2 Samuel 14 - Eipomek

Absalom bira, Yerusalem mutuku tamubuka yayuk ati, nyabuk yupu

¹ Raja Daud birye, Absalom biti, pia tuba tenelamuk. Utenelamuk ning ara, ninye si Zeruya, elce deiamuknye, el si Yoab bira, akunum bikamuk.

² Ati ara, Yoab birye, ninye dopdeibukba, kel weik kil tonok, Tekoa mutuku ulamukak biyikce, binuka bobuka, Yoab dam tamubuka yayik. Akil bobuka yayikba, Yoab birye, akil ati nyabuk. “Akilo anda, ninye dipmalinye biti, tenenmakirye, winilamak touk, winipnamlyame. Tonda, dipmalinye biti, bico tenebikirye, ongolilamak baju uk, ongopnamalyame. Tonda, kil tonok, el pia kanye deiamlinye, diamlya ati engelamlirye, ulamle urasin atonun, an babye bopnamlyame.

³ Winipminyopura, “An adiparyuk, ninye deiyoknye Raja Daud, el damak bimince, binuka nyapnamlyame. Winibuka-winibuka nyanamalyame,” nyabukce, elce nyapnamkil yupu nirya ara, adiparyuk Yoab birye, akil kekenak ati, nyapdeibukba, akil arye kekebuk.

⁴ Kekebukura, akil adiparyuk, ninye deiyoknye Raja Daud damak biyukce, kutam tuku dukdongobuka kibukce, akil arye nyabuk. “Na ni anda, na weik deiyoknye ulyame. Ati, ance na melipnamanilama ati, anyaka yanuka moropkine,” nyabuk.

⁵ Nyabukba, ninye deiyoknye Raja Daud birye, tamubuka akil ati nyabuk, “Anda yata ning patapmakil ati, nyapnilam do?” nyabuka asipdeyuk. Asibukba, akil arye, tamubuka nyabuk, “Kume na nio, nara talye youwak kil unune. Tonda, talye kankan kil ununa anya arye, na domnuknye bira, akunum dibuke,” nyabuk.

⁶ Nyabukopura, ayupu ton dukdongobuka nyabuk. Na mapu ara, saluk bitinye deiamse. Winyamsibuk daulamdik ani, like tonok sum ara, bai tam dabinuka oldanmarik. Aolanmarik talak ara, ninye yuk nang arye, melibuka lyepdeipmanto kum anya arye, tonoknye bira, el ka koprop arye, obukba dibuk.

⁷ Ati wini talak ara, na deiyoknye, an amu tam pil don kil, tonok ununa anya arye, na tam nang nirya arye, na deiceuk ikin ning deilininyake. Ara, na mi arye, el kakoprob obukba, dibuknye ati, el yok pununa ara, na tam nang arye nyaninyake. Ara, “An mi el ka koprop, kam ululnye ati, ance nun arisiminyeba, el babye kwang dakna ati, wenebuka obibiba, dipnamle,” nyanikyake. Nyanyaka ati, na mi dobuka, sik anang arepnyeba obicopura, nara youwak kil ununa ati, na dem una ara, na like. Tonda, na an amu tam pil don kil arye, na domsenye, el yala deipdanin baning ati, ‘Punamake,’ tenepse ning ara, sikce, ‘Kum kipdeipnamap,’ tenenyake. Ara, narye deipse sal mapu nirya, obikceura, ‘Na domsenye birye, el deiamuk mapu nirya ap, sikce deipdanin banyak nang nirya ara, kum dalyakʼ tenen, moropkine,” nyabuk.

⁸ Nyabukura, ninye deiyoknye Raja arye, akil ati nyabuk. “Anda, tamubuka, an asik binulyame. Aning nirya ara, narye yupu tenipnirye, anti, ‘Winipnamlyame,’ nyapdeipnamakine,” nyabuk.

