2 Samuel 20 - Eipomek

Seba birye, yupu deice arye, Raja Daud ati, yanibuk yupu

¹ Gilgal mutuku noutam ara, pia malye winibuka, malye weik ulamuknye tonok ulamuk. Anye bira, el si Seba. Elda, ninye si Bikri, elce deiamuknye ulamuk. Sikda Benyamin yala nang ulamdik. Raja Daud, el bulubuka kina yangana ati, atalak noutam ara, Seba arye, ‘Israel nang, na yupu kekepnamakʼ tenen, lelim nyan ning, el si terompet deice arye, lelim nyan ati, pubukce yukubuka nyamuk. Wininmokce, ayupu nyabuk. “Ara nun ap, Raja Daud ap, tonok yupu kum nyalanyake. Yata ati el ap tonok ansiniptinye do? Se, sik Israel yala nang nirya, nunda atalak aryuk Daud batakuka, na mutuku tamubuka bindopnuyabe! Nun baju bola arye, dolina tenda aik deibupakuk, tamubuka bina unamabe,” nyabuk.

² Nyabukura, sik adiparyuk Israel yala nang noutam bukni, eitam ulamik nang, sik nirya ara, Raja Daud batakuka, ‘Seba, el tam nang unamapʼ tenen, el ap ansinibuka biyik. Bukni, sik outam, Yehuda tam mutuku tuku doprobik nang, utamuk talibuka ulamik Israel yala nang ara, sik pia tuba Daud melibuka, Yordan mek tam arye, dipdongobuka balamika ani, Yerusalem weik asik biyik.

³ Daud el ulamuk asik dam, pia urasin teleb mutuku, Yerusalem biyukopura, sepuluh kilapu, dipkoprob ninye kum domik kilapu bukni, el tonok ulamuk kilapu, ‘Na aik kalikna ap, pil dona ap ati, dawininamakʼ tenen, el min arye biyuk talak ara, el aik deibuk kilapu ati, akilapu dobuka, yuk aik deibuk. ‘Anang arye, akilapu kalinamakʼ tenen, el yin talin nang ton, dopdeibukba, anang arye, anyaik kaliklamik. Atonun ton, Daud birye, takubarye (10) kilapu, sik patan ning nirya ara, dobuka delilamuk bukni, Raja Daud birye, sik akilapu nirya ap, tonok ton pia kum malamuk. Ati, sik takubarye (10) kilapu ara, anyaik pum tamuk, talye ulamik. ‘Sikda, youwak kilapu uninto daulamika ani, yuk-yuk daunamake,’ tenelamuk ati, winilamik.

⁴ Aminyan talak ara, ninye deiyoknye Raja Daud birye, el kwit Amasa biti nyabuk. “Yehuda tam unyak nang nirya ara, ancuk yukupminyeba, sik anang nirya, bulubuka yanamake. Sik yanamak ning ara, like winilye sum noutam aryuk yanamake. Asukumuk bulupnamak,” nyabuk.

⁵ Nyabukba, Amasa adiparyuk, sik anang bulubuka, delina ati laka nyal biyuk. Biyuk bukni, el deiyoknye Raja birye, “Winilye sum noutam aryuk yanamake,” nyapdeipmuk talak noutam arye, el ap, sik Yehuda tam nang ap, tamubuka kum yayik.

⁶ Unubukopura, ninye deiyoknye Raja Daud birye, Abisai biti nyabuk. “Wini talak ara, Absalom bira, mitik ikin arye winipsitu bukni, anye Seba biti ara, weik malye kipduipsute. Ati, nunce elti, pia mounamabe. Aning ati ara, Abisai ance, na yin talin nang weika arye bobuka, bimunce, anye Seba biti dobolbilyame. Minpola arye, anye min tomopminyeura, Seba el adiparyuk, bikbik abuka, weik cang keil arye, poka dobik mutuku noutam wekmalyebuk, anggunce el dam kum bitibye. Bikbik abuka bai ati, minpola elti, tomobilulume,” nyabuk.

⁷ Raja Daud birye nyabukba, Abisai biyuk. Tonda, Yoab el yin talin nang ton, Abisai ap biyik. Sik nirya arye, Keret mutuku nang ap, Peleti mutuku nang ap ara, Yoab el amu tam pil dolamik nang ap, yuk yin talin nang ap nirya ara, Abisai birye deiyok kibukba, Yerusalem mutuku arye biyik. Ara, ‘Bikri el mi Seba tomona ati dobolbinamapʼ tenen, dobolbiyik.

⁸ Ura, dobolbanmeka ani, Abisai ap, Yoab ap, tonda Kereti nang ap, Peleti nang ap, yuk yin talin nang nirya ap, banmeka ani, Gibeon mutuku weik keil bukamukak biyik. Biyikba, Amasa birye, ‘Anang ap epdanamabʼ tenen, yayukce, sik anang nirya ap epdayik. Epdayik talak aryuk, Yoab el mal olal bana ati, yin talin nang ongolamik baju ongopmokce, adeice ara, cang parang ya yu ning ton, el lin ning pum tam aupmokba, el deiyok deice akunum koupdongobuk. Aparang ya ara, el deiyok deice deipmukce, kikipmok ning nirya, el Amasa dam biyuk talak ara, yu ya liyamuk ning pum tam arye, kwiribuka sakuk. Winibukba, ayu parang ya ara, kisikuka taruk sirik tam kipdobuk.

