2 Samuel 3 - Eipomek

Israel yala nang ara, ‘Yatanye arye, nun ninye deiyoknye kibuka, talenamsil do?’ tenen, oplanin winilamik talak ati, sekuk yupu

¹ Raja Saul el mapu silip ap, el tam kiamik nang ap, Raja Daud el mapu silip ap, el tam kiamik nang ap nirya ara, keting tamun weik tonun ton, olana uk ulamik. Winilamik bukni, Daud el tam ara, mikip weik upnin balamuk. Bukni, Saul el tam nang ara, pia mikip kum upnin balamuk.

Daud elce deiamuk mapu ati, sekuk yupu

² Daud, Hebron mutuku ulamuk talak arye deiamuk mapu ara, adeiamuk atouk, nukuka bikina ati ara, ani. Daud birye domuk kil, el si Ahinoam, elda Yisrel mutuku kil ulamukce, akil arye, Daud el mi Amnon deibuk.

³ Daud birye deibuk mi bitinye ning ara, Kileab ulamuk. El lin Abigail ara, minop talak Karmel mutukunye, el si Nabal domuk bukni, dibukce tamubuka, youwak ulamuk. Daud birye deibuk mi, winilyenye ara, Absalom ulamuk. El lin bira, Maakha ulamuk. Ara, Gesur mutuku taleamuk ninye deiyoknye, Raja Talpai nyalamiknye, el kilmu ulamuk.

⁴ Daud birye deibuk mi dumbarinye bira, Adonia ulamuk. El lin ara, Hagit. Pamubarye deibuknye ara, Sefaca ulamuk. Sefaca el lin bira, Abital ulamuk.

⁵ Daud birye deibuk mi, nakub barye deibuknye ara, Yitream ulamuk. El lin si ara, Egla. Daud el mapu ara, nakub barye nang nirya ara, Hebron mutuku noutam aryuk deiamuk.

Raja Saul, el tamnye Abnar bira, Daud tam kibuk ati, nyabuk yupu

⁶ Daud el tam kiamik nang ap, Saul el tam kiamik nang ap, tuba olana uk ulamikba, Abnar arye, Saul el tam nang ap ulamukce, pil dolamuk deice arye, mikip weik kipnin balamuk.

⁷ Atalak noutam ara, Saul bira tonok kil ton, el si Risfa dobuka tia ati, neika ulamdikce, malamdik. Akil el li koprop si ara, Aya ulamuk. Tonok sum ton, Saul el mi Isboset birye, Saul el yin talin deiyoknye, Abnar ati nyabuk. “Na ni koprop Saul birye, el tia ati domukce, neika malamdik kil, el si ara, Risfa ara, anda yata deiyok ning ati, an ap, akil ap, neika maprum do?” nyabuka kisibukce, Abnar biti malye nyabuk.

⁸ Isboset arye nyabukba, Abnar, aning kekebukce, yu weik ubukba, nyabuk. “Se, anda yata ning deiyok ati, nara talye kisipmanilam do? ‘Saul biti yuk nang arye, daoptinge,’ tenepmanilamce do? Tonda, ance nati, ‘Elda mambul kumnye, elda talye balamle kam atonye, Yehuda yalanye ulule,’ tenepmanilamce, nyapmanilam do? Nara, min talak ara, Saul el tibuk, kanye deibuka ulamsinye. Na deiyoknye ani ati, melilamse. Tonda, Saul el weit yapu nirya ap, el kayapu yuk nang ap ati, tuba telebuk unune. Narye na deiyoknye, Raja Saul biti, weika arye meilyamsiba, Daud ap, el yin talin nang ap arye, an ni koprop Saul biti, opmanto kum ulamse. Telebuk winilamse bukni, ance, “Yata deiyok ning ati, na ni koproba domuk kil ton, neika mapmarum do?” nyabuka, nati malye kipdeipmanilam do? Anda pia malye yupu nyapmanilame.

