2 Samuel 19 - Eipomek

Raja Daud birye, el mi Absalom dibuk ati engebukba, Yoab birye, wenebuk yupu

¹ Raja Daud, el mi Absalom obikba kekebuka ati ara, Raja Daud birye el mi ati, malye kanye bobukce, engenmok. Engenmok ning ara, yuk nang arye, Yoab biti laka nyalbiyikba, Yoab birye bikuk.

² Asum ara, Raja Daud, el tam yin talin nang nirya arye kekebik. “Nun ni Raja Daud birye, el mi Absalom dipmoa ati, weik arye engenmoe. El mi obikba dibuka anya arye, el li Daud weik arye engenmoe,” nyanmekba, kekebik. Ati ara, sik mal olan nang, Israel nang ati, akunum opmek bukni, asum adiparyuk, Daud el yin talin nang nirya ara, talima ikin ubukba, sik babye malye kanye bopmek.

³ Winibikopura, ayin talin nang nirya ara, alye weik ubuk. Winipmanto ara, yin talin nang, sik olan talak ilil upliba, bikbik abuka, bai tam sakuka bicopura, alye dakaldalamak tonun, ikin kanye bobuka, alye weik ubuk. Ati ara, Yerusalem asik tamubuka banmek talak ara, adiparyuk talye kanye bobuka, sik yuk-yuk aik tamubuka, dungnul biyik. Ara, dungnubuka balonmeka ani, sik aik yuk-yuk binuka, sirya dakik. Aning ara, talye ati kume, weiknye el mi ati engenmoka ati, alye dakdayikce, dungnubuka biyik.

⁴ Raja Daud birye, el urasin kanupdongobukce, weik arye engenmokce, “Se, na mi, na mi Absalomo, Absalom yata ati do?” nyabuka engenmok.

⁵ Atalak ara, yin talin nang, sik deiyoknye Yoab, Raja Daud aik biyukce nyabuk. “Arup ara, an yin talin nang nirya ati, malye kipdeipmalamba, alye dakdanmake. Ayin talin nang arye, an oldan nang, Israel nang ati obuka, sirya dakmaka deice arye, lyepmasiake. Ara, an ap, ance deiamlum mapu ap, kilmapu ap, tonda an kilapu nirya ap, nirya lyepropmasiyak bukni, ance engenmalam deice arye, alye dakeipsilame,” nyabukce, Daud biti wenebuk.

⁶ Yoab arye, nyabukce, Daud biti, ayupu ton nyabuk. “Anda yata ati do? Na nio, yuk nang arye anti, ‘Nun like,’ tenekinyak nang ara, ance anang ati, telebe tenebuka, bico tenelyame. Bukni, yata nang do nirya, anti, dipkoprob bico tenekinyak nang nirya ati, ance anang ati, ‘Dauplye’ tenen, lik tenelyame. Winibuka ulyama ara, yata deiyok ati do? wininmalam deice arye kel bikine. Ara, an yin talin nang ap, nun yin talina deiyok nang nirya ara, ance nunti tenesiminya ara, ‘Anang, sikda dauaple. Sik anang nirya ara, mambul kume,’ tenesilyame. An mi Absalom, tuba kam uptuba, nunda an yin talin nang nirya, akunum dipmatibye toura, ance kanye deiptume. Nun akunum dibipyopura, Absalom tuba kam utopura, an ‘Telebe,’ teneptumce, kanye deiptume. Ance nun yin talin nang nirya ati, alye dakeipmasilam deice arye, anyapmakin atonun, akunum malye kipmasilame. Ati ara, ance aning pia moubuka teneipnulame,” nyabuka, Yoab birye, Raja Daud biti, wenebuk.

