2 Samuel 24 - Eipomek

Daud birye, ninye si sekna pil dobuka ati, sekik yupu

¹ Allah Yahweh arye, sik Israel yala ninye ati, malye kanye bobukce, yu tenebuk. Yu tenebukopura, Allah arye, ‘Israel ninye sik deice kanye moun ning arepnyeura, ikin upnamle tenebukce, Raja Daud biti, “Ance, Israel yala ninye nirya ap, Yehuda yala nang nirya ap ara, sikda yata winibuka ninye unyak do?’ tenena ati, sik nukmince, sik si seknalame,” nyapdeibuk.

² Nyabukura, Raja Daud birye, el yin talin nang, sik weik deiyok panglima anye, el si Yoab ap, el amu tam yin talin nang ati, sik deiyok-deiyok talibuka, ulamik nang nirya ap ati nyabuk. “Wini talak ara, sik nirya arye, Israel yala ninye, sik unyak mutuku noutamak nirya ara, sik si sekelbinulyame. Ara, pia eitam ulul asik aruma dolamika, Dan mutuku arye nukmince, anyapce ubuka dukdongobuka, pia sirya dapu tam ulul asik aruma, Beer-Sheba mutuku ton, amutuku noutamak nirya ara, Israel ninye yala-yala nirya, daunyak touk nukmince, laka nyapniminyeura, narye sik yupa ara, biknamne.” Raja Daud arye, Yoab biti nyabuk.

³ Bukni, Yoab elce el deiyoknye Raja Daud biti nyabuk. “Naio, na dipkoprob patapmanila ati nyapmakin ara, dipkoprob yupu uk nyapnukine. Ara, Allah Yahweh arye, sik Israel ninye weike unyak bukni, amutuku-amutuku noutamak nirya ara, Israel ninye yupa ara, seratus kali lipat arye, ton ap tabakuka arenamkile. Tonda, narye tenepmana ara, na deiyoknye Raja Daud, an tuba kamuk uminyopura, ninye pia weik unamakak nirya ara, ancuk dinalame. Bukni na nie, yata deiyok ati, ance, ‘Ninye si seknamne,’ tenenmalam do?” Yoab birye nyabuk.

⁴ Nyabuk bukni, Yoab adiparyuk, el deiyoknye Raja Daud birye, nyapmok touk winibuk. Ati Yoab ap, el amu tam bukni, yuk yin talin nang, sik deiyok-deiyok nang nirya arye, Raja Daud ulamukak arye, bai tam binmekce, ‘Sik Israel yala nang yupa, yata barye unyak do?’ tenen, sik ulamik mutuku nirya nukul biyik.

⁵ Sikce nukulbinmek talak ara, Yordan mek koubuka, oketeng yangan tam akunum biyikopura, Yoab ap, el melin nang ap nirya, sik binmek mutuku ara, Kat yala ninye arye doprobik tam bukni, weik lu mutuku noutam ara, anyasik dolamik ning si ara, Aroer mutuku iknapye tam binuka nukunmek. Adinibuka, eitam bisik nukulbinmekce, Kat mutuku noutam bukni, weik asik aruma ton dolamik ning binuka, Yaezer mutuku dam nukul biyik.

⁶ Anyapce dipdongobuka, eitam bisik banmika ani, Gilead mutuku biyikopura, Kades weik asik dam biyik. Amutuku noutam ara, sik Het yala nang ulamik mutuku nukul biyik. Amutuku biyikopura, Yoab ap, el yin nang, sik deiyok-deiyok nang nirya ap, eitam ton weik asik si ara, Dan mutuku ton biyik. Dan mutuku nukul biyikopura, anyapce ubuka, dukdongobuka otam, keting wekelban tam mutuku ton kiprobik. Nukulbinmeka ani, otam mutuku si ara, Sidon mutuku dam nukul biyik.