⁹ Ance na nong deice, pia malye yupu nyapdeipmanilama ati ara, na kanye weik teleb ning ara, narye nun ni Allah tenelamuk ning, kum winipnyopura, Allah arye nati, weik arye wenepnamnile. Ara, talye ati kum nyapkine. Allah arye Raja Daud biti, ‘Winipnamkine,’ nyalin yupu deice arye, nyalamuk ning nirya, narye ton melipnamne. Daud el tam kipnirye, elti, melipnamne.

¹⁰ Ara, Allah arye, Saul biti erepdeibukba, ninye deiyok kibukura, amutuku nirya talibuka ulule. Bukni, Daud el tam nang ati melipniba, adeice arye, Saul birye talilamle ning ap, ninye nirya ap ara, Allah arye aning-aning nirya doproplirye, Daud elti, arenamle. Ara, amutuku tuku nirya ap, amutuku noutam unyak nang ap, doproplirye, Daud biti arepnamle. Aning nirya ara, Daud el taruk deice arepnamle. Ara, Daud tam nang melipnyeura, Allah arye Israel mutuku tam unyak nang ap, mutuku ap, tonda, Yehuda mutuku tam noutam unyak nang ap, mutuku ap nirya ara, doproplirye, Raja Daud biti arepnamle. Na dipkoprob nyapne. Narye aning kum winipnyeura, Allah arye nati wenebuka opnamnile. Abnar birye, Isboset biti nyabuk.

¹¹ Nyabukura, Isboset bira, yupu ton tonok babye kum nyabuk. Ara, Abnar nyabuk yupu ap, Abnar biti, ilil weik ubuka ati, yupu ton kum nyabuk.

¹² Winibukura, Abnar birye, Daud dam Hebron mutuku ulamukak, yupu bobana ati, ninye tonok wibuka deibukce, ‘Nyapnamalyame,’ nyabukba, sik anang arye, ayupu dobuka Daud dam lake nyalbiyik. Ara, Abnar birye nyapkile, “Yatanye birye, amutuku nirya ara talipnamle do? Ati ara, an ap, na ap arye, ‘Winipnaname,’ nyabuka, nyalin yupu talipnaname. Winipnimnyeura, na melipkinyeura, adeice arye, sik Israel yala nang nirya, dana-dana tam ulamak ninye nirya ara, antamuk kipnamake. Anda na deiyoknye Daud, antamuk kipnamake. Abnar birye, Raja Daud anti nyapkile,” nyabik.

¹³ Ayupu nyabikba, Daud kekebukce, tamubuka Abnar biti nyabuk. “Telebe, ati ara, narye tamubuka nyapdeipne yupu ara, binuka nyapnulyame. Aning ara, neika tonok kanye bobuka unamname bukni, tonok ning ara, pia winipnamnilyame. Ara, anda na dam yanganalam talak nirya ara, ance Saul el kilmu Mikhal bira, adiparyuk bobuka, na dam boyanamnilyame. Ati, na dam yanaminye talak nirya ara, talye urdem yangana meme. Akil ap bobuka yanamlyame, Daud birye, Abnar biti nyabuk.

¹⁴ Nyabukopura, Daud babye atouk, ninye Isboset dam nyalbana ati yupu dopdeibukce nyabuk. “Na kwit, an adiparyuk, na mince dopse kil Mikhal bira, na babye tamubuka dopdeipnamnilyame. Akil ara, narye Pilistin nang yupa weik seratus (100) nang opsirye, sik den bola deice batakna ning sekamsirye, an ni koprop Saul dam bobinamse. Arepse ning ara, akil Milka kil tabuka atonun dekamse ati ara, akil tamubuka arepnunilyame,” nyabuk.

¹⁵ Nyapdeibukura, ayupu bobana ati, dopdeibuk nang arye nyabikura, Isboset birye ninye ati, yupu nyapdeibukura, akil Mikhal bira, el dam binuka alubuka doprobikce, boyayik. Ara, ninye si Lais, elce deiamuk mi, el si Paltiel birye, akil domuk buk, akil Milka dalubuka, doprobikce boyayik.

¹⁶ Akunum binuka, alubuka boyayikura, akil domuknye, el si Paltiel adiparyuk aminyan, engebuka dobonmok. Wininmokbuk banmeka ani, Bahurim mutuku akunum biyikopura, Abnar eibukce, anye Paltiel biti, “Anda tamubuka bindopnulyame,” nyabukura, adiparyuk anye, el mutuku tamubuka biyuk.

