2 Samuel 21 - Eipomek

Saul elce deibukba, dadeipdanin yangalamik nang ati, ikin ning deibik yupu

¹ Daud Raja ulamukce, yupu nyalamuk talak ara, keting tamun winilye deice arye, kwaning pia weik patana li yayuk. Winilamukba, Daud birye Allah Yahweh ati, “Aning ara, yata deiyok ati, kwaning patana li yanmasil do? Aning deiyok ara, laka nyapnilyame,” nyabuka morobuk. Moropbukba, Allah Yahweh arye nyabuk, “Aweik din patana an dam upmakil deiyok ara, ani. Ara, minop talak Saul ap, el mapu silip ap nirya arye, Gibeon mutuku noutam ulamik nang omik deice arye winipmasile,” nyabuk.

² Nyabukura, Raja Daud birye, sik Gibeon nang ati, yukubukba, yayikopura, yupu talibik. (Ura, Gibeon mutuku nang ara, Israel yala nang koproba kume. Sikda, Kanaan tam noutam ulamik nang, Amori yala nang arye deiamikba, dadeipdanin yangalamik nang, yupa mitik tonun tuba ulamik. Minop talak ara, sik Israel yala nang arye, “Kume, sik Amori yala nang nirya ara, obuka sirya kum dakmabe. Ton obibyopura, ton tam nang ara, tuba kam unamake,” nyalin yupu nyapdeiamik. Nyapdeiamik bukni, aminyan talak ara, Raja Saul elce, ‘Kume Israel yala nang ap, Yehuda yala nang ap, sikuk amutuku noutam unamakʼ tenen, sik amutuku upnamak ati piribukce, aGibeon nang nirya obuk. Winilamuk bukni, sik Amori yala nang nirya, obuka kum sirya dakamuk ati, anang ara, mitik tonun tuba kam ulamik.)

³ Aning ati ara, sik amutuku nang yayikopura, Raja Daud birye, sik Gibeon mutuku ulamik nang ati, asipdeyuk. “Raja Saul arye, anggun Gibeon nang ati, malye ulamsik ning pununa ati ara, yata ning winipsitinye do? Na kanye ara, anggun dam Raja Saul arye, malye uamuk ning ara, aning kilibuka kum kipdeipnirye, teleb kibuka deiptinyeura, anggun kanye teleb upsilya deice arye, Allah arye el ‘Naʼ tenen nang, nun Israel yala nang amutuku noutam unamabak ara, Allah arye melisilyeba, telebuk kipdeipnamsile. ‘Winipsutuʼ tenen ati, narye yata ning winipsitinyeba, teleb kanye deipsutum do?” nyabuka asipdeyuk.

⁴ Nyabukura, sik Gibeon mutuku ulamik ninye arye, tamubuka nyabik, “Kume. Nun dam Raja Saul ap, el mapu silip nirya ap arye, sik malye kipdeipsik ning ara, sik el yala nang arye, dekna weik kat ning, perak deice arye do, emas deice arye do, ato ning deice arye amalye kipdeipsik ning ara, pia kume, kum daneipsitinge. Aning atonun, anda Raja Daud, an tam nang arye, ato dekna ning deice arye, minop talak sik malye kipdeipsik ning kum eiptume. Tonda, nun tenenyap ning ara, “Nunce, sik Israel yala nang noutam arye, ‘Tonoknye babye ton, nunce kum optibye,’ tenenyabe,” nyabik. Nyabikura, Daud birye nyabuk, “Aning ati ara, anggun Gibeon nang nirya arye, yata ning winipsinyeba, amalye ning kiliptinye do? Anggunce, yata ning teneplumbuk winipnamasin do?” nyabuk.

⁵ Nyabukura, sik Gibeon nang arye tamubuka nyabik, “Kume, tonoknye birye, nun Gibeon nang nirya ati ara, ‘Ayala nang nirya ara, obuka sirya dakamne. Ayala nang ara, kum kibuka deipnamne. Nun Israel yala nang unamap mutuku noutam ara, sik Gibeon yala nang wangaptinge. Tonoknye ton, ‘Amutuku noutam pia kum unamle,’ tenelamsuk nye, el tonok, el nong deice uk, ikin ning deiptibyeba, aning nirya kum ubtu ura, tonap teleb upnamsutu,” nyabik.