⁷ Amutuku biyikopura, Yoab ap, yin talin nang, sik deiyok-deiyok nang nirya ap ara, eitam mutuku arye, dipdongobuka outam ton nukulbinmeka ani, utam Tirus mutuku noutam ton nukul biyik. Tirus weik asik dana-dana tam nirya ara, pala weik keil dobuka, taplakuka domik weik cang keil poka ton, deibuka dolamik mutuku uamuk. Amutuku arye dipdongobuka, nukda banmeka ani, sik Hewi yala nang ap, sik kanaan yala nang ap, ulamik mutuku binuka wekikce nukik. Tonda, amutuku arye dipdongobuka, outam ton nukul biyik. Ara, pia outam nukulbinmeka ani, mitik tonun arye, keting yangan tam arye domik weik asik, Bersyeba mutuku ton nukul biyik. Ara, pia utam nukulbinmeka ani, mutuku si Yehuda mutuku tamuk nukul biyik.

⁸ Yoab ap, yin nang sik deiyok-deiyok nang nirya ap ara, amutuku noutam balamik talak ara, wala toupne barye (9) noutam nirya nukulbinamik. Tonda, tabakuka nukulbinamik sum ara, dua puluh (20) sum deice arye balamikce, nukulbinmek. Amutuku noutam akunum nirya balamika ani, Israel nang nirya nuklamikce, akunum sirya dakik opura, ila tamubuka eitam bisik binmekce, weik asik Yerusalem mutuku tamubuka biyik.

⁹ Winibikopura, amutuku-amutuku noutam balamik talak, ninye nukuka, si seklamik ning nirya ara, sik deiyoknye Raja Daud, el dam laka nyalbiyik. Sik Israel yala nang, yin nang kipmanto nang yupa ara, pia weik delapan ratus ribu (800.000) nang ulamik. Tonda, Yehuda tam ulamik nang ara, yin nang kipmanto nang, sik yupa ara, pia weik, lima ratus ribu (500.000) nang ulamikbuk, nukikce, aning nirya, laka nyabuka nyalbiyikura, Raja Daud birye kekebuk.

Raja Daud birye, Israel nang nirya nukukura, Allah arye malye kanye bobuka ati, sekik yupu

¹⁰ Raja Daud birye nyapdeibukura, el yin nang arye, Israel yala nang ulamik mutuku noutam nirya ara, nuknulamikak, Israel yala nang nirya, akunum nukuka sirya dakikopura, tonok lukunyan noutam ara, Daud birye, ‘Se nara akunum malye winipmane. Yata deiyok ati, aning winipmase do?’ tenebukce, mambul kanye bobuk. Atenebuk ning ara, Raja Daud birye, Allah Yahweh ati nyabuk. “Se, na nio. Na winipman ning ara, dipkoprob malye winipmaseba, malye winipdase. Aning ati ara, ance na walwal arye, malye winipmase ning ati, biknilyame, na nie,” nyabuka morobuk.

¹¹ Nyabuka morobukura, mapmuka, berekukopura, asum beren tam koproba arye, Allah Yahweh ara, el yupu nyapdeipnyeura, laka nyana deiyoknye, nabi Kat ati, yupu nyabuk. Anye bira, Daud biti aminyan winipnamuk ning, laka nyan pil dolamuk. Apil dolamuka ati, Allah arye anye, nabi Kat biti yanuka nyabuk.

¹² “Anda, Raja Daud el dam bimince, nyapnulyame. Ara, narye el wenena ati, winipmanto winilye ikin ning ton areptinye. Ati, Raja Daud teniplirye, elcuk wipnamle ninguk, narye el nong deice deipnamne.” Allah arye, nabi Kat biti nyabuk. Ura, ambusum beren tam ara, Raja Daud mapmuka akunum bukuk.

¹³ Ati, nabi Kat adiparyuk, Raja Daud el dam yayukopura, Allah Yahweh arye, nyapdeipmuk yupu yanuka laka nyabuk. “Ara, nyabuk. “Narye laka nyapnukin yupu noutam ara, na deiyoknye Raja Daud, ance yata ning wipnulam do? Aning tenipdelyame. Tonok ning ara, ani. Amutuku noutam ara, keting tamun yupa winilye keting tamun deice arye, Allah arye, weik din patana deiyok ning arepnamle. Aning kum opura, Raja Daud an mal pikinyak nang arye, ‘Daud opnuyapʼ tenen, anti dobolyangakceura, wala winilye deice arye, batakuka binamlam do? Akumopura, an ulyam mutuku noutam ara, weik kanye ikinuk, yala deiyok ning, Allah arye areplyopura, winilye sum deice arye, amutuku nang dinamle do? Ance minpola kintiminyak arye, wibuka nyapminye ninguk, narye Allah Yahweh dam binuka, laka nyapnamne,” nabi Kat birye, Raja Daud biti nyabuk.