¹⁷ Aning nirya akunum winibik talak ara, Abnar birye, sik Israel yala ninye, sik deiyok nang ati, ninye wipdeibukce, ayupu dobuka bobinmek. Ayupu nyalbiyik ning kekebukce, “Ura, na kele, anggun nirya ara, minop danyapce, ‘Se, Daud bira, nun Israel yala nang nirya ati ara, nun ninye deiyoknye Raja tuba kipsutue,’ tenenuk ulamlume.

¹⁸ Winibuka tenelaluma anya arye, wini talak akunuma, aninguk winipnamabe. Anggunce nyaptumba, Daud bira anggun tam kipsutue. Ati anggunda, bita moubuka tenipnamlulume. Nun ni koprop Allah Yahweh arye, Daud biti, nyalin yupu deice arye, akunum nyapdeiamuk. Na amu tam pil melinanye Daud bira, ‘Naʼ tenen, ninye sik Israel ninye ati, lyepdopnamle. Ara, sik mal olan nang, Pilistin yala nang ap, sik tam kiyamik nang ap, tonda yuk mutuku ninye, sik dana-dana tam unyak mal olan nang arye, ‘Israel ninye opnamabe,’ tenenyak ninye nirya ara, Daud deice lyepdopnamlarya,” nyapdeiamuk.

¹⁹ Tonda, aning atonun, Abnar elda, sik Benyamin yala nang ati, sik dam binuka yupu nyabuk. Winibukopura, Abnar birye ayupu talibukce, Raja Daud Hebron mutuku ulamukak nyalbiyuk. Ara, sik Benyamin yala nang ap, yuk Israel yala ninye ap, ‘Winipnamabe,’ tenen, yupu talipmekce, Aning ara, telebe tenenmek ning nirya, Abnar birye Daud biti, yupu laka nyalbiyuk.

²⁰ Abnar ap, el tam nang dua puluh (20) nang ap, Hebron mutuku dam biyik. Biyikura, Daud birye, sik anang nirya ati, kwali buka din ning weik tonun ton, kintinibuka arebuk.

²¹ Winibuka ura, Abnar elce nyabuka morobuk. “Naio, ance nati, ‘Telebe,’ nyapniminba, Israel nang dam binirnye, sik nirya ati, ‘Na deiyoknye Raja Daud, el tamuk kipnamlume. El ap, anggun ap, nyalin yupu nyalanamlume,’ nyapnamakine. Nyapnyeura, na deiyoknye, sikce anti, ‘Yo, Daud elda nun ninye deiyoknye Raja unamsile. Akunum teleb nyapmasilame,’ nyabikirye, anti erebuka deipkikceba, ance sik amutuku nang ati, deiyoknye kibuka talipnalame. Ara, na deiyoknye, ance tenepminye touk wininamlame. Ance, ‘Aning-aning nirya ara, telebuk ulule,’ tenepminye ning nirya ara, ancuk talinamlame.” Abnar birye, Daud biti nyabuk. Nyabuk ati, Daud birye, Abnar biti, “Telebe, ance, ‘Winipnamne,’ tenepmalam ning ara, teleb kanye arye winipnulyame. “Winira dabilayame,” nyabukura, Abnar talye kanye deibukce, el mutuku tamubuka biyuk

Abnar obik yupu

²² Mitik tonun daunmeka ani, Abnar bira, Daud el dam arye akunum batakuka biyuk talak ara, Daud el yin talin nang, sik deiyoknye Yoab ap, el mapu ap, ton yuk nang ap, olanak binmika ani, tamubuka yanmek talak ara, sikce akunum opmek nang, sik taleamik ning yuk-yuk nirya, weika arye, alubuka doprobikce, boyayik. Sikce aning boyayik talak ara, Daud birye Abnar biti, ‘Telebe dabilyame,’ nyapdeiamukba, Abnar akunum kanye deibuka binmoka ati, Abnar Daud dam kum umok.

