2 Samuel 2 - Eipomek

Daud birye, Yehuda yala nang mutuku deiyoknye kibuk yupu

¹ Wala mitik anun akunum malamuk ning ara, Daud birye, Allah el si Yahweh ati asipdeyuk, “Na ni Allah, Yehuda yala mutuku bukni, tonok ninye asik mutuku ton bitinye do?” nyabuk. Nyabukba, Allah el si Yahweh arye, Daud biti, “Binamalyame,” nyabukba, Daud birye, “Dan mutuku bitinye do?” nyabuka, asipdeyukopura, Allah arye, “Hebron mutuku binulyame,” nyabuk.

² Nyabukopura, Daud el kilapu bitinye, Yisrel yala kil, el si Abinoam ap, tonda Karmel mutuku kil, el si Abigail ap, bobiyuk. Abigail bira, Nabal el kil ulamuk bukni, Nabal dibukopura, Daud birye dobuk kil ani.

³ Winibukopura, Daud el mapu bona ap, tonda, el melin nang, sik kilapu ap, mapu nirya ap, Hebron mutuku noutam dolamik ninye asik binuka, pia daulamik.

⁴ Akunum biyikopura, Yehuda yala nang yayikce, Daud biti nyabik. “Anda Yehuda yala nang, nun deiyoknye kipnamsilame,” nyabuka, adiparyuk wipdeibik. Akunum winibikopura, aminyan talak ara, yuk nang arye, Daud biti nyabik. “Yabesh-Gilead mutuku nang arye, Saul dibukba akunum weibike,” nyabuka, laka nyabikba, kekebuk.

⁵ Daud akunum kekebukopura, ‘Yabesh-Gilead mutuku ninye ati, yupu nyapdeipnamane,’ tenebukce, el mapu wipdeibukce, nyabuk. “Yabesh-Gilead mutuku bimunce, nyapnamalulume,” nyabuk. “Anggunce pia teleb pil doplum ara, anggun deiyoknye, Saul dibukba, el nong dobuka weiplum ning ara, pia telebe nyapsine. Winiplum ati ara, Allah arye anggunti, ‘Kanye weik deibuka, pia teleb kipdeipsilirye, bona weik arepnamsile’ tenen, Allah moropsine,” nyabuk.

⁶ Ayupu ton nyabuk. “Ati ara, Allah arye anggun biti, bico weik tenepsilirye, batakana kumce, pia melinamsil atonun, na babye, bico weik tenepsinirye, pia melinamsine. Ara, anggunce nun deiyoknye, Saul weipluma atia.

⁷ Wini talak aryuk, kanye talima erelana kumce, anggun ni Saul dibuka babye, mikip weik kipmunce, ilil pia kum arye, mikip kibuka, teleb asa arye, unamlume. Anggun ni koprop Saul dibuka ati ara, anggun Yehuda yala nang arye nati, ‘Nun deiyoknye, pia unamsilame,’ nyabuka, akunum wipdeipnikce, Yehuda mutuku deiyoknye, akunum kipdeipmaniake. Winibuka nyapnikba unamne,” Daud birye nyapdeibukba, el mapu arye, Yabesh-Gilead mutuku nang ati, lak binuka nyabikba kekebik.

⁸ Saul el yin talen nang, sik deiyoknye Nar, elce deiamuk mi ara, Abnar ulamuk. El anye birye, Saul el mi Isboset doprobukce, sik neika panabuka birikce, Yordan mek koubuka, otam Mahanaim mutuku binamrik.

⁹ Amutuku binuka ulamdik ning ara, Abnar birye, Isboset biti, ‘Ninye deiyoknye Raja unamsilʼ tenen, elcuk Isboset biti, erepdeibuk. Winibukba, anye elce taleamuk mutuku ara, ani. Ara, Gilead tam nirya ap, Asyuri yala nang ulamik mutuku ap, Yisreel mutuku ap, Efraim yala ninye ulamik mutuku ap, tonda Benyamin yala ninye ulamik mutuku ap, yuk nang amutuku noutam ulamik ninye nirya apura, Israel ninye ap ati, Isyboset elce talibuka ulamuk.