⁷ Wenebukce, ayupu ton dukdongobuka nyabuk. “Ati ara, na nio, an minop bukmince, dipkoprob bai tam bimince, an mapu yin talin nang nirya ati, sik talimak ikin weik teninmak ning ara, binuka namin kipdeipnulame. Na dipkoprob nyapkine na nio. Ance, sik yin talin nang dam min bimince, sikti, teleb yupu min binuka nyapminyopura, atalak aryuk, keting min kum wekelbinulye talak, anang nirya arye, an batakuka bindopnamake. Ninye tonoknye babye, ton tuba kum melipnamkiyake, amutuku batakuka bindopnamake. Winibicopura, ikin pia weik unamkile. Minop talak, ikin upkuk ning nirya ara, mitik mambule. Bukni, an yin talin nang nirya batakikirye, bindobicopura, aning ara, ikin weik unamkile. Ayupu nirya ara, nun ni koprop Allah Yahweh, el si deice arye, dipkoprob nyapkine,” Yoab birye, Raja Daud biti, nyabuka wenebuk.

⁸ Nyabuka wenebukopura, Raja Daud kekebukce, adiparyuk kutukuka, bai tam biyuk. Kutukuka biyukce, anyasik bai tam weik poka bublan dam binuka bukuk. Winibukopura, yuk nang eibikce, laka nyalbiyikba, el yin talin nang nirya ap, amutuku nang nirya ap, Raja Daud dam yanuka wekelyayik.

Raja Daud tamubuka, Yerusalem mutuku biyuk yupu

⁹ Aning akunum winibukopura, Israel yala nang, ilil ubukba, sik asik yuk-yuk tamubuka, bikbik abuka biyik. Bulubuka yanganmekce, Israel nang, ayala-yala nirya arye, ayupu nyanmek. “Raja Daud birye, nun oldan nang nirya ati, lyepdomsuk. Tonda nun oldan nang, Pilistin yala nang ati obisibukba, anang arye, kum taleamsike. Bukni, wini talak ara, Daud el mi Absalom biti, ilil ubukba, amutuku batakuka, bai tam sakuka biyuk ani, aminyan talak ara, el mi Absalom akunum obik.

¹⁰ Tonda nunce wera, ‘Absalom binyuk wipdeibibyeba, elcuk nun ninye deiyoknye Raja unamsil’ tenen, ereipmapu bukni, Daud tam yin talin nang arye Absalom akunum obikba dibuk. Ati ara, wini talak ara, yata ati, nun ni Raja Daud biti, min kum yukubupe. Elda tuba tamubuka, ninye deiyoknye Raja una ati, kum erepdeipnamap do, yata wiripnamap do?” nyanmek.

¹¹ Aning nyanmeka ati ara, Daud birye, Allah el aik pil dona deiyok nang, bitinye ati, yupu nyapdeibuk. Ara Zadok ap, Abyatar ap ati, yupu dopdeibuk. Anggunce, Yehuda yala nang, wisi deiyok nang ati asipdenamdurume. Israel mutuku noutam nirya, Israel nang ayala-yala nirya arye, nyanyak yupu ara, na akunum kekenune. ‘Raja Daud tamubuka, el weik deiyoknye aik yaturye, nun deiyoknye unamsile,’ nyanyaka anya arye, sik Yehuda yala nang ara, yata deiyok ati, sik ulyam do? Na erepdeipnikiba, Raja weiknye unamana ara, anggunda aminyan tam kiyamuce nanguk unamlum do, kum do?

¹² Yuk nang ara, ‘Daud ereibupe,’ akunum nyanyak bukni, anggunda, na kwit capu nang ap, nabi yala nang ap, tonda na ining nang ululuma anya arye, yata ati anggunda, aminyan tam nang kipmalumce, Raja kina ati, sik arye tamubuka, boyanamnulum do?

¹³ Tonda, ninye si Amasa, el dam nyapnamalyame. Raja Daud birye nyapkile. “Anda nabi yalanye ulyam do, kum do? Na batakananye ulyama anya arye, narye nyapkine. Yin talina deiyoknye Yoab, el pununa ati, an wibuka ereipnamkine. Dib nyapkine, arup arye dipdongobuka, atalak-atalak nirya ara, anda na yin talin nang, sik deiyoknye kipnalame. Narye anti, ereipnamkine. Aning kum winipnyopura, na ni Allah, el si Yahweh arye, weik arye wenepnamnutue, nyapne,” Daud birye, nyabuk.