²³ Bukni, Yoab ap, el mapu silip ap yayikopura, amutuku nang arye Yoab biti nyabik. “Ninye si Nar, elce deiamuknye Abnar bira, Raja Daud dam yamokce, yupu talipmarika ani, Daud birye, ‘Anda telebuk binuka unamlame nyamukura, Abnar birye, talye kanye bobuka biyukak, lake nyabik.

²⁴ Nyabikura, Yoab kekebuk ning ara, Yoab adiparyuk bikbik abuka, ninye deiyoknye, Raja Daud dam biyukura nyabuk. “Se, na deiyoknye ance, Abnar bira, an dam yanmokbuk, yata deiyok ning ati talye batakmalamak, kanye deibuka binmo do? Tonda, na deiyoknye ance, Abnar biti, Talya binulyame nyapmumu ak binmal do? Teleb ning ara, Abnar tomopmatumce, tapu koupdongopmatume.

²⁵ Nun deiyoknye an kele, Abnar birye an dam yanmu ning ara, talye minin yupu nyalyanmakue. Tonda, elce anti, ‘Daud el ulul ning ap, el tenelul ning ap ara, yata wirilul do? Yata winipnamle do?’ tenen, dilyanmakuke.” Abnar birye, Daud ati nyabuk.

²⁶ Nyabukce, Daud el dam arye, batakuka biyukopura, Yoab birye, el tam yin talin nang ati nyabuk. “Abnar biti, winipnulyame,” nyabuka, ninye wipdeibukba, yupu nyalbiyik. Winibik talak ara, Abnar biti aminyan melibuka banmika ani, mutuku si Sira mutuku deibuk mekwen dam biyikce, Abnar tamubuka boyayik. Aning winipmik ning nirya ara, Daud el kum bikuk.

²⁷ Abnar minpola tamubuka, Hebron mutuku biyuk talak ara, Yoab weik asik dolamik dam, bai tam arye, anyaik wekel bana ati bisik bublan dam binuka, tikuk talak ara, Abnar biti Yoab birye duknuna yupu nyapnuyaka ati, wilamak touk ubuk. Winibuka ani, Yoab birye Abnar bira, adiparyuk tema arye, el mun pum tam lukdongobukba dibuk. Yoab birye Abnar obukba dibuka deiyok ara, Yoab el weit koprop Asael bira, minop talak Abnar birye omuka ati, Yoab tenilamuka arye kwang dakukce, Abnar oplobuk.

²⁸ Winibukba, aminyan talak Daud birye, aning nirya akunum kekebuka, kel bikuk ning ara, elce nyabuk. “Anye bira Yoab, el kanye aryuk oplobuk ati, na ni koprop Allah el kele, na ap, na talipse nang ap ara, Abnar opmal ning ara, nun kum bikmaba ati, atalak arye diprongobuka, do unamle talak nirya ara, Abnar opmuk ning ati, wenena ning ap, ikin ning ap, nun deice malye ning kum yanamsile. Aning deiyok ara, nunce kume,” nyabuk.

²⁹ Nyabuk ning ara, ayupu ton dukdongobuka nyabuk. “Kume, Abnar opmuk ning ati wenena ara, narye, ‘Aning ara, telebe,’ tenenun ning ara, ani. Ara Yoab ap, el li obikce, deibukura, dadeipdanin yangalamik nang, sik tam nang deice uk, ikin ning weik tuba-tuba yanganamle. Atam nang, sik malye winibik deice arye, anang sik wenena ati ara, ikin ning yalyeba, dolona uk unamake. Sik adeipdanin, baning dopropnamake. Adopropnamak ning ara, ani. Ara, nong bola deice uk, susu dina weik ninguk dopropnamake. Tonda, weik kanye imun uk, bola kona atonun ning ara, sik nong bola deice pia dinamle. Tonda, adeice arye, ninye kum dolamak pil ara, kilapu arye baju wina atouk pil donyak ning ara, sik sal mapu arye alye dakuka, akilapu pil talibuka donamake. Akum opura, sik mapu silip noutam ara, ninye olanak arye, obikiba dipnamake. Tonda, sik din ning nirya, pia kum danin balamliba, din patana uk pia unamake. Aning nirya ara, sik wenena atia,” Daud birye nyabuk.