¹⁰ Saul el mi, Isyboset ara, daulamika ani, keting tamun 40 tahun akunum mabukura, atalak arye deiyok koubuka, Israel yala ninye, sik deiyoknye Raja kibukce, amutuku-amutuku taleamuk. Elda, keting tamun bitinye deice aryuk, ninye deiyoknye Raja kibuka ulamikce, amutuku taleamuk. Bukni, Isboset eitam ulamik ninye ati, ninye deiyoknye ulamuk talak ara, outam (arah selatan) Yehuda tam noutam ulamik Israel yala nang, sikda Daud tam kipdobikce, elak melibuka ulamik. Sikce, ‘Elda, nun deiyoknye Raja pia unamsile,’ tenelamik.

¹¹ Ati ara, Daud birye ninye deiyoknye Raja arye deiya kibukce, Yehuda yala nang talibuka, Hebron mutuku noutam ulamuk keting tamun ara, tekbarye (7) keting tamun deice arye, atam ulamik Israel ninye talibuka ulamuk.

Israel nang ap, Yehuda nang ap, Gibeon mutuku binuka, mal opdayik yupu

¹² Tonok sum, Nar elce deiamuk mi Abnar bira, Yordan mek koubuka, oketeng yangan tamak, mutuku si Mahanaim mutuku arye, Yordan mek koubuka, otam keting wekelban tam binuka, mutuku si Gibeon mutuku, weik asik dolamik damak biyuk. Elda amutuku biyuk talak ara, Isboset el pil melina ati, deiyok-deiyok nang ap, melibuka biyik.

¹³ Atalak aryuk, tonoknye el si Zeruya arye deiamuknye, el mi Yoab ap, Raja Daud, el pil melin nang ap, weik asik dobuka ulamikak ara, Gibeon mutuku dam deiamuk mekwen dam unmekak biyik. (Amutuku Gibeon ara, keting kumulban tam, arah barat uamuk.) Sik eitam ulamik nang melina ati, Abnar ap, el melin nang ap, sik amekwen dam yanuka unmekak biyik. Atalakuk sik outam ulamik ninye melina ati, Yoab ap, Daud el melin nang ap, amekwen dam yanuka unmekak biyik. Tonda, Abnar ap, el melin nang ap nirya ara, Gibeon mekwen deiamukak wekmeka anya arye, sik nirya eipdayik. Winibikce, Abnar ap, el tam nang ap nirya ara, amekwen deiamukak otam bulubuka wekik. Atonun, Yoab ap, el tam nang ap nirya ara, amekwen atam bulubuka wekik.

¹⁴ Winibik talak ara, Abnar birye, Yoab bak nyabuk. “Wini talak ara, nun yin talin nang noutam arye, ton mapu wibuka deibibyakarye, ‘Dan tam nang arye, yuk tam nang ati opsiting do?’ tenen, dipdenamabe. Ati, an tam nang ap, na tam nang ap, anyak noutam arye wibuka deibibirye, epdanuka wekipyeura, opdandikcak, nun dipdenuyabe,” nyabuk. Nyabukura, Yoab birye tamubuka, nyabuk, “Yo, ura telebe, asukumuk opdandenuyake,” nyabuk.

¹⁵ Nyapdarikura, akunum wibukabikce, kintineibuka deibikopura, sik Abnar ap, Yoab ap bukmarik dam biyikce, amekwen dam wekik. Sik banmek talak ara, ayin talin nang nirya nukikce, sik yuk-yuk bukni, ton tam nang ara, obarye arye, (12) dua belas kintinibik touk, otam nang babye, dua belas yin talin nang kintinibik. Ati, Benyamin yala nang kan-kan arye, 12 nang ara, Saul arye deiamuk mi Isboset, sik tam ati, kitinibik. Aning atouk, Daud el tam yin talin nang babye, obarye dem kintineibik.

¹⁶ Kintineibikura, ayin talin nang nirya arye, otam tikmek nang arye, atam tikmek nang ati, sik anang ara, tonok-tonok nang nirya, sik yu parang dobuka, yuk-yuk kisok potonguk talipdanuka, dinikdongopdayikce, tonye birye, tonye biti, el mun noutamuk lukdongopdayikce, sik neika adiparyuk opdeipdayikba deibik. Ati, Gibeon mutuku dam arye winibikce, dibika ati ara, amutuku ulamik nang arye, “Amutuku ara, yu parang ya arye obadayika ati, nun yupu deice arye, amutuku si ara, ‘Helkat-Hazurimʼ nyanamabe,” nyabuka, si sibik touk, wini talak babye, amutuku ati, asi uk tuba nyanyake.