⁹ Winibukba, Yoab birye, Amasa biti nyabuk, “Kao, anda teleb do? An yupu ara, yatato do, na kwit koprop?” nyabuk talak aryuk, Yoab el diksukum taruk arye, Amasa el binuka potong talibukce, ‘Amasa biti oplopnunʼ tenen, el Yoab birye, Amasa talibuk.

¹⁰ Bukni, Amasa arye, Yoab el sirik taruk deice yu ya talipmuka ara, kum eipmok. Kum eipmokba, talye karin arye, Amasa el mun akak, ya bopmuk ning arye lukuk. Lukukopura, Amasa mun noutam auamuk ning nirya ara, sakukce, tuku deice sakuk. El atalak aryuk dibuk. Adiparyuk dibuka ati, Yoab birye, ton ap kum lukuk. Winibukopura, Yoab ap, el weit koproba, Abisai ap ara, ‘Bikri deiamuknye, anye Seba biti, tomopnunameʼ tenen, pia dopbolbanauk unmarik.

¹¹ Yoab tam yin talinnye tonok arye, Amasa dipmokba deipmikak tekmukce, yupu weik arye nyamuk. Ara, “Yata nang do nirya ara, Yoab tam ton kiyapna, Raja Daud, el tam ton kiyapna nyabuka, winyak do? Pia teleb ning ara, Yoab tamuk kipnamyake,” nyamuk.

¹² Amasa el bikna ara, ninye bisik balamik dam deipmikak, el ining ara, banmok noutamuk upmok. Wininmok talak ara, Yoab el yin talin nang nirya arye, abisikuk banmekce, dilamikak, sik anang nirya ara, balamikak asukumuk binuka, tunim anmek. Ara, ‘Se Amasa opmokba, asukumuk dipmok adanoʼ tenen, tunim apmikce, el nong eibik. Winibikopura, arup talak, “Yoab tam kipnup nang ara, el tam kipdopnuyap,” nyabuka, weik yupu arye nyamuknye arye, Amasa el bikna ara, doprobukce bonuka, asukum tonok taram tam noutam deiplobukce, cang baju bola arye, anye el nong lelipdongobuk.

¹³ Amasa el kena ayin talinnye arye, akunum dobuka, bisik balamikak arye, batakuka pera karin binuka, deibukopura, sik yuk yin talin nang nirya ara, ton ap kum batakikce, tuba Yoab ap tonok ansinibuka biyikce, Seba tomona ati, pia dobolbiyik.

¹⁴ Seba birye bikbik abuka, binmo talak ara, sik Israel nang ulamik mutuku noutam nirya ara, bisik banmoka ani, ei mutuku bana ati, (arah utara) sik ulamik mutuku nirya, akunum bisibikce, kirikuka yayik. Winibukopura, eitam mutuku si, Bet-Maaka mutuku bukni, asik si ara, Abel mutuku biyuk. Biyukopura, el ap neika melilamik nang ara, el li koproba, el tam nang, sik Bikri yala nang nirya ap ara, amutuku bulubukabikce, Seba ap anyasik dolamikak ara, neika wekik.

¹⁵ Winibukopura, aminyan sik Yoab ap neika balamik nang nirya ara, yuk nang arye, “Seba ara, Abel Bet-Maaka asik noutam yanuka unmale,” nyabikba, kekebikura, sik nirya arye, amutuku yanuka warikik. Ara, winibikce, amutuku nirya ara, warikdongobuka antanabik. Tonda, anyasik aruma, dana-dana tam weik cang keil poka domik dam ara, atembok bai tam arye, tuku palibukabikce, dobuka, akeil poka dam yayikce, deilinmika ani, wininmik buk weik tonun welebuk. Tonda, sik adiparyuk, ‘Akeil poka tembok saktueʼ tenen, poka nong deice, weik kat yo arye pakanmikce, pirinmek.

¹⁶ Winibuka unmek talak ara, anyasik aruma, Abel mutuku dolamika noutam ara, kel weik kil tonok ulamuk. Akil ara, weik cang keil poka deice tekmukce, weik yupu deice arye nyamok. “Ayupu ara, kekepnululume! Kekepnululume! Na moropmanin ning ara, ani. Yoab bira nyapmunyeba, na dam yanulule. Na tenepman yupu ton, el ap, na ap neika, nun yupu talipnamaname,” nyabuk.

¹⁷ Nyabukba, Yoab kekebukce, adiparyuk akil dam yayukba, asipdeyuk, “Naio anda Yoab do?” nyabuka asideyukura, “Diba nara Yoab,” nyabuk. Nyabukura, akil arye tamubuka nyabuk, “Nara, an amu tam pil melin kil atonun ununa ati, na nyapnun yupu ara, ance pia moubuka kekenulyame, na nio,” nyabukura, Yoab birye, “Telebe, nara akunum kekepnukine,” Yoab birye nyabuk.

¹⁸ Nyabukura, akil arye tamubuka nyabuk. “Minop talak ara, amutuku dana-dana tam ulamik nang nirya arye nyalamik. Ara, ninye nirya arye, ‘Yata wiriptinye do?’ tenenyak talak ara, ‘Weik tonun kel nang arye, weik kel yupu ton nyapnitingʼ tenen, patapsilyeura, Abel mutuku binuka, asilenamlulume. Winipmunyeura, amutuku nang arye, teleb kel yupu nyanamsiake,” nyalamik. Wilamik deice arye, sik yupu lipsisikuka bolilamik.

¹⁹ Nunda, weik asik aruma, Abel mutuku noutam daunyab nang nirya ara, yuk mutuku nang ati, olana ap, yu tenena ap, kum aryuk, namin arye mangkau asa, pia teleb kanye bobuka unyabe. Ara, Israel mutuku noutam ara, yuk asik weik daunyak bukni, nunda namin kanye uk bobuka unyabe. Ati ara na nio, anda yata ning deiyok ati, ‘Amutuku nirya ara, obukapnirye, malye kibuka, sice bukuka, kum kibuka deipnaman,’ tenenmalam do? Tonda, Allah Yahweh elce, ‘Amutuku ara, na ning koproba ati, pia talipnamne,’ tenelirye, talisulul mutuku tuku noutam nirya ati, na ni yata deiyok ati, ance, ‘Amutuku nirya obuka, malye kiploptinye,’ tenenmasilam do?” nyabuk.

²⁰ Akil arye nyabukba, Yoab birye, “Kume, pia dipkoprob ‘Aning winipnamneʼ tenen, kum yanmane. ‘Anggun mutuku obuka atu bukna ap, kum kibuka delina ap ara, winipnamne,’ kum tenepmane! Aning ara, pia kum tenenune.

²¹ Aning ara, nun tenenmap ning kume. Bukni, ninye tonoknye el si ara Bikri, el mi Seba, Efraim mutuku, iknapye tam arye yanuka deibiknyeuk ara, elce, ‘Ninye deiyoknye, Raja Daud biti obuka, sirya daknamne,’ tenelule. Ati ara, narye moropsine. Anggunce, anye Sebauk tomopmunce, dobuka arepnamlulume. Winipmunyopura, nunda adiparyuk, batakibirye, anggun kan-kan arye batakuka, yuk mutuku uk tamubuka binamabe,” nyabuk. Nyabukura, akil arye tamubuka nyabuk. “Ati ara, anye Seba, el kisok ara, daklobibirye, doprobibye ning ara, acang keil poka deice tam arye, anggun dam donoknamabe,” nyabuk.

²² Aweik kel kil arye, ayupu nyabukopura, adiparyuk, el kanye teleb deice arye, Bet-Maaka mutuku noutam bukni, anyasik aruma si ara, Abel mutuku talibuka ulamik nang nirya ati, laka nyalbiyukura, sik nirya arye, ‘Yo, telebe, winipnuyabe,’ nyapdayikce, adiparyuk Bikri elce deiamuknye, Seba el kisok ara, sekukabikce, Yoab dam dopkwetebik. Winibik talak ara, Yoab birye, weik pong-pong an ning, el si terompet, lelim nyabukura, el mapu yin talin nang nirya, amutuku batakuka, sik asik yuk-yuk tamubuka yayik. Sik deiyoknye Yoab babye, tamubuka Yerusalem mutuku uk yayukce, ninye deiyoknye Raja Daud, el dam laka nyalyayuk.

Daud el amu tam pil don nang ati, nyabuk yupu

²³ Ura, ninye deiyoknye Raja Daud, elce el amu tam pil talibuka don nang ati, wibuka deibuk. Ara, Israel nang arye, yuk mutuku nang olana ati, sik yin talibuka, deice tam unanye, ‘Anye panglima yin nang, sik deiyoknye unamleʼ tenen ati, Yoab erepdeibuk. Raja Daud el kalikna ati, mikip weik yin talin nang ara, ninye si Yoyada, elce deiamuknye, el si Benaya erepdeibuk. Sik yala ara, Keriti yala nang ap, tonda Peletit nang ap, ulamik.

²⁴ Tonda, “Aning ara, winibuka ikin pil dopnulum bukni, yo bok arena kum aryuk, aikin pil doplyame!” nyabuka, ninye arye kum tenepmanbuk pia dobuka, yupu nyana deiyoknye bira, el si Adoram wipdeibukba, elce apil aruklamuk. Tonda, amutuku noutam, negara ati yo bok delina deiyoknye bendahara bira, Ahilut el mi Yosafat erepdeibuk.

²⁵ Amutuku noutam yuk mambul ning, sekna pil talibuka dona ati, sekertaris ara, tonoknye el si Seya erepdeibuk. Imam pil dona ati ara, bitinye nang, Zadok ap, Abyatar ap, wipdeibuk.

²⁶ Ninye deiyoknye Raja Daud, el asik dam kalikna ati, imam pil donanye ton, elda Yair mutuku nang arye deiamiknye, el si Ira wipdeibuk.