⁹ Nyabukura, aTekoa mutuku kil, elce tamubuka, Raja biti nyabuk. “Yo ura, na deiyoknye, anda ninye deiyoknye, ance winipnalam ning ara, na ap, na tam nang ap, na ni el tam nang ap, ance winipnamlame ati ara, ikin ning awaplyopura, nuncuk dopropnamabe. Ara, na deiyoknye Raja, an ap, an tam nang ap, anggunda ikin kum dopropnamlume. ‘Winipnamle,’ tenena ati, Allah morokunune,” nyabuk.

¹⁰ Akil arye nyabukba, ninye deiyoknye Raja arye, akil ati tamubuka nyabuk. Yatanye birye do, an dam ton ap malye yupu yanuka nyapkilirye, ikin deipkilye ning ara, na dam bobuka yanulyame. Winipminyeura, dipkoprob elce, tonap tamubuka, anti kum boyanganamle. Na aryuk anti, kalikinamkine,” nyabuk.

¹¹ Raja arye nyabukba, akil arye tamubuka, Raja ati nyabuk. “Na deiyoknye Raja ance, an ni koprop, Allah Yahweh ati, tuba tenepminyeura, na mi arye, el ka koprop obuk ning ati, ‘Anye el ining bikyuk ning ara, kwang daknamab,’ tenenyak nang arye, ‘Na mi tonok kam ulul mi obicak,’ tenen ati, moropkine nyabuk.” Nyabukba, Raja Daud birye, tamubuka akil ati, “Allah dipkoprob kam ulamle touk, na babye dipkoprop, yupu nyapkine. An mi el dam ara, ikin ning tonok babye, ton kum deipnamake. Telebuk unamle,” nyabuk.

¹² Nyabukba, akil arye, tamubuka nyabuk. “Nai, anda na weik deiyoknye Raja, ance, ‘Telebe,’ tenepniminyeura, yupu ton ap nyapnukin ati, moropkine,” nyabuka morobukba, ninye deiyoknye Raja arye, “Telebe, an yupu ton aupkilyopura, nyapnulyame,” nyabuk.

¹³ Akil arye, ton ap tamubuka nyabuk. “Na deiyoknye Raja, ance arup nyapmanu ning atonun ning ara, yata deiyok ning ati, ‘Winipnamne,’ tenepmalamce, Allah el tenen ninye, sik nong deice ikin ning deipnamsilam do? Deiyok ara, ance arup anyapmalam yupu deice aryuk, ance an bidamnye ati, ‘Malye winipmana ati, wenapnamnitinge,’ nyana atonun nyapmalame. Ara, an mi Absalom biti, yaklumba bai sakuka biyukce, tuba pera mutuku noutamuk, tuba ulul ning ara, ninye deiyoknye ance, ‘Tamubuka yalyame,’ kum nyaplum deice arye, akunum malye kiplume. Teleb ning ara, ance an mi Absalom biti, yaklum ning ara, tamubuka yukuptumba amutuku yanuka, unamtu bukni, na ni Raja ance aning kum winiplum deice arye, Allah el mapu dam malye kideiplum ara, yata ati do?

¹⁴ Na nio, na dipkoprob nyapkine. Nun tukwak nang nirya ara, aminyan dipnamabe. Winipmanto, nunda mek tukwak deice diksaklirye, balibuk tamubuka, tonam kwebikirye, kum diklamaka atonun upnamsile. Bukni, Allah elce, ‘Anang ton optinye,’ kum tenelule. Aning kum bukni, yatanye do nirya, el dam tuba kum unyak nang, malye winipbikceba, elce yakliba, pera mutuku binuka unyak nang ati ara, elce, ‘Se, yata wiriptinyeba, anang nirya, na dam ton tamubuka yanganamak do?’ tuba tenesulule. Allah el pil dosilya deice arye, anang tamubuka boyangalule. Ati ara, na deiyoknye, ance yaklumba, yuk mutuku biyuknye bira, ‘Tamubuka yalule,’ nyaptumura, el adiparyuk tamubuka, an dam yanamle,” nyabuk.