¹⁷ Aning winipdayikopura, sik dana-dana tam awekmek yin talena nang nirya arye, adiparyuk asum noutam aryuk, atalak ara, yu weik ubukce, opdayik. Winipmeka ani, sirya ara, Daud el yin talin nang arye, Abnar ap, Israel yin talen nang ap nirya ati ara, obisibikce, malye kibik.

¹⁸ Atalakuk, tonoknye el si Zeruya, el mapu winilye nang ara, Gibeon mutuku mekwen dam olanmek talak ara, sik babye asukum unmek. Zeruya elce deiamuk nang, sik si ara, ani. Ara, Yoab ap, Abisai ap, tonda Asael ap, aunmek. Asael elda, rusa basam sebuka balamla atouk, pia minpola sebuka balamuknye ulamuka ati, pia bikbik abuka banmok.

¹⁹ Winilamuka ati, asum aryuk, Abnar bira, ‘Se, anang arye oplopnicakʼ tenen ati, ‘Lyepdanun,’ tenebukce, bikbik abuka banmoka ati, Asael birye Abnar biti, ‘Anye tomopnunʼ tenen, pia bikbik abuka, tuba dobona uk unmokce, kwanim tam ap, sirik tam ap, ‘Yuk bisik ton binun do?’ tenena kumce, pia tuba dobona ukunmok.

²⁰ Pia dobolbanauk unmoka ani, Abnar birye tamubuka dipdeyukce, nyabuka asipdeyuk. “Se, na aminyan tam bikbik abuka, yanmalamnye bira, Asael nyakinyaknye, “Ance anyanganmalam do?” nyabuka, asideyukura, Asael birye, “Diba natia. Narye an aminyan tam, bikbik abuka yanganmane,” nyabuk.

²¹ Nyabukopura, Abnar birye tamubuka nyabuk. “Kume, ance nati, pia dobona meme. Dana-dana ton dipdelyame. Winipmince, na yin talena nang ara, tonoknye ton eipmince, tomopminyeura, el yin ap, el talilul ning ap, doropnulyame. Na uk ara, bataknilyame,” nyabuka morobuk. Nyabuk bukni, Asael arye, ayupu kum kekebukce, ‘Abnar uk tomopnunʼ tenen, tuba Abnar aminyan tam, bikbik abuka, dopbolbana uk unmok.

²² Wininmoka ani, tuba bikbik abuka banmarika ani, Abnar birye, tamubuka Asael biti nyabuk, “Amio, ance natibuk dobona ara, bataknilyame. Ance natibuk, tuba dobolyanganiminyeura, aminyan ara, narye dipkoprob opnamakine. Opkinyeura, an du Yoab, el urasin dina ati ara, yata wiriptinye do? Alye weik upnilyak ati, bataknilyame. Tuba bikbik abuka, yangana kume,” nyabuka morobuk.

²³ Asael arye, ayupu kekebuk bukni, ‘Bataknune,’ kum tenebukce, mandipna kanye bobuk ati, Asael arye, Abnar el aminyan tam bukni, damak yayukba, Abnar birye, ninye ona ati, cang yo tace luamik ning ara, el si tombak doprobukce, el amnyok tam arye lukukura, Asael el mun ara, botobukak arye, balye deice tam panabuka belebukura, Asael adiparyuk asukumuk dibuk. Winibuk ati, aminyan talak ara, sik yuk yin talena nang nirya ara, Asael dibukce, lokuka poulbiyukba, aminyan banmek nang nirya ara, asukumuk wekelbiyik, ‘Se, Asael asukumuk dipmoe,’ tenenmikce, asukumuk tunim abuka tikmekce, el nong dinmek.

²⁴ Ura akaren aryuk, ayin talin nang arye, asukumuk tikmek arye, Asael el nong dinmek talak ara, Yoab ap, Abisai ap ara, sikce dukdongobuka, ‘Abnar opnunameʼ tenen ati, pia bikbik abuka dobolbanmarik. Bikbik abuka, dobolbanmarika ani, keting wekukopura, keting yangan tam bukni, mutuku si Giah mutuku, otam uamukak bukni, abisik ara, Gibeon tam balamik bisik bukni, ninye kum ulamik tam, kata tam ara, tonok mutuku kon deice welebik. Amutuku kon deice si ara, Ama mutuku biyik.

