2 Samuel 17 - Eipomek

Ahitofel birye nyalamuk yupu ara, yuknye Husai birye, yupu sekdongobuka ati, nyabuk yupu

¹ Ahitofel birye, Absalom biti nyabuk. “Naio, na tenipmana ara, sike kume, adiparyuk ance winipnulyame. Teleb ning ara, ance nyapminba, ninye yupa weik, dua belas ribu (12.000) yin talin nang wibikirye, kintineipmunyopura, alukunyan noutam aryuk, Daud biti dobolbinamlulume,” nyabuk.

² “Wini talak ara, el mikip kum mitang uplirye, el kanye ikin upmale tenepmana ati, atalak aryuk bimince, el dam yaminyopura, opnulyame. El ap, el yin talin nang ap, mikip kum mitang uplye talak ara, ance mikip weik ap, yu ap arye, opminyopura, el ap unyak nang nirya, el batakukabikirye, adiparyuk bai tam sakuka, bikbik abuka bindopnamake. Winibicopura, el Raja Daud bira batakicopura, ance Daud biti binuka opnalyame.”

³ “Daud el tibuk oplopmince, el tam nang nirya bobuka, tuba tamubuka, Yerusalem mutuku uk boyanalame. Ara ance, ‘Anye Daud optinye’ tenen, dobolbanmalamnye binuka opminyopura, tonoknye el nong atibuk kum danamle bukni, yuk ninye nirya ara, kum dipnamake. Winibikcopura, sik yuk ninye nirya, an dam tuba tamubuka yanamake,” Ahitofel birye, Absalom biti nyabuk.

⁴ Nyabukba, ayupu nirya kekebikce, Absalom ap, Israel wisi nang nirya arye, “E, anyapmasilam ning ara, teleb uka. Aninguk winipnamabe,” nyabik.

⁵ Nyabik bukni, Absalom birye ayupu ton nyabuk. “Arki yalanye, Husai bira yukupmunyeba, el yalirye nyapnamle yupu ton kekepnuyabe. Elce yatato yupu yanuka nyapnamasil do?” nyabuk.

⁶ Ati ara, Absalom nyabukba, Husai yukubikopura, Absalom dam yayuk. Yayukopura, Absalom birye, elti, nyabuk. “Ara Ahitofel birye, nunti, ‘Wininamlulume,’ nyan yupu nyasulul ning ara, yata wiripnuyap do? Ayupu ara, teleb do? El nyapmasil touk winipnuyap do, kum do? Kumopura, ance tenepmalam ning ara, lak nyapnusilyame,” nyabuk.

⁷ Nyabukba, Husai birye, Absalom biti nyabuk. “Kume na nio, Ahitofel birye, ‘Wininamlulume,’ nyapmasil yupu ara, wini talak ara teleb yupu kum nyapmasile. Aning kum wininalume,” nyabuk.

⁸ Husai birye, ayupu tonap nyabuk. “Amio tuba moubuka kel biknulyame. An kele, an ni koprop ap, el tam yin talin nang ap nirya ara, olana ati mikip ap, yu ap weik yin talin nang unyake. Sik nirya talima pia uk diliba, yua kil basam el mi obikiba, pia yu weik kilamle touk, unyake. Tonda, an ni koproba ara, yin talinanye weik kel bikamuknye ulule. Ninye olan ning nirya, weik arye kel bikamuk. Ati ara, el ap el amu tam unyak yin talin nang ap, neika kum mapnamale. El biyuk mapnamale.”

⁹ Dipkoprop elda, wini talak keil deiya pum bisik do, yuk bai tam do, dabinuka duknupmale. El ap el yin talin nang ap arye, an tam nang minopce olyasikirye, opsiceba, yuk nang arye kekebikcopura, ninye kekena ak, binuka nyabikiba, yuk nang ton kekenamake. Nyapnamake. ‘Se, Raja Daud birye, Absalom tam nang ati, yata wiribuka nang akunum opmak do? Kum nukmanto ati, weik arye akunum opmakce, sirya dakmake,’ nyanamake.

