noutam tuba upmok kum inipmuk bukni, keting tuba upmok talak birik. Ati ara, Isboset bira, keting noutam biyikba, keting peikna ati mapmok talak, el asik dam birik.

⁶ Isboset aik pil melin kil ara, gandum duk winmokce, pil donmokak, wi pia weik upmuka ati mapmok. Akil mapmok talakuk, abitinye nang yok leibuka, birikce, Isboset mapmuk aik dukunubuka wekdik.

⁷ Aik wekdikopura, Isboset mabuka wimaplukmoka ati, amapmok aik koprop wekdik. Akunum wekdikopura, ninye ona ati, yu ya bopmarikce, Isboset el mun noutam lukuka opdikura, anyaik anyuk dibuk. Winibuk ning ara, el kisok duk sekuka, bobirik. ‘Sik anang ara, eipsikcakʼ tenen, bisik bana ara, Yordan mutuku lu tam, Araba tam arye leibuka, duknu birik.

⁸ Akunum birikopura, Baana ap, Rekhab ap arye, Isboset el kisok sekdik ning ara, Raja Daud Hebron mutuku ulamukak binuka, arepdikura, nyapdik. “Ara, ‘Raja Saul arye, anti optinyeʼ tenen, dobolamkuknye, el mi Isboset nyalamiknye, el kisok ara, atia. Nun ni, anda nun deiyoknye Raja Daud, nun kanye ara, arup Allah Yahweh arye, Saul ap el mapu silip ap arye, ‘Daud optibyeʼ tenen, dopbolbanauk winilamik ning ati, akunum kwang dakmale,” nyapdik.

⁹ Nyapdik bukni, Daud birye, sik Rekhab ap, Baana ap ati, tamubuka nyabuk. Na ni Allah Yahweh, kam una deiyoknye, pia kam ulula ati, na dipkoprob nyapsine. Allah elce, na kanye ikin ulamnuk talak nirya, melibuka lyelamnuke. El si deice arye nyapsine.

¹⁰ Anggun moubuka kekeprurume. Na Siklag mutuku unmase talak ara, tonoknye ton, na unmase dam yayukce, Raja Saul diamuk ati, yanuka lake nyapnuke. Ayupu bobinmanoknye birye, ‘E, teleb yupu boyanmana ati, ayupu nyapnyeura, Daud birye nati, kanye deipnamnile,’ tenebuk bukni, anye adiparyuk tomopsakarye, oplopse. Winipse ning deiyok ara, Saul diamuka ning ati, yupu na dam nyalyanmanuk ati, deken ning arelamak touk, kwang dakalana ati, aninguk oplopse.

¹¹ Ati ara, ninye malye winibikceura, sik wenena ati, yuk nang arye, kwang dakalana ati obicopura, ara mitik mambul. Bukni, deiyok kum upmalyebuk, sikda yu upsukura, teleb ulamoknye ati, opmaruma ara, weik mambul, pia malye upmarume. Anggunto nang ati ara, weik kanye imun ikin ning, anggun ninye malye winipmarum nang deice deipnune. Ara, Abnar bira, el malye una babye, kume. Elda telebnye bukni, mangkau arye, el aik pum tam tuba mapmokba, anggun yu upsukba, anggunce el aik wekuka, opduma ati nyapsine. Aning ati ara, wini talak awinipmarum ning ati, narye ikin ning delina ara, anggun deiceuk deipnusine. Abnar opmarumba, el ining sakuka dekna ati ara, anggun dekena ning arena ati, narye nyapdeipnyeura, na tam nang arye, anggun bitinye ati, nong opsikirye, amutuku noutam arye kum kibuka, deipnamasiyake.” Raja Daud birye, sik Rekhab ap, Baana ap ati, nyabuk.

¹² Nyabukopura, Daud birye el melin nang, wel nang ati, “Rekhab ap, Baana ap ara, adiparyuk oplulume. Akunum opmunyeura, anang bitinye sik taruk ap, sik yan ap ara, sekuka batakmunce, sik nong ara, mekwen dam anyuk, tapu koubuka diripkwetepnamlume,” Daud birye nyabuk. Nyabuk touk, winibik. Bukni, Isboset el kisok seklopdikce, boyanmarik ning ara, Daud el melin nang arye doprobikce, Isboset el li koprop, Abnar dipmokba, mince yuk nang arye, weiapamikakuk, amutuku binuka weibik.