¹⁴ Winibuk talak ara, Yehuda yala ninye nirya arye, Raja Daud biti, weik kanye deibik. Sikda ninye bin tonoknye atonun, elti, kanye deibikce, el tam kiprobik. Ara, sikce el Daud biti, ‘Nun Raja ninye deiyoknye unamsile,’ tenebikce, kanye deibikce, elti, yupu nyapdeibik. Sikce nyabik, “Raja Daud an ap, an yin talin nang nirya ap, nun mutuku tamubuka yanamlume. Nun ninye deiyoknye, Raja unamsilame,” nyabuka, yupu nyapdeibik.

Raja Daud biyuk talak ara, ninye si Simei birye, minop Raja dam biyuk yupu

¹⁵ Yehuda yala nang arye, Daud biti, “Nun mutuku tamubuka yalyame, nun Raja kipnamsilame,” nyabik. Ati ara, Raja Daud adiparyuk, sakwetebuka banmoka ani, Yordan mek duman biyuk. Ani atalakuk, Yehuda yala nang ara, Rajanye dilbana ati, Gilgal mutuku yayik. Ara, ‘Nun deiyoknye Raja Daud eipdabirye, dopropbibyopura, Yordan mek neika koubuka binamap’ tenen, yayik.

¹⁶ Ton atalakuk, Benyamin yalanye Gera, el mi Simei bira, Bahurim mutuku arye, sike kum, minopce Yehuda yala ninye ap, yanganmeka ani, yayukce, Raja Daud ap, epdarik.

¹⁷ Tonda Simei ap, Benyamin yala nang yupa ara, seribu nang ap, tonda minop Raja Saul, el aik pil meliamuknye, Ziba ap, tonda, Ziba el mapu 15 nang ap, tonda, el pil melin nang 20 nang ap, aninye nirya, Raja Daud unamukak, Yordan mekin atalak aryuk, sik minopce yanuka unmekbuk, Daud bira aminyan talak ara yayuk.

¹⁸ Aning ara, urdem ati kum yayik. Ara, ‘Ninye deiyoknye Raja Daud bira, el mapu silip nirya ara, nunce melibibiba, Yordan mek koubuka binamik’ tenen, yayik. Tonda, ‘Raja Daud birye, el pataliba nyalye touk, aning nirya, nunce winipnamabe’ tenen, yayik. Sik yayik talak ara, Gera el mi Simei birye, ninye deiyoknye Raja Daud, el si erena ati, el dam yayukce, kisok tuku dipdongobuka malamak touk winibuk. Yanuka kanupdongobukce, tukwak mabuk. (Ara, atalak ara, Daud Yerusalem mutuku batakuka biyuk talak ara, Simei birye, malye yupu weik nyabuka subukce, Daud yala nang, sik nong deice keil donokamuk ati.)

Daud birye, Simei biti talima arebukba, kanye deibuk yupu

¹⁹ Anye Simei birye, Raja Daud biti nyabuk. “Se na ni, na malye winilamse ati, anda, ‘Malyeuk unamle,’ tenena bataknimince, namin kipnilyame. Narye, an dam malye winipse ning ara, na akunum kele. Ara, Yerusalem binuminye talak ara, pia malye winipse. Bukni, aning ara, tuba kum tenenamnilame. ‘Na malye winipse ning ara, luba kipnunilyam’ tenen, moropkine na nio.

²⁰ Na nio, na deiyoknye ulama ati, na pia malye winipse ning ara, na akunum kel biksirye batakse ati, aning ara, namin kipnamnilame, na nio. Wini talak ara, an amu tam pil melinanye unamne. Tonda, asum ara, anyaka yanuka, winipmakin ning ara, talye ati kume. Ninye Yusup yala nang ara, amutuku weik daunyak bukni, an amu tam pil melibuka donanye, min yumanye bira, na uka. Narye, minop an dam yanuka, telebe nyapmakine,” Simei birye nyabuk.

²¹ Nyabukopura, Zeruya, el mi Abisai birye, ayupu kekebukce, nyabuk. “Kume, Allah el si Yahweh arye, ‘Ninye deiyoknye, Raja unamle’ tenen, wipkuk bukni, anye Simei birye, minop talak pia malye yupu nyabuka, an nong deice sulongon yupu deipkuke. Aning akunum winibuka ati ara, teleb ning ara, adiparyuk anye oploptibye,” nyabuk.