²⁵ Ama mutuku kon deice biyik talak ara, sik Benyamin yala yin talin nang arye, Abnar ati yanuka melibik. Ara, ‘Nun mal olan nang arye, nun deiyoknye Abnar opnuyaka ati, nuncuk elti, kalikuka melipnuyap,’ tenebikce, Abnar noutam tekmokura, sikce el dana-dana tam warikdongobuka, kintinip deibikce tikik.

²⁶ Amutuku kon deice tikmekce, Abnar birye, Yoab ati yukubukce, weik yupu deice arye, ayupu nyabuk. “Amio, nunda pia ati, mal olana ap, yu parang ya arye, olana uk unamap do? Anda kum biklum do? Tuba-tuba mal olana uk ubibyopura, teleb kum kipdeipsutue. Malye weik upsilyeura, ninye weik tonun ton dipnamake. Nun nirya weik, imun kanye bobuka engenamabe. Ati, moubuka biknamlyame. Dipkoprop ara, nunda an kayapu nang unyabe. Nunda tonok yala nanguk unyabe. Ati, Yoab, an mapu ati, dan talak arye nyapminyeura, anggunce nunti, dobolyanmasiyak ning ara, batanamsiyak do?” nyabuka, asipdeyuk.

²⁷ Abnar arye nyabukba, Yoab birye tamubuka nyabuk. “Se, dipkoprob nyapkine. Allah Yahweh pia kam ulamle touk, dipkoprob yupu uk nyapkine. Ance anyaplam atouk, yupu kum nyaptumopura, na mapu arye, alukunyan noutam nirya ara, an ap, an yin talin nang ap ati, tuba dobona uk unmatibye bukni, inipmatu ani, berektue. Bukni, ayupu akunum nyapmasilama ati, nunce bataknuyabe. Nun tonok yala nanguk unyaba ati ara, tuba olana uk kum unamabe,” nyabuk.

²⁸ Nyabuk ning ara, laka kina ati, Yoab birye, bung-bung ana, el si terompet talibukce, weik arye pong-pong abukba, weik lelim nyabukopura, el tam yin talin nang nirya arye kekebik. Nyabukba, el mapu sik Yudea tam ulamik yin talin nang nirya arye, alelim kekebikce, sik kayapu yuk Israel nang, itam ulamik Israel nang ati, dobolbanmek ning ara, adiparyuk batikik. Tonda, atalak aryuk, olalamik ning babye batakik.

²⁹ Yoab ap, el yin nang ap, batakikopura, Abnar ap, el melibuka banmek yin talin nang ap nirya, alukunyan noutam arye, tuba bisik banmeka ani, Yordan mekin biyikopura, amek koubuka, otam keting yangan tam biyik. Winibikce, tub bisikuk banmika ani, berekukopura, ila tamubuka dukdongobuka, bisikuk banmeka ani, aminyan talak weik asik si ara, Mahanaim mutuku biyik.

³⁰ Ura atalak anyuk, Yoab birye, ‘Abnar ati optinyeʼ tenen, dobolbanmok ning ara, batakukce, sik mutuku tamubuka biyik. Biyikopura, Yoab el mapu nirya bulubuka deibukce, nukdeyukura, bikuk ning ara, ‘Na mapu ara, Asael tonok opmakeʼ tenen, bikmokcukni bukni, akaren ara, tamubuka nukdeyukura bita bikuk. Ara, Daud el yin talin nang toupne dikin (19) nang ton kum eibuk. Winibukce, anyak arye, ‘Se, Daud el melina ati, yin talin nang, toupne dikin (19) nang ton akunum opmakeʼ tenen, bikuk.

³¹ Bukni, Daud el melina ati, yin talin nang arye, Abnar el yin talin nang, sik Benyamin yala nang opmeka ara, pia weike. Ara, tiga ratus enam puluh (360) nang obik.

³² Akunum bikikura, Zeruya el mi Asael, el nong tomobuka, el li wiamikak, Betlehem mutuku uk binuka, asukumuk weibik. Winibik bukni, asum lukunyan aryuk, Yoab ap, el yin talin nang ap, sik nirya ara, tamubuka bisikuk banmika ani, berekel dongon talak ara, Hebron mutuku uk tamubuka biyik.