2 Samuel 18 - Eipomek

Absalom malye kibuka, obikba dibuk yupu

¹ Atalak ara Daud birye, el ap ulamik yin talin nang nirya, bulubuka tikik bukni, sik kisok nirya dipdeyuk. Dipdeyukce, sik yin talin nang, weik deiyok nang kina ati, ton ning ara wipdeibukura, anang ara, yin talin nang seribu talibik. Ton nang ara, wipdeibukura, anang ara, yin talin nang seratus talibik.

² Aning akunum winibukopura, Daud birye ninye minopce menekuka deiya, koubuka mal olalban nang nirya bokuka, yupa winilye kipdeibuk. Ton yupa ara, Yoab birye deiyoknye kibuk. Ton yupa ara, Zeruya el mi Abisai, Yoab el weit koprop arye deiyoknye kibuk. Ton yupa winilye ara, Gad yalanye, el si ara Itai birye, deiyoknye kibuk. Winibuka kintinip deibukopura, Raja Daud birye, el yin talin nang nirya ati nyabuk. “Anggunuk pia kum bataknamsine. Na ap, anggun ap, nun oldan nang ati, neika olbinamabe,” nyabuk.

³ Nyabuk bukni, ayin talin nang nirya arye, tamubuka nyabik. “Kume na nio, an ap, oldalbanak ara, bana kume. Winipmanto, nun oldan nang arye, obuka kumdaneipsikiba, nun batakuka bai tam sakuka bindobipyopura, nun oldan nang arye, nun talye nang ati, ‘Anang ara, mambule,’ kum tenepnamake. Tonda, nun nirya noutam bokuka, weik dibipya babye sikce, ‘Aning ara, mambule,’ kum tenepnamake. Bukni, nun ni koprop, an tonoknye bukni, an dipminyopura, ninye yupa tagu barye, 10 ribu nang diplamak atonun upnalame. Ati ara, nun kanye ara, pia teleb ning ara, amutuku unmalamak aryuk, nunti melipnamsilame. Nun ap neika olbana kume,” nyabik.

⁴ Nyabikopura, sik deiyoknye Raja Daud birye, tamubuka nyabuk. “Telebe anggunce, ‘Aning telebe,’ tenepmaluma atonun, na babye winipnamne. Anggun dabilulume,” nyabuk. Nyabukopura, elda anyasik dolamik bai tam, poka bublan dam tikuka dinmokba, sik yin talin nang nirya ara, yupa ara, lelebuka tikmekce, kutukuka banmek ara, ton yupa ara, seratus arye banmek. Ton yupa ara, seribu (1.000) arye banmek. Aning atonun, ayupa ton, ayupa ton weik arye, bai tam banmek.

⁵ Binuyik talak ara, sik deiyoknye Raja Daud birye, Yoab ap, Abisai ap, Itai ap ati, nyabuk. “Na mi Absalom ara, mitika babye dila ton sakana kume. Yu arye ona kume. Ara, na kanye imun upnilyak ati nyapsine,” nyabuk. Nyabukopura, ayin talin nang nirya ati, Daud birye, sik deiyok nang ati, nyabuk yupu kekebik. Sik yin talin nang nirya arye, kekebik.

⁶ Kekebikopura, Daud el mapu, sik yin nang nirya ara, Israel nang olbana ati, biyik. Sik oldanmek mutuku si ara, Efraim mutuku bukni, yo noutamak bai tam olalbiyik.

⁷ Atalak ara, Daud el yin talin nang arye, Absalom el tam nang, Israel yala nang ati, pia weik obik. Dipkoprop atonok sum obikba dibik nang nirya ara, yupa weik, dua puluh ribu nang (20.000) obikba dibik.

⁸ Amutuku noutam nirya asum oldanmek. Olanmek ara, mal olan dam dibinmek ara, ninye mitiktobuk, amutuku yo kan-kan noutam ara, ninye pia weik dibik. Tonda, Daud el yin talin nang arye, sik parang ya arye, ninye mitik weik obik bukni, ayo noutamak noutam dibik ning ara, pia weik.

⁹ Atalak ara, Absalom el keledai basam balye deice, bukuka bayuk talak ara, talye karin arye, Daud el yin talin nang ap, anye ap epdayik. Epdayikba, Absalom ilil ubukba, keledai basam deice bikbik abuka binmok. Binmok ara, yo noutamak anya arye, Absalom balye deice bukmok keledai basam, weik yo tikamukak amu tam wekelbiyukbuk, Absalom el cang potong, ayo taruk arye kwarikukba, asukumuk dadipmok. Absalom el keledai basam ara, talye bikbik abuka biyuk.

¹⁰ Winibukba, ninye ton Daud, el tam yin talinanye eibukce, el deiyoknye Yoab biti, laka nyalbiyuk. “Naio arup arye, narye dinmanubuk, Absalom bira, weik yo tikamukak noutam arye, el potong kwarikuka dadipmokba eipmanue,” nyabuk.

¹¹ Anye birye, ayupu nyabukopura, Yoab birye tamubuka, anye biti nyabuk. “Anda yata ati asing aryuk dinmom do? Yata deiyok ati, atalak aryuk akunum opmatumba, tukwak poupmatue. Opmatumba, akunum dipmatuopura, narye keil uang, el si ara perak, mitik anun tagu barye, ara tagu barye kibuka (10) akunum arepmakitinye. Tonda, mikip weik yin talin nang deiyatinga delin ning, deililamaka ato ning tonok ap, anti arepmaketinge,” nyabuk.

¹² Nyabuk bukni, anye birye tamubuka, Yoab biti nyabuk. “Kume na nio, minopce keil uang weik, seribu perak arepnutuma babye, Raja Daud el mi ati, na taruk deice kum optinye. Deiyok ara, Raja Daud birye, an Yoab ap, Abisai ap, Itai ap ati, ‘Na kanye imun upnilyak’ tenen, ‘Na mi Absalom biti, yu arye kum opnamlume,’ nyabukba, nun nirya amul arye kekebupe.

¹³ Tonda, atalak ara, anye bira akunum opmatinyopura, yuk nang arye, na babye opmanitinge. Winibuka opnitingopura, ance kum melipnutume. Na nio, an kele, yata ning do nirya, Raja Daud, elce kekelula anya arye, el mi akunum opmatinyopura, el dipkoprob akunum kekepmatue. Kekeplyopura, na dam kum yatum bukni, ance, ‘Anye melipniba, na ton opnicak’ tenen, na dam kum yatume. Ati ara, narye Daud, el mi Absalom kum opmanue,” nyabuk.

¹⁴ Nyabuk bukni, yin talin nang deiyoknye, Yoab birye nyabuk. “Narye, ‘Dan talak arye, anye bira olbinalam do?’ tenen, antibuk apia kum dinamakine,” nyabukce, cang yo dula tombak winilye dobukabukce, Absalom unmokak, kam arye isin tuba aunmokbuk, binuka el taram deice, mikip arye lukdongobuk.

¹⁵ Obukopura, Yoab el mapu yin talin nang, tagu barye (10) yayikce, sik parang ya arye, yanuka obikba, Absalom dibuk.

¹⁶ Obikba dibukopura, Yoab birye, terompet yupu weik arye pong nyabukba, el yin talin nang nirya bulubik. Atalak ara, ‘Israel nang opnuyap’ tenen, dobolbanmek ning ara, batakikba, Israel nang bindobik.

¹⁷ Winibikopura, Yoab el yin nang arye, Absalom el nong dobuka tomobikce, amutuku noutam, yo noutamak noutam uamuk tuku pum bisik dopkwetebik. Winibikopura, el nong deice tam ara, weik arye keil deipnin welenmeka ani, erebuka deibikce, Israel yin talin nang nirya, adiparyuk bikbik abuka, sik aik yuk-yuk ulamik touk bindobik.

¹⁸ Ura, Absalom tuba kam ulamuk talak arye, ‘Na mi min kum deipsa ati, na nong pununa kum upnamnile anya arye, na si kum upnamle’ tenen, weik cang keil ikuka tikeibuk. Akeil ikuk mutuku ara, Yerusalem asik domikak bukni, keting yangan tam, mitik yukak arye ikdeibuk. Amutuku ara, lyu mutuku uamukba, amutuku nang arye, “Nun ninye deiyoknye, Raja el lyuak,” nyalamik. Absalom birye, cang keil ikdeibukce, akeil ap, amutuku ap ati, el sisibuk. Ara, ‘Ninye arye, na si tuba tenepnamak’ tenen, el sisibuk. Amutuku ara, “Absalom, el cang keil ani,” nyalamik. Akeil ati ara, ninye arye, “Absalom el cang keil ara, ani,” tuba nyanyake.

“Absalom dipmale,” nyabikba, Daud kekebukce, engebuk yupu

¹⁹ Aning akunum winibukopura, Zadok el mi Ahimas birye, Yoab biti nyabuk. “Wini talak ara, ance ‘Telebe,’ nyapniminba, Absalom opmangu ning ati, minopce Raja Daud dam nyalbinuyake. Bicopura, ‘Allah el si Yahweh arye, anti lyepmakilarye, an olyangna ati olyangalamkik nang ara, akunum opmake,’ nyalbinuyake,” nyabuk.

²⁰ Nyabuk bukni, Yoab birye tamubuka nyabuk. “Atalak ara, ayupu nyalbana kume. Yuk talakuk nyalbinamlume. Weiknye Raja Daud, el mi Absalom opmakba, arup dipmala ati, arup minopce ayupu kum nyalbinamlume. Yuk sum arye nyalbinamlume,” Yoab birye nyabuk.

²¹ Atalakuk, Yoab birye, ninye tonok Etopianye biti nyabuk. “Awinipmalba eipmalam ning ara, weik Rajanye dam nyalbinulyame,” nyabukopura, anye birye, el dam kanupdongobuka si erebukce, bikbik abuka biyukce, Raja Daud dam nyalbiyuk.

²² Bukni, Zadok el mi Ahimas birye, tuba malye kanye bobuka, Yoab dam tuba tamubuka, tonap tuba nyalbamok. “Naio, narye ayupu nyapnyopura, ‘Yata wiripnamak do?’ kum tenenune. Ikin upnilya babye, ‘Aning ara, mambule,’ kum tenepne. Ati, wini talak ance nyapdeipniminba, Etopianye bikbik abuka, bindopmalak, el aminyan tam, na aminyan bikbik abuka bitinye,” nyabuka, tuba-tuba moronmokba, Yoab birye, anye biti nyabuk. “Yata ati aning patapmakila ati, tuba nyapmanilam do? Ayupu nyapminyopura, aminyan dekne ning kum doproptume. Ayupu ara, kanye imun yupu atia,” nyabuk.

²³ Nyabuk bukni, Ahimas birye, “Kume, ikin upnilya babye, na ton bikbik abuka bitinye,” nyabuka morobuk. Nyabuka moropbukba, Yoab birye, “Yo telebe, adiparyuk bikbik abuka nyalbilyame,” nyabuk. Nyabukopura, Ahimas yuk bisik, Yordan mekin lyuak bisik deice, bikbik abuka banmoka ani, Etopianye bisibuka bindopmok. Aning ati, Ahimas birye, minopce Daud dam biyuk.

²⁴ Daud bira, Yerusalem mutuku bisik bublan bai tam ning ap, aik tam ning ap, noutam bukmok. Bukmokce dinmokba, el aik pil donanye, ‘Yata wiripnamsil do?’ tenen, kalikuka, dina deiyoknye birye, anyaik abilinga arye, welebuka abublan deice binuka, tikuka dinmokba, ninye tonoknye ton, bikbik abuka yangayukba, eibuk.

²⁵ Yayukopura, anyasik kalikinanye eibukce, weik arye malye nyabuka, Rajanye dam nyabukopura, Daud birye nyabuk. “Se el bin tonoknye yanmala ara, urdem ati kume. Na kanye ara, el tonok yanganmala anya arye, laka teleb yupu nyalyanganmasil kum danya,” nyabuk. Nyabuk karin ara, ayanganmoknye, sik dam ton yanganmok.

²⁶ Anyaik deice dinmoknye, adiparyuk dinmokba, yuknye tonap, bikbik abuka yanganmokba, eibuk. Eibukopura, anye birye, anyaik bublan dam kalikina deiyoknye biti, nyabuk. “Dipdelyame, yuknye tonap, el yuk bukni, bikbik abuka yanganmal atia,” nyabuk. Nyabukopura, Raja Daud birye, “Yo, na kanye ara, anye bira, laka teleb yupu nyalyanganmasile, tenepne,” nyabuk.

²⁷ Nyabukba, anyaik kalikinanye, weik poka deice arye, dipdeyukce, tonap nyabuk. “Narye eipmana ara, min yuma yanmonye bira, Zadok el mi Ahimas, el bikbik abuka balamle atonun yanganmale,” nyabuk. Nyabukopura, Raja Daud birye, “Diba anye bira telebnye yanmala anya arye, laka teleb yupu ton bobuka nyalyanmasile, tenepne,” nyabuk.

²⁸ Nyaldongoyuk talak aryuk, Ahimas weik yupu arye, Raja Daud biti nyabuk. “Telebe na ni. Aning-aning nirya, telebuk ulule,” nyabukce, gutam tuku dipdongobuka, si erebukce, ayupu ton nyabuk. “Na ni koprop Raja Daud, ance Allah el si Yahweh ati si erelyam Allah ara, telebe nyapne. El si erepnamabe. Na ni koprop, an ona ati dobolyangalamkik nang nirya ara, akunum obuka sirya dakmabe. Nun ni koprop, Yahweh arye melipsukba, an mal olan nang nirya, akunum obisipmabce, sirya dakmabe,” nyabuk.

²⁹ Nyabukba, ninye deiyoknye Raja Daud birye, asipdeyuk. “Na mi Absalom kamnye bira, batakmalumba, tuba kam unmal do, kum do?” nyabuka asipdeyuk. Nyabukba, Ahimas birye, tamubuka nyabuk. “Naio na walwale. Nun yin talin nang deiyoknye Yoab birye, ‘An ap, Rajanye el melinanye ap, anggunce Raja Daud dam nyalbidurume,’ nyabuka, dopdeipmasu talak ara, yanganumurye kekenumuba, weik yupu nyanmek ning ara, aupmo bukni, yata ning deiyok ati wininmangurye do, na walwale,” nyabuk.

³⁰ Nyabukba, Raja Daud birye, Ahimas biti, “Otam tikilbimince, daunalyame,” nyabuk. Nyabukba, Ahimas adiparyuk, otam aminyan binuka tikuk.

³¹ Atalakuk, Yoab birye, el pil melinanye, Etopia mutukunye dopdeibuknye bira, el ton bikbik abuka yayukce, Raja Daud biti nyabuk. “Naio, anda na deiyoknye Raja ulyame. Narye anti, pia mambul teleb yupu nyalyakine! Ati, kekepnulyame na nio. Asum ara, Allah el si Yahweh arye melipmasuba, na ni koprop, an ona ati dobolyangakinyak nang nirya ara, akunum obuka, sirya dakmabe. Nun ni koprop, Yahweh arye melipsukba, an mal olan nang nirya, akunum obisipmabce, sirya dakmabe,” nyabuk.

³² Nyabuk bukni, ninye deiyoknye Raja Daud birye, tonap, tamubuka asipdeyuk. “Na mi Absalom kamnye bira, batakmalumba, tuba kam unmal do, kum do?” nyabuka asipdeyuk. Asipdeyukura, amelinanye, Etopia mutukunye birye, tamubuka nyabuk. “Naio, nun patapsil ning ara, sik yin talen nang arye, akabunya anye biti winipmeka atonun, anti mal piyangakinyak nang nirya babye, atonun winiptinge. Anye bira akunum opmake,” nyabuk.

³³ Etopia mutukunye birye, ayupu nyabukba, Raja Daud aning akunum kekebukopura, pia malye kanye bobukce, anyasik poka bublan alip tam welebukabukce, el alip aik biyukopura, pia weik arye engenmok. Engepnin banmok talak ara, nyanmok. “Se, se, na mi, Absalomo, na mi Absalomo. Se, na mi yata ati do? Teleb ning ara, an dipna kum bukni, na tonok ara, an nong pununa ati, na dipmatinye. Se, na mi Absalom, Absalomo,” nyabuka engenmok.