⁶ Aning ati ara, anda ninye deiyoknye Raja Daud birye, ‘Telebe,’ tenepmince, Raja Saul elce deibukura, dadeipdanin yangalamika ani, deiamik nang kan-kan noutam arye, tekbarye nang dobuka, nun Gibeon mutuku nang ati arepsutumura, nunce ananguk optibye. Ara, nunce, anang dobuka, Allah Yahweh el dam bukni, Gibea mutuku noutamuk, weik cang yo ikibirye, taica lukuka deibibyeura, atatca deice arye, tekbarye nang lukuka dongoptibye,” nyabik. Nyabikura, Raja Daud birye, “Yo ura, aning ara, telebe uka. Saul tam nang tekbarye nang dobuka, anggun Gibeon mutuku ululum nang ati, narye arepnamsine,” nyabuk.

⁷ Raja Daud birye, ayupu nyapdeibuk touk winibuk. Bukni, Saul elce deiamuknye Yonatan, elce deiamuk mi, el si Mefiboset, elda yan sesal semuknye bira, el dobuka kum arebukba, sik Gibeon nang arye, anye kum obik. Deiyok ara, minop talak, sik Daud ap, Yonatan ap arye, Allah Yahweh el dam arye, “Nun bitinye ara, teleb kanye deibuka, dipkoprob telebuk unamname,” nyabuka, nyapdeipdanamdik yupu atia. Allah Yahweh el si deice arye, “Dipkoprob nyapname,” nyapdika ati, ninye deiyoknye Daud birye, Yonatan el mi Mefiboset dobuka, sik Gibeon mutuku nang ati, kum arebuk.

⁸ Saul elce deibuknye, Yonatan birye deibuknye Mefiboset, yan sesal semuknye bira, Daud birye, kum doprobukce, kum arebuk bukni, yuk nanguk doprobuk. Ara, tonoknye el si Aya, elce deiamuk kilmu, Rizpa, minop talak Raja Saul arye, akil dobukce, sik bitinye arye, mapu bitinye, sik si Amoni ap, tonye el si Mefiboset ap, deipdik nang doprobuk. Ara, Saul el kil Rizpa, akil arye deiamuk bitinye nang ton doprobuk. Tonda, Saul el kilmu, el si Merab, akil arye deiamuk nang pamubarye ton doprobuk. Apamubarye nang nirya ara, akil Merab, el ap el akinye, el si Adriel arye deipdik. Daud birye, sik adeipmarik nang pamubarye doprobuk. Adriel el li koproba si ara, Barsilai ulamuk. Barsilai bira, Mehola mutukunye ulamuk.

⁹ Ninye deiyoknye Raja Daud birye, tekbarye nang doprobukce, sik Gibeon mutuku nang ati arebuk. Winibukopura, sik tekbarye nang nirya ara, Allah Yahweh el si erelamik mutuku kon deice, ara Gibeon mutuku kon deice binuka, cang yo taica ketepdeibik ning deice diripkwetebikura, adiparyuk nirya dibik. Ninye deiyoknye Raja Daud birye, pia mok cena kum arye, dou pia malamuk talak, sik tekbarye nang ara, ikin ning dobuka deiamukba, Gibeon mutuku nang arye obikura, akunum dibik. Atalak ara, sikce wa wibuka koamik ning, el si ara jelai sekukabikce, libuka deilinmik talak dibik.

¹⁰ Ura, aning nirya akunum winibikopura, Aya el mi Rizpa, el malye baju bola, karung koni nyanyak atonun ning arye el ap, el mapu pamubarye nong dipmek nang delina ati ara, weik pala keil deice deibukce, el mapu pamubarye, akunum opmek nang, sik siknilongona ati, abaju bola deice deibuk. El babye abaju bola deice bukuk. Anang sik nong dobuka, lelipdongobuk. Rizpa bira asukum arye, pia kum batakuka biyuk. Asukumuk deiyok dou tuba malamuk talak arye dipdongobuka, sik kouamik ning, lin talak li nirya ap, tonda mok celyangan li talak ap, aning sakalongon talak li ap ara, Rizpa kum biyuk. Aning atouk, atalak noutam nirya ara, Rizpa birye im alip tam lakuka balamle maka yala-yala nirya ap ara, ‘Na mapu sik nong tup yanuka dibicakʼ tenen, pia kaliknauk ulamuk. Ara, keting noutam talak batakniba, talye balamle ning arye, ‘Sik anang nong dibicakʼ tenen ati, dilamuk. Atonun ton, Talya bai tam ulamle yu ning arye, lukunyan noutam yanarye, sik anang nong tub ton dibicakʼ tenen, pia kaliklamukce, kum bataklamuk. Pia asukumuk kaliklamuk.