¹⁵ Nyabukce, ayupu ton nyabuk. “Nara, an amu tam pil donun kil arye, na deiyoknye Raja, an dam yanman ara, yuk nang arye nati, “Ance binuka nyapnulyame,” nyabuka, malye nyaninyakce, sikce ikin kilinyenyake. Ati, ‘Se, sikce wenepnikcakʼ tenen, na ilil unulule. Ilil kipdeipnikba, nara an amu tam pil don kil arye, moubuka tenipdesirye, ‘Kume, aning ara, na deiyoknye Raja dam binuka, nyapyopura, elce kum bataknamnile. Elce dipkoprob kekepnilirye, na moropnamne touk, winipnamnile,’ tenepmana ati, an dam yanuka, laka nyapkine.

¹⁶ Ara, ‘Narye na Raja deiyoknye dam binirnye, el kekenak binuka nyapyopura, kekepnamnil caʼ tenen, yanuka nyapmakine. Tonda, elce na yupu kekepnilirye, yuknye birye, na mi tonok kam ulul mi, opmanto unulul ning ara, ‘Na deiyoknye Raja arye, lyepdopnamnilʼ tenen, yanuka nyapmakine na nio. ‘Sik aninye arye, na mi tonok obikceura, aminyan talak ara, na tam nang nirya, amutuku noutam arye kum danamake. Ati ara, na mi ap, na ap ara, nun Israel nang ati, Allah arye arepsuk tuku arye, obuka yaknamsiake,’ tenenune.

¹⁷ Tonda, na akunum tenepse ning ara, ani. Ara, ninye deiyoknye Raja ance, nati, ‘Melipnamkine,’ nyapnuniminye yupu ara, dipkoprob anyalin yupu nyapdeipnunilam ning ara, melipnamnile. ‘Na kanye kwa dipnamnil,’ tenepse. Ara, talye ati kum nyapkine. Na kanye ara, nia anda, Allah el pil don nang malaikat atonunye ulyama ati, anda dipkoprob akunum kel bikmince, ‘Aning ara, teleb ning, aning ara, malye ning,’ tenepminyakarye, nyasilyame. Ati an si erelyamnye, Allah Yahweh arye, tuba kalikuka melipkilyeura, an wininalam ning nirya ara, ‘Telebuk unamleʼ tenen, Allah morokunune,” aTekoa mutuku kil arye, Daud biti ayupu nyabuk.

¹⁸ Akil arye nyabukba, ninye deiyoknye Raja Daud birye, tamubuka akil ati nyabuk, “Narye anti, yupu ton asipdenukine. Ati, narye anti asipdekine yupu ara, adiparyuk laka nyapnunilame. Dipkoprob diksukum yupu uk nyapnunilame,” nyabukba, akil arye, “Yo ura, nara akunum kekepmana ati, adiparyuk, na ni Raja, ance asipdenilyame,” nyabuk.

¹⁹ Nyabukura, ninye deiyoknye Raja Daud birye, akil ati, “Yoab birye anti, ‘Winibuka-winibuka,’ nyapnalyame nyapdeipmakil yupu, yanuka nyapnilam do?” nyabuka, asibukura, akil arye nyabuk. “Diba, ninye deiyoknye Raja, anda dipkoprop, kam tuba ulyama atonun, na dipkoprob yupu uk nyapnusine. Anda nun ninye deiyoknye Raja uslilyama ati, ance, ‘Aning nyapnulyame, aning winipnulyame,’ nyapsiminye yupu uk kekebuka, wininyabe. Dana-dana tam kum bitibye. Yuk ning ton kum teneptibye. Ati, ayupu ara, kum duknupnune. Dipkoprob Yoab birye, na an amu tam kil ati, ‘Aning binuka winipmince, ayupu binuka nyapnalyame,’ nyapdeipmanu touk, narye yanuka nyapmakine.