¹⁴ Nyabukura, Raja Daud elce tamubuka nyabuk. “Se! Aning ara, na pia kanye ikin atia! Bukni, na kanye ara, ninye arye, na ikin ning delina ara, na like. Ati, na kanye ara, pia teleb ning ara, Allah Yahweh arye, nun Israel yala nang nirya unyap mutuku ap, na ap, ikin ning deipsutu. Deiyok ara, nun ni koproba Allah Yahweh aryuk, pia weik arye bico tenelamsuke. Bukni, weik kanye ikin ning ara, nun mal olan nang arye, nun Israel nang ati, weik yu arye opsicake. Ninye arye nunti, bico kum tenesinyake.” Daud birye nyabuk.

¹⁵ Raja Daud birye, aning wibuka nyabuka ati ara, Allah Yahweh arye, weik kanye ikin uk yala deiyok ning dobuka, sik Israel yala nang ulamik mutuku noutam nirya, asum beren tam talak arye, bulu buka, Allah Yahweh arye tenyamuk talak atouk, dipkoprob winibuk. Aning winibuk talak ara, aweik kanye imun uk dilamuk bukni, sik Israel yala nang ulamik mutuku nang nirya, dibika yupa ara, tujuhpuluh ribu (70.000) nang dibik. Ara iknapye tam, Dan mutuku arye dukdongobuka, utam uamuk weik asik Beer-Sheba mutuku, danoutam nirya ara, ninye weik dibik.

¹⁶ Bukni, Allah Yahweh, el im deice pil melibuka donanye malaikat arye, weik kanye ikin uk, yala deiyok ning arena ap, tonda ‘Ninye dipnamakʼ tenen, wininanye birye, atalak ara, sik Yerusalem asik noutam ulamik nang nirya ara, obuka kum daneipnun tenebukce, kintinipmuk ning nirya, Allah Yahweh arye, dinmokce eibuk. Eibuka ati, Allah Yahweh arye, amalaikat ati, “Kume, bataknulyame. Adiparyuk winina kume,” nyabuka, yupu sekdobuk. Ara, Allah arye, ‘Amutuku noutam unyak nang nirya ara, akunum kum kipdeipnaman,’ tenepmok kanye nirya ara, adiparyuk batakuk. Winibukce, amalaikat ati nyabuk, “Ara akunuma, asukumuk deipnulyame nyabuk!” Allah arye, ayupu nyabuk talak ara, ninye ona deiyok malaikat ara, akunum Yebus mutukunye, el si Arauna, el ulamukak bukni, sik kouamik ning gandum, duk dobuka, bola kokoltalamik dam yayuk talak ara, batakuk.

¹⁷ Ninye deiyoknye Raja Daud birye, sik Israel yala nang nirya, ona ati yanganmok malaikat eibuk. Eibukopura, Raja Daud birye, Allah Yahweh ati nyabuk. “Se, na nio, na tonok aryuk, weik malye un ning winipse. Malye una deiyoknye bira, na uka. Na aryuk akunum weik malye winipse. Bukni na nio, sik amutuku unyak nang nirya ara, yata malye ning ton winilamik do? Ati ara na nio, na ap, na mapu silip ap, na ni birye deiamukba, dadeipdanin yangalamik nang nirya uk, ikin ning ara, nun nong deice uk deipnusilame,” nyabuka morobuk.

¹⁸ Asum ara, nabi Kat adiparyuk, Raja Daud el dam yayukce, nyabuk. “Raja Daud, an adiparyuk, anye Atalina, elce gandum wa wibuka koubukura, akunum wisibukce, el bola kobuka, duk doproplirye, kala batakalul sukum welebinulyame. Winipmince, asukumuk binuka, Allah Yahweh el si erena ap, elti, si dona atia, keil cang arye yangabuka, deipminyak arye, mesba memepdeipnulyame.

¹⁹ Ati, atalak ara, ninye deiyoknye Raja Daud, Allah Yahweh arye, “Winiplulume,” nyapdeipmok ati, nabi Kat elce, yupu bobuka nyalyanmok touk, Raja Daud birye, akunum binuka winibuk.