¹¹ Awinilamukba, yuk ninye arye, ton eibikce, Raja Daud dam nyabik, “Saul el talye pil don kil bukni, elce domuk kil Rizpa, elce Saul birye deiamuk mapu tekbarye, dadeipdanin yangalamika ani, yanuka deiamik nang, sik nong dibik ati, ‘Talye maka ap, talye ning ap dibicakʼ tenen, pia kalikule,” nyabikura, Raja Daud birye kekebuk.

¹² Nyabikura, Raja Daud kekebukce, adiparyuk bikbik abuka, minop talak weiamik nang, Saul el yoka ap, Yonatan el yoka ap, Yabesh mutuku bukni, Gilead mutuku nang ulamik sukum binuka dolbiyuk. (Sik anang arye, ayoka nirya ara, Bet-San asikak, amutuku noutam arye, akunum ubula dopromik. Ara, sik Pilistin nang arye, Gilboa mutuku dup arye, Raja Saul obikce, el nong ap, Yonatan el nong ap, dirilkwetelyanamik sukum ara, Gilboa mutuku dup, Raja Saul akunum obuka, sirya dakik. Obuka sirya dakik arye, sik nong dobuka, amutuku Bet-San asik noutam deiplobik.) Daud birye, ayoka nirya anyak arye doprobuk.

¹³ Ninye deiyoknye Raja Daud birye, Saul ap, Yonatan ap, sik yoka Yabesh mutuku bukni, Gilead tam noutam arye, bobuka yayuk. Winibukopura, Daud elce, sik yok deice diripkwetebuka, deibik tekbarye nang, sik yoka nirya babye, Raja Daud birye, bulubuka deibuk.

¹⁴ Aning akunum winibukopura, ninye deiyoknye Raja Daud, elce Saul ap, Yonatan ap, sik yoka ara, Raja Daud birye, nakub barye nang yok deice kirikuka, diripkwetcamuk nang, sik yoka ap, tonok ansinibuka tuku lukuk. Ara, sik Benyamin yala nang arye, talibuka ulamik mutuku noutam bukni, sik tuku si ara, Zela tam Saul el li koproba, Kish birye palyamuk pum tamuk, binuka dongobuka anang sik yoka ton lukuk. Raja Daud birye, “Winipnamlulume,” nyapdeiamok touk, el pil melin nang arye, aninguk akunum winibik. Aning nirya akunum winibikopura, Allah arye, sik amutuku noutam ulamik nang nirya arye, sik patapneura, morolamik ning ara, “Nun ni Allah melipsilyame,” nyabuka morolamik yupu, akunum kekebukce, meliamuk deice arye, amutuku ara, tuba tonap teleb kipdeibuk.

Pilistin mutuku noutam ninye deiyok nang talibuka ulamik nang obuka, sirya dakik yupu

¹⁵ Ura, sik Pilistin yala nang arye, Israel yala nang ati, ‘Mal olbinamabe,’ nyabuka bulubuka, olalamik. Winilamik talak ara, Raja Daud, el yin talin nang ap, Pilistin nang olbana ati biyik. Aolalbiyik talak ara, ninye deiyoknye Raja Daud bira, mitang kipnin balamuk.

¹⁶ Winibuk talak ara, weik cang ap, mikip weik ap, ulamik nang, anang arye deibikba, dadeipdanin yangalamik nang kankan noutam arye, tonoknye deiyok tonok, el si ara, Yisbi-Benob yayuk. Ayayuknye, el ninye ona ati, cang taica yo atonun ning, el si tembok tembaga deice arye, deibuka domuk, el ikin ara winilye ap, ton noutam dam ning ap, 3.5 kilo gram atonun uamuk. Atalak ara, Yisbi-Benob babye, winiryuk ya yu pia weik ning ap, bobuka yayuk. Ara, ‘Ninye deiyoknye Raja Daud opnamneʼ tenen, yu ya ton, winiryuk ning bobuka yayuk.