¹⁰ Aning nyabikiba, an tam yin talin nang, ilil pia kum unyak nang babye, ayupu kekepnamakopura, pia malye kanye bobuka, teniltonauk unamake. Ilil weik uplyopura, ninye ton mikip weik arye, itam kibuka unanye babye, singa bai tam, kam ilil pia kum ulamle tonye bira, adiparyuk ilil upliba, talima mitanguk unamake. Ara, urdem ati kume. Israel nang nirya, kel bikamik ning ara, ‘Absalom el li koproba Daud, mikip weik ninye olananye ulule. Tonda, el ap unyak yin talin nang babye, lik tenebuka unyake’ tenen, akunum kel bikamik.

¹¹ Ati ara, narye anti nyapkine. Ance nyapminba, Israel yala ninye, dan yala nang do, nirya bulupnamake. Ara, Dan yala nang sik mutuku arye, anyapce dukdongobuka, Bersyeba mutuku ton, anoutam mutuku nirya, ninye pia weik arye, an dam bulupnamake. Ara, mitika arye kume. Aning ara, laut mekwen kup-kup mek wininga, pasir weik uliba, kum nukmanto ulye touk, ninye weik arye bulupnamake. Winibikiba, ance menekuka baminba, sik nirya an aminyan tam yanuka, ninye olbanamake.

¹² Aning winipmunba, nunce Daud biti, benduka enmapya ani, yuk sukum daunmaliba eibipyopura, el olbinamabe. Tonda, mok purwe daksakukaplirye, tukwak sakuka, poulbalamle atonun upnamabe. Ara, el ap, el tam nang ap, unyak mutuku nirya, tonok ning babye batakana kumce, elti, enmapya ani, eibipyopura, darabuka olbinamabe. Winibibirye tonoknye babye, el ap, el mapu ap, ton kum binamake. Nirya obuka, sirya daknamabe.

¹³ Tonda el ap, el tam nang nirya ap arye, bai tam mutuku batakukabikirye, anyapce ubuka, ‘Duknubuka unamap’ tenen, yuk mutuku asik donyak noutam bicopura, nun Israel ninye nirya arye, weik tapu boyabirye, anyasik nirya ap, anyasik keil poka angnabuka, wiamik ning ap ara, atapu arye kirikdongobukabikirye, libuka loklobibirye, akeil nirya outam luakuk, malmalya bisik dam deipnamabe. Winibipyopura, amutuku asik ap, keil poka ap, tonok ning babye kum bataknamabe. Nirya libuka loklopnamaba anya arye, tonok aik babye, tonok keil babye, tonok aik abilinga yo babye, kum bataknamabe. Nirya loklobikiba kum danamle. Husai birye, Absalom biti nyabuk.

¹⁴ Aning nyabukba, Absalom ap, Israel ninye, sik yin talin nang ap, ayupu kekebikopura, Husai biti nyabik. “Ahitofel birye nyapsuk yupu ara, mitik teleb upmok bukni, anda Arki yalanye, Husai birye nyapmasilam yupu ara, pia teleb winilula ati, aninguk wininamabe,” nyabik. Ura, anang arye, Husai yupu kekebik ning deiyok ara, ani. Ahitofel birye nyapmok yupu, dipkoprob teleb ubuk bukni, Allah el si Yahweh arye, ‘Kume, Absalom biti, kanye imun ning weik arepneba, ikin weik unamle’ tenen, Absalom ap, el tam yin talin nang ap ati, sik kanye tamupdeibuk. Husai nyapmok yupu ara, malye yupu nyapmok bukni, Allah arye, sik kanye tamupdeibukba, anang arye, ‘Husai nyapmok ning ara, telebe,’ tenebikce, el yupu uk kekebik.