²⁰ Yoab el tenebukce, aning winibuk ara, ‘Na ni Raja Daud, ayupu kekepturye, Absalom biti, ‘Na like,’ tenelul kanye dangubuka, ‘Teleb kanye boptueʼ tenen, ayupu nyapdeipnukura, yanuka nyapkine. “An amu tam pil dolyenye Yoab birye, ‘Aning deice arye aning nirya ara, teleb aryuk sirya daknamapʼ tenen, winibuk. Bukni, na deiyoknye Raja, anda Allah el pil don nang malaikat arye, aning-aning nirya weik arye, kel keiyamik touk, an babye kel weik arye nyasilyame. Ati, ance yata ning do nirya, aupmal ning nirya ara, anda moubuka kel biknalyame,” akil arye, Raja Daud biti nyabuk.

Raja Daud, el mi Absalom tamubuka yayuka ati, nyabuk yupu

²¹ Ara, Raja Daud arye, Yoab biti nyabuk. “Ance nyapnilam ning winipnamana anya arye, ormutuku bimince, na mi Absalom eipminyopura, el ap dobuka, na dam yalulume.”

²² Nyabukopura, Yoab birye, ‘Na ni Raja Daud kipnaman’ tenen, el kisok kanupdongobuka, tuku deice dipdongobuka bulbiyuk. Bulbiyukopura, Yoab birye, “Naio, ‘Allah arye anti, teleb kibuka melipnamkil’ tenen, Allah moropnune. Tonda, arup ara, na moropmakin ning winipnalama deice arye, na akunum bikne. Ara, Raja Daud, nara, an amu tam talye pil donanye unun bukni, kanye deipmanilama arye, na moropmakin ning, melibuka winipmanilame. Aning ara, akunum bikne.” Yoab birye nyabuk.

²³ Ati ara, Yoab birye, Absalom ulamukak, Gesur mutuku biyukopura, Daud el mi Absalom dobuka boyayukba, tamubuka, Yerusalem mutuku yarik.

²⁴ Yarikura, weiknye Raja Daud birye, Yoab biti nyabuk. “Narye, na mi Absalom ati, na kanye kum deipmane. El aik kopropuk binule, na ap, na aik una kume. Absalom kum eipnamane, tonda elce na nong kum eipnamanile,” nyabuk. Raja Daud birye nyabuka ati ara, el mi Absalom, tamubuka el aikuk biyuk. Tuba tonap, tamubuka weiknye Raja Daud damak kum yayuk.

Absalom ap, Daud ap, namin kipdanuka, ansinipdarik yupu

²⁵ Atalak noutamak ara, Absalom binyuk si erenmeka deiyok ara, ani. El yan duk mouse arye, dipdongobuka potong duk mouse, ton malye ning tonok ning babye, kum ulamuk. Urasin telebnye ulamukba, Israel ninye nirya arye, el tibuk kanye deibikce, ‘Elda pia telebe,’ nyalamik. Yuk nang ara, urasin mitik teleb ulamik bukni, el tonok ara, urasin telebnye ulamuk.

²⁶ Tonda, anye bira, el potong kolamika ara, keting tamun tonok akunum upne talak nirya ara, el kisok potong ikin weik ulamukba, potong kopnopura, ikin ati kiklilamik. Kiklilamika, el kisok potong ikin ara, 2.3 kilogram ubuk. Ara, Raja arye, ‘Kiklina ikin ara, winibuka-winibuka biknamlume,’ nyalamuk touk, el kisok potong kopnopura, ‘Ikin ara, yata wiribuka do?’ tenen, kiplipdeyik. Winibuka ulamika anya arye, el kisok potong kobik ning ara, kiklipdeyikba, ikin ara, 2 kilo deice tam 2.3 kilo ubuk.

²⁷ Anye Absalom bira, el mapu ara, sal winilye, kil tonok deiamuk. El kilmu ara, El si ara, Tamar deiamuk. Tamar nepnin balamuka ani, urasin pia teleb kil ulamuk.

²⁸ Absalom bira, keting tamun bitinye tuba, Yerusalem mutuku noutam ulamuk bukni, atalak noutam nirya