³⁰ Ati ara, Yoab ap, el weit koproba Abysai ap, sikce Abnar biti, oplobik. Deiyok ara, el Abnar birye, sik weit koproba Asael, Gideon mutuku noutam arye omuka atia. Abysai ap, el du Yoab ap arye, tuba tenelamdika arye, Asael el kwang dakna ati, Abnar oprike.

Apner dibukura, el nong dobuka weibik yupu

³¹ Winiprikopura, Daud birye, Yoab ap, el mapu silip nirya ap ati, nyabuk. “Anggun ongolulum baju nirya ara, kwilikuka batakdumunce, dibikce nang engena talak ati, ongolamak baju ongoprumunce, Abnar dipmala ati, engenamlume. Tonda, Abnar weilbinuyik talak ara, Daud el babye, ninye dibikce nang, dongolbalamak kobor yo peti bopmek nang, wibuka banmekak, el Daud babye, aminyan banmok.

³² Abnar el nong dobuka, Hebron mutuku binuka weibikura, amutuku nang, sik deiyoknye Raja Daud ap, el mapu ap nirya, weik tonun engebuka wein damuk unmekce, Abnar biti, weik tonun engenmik.

³³ Aning nirya akunum winibikopura, Daud birye, Abnar biti engebukce, nyabuk. “Abnar dipmal ning ara, talye walwalnye dipneto upmal do? Aning ara, kume.

³⁴ Abnar dibuk talak, el taruk ara, koulongona kum atia. Atonun, el yan babye, daralongona babye, kum atia. El opmakba dipmal ning ara, ninye ona ati weik yunye birye opmale,” nyabukba, amutuku nang nirya ara, kekebikce malye kanye bobuka, weik tonun kanye tonap engena uk unmek.

³⁵ Engenmeka ani, aminyan talak ara, amutuku unmek nang nirya arye, ‘Se, keting kumubuka ati, nun ni koproba Daud, din ara mitik tonun ton diptueʼ tenen, arukulinmek bukni, Daud birye nyabuk, “Kume, Allah arye opnilyake. Ara winipmanto, keting asing banmalya ani, pia min kum kumaplye talak arye, roti do, yuk din ning do, mitik tonunuk dipnyeura, Allah arye na wenebuka opnamnile,” nyabuk.

³⁶ Daud birye nyabukura, kekebikce, amutuku nang nirya ara, Daud birye nyapmok ning ati, weik tonun kanye deibik. Tonda aning atouk, Daud el winipne ning ati ara, amutuku nang nirya ara, sik kanye pia delilamik.

³⁷ Asum ara, Daud weik tonun engenmoka ati, sik amutuku nang nirya dinmika anya arye, Daud elce taleamuk nang nirya ap, tonda Israel yala nang nirya ap ara, akunum kel bikik. Ara, sikce, ‘Kume, aning ara, Daud elce, ‘El anye Nar birye deibuk mi Abnar biti, optinge,’ tenen, pia kum tenyamuka ati tenepmalce, winipmale,’ tenebikce biyik.

³⁸ Tonda, sik deiyoknye Raja Daud birye, el amu tam ulamikce, el pil ati melilamik nang ati nyabuk. “Na kayapu, anggun ton kel bikmalum do? Asum ara, Israel nang, sik weik deiyoknye atouknye, weik teleb mambulnye tonok dipmal ning ara, moubuka kel kum bikmalum do?” nyabuka asipdeyuk.

³⁹ Tonda nyabuk. “Se, nara ninye deiyoknye kina ati, Allah arye wipdeipnuk bukni, wini talak ara, na mikip pia mitang upmanile. Tonda, wini talak ara, Zeruya el mapu ara, yu weik ubuka ati, yu arye telebnye oplobik. Nara, sikti, yata wiriptinye do, kume. Aning ati, yupu kum sekmatinye. Kum malye kiptinye. Ati, aning ara, Allah Yahweh elcuk, wenen ning sikti, areptue. Ara, sik malye unyak ning atibuk dekuka, amalye ning atouk ati, weik ikin deilin ning ara, arepnamle,” Daud birye nyabuk