¹⁷ Bukni, Zeruya el mi Abisai arye, ‘Raja Daud biti melipnamneʼ tenen, Raja Daud ati, yanuka melibuk. Ayayukce, ‘Raja Daud biti opnamanʼ tenen yanmoknye, weik cang ap, mikip weik ap ulamuknye ara, Abisai arye obuk. Aning akunum winibukopura, Raja Daud el yin talin nang nirya arye, Daud biti morobik. Ara, nun wini talak ara, mal olalbanak ara, an ton kum melibuka banamabe. Deiyok ara, ani. Ara, “Nun ninye deiyoknye, nun olan mutuku nang arye, anti opkikceura, weik mambul kanye bobuka unamabe. An dipminyopura, ance deipminyeura, dadeipdanin, yanganamak nang arye, kum daneipsikceura, an yala nang arye, nun Raja kum upnamtinge. Anti obkicopura, Israel nang unyap mutuku noutam, tonok delin weisa upna atonun ulyama ati ara, aning tangapturye kum datopura, nunda yata wiriptibye do?” ‘Kunukna noutam atonun kipsilyakʼ tenen, nyapkiabe. Israel yin talin nang arye, Raja Daud biti, nyabik.

¹⁸ Aminyan talak ton, mal olbana ton deiyok koubuka, sik Pilistin nang arye, ‘Israel nang ati olbinamapʼ tenen, Gob mutuku olalbiyik. Aolalbiyik talak ara, Husa mutukunye, el si Sibkai, elce ninye tonok, nong cang weiknye, el si ara, Saf obuk. Saf bira, minop talak nong cang weik nang, raksasa nyalamak nang ulamik talak, sikce deibikba, dadeipdanin yangalamik nang, kum danin balamik bukni, sik anang yala ara, el tonok tuba ulamuk.

¹⁹ Yuk talak ara, mal olalbalamikak ara, sik Israel nang ap, Pilistin nang ap, tuba tonap Gob mutuku olalamik. Aolbiyik talak ara, tonoknye el si Yair, elce deiamuknye Elhanan, elda Betlehem mutukunye arye, Kat mutukunye el si Goliat obuk. Tonda, anye Goliat ara, mikip weik ap, nong cang weik ap ulamuknye, raksasa nyalamak nang atonun uamuknye ati, el ninye ona ati, taice memamuk yo ara, ikin weik yo arye, memebuka deibukce taleamuk.

²⁰ Aminyan talak ton, Israel nang arye, Kat mutuku noutam olalbana ton, deiyok koubuka biyik. Winibik talak ara, amutuku noutam nong weik cangnye ton, raksasa nyanyaknye, ayala nang arye deiamiknye ara, Kat mutuku ulamuk. Anye el taruk duk sirik tam babye, kwanim tam babye nirya ara, nakub barye uamuk. Atonun, anye el yan duk nirya babye, dana-dana tam nakub barye uamuknye ulamuk. El taruk duk ap, yan duk ap ara, nukuka 24 uamuk. Anye babye, sik minop talak ulamik nang, weik cang nong ap, mikip weik ap, ulamik nang, raksasa nyalamak nang arye, deiamikba, dadeipdanin yangalamik nang arye, anye ton deibikba, Kat mutuku ulamuk.

²¹ Winyamuknye, elda Pilistinye ati, sik Israel yala nang nirya ati, malye kinmokak arye nyalamuk. Nyalamuk ati ara, Daud el weit koproba, el si ara Simea, elce deiamuknye Yonatan, elce Filistin mutuku weik nong ap, mikip weik ap, ulamuknye obuk.

²² Ninye deiyoknye, Raja Daud ap, el mapu yin talin nang nirya ap arye, sik nong weik cang ap, mikip weik ap ulamik nang, raksasa yala nang arye deiamik nang, dumbarye nang obik. Adumbarye obik nang nirya ara, sikda raksasa nyalamik nang ati, ayala nang danyapce deibikba, deipdanin yangalamika, Kat mutuku yanuka ulamik nang obik.