²⁰ Daud ap, el melin nang ap, sikce gandum duk kobuka, batakuka biyik talak ara, amutuku taleamuknye, Arauna el urasin ara, utam deibuka, dinmok tam arye, ninye deiyoknye Raja Daud, el mapu ap yanganmeka ani, Arauna el dam yangayikak eibuk. Eibukopura, Arauna el adiparyuk, el kutam tuku dipdongobuka, el urasin kanupdongobukce, el nong nirya, tuku deice mabukak, Raja Daud yanganmok tam deibuk.

²¹ Winibukce, Arauna adiparyuk, Daud biti asipdeyuk, “Ninye deiyoknye Raja Daud, anda yata deiyok ati, asukum yanmalam do?” nyabuka asipdeyuk. Nyabukura, Raja Daud birye, tamubuka nyabuk, “Na asukum yanmana deiyok ara, gandum duk delina ati, yangabuka deibikcak arye, bola kolamakak ara, ‘Atuku deknamanʼ tenen, yanmane,” nyabuk. “Aning dekna ning ara, na adiparyuk, Allah Yahweh el si erena ap, si kina ap ati, mesba keil taplakuka yangabuka dopnamne. Winipniba, weik uk yala deiyok ninguk ara, adiparyuk tunim apnamle,” nyabuk.

²² Nyabukura, Arauna arye ayupu nyabuk. “Kume Raja Daud, anda gandum pil asukum donyapak tuku ara, dekna kume, talye doproplyame. Ara, Raja Daud ance, ‘Telebe,’ tenepminye ninguk, adiparyuk dopropminyak arye, Allah Yahweh el si erepmince, dobuka arepnulyame. Ati, amutuku dam aunmal sapi basam ara, narye talye arepkinyeura, ance obukapmince, Allah ati uku dongopnalyame. Tonda, na deiyoknye Raja, uku dongon yo ati ara, agandum duk dekena ati, kintibupu yo lakase papan ap, sapi basam kum deice deilinyab ikin yo ap, aning nirya ara, aupmal ninguk dobuka, uku sekminyence, asapi basam obuka dapmince, Allah Yahweh ati kibuka el si ereptume.

²³ Na Arauna arye, aning-aning nirya ara, dobuka ninye deiyoknye Raja Daud, antibuk arepkine. Ara, nun ni koprop Allah Yahweh, elti, Raja Daud, ance Allah ati arepnamle ning nirya ati ara, Raja antibuk weik arye, kanye pia deipnamkile. ‘Allah arye kanye deipnamkilʼ tenen, moropkine,” Arauna birye, nyabuk.

²⁴ Nyabuk bukni, ninye deiyoknye Raja Daud, elce tamubuka nyabuk, “Aning ara, pia kume! Nara, aning nirya ara, teleb ning arepkinya deice arye, deknamkine. Deiyok ara, narye Allah Yahweh ati, talye ning kum areptinye. Narye pia kum dekmanye ning arye, el si erena ati, dobuka arena ara, na kume,” nyabuk. Raja Daud birye nyabukura, Raja Daud adiparyuk, gandum bola kobuka delinak ap, asapi basam yala-yala nirya ap, aning nirya ati dekuk ning, yo bok yupa ara, lima puluh (50) dekna weik ning, el si perak deice arye dekuk.

²⁵ Aning nirya akunum dekuka, sirya dakukopura, Daud birye Allah Yahweh, el si kina ap, el si erena ap ati, mesba dobuk. Tonda winibukce, kam ning obuka uku dongobukce, Allah el si erebuk. Tonda, ‘Ninye ap, Allah Yahweh ap, elabirye, teleb kibuka tonok unamap,’ tenen ati, aning nirya ara, obukabukce, Allah si erebuk. Winibukba, Allah Yahweh arye, Raja Daud birye, amutuku noutam ulamik nang nirya ati, morobuk ning ara, kekebuka melibuk. Ara, sik Israel yala nang, weik kanye ikin uk, yala deiyok ning areamuk ning nirya ara, Allah arye kum kipdeibuk. Anyuk dina deice arye, sik Israel nang kum diamik.