²² Abisai birye, ayupu nyabuk bukni, Daud birye tamubuka Zeruya el mapu Abisai ap, Yoab ap ati nyabuk. “Ayupu nyapmanilam touk, winilyam ning ara, na tenenye touk, pia kum tenelyame. Ati ara, na ap, anggun ap, ansinibuka neika una kume. Anggunda, na oldan nang atonun akunum unamlume. Aning ara, yata ati do? Arup ara, yata deiyok ati, Israel yala nang ton opnamtibye do? Kume, asum ara, na kele. Na kanye ara, Israel yala ninye nirya ati ara, sik ninye deiyoknye Raja akunum upne. Tonda Raja pia unamna ati, ninye tonok babye, kum opnuyabe,” nyabuk.

²³ Nyabuka ati, Raja Daud birye, tonap tuba, tamubuka Simei biti nyabuk. “Narye dipkoprob nyapkine, anda ton wenebuka kum opnamkiyake. Na Raja Daud birye, dipkoprob nyalina yupu deice arye, akunum nyapkine,” nyabuk.

Mefiboset birye, Daud dam biyuk yupu

²⁴ Tonda, Saul el deiamuk mi arye, deibuk mi Mefiboset bira, minopce Daud dam yayuk. Raja Daud birye, Yerusalem mutuku batakuka, biyuk talak arye, deiyok koubuka, Mefiboset bira, ikin kanye bobukce, el ongon baju mek ilikina ap, bam potong kona ap, yan mek likina ap, batakuk. Ara, Daud Yerusalem mutuku Raja ulamuka ani, Absalom biti ilil ubukba, Yerusalem batakuka, bai tam binamuka ani, tuba tamubuka, Yerusalem mutuku uk, teleb ubuka yayuk talak noutam nirya ara, Mefiboset birye, talibuka ulamuk. Mek ilikina ap, mek kekna ap, kum diparyuk yayuk.

²⁵ Ati ara, Mefiboset birye, Raja Daud dam yayuk talakuk, Daud birye asipdeyuk. “Mefiboset, anda na binuka unmase talak ara, na kum melipnulumce, na ap neika kum binamnume ning ara, yata ati do?” nyabuka asipdeyuk.

²⁶ Asipdeyukura, Mefiboset birye nyabuk. “Naio, anda na deiyoknye ulyame. An kele, nara, yan malinye binya arye, na yan arye, yanibuka kum binmantonye unune. Ati, an binuminye talak ara, narye, na pil melinanye biti nyapse. ‘Na keledai basam balye deice bukuka, Raja Daud ap, neika binamname anya arye, aning nirya kintiniplulume,’ nyapse. Nyapse bukni, na pil melinanye Ziba birye, tilila yupu nyapnukba, na keledai basam kum kintinipnuke. An ap kum binumu ning deiyok ara, akunum nyapkine.

²⁷ Tonda, narye malye kum winipse bukni, anye Ziba birye, malye yupu weik, nati nyamnukba, kekeplume. Na nio, na kanye ara, anda na deiyoknye, Allah el im deice pil don nang, malaikat atonun, pia mambulnye ulyama anya arye, ance, ‘Winipnamkine,’ teneminye touk, aninguk winipnamnilyame.

²⁸ Na kele, na ni Saul, elce deiamukba, sikce deipdanin yangalamik nang nirya ara, anti malye ulamik anya arye, akunum opmatume. Ati ara, ance, ‘Anang nirya ap, Mefiboset ap, opnamne,’ tenesiminya babye, teleb uka. Na ni Raja Daud, minop talak arye, talye opmanutum bukni, kum opnulume. Tonda, atalak ara, ance kum opnulum bukni, an bico tenepnulumce, ‘Na ap na aik pum neika dinaname,’ nyapnulumce, lo arepnulume. Ati ara, narye anti, tuba tonap tonok ning babye, kum moropnamakine,” Mefiboset birye, Raja Daud biti nyabuk.

²⁹ Nyabukba, Raja Daud birye, tamubuka nyabuk. “Kume, yupu tonap kum nyapnulame. Auplule. Wini talak ara, an ap, an don pil melinanye Ziba ap, an ni taleamuk wa win dam tuku nirya, noutam arye, bokuka dopropnamlulume. Elda, noutam ning dopropnamle touk, an babye noutam dopropnalame. Ansinibuka dopropnamdurume,” Daud birye nyabuk.

³⁰ Nyabukba, Mefiboset birye, tamubuka Raja Daud biti nyabuk. “Kume na nio, Ziba birye, awa win dam nirya ara, dolona teleb uka. Ara, urdem ati kume. Na dolona ara, mambul kum bukni, weik mambul ara, na nio anda ona kum aryuk, teleb arye tamubuka, nun mutuku yanmalama ati, na kanye deipne. Yuk ning ton kum patapnile ati, ayupu nyapkine,” Mefiboset birye nyabuk.

Ninye si Barsilai birye, Raja Daud melibuka, biyuk yupu

³¹ Aning atonun, ninye ton Gilead yalanye, el si Barsilai, el ulamuk mutuku Regelim mutuku arye, ‘Raja Daud dam binirye, Yordan mek koubuka, melibuka binimnyeura, ‘Telebe dabilyame,’ nyapnyopura, el yukak binamalak ara, kanye deibuka binamale,’ tenebukce, yayuk.

³² Barsilai, el ulamuk talak ara, keting tamun yupa weik delapan puluh tahun (80) deice, akunum wisi danamuk. Wisi akunum danamuk, diparyuk yayuke. Minop talak ara, bona utotoa talinanye ulamuka anya arye, Raja Daud Mahanaim mutuku bai tam binuka, ulamuk talak ara, Barsilai birye, minop talak arye Raja Daud, el dina ati, kintinibuka bobinamukce, arelamuk.

³³ Winibuka, weik arye Raja Daud meilyamuk ati ara, Raja Daud birye, Barsilai biti nyabuk. “Amio, ance meliamnuluma anya arye, wini talak ance na melipniminba, nun bitinye Yerusalem mutuku binimirye, narye anti, aning-aning nirya arepkiniba, talibuka unalame,” nyabuk.

³⁴ Nyabukopura, Barsilai birye, tamubuka Raja Daud biti nyabuk. “Naio teleb nyapnilam bukni, na an pil donanye bira, keting tamun weik arye minop unirye. Wisi akunum dase ati, akunum dipna dam upmanila anya arye, yata wirina ati, narye an melipkenepa, Yerusalem mutuku binunam do?

³⁵ Aning ara, urdem ati kum nyapne. Na keting tamun ara, yupa delapan puluh (80) keting tamun akunum wisi dase ati, wini talak ara, narye, ‘Aning telebe, aning malye’ tenen, tuba moubuka biktinye do, kum do? Kume kum biktinye na nio. Tonda na nio, na din ning ap, din mek ap babye, aning dipnyopura, ‘Aning telebe, aning malye ning’ tenen, kum kel kiptinirye, kum nyaptinye. Tonda, wini talak ara, sal do, kilapu do, teleb mot senmaya babye, teleb ubuka kum kekeptinye. Kume na nio, na ap neika bitinye bukni, na wisi dase ati, na mambul ning nirya, ancuk melipnamnilama anya arye, an ikin unamkile. Aning ara, yata deiyok ati do? Kume aning ara, auplule.”

³⁶ “Tonda na nio, ance nati, ‘Dekna weik ning arepnamne’ tenena kume. Na ap, an ap, Yordan mek koubuka, bisik noutam arye anyapce neika binaname. Weika arye kum binaname.

³⁷ Na nio, na moropkine. Nara, an amu tam pil donanye unune. Bukni ance, ‘Telebe,’ nyapniminyopura, nara, na mutuku koprop tamubuka binamane. Na mutuku bukni, na aik tamubuka binyopura, na mutuku uk dipnamne. Dipniba, na nong ninye, na ni koprop ap, na nin koprop ap, diamdikba, weiamik sukumuk, weipnamniyake. Ati, na ton tenena kum bukni, narye tenipmana ara, anyaka unmalanye, el si Kimham, an amu tam pil donanye ulule. Ance, ‘Telebe,’ nyaptumopura, el ap, an ap, Yordan mek neika koubuka biturume. Ance, ‘Aning winiptinye, anye biti winibuka melipnune’ tenen, tenenalam ning nirya ara, elti, melinamlyame,” pia wisinye Barsilai birye, Daud ati nyabuk.

³⁸ Nyabukopura, Raja Daud birye Barsilai biti, nyabuk. “Ati ara, ance tenepmalam touk, anye Kimham dobuka binirye, an tenepmalama atonun, aning nirya ara, elti, melibuka winipnamne. Tonda, yata ning do nirya, an patapkilye ning nirya ara, ance moropniminyeura, narye dipkoprob melibuka winipnamkine,” Raja Daud birye, pia wisinye Barsilai ati, nyapdeibuk.

³⁹ Nyabukba, aninye nirya, Yordan mek koubuka, otam mutuku banmek. Sik nirya banmekbuk, aminyan talak ara, Raja Daud el babye, sirya binuyuk talak ara, Barsilai ati, ‘Telebe, Allah arye melinamkile,’ nyabukce, el urasinak mutubuka, melekdobukura, el aik tamubuka biyuk.

Israel nang ap, Yehuda yala nang ap arye, ninye deiyoknye Raja Daud ati, malye kanye bobuka, nyapdayik yupu

⁴⁰ Aning winibukopura, Raja Daud ap, Yehuda yala nang ap, sik yin talin nang ap, tonda, Israel nang sik yin talin nang anoutam nang nirya ap, Yordan mek koubuka, otam banmek. Gilgal mutuku banmek talak ara, ninye ton Kimham ap melibukba, aninye nirya ap, Raja Daud ap, nirya biyik.

⁴¹ Biyik bukni, aminyan talak ara, Israel nang yupa weik arye, ninye deiyoknye, Raja Daud dam yayikce, elti, nyabik. “Nun kwit capu, Yehuda yala nang ara, yata ati Raja Daud anti, ubula dolona atonun updeipsik do? Tonda, ance anang ati, ‘Telebe,’ nyabuka yukupdoplumce, ‘Na melin nang unamake,’ nyabuka, an mapu ap, an yin talin nang ap, Yordan mekin arye, neika ansinibuka, Yordan mek koubuka yalum do? Sik Yehuda yala nang arye, anti, dalubuka ubula dolona atonun upkike. Aning ara, nun like,” nyabik.

⁴² Israel ninye arye nyabikba, Yehuda yala nang arye tamubuka, Israel yala nang ati nyabik. “Winibupu ning ara, Raja Daud nun tam damaknye, nun yalanye koprop ulula ati, winibupe. Anggunda, yata ati nun uapmasulum do? Dipkoprop ning ara, Raja arye, el ning ton arepsukba, dobuka dipmap do? Kume, nunce el ning kum dobuka dipmabe. Tonda, el ning noutam arye, yata bona ubula bopmaburye, ‘Nun ning atia,’ nyabupu do? Kume, aning kum winibupu,” nyabik.

⁴³ Nyabikba, sik Israel yala nang arye, tamubuka Yehuda yala nang ati, nyabik. “Winipmanto ara, elda Raja ninye deiyoknye kina ati, nunda yupa tagu barye (10) kipna arye, ‘Elda nun tamnye,’ nyanyabe. Tonda, nunce elti, ‘Nun yalanye koprop ulule,’ weik arye nyaptibye. Anggunda, mitik anun aryuk, ayupu nyaptume. Dipkoprop elda, nun yala nang koprop ulule. Ati ara, anggun Yehuda yala nang ara, yata ati malye yupu nyabuka, nun deice deipmasulum do? Yata ati anggunda, nunti, ‘Sikda, talye nang uka,’ teneplumce, malye kanye bobuka, disululum do? Luba kildongona kume. Nunda, minopce deiyok koubuka, morolamupa ani, Raja Daud tuba tamubuka boyayik. Anggunda, aminyan talakuk, nyaplume!” Israel yala nang arye, nyanmek bukni, sik Yehuda yala nang, sik yupu nyana ara, mikip weik nang anya arye, yu yupu weik arye nyanmekba, sik Israel nang arye, Yehuda yala nang, sik yupu kum yanipmanto ubik.