Daud Mahanaim mutuku biyuk yupu

¹⁵ Anyabuk ning ati, Allah el si eren aik pum pil dona deiyok nang Zadok ap, Abyatar ap ati, Husai birye nyalbiyuk. “Wini talak ara, Ahitofel birye, ‘Winipnamlulume, winipnamlulume,’ nyabuka Absalom ap, Israel yin talin nang ap ati, nyapmok bukni, narye nyapmanu ning ara, ‘El nyaplye ning ara, kume. Dipkoprop anggun winipnamlum ning ara, aning ap, aning ap uka,’ nyapsirye, Ahitofel nyapmok yupu ara, sekdongopse.

¹⁶ Narye, yuk yupu nyapsiba, aninguk wininamaka anya arye, anggunce ninye dopdeipmunyeba, anang ara, minopce Raja Daud dam laka nyalbinamake. Raja Daud biti nyapnamlume. ‘Naio, ninye kum unyak mutuku, pata mutuku noutamak ara, ninye arye mek koubuka, balamakak kum mapnamalume. Aning kum bukni, adiparyuk amek koubuka, otam bikbik abuka banamalume. Aning kum winipmunyopura, Absalom tam yin talen nang arye, an dam yakirye, an ap, an neika unyak yin talin nang ap nirya, obikirye sirya daknamake.’ Ayupu nyapnamlyame,” nyabuk.

¹⁷ Atalakuk Yonatan ap, el kwit Ahimas ap ara, mutuku si En-Rogel mutuku unmarik. Yuk nang arye, utenebik. ‘Tonok pil melina kil wibuka dopdeibipiba, akil arye, Yonatan ap, Ahimas ap ati, yupu laka nyalbilyopura, Yonatan ap, Ahimas ap arye, Raja Daud dam laka nyalbinamarake,’ tenebik. Ara, sik bitinye nang ara, Yerusalem mutuku noutam, talye kanye bobuka kum bitiringe. Deiyok ara, ‘Anyaik domikak binimiba, yuk nang eipsikirye, Absalom laka nyalbicak,’ tenen ati, anyaik noutam wekna kumce, yuk sukumak unmarik.

¹⁸ Utenebuka kintinipmek bukni, atalak babye winipmarikba, tonok kamnye ton, sik duknupmarika ebukabukce, kel bikukopura, adiparyuk Absalom dam nyalbiyuk. Nyalbiyukopura, abitinye nang adibuk, bikbik abuka birikce, ninye ton tonoknye, el mutuku Bahurim, el aik dam ara, mek dina ati, kum ubuka palyamuka pum bisik binuka, wekuka duknupdik.

¹⁹ Winipdikopura, Bahurim mutukunye, el kil arye amekwen paliamuk tuku pum bisik alip tam, pala weik baju kalupdeibuk. Kalupdeibukce, ‘Aning pum bisik ara, ninye duknupmarake,’ kum tenebikirye, ‘Kum kel biknamak’ tenen, yakong duk libuka bopmuka arye, aongon aling deice yamupnin banmoka ani, amutuku nang arye, abitinye nang ara, kum eibikce, kum bikik.

²⁰ Winibuka ati ara, aminyan talak ara, Absalom el yin talin nang, akil dam yayik bukni, dungnupmarik nang kum eibikce, asipdeyik. “Abitinye nang Ahimas ap, Yonatan ap ara, dan tam unmarak do?” nyabuka asipdeyik. Nyabuka, asipdeyikba, akil arye tamubuka, “Diba, sik winiryuk yarik talak ara, mek koubuka otam kup-kup birik. Ati winira na walwale,” nyabukba, amutuku nang nirya, anang bitinye ati enmeka ani, kum eibikopura, tamubuka Yerusalem mutuku biyik.

²¹ Anang tamubuka biyikopura, Ahimas ap, Yonatan ap, mek ati lukuka falyamika, pum bisik duknupmarika, kutukukaprikce, adiparyuk minopce bikbik abuka birik. Birikce, Raja Daud dam ayupu binuka nyapdik. “Wini talak ara, Ahitofel birye, Absalom biti, an olyangana ati, ‘Winipnulyame,’ nyabuka, yupu akunum arebuk. Ati ara, an minopce mek binuka koubuka, otam binulyame,” nyapdik.

²² Nyaprikura, atalak aryuk, Raja Daud ap, el melibuka ulamik ninye nirya ap, anirya kintinibukabikce, Yordan mek koubuka otam biyik. Mek duman banmeka ani, berekuk. Tonoknye babye, ton kum batakmek. Nirya ara, Yordan mekinuk binmek.

²³ Winibikba, sikti, ‘Winipnamrurume,’ nyananye, Ahitofel bikukopura, ‘Sik ti yupu nyapdeipmase ning ara, kum kekepmanike,’ tenebukce, el keledai basam deice bukukce, el mapu silip, sik ulamik aikuk biyuk. Biyukopura, el winilamuk ning nirya ap, el mapu ap, kilapu ap ati, “Na taleamse ning ara, anya akunum kintinibuka deipne,” nyabuk. Adiparyuk, tapu yupdanuka opdayukba, akunum dibukba, sikce el nong dobukabikce, el li koproba weiamikak binuka, el nong weibik.

²⁴ Atalak ara, Daud banmoka ani, mutuku si Mahanaim mutuku dam biyukopura, Absalom ap, Israel yala nang, el tam kipromik ninye nirya ap ara, Yordan mek koubuka wekelbiyik.

²⁵ Atalak ara, Absalom birye, ‘Yin deiyok kiplirye, ninye bobuka banamle’ tenen, Yoab pununa ati, ninye si Amasa wepdeibuk. Amasa bira, Israel yalanye el si Yitra, el mi ulamuk. Yitra el kil si ara, Abigail. Abigail bira, ninye si Nahas, el kilmu ulamuk. Abigail el du kul Zeruya ulamuk. Zeruya bira, yin talina deiyoknye, el si Yoab, el lin ulamuk.

²⁶ Absalom ap, Israel yala nang, el tam kipromik ninye nirya ap ara, Yordan mek koubuka wekelbiyikopura, Absalom ap, el neiktoto ulamik nang nirya ap, sik doltakne tenda aik ara, Gilead mutuku uk binuka dobik.

²⁷ Daud Mahanaim mutuku biyuk talak ara, ninye arye el melina ati, kwaning ap, yuk ning ap, boyanuka arebik. Ara, Nahas el mi Sobi, Raba mutuku bukni, Amon yala ninye ulamikak yayuk. Tonda, Lodebar mutukunye, Amiel el mi Makir ap, tonda Gilead yalanye bukni, Rogelim mutuku ulamuknye, el si Barsilai ap, sik anang nirya arye, Daud melina ati yayik.

^28-29 Sikce Raja Daud ap, el mapu nirya ap ati, deibik ning ara, man ning ap, yangalin ning ap, kat tuku arye memelamik bilanga ap, tonda din yala ning si ara, gandum ap, yakung atonun ning jelai, dabuka kintinip deibik ning ap, roti dana deiyok ning tepung ap, meirma ap, kedelei ap, gandum ap, bidang duk weik ning ap, mong mek ap, domba basam ap, sapi moum yung arye kintinipmek din ning ap, aning nirya bobukapbikce, ‘Daud ap, el melibuka ulamik nang nirya ap, sik dinamak’ tenen, boyayik. Ara, urdem ati kume. ‘Aninye sik mok ap, mek ap kum ati, buppu weik arye ninye kum ulamik mutuku banmek talak ara, din patana ap, mek patana ap, mikip kum mitang una ap, akunum upmale,’ tenepmeka ati, aning bulubikce, bobuka, Daud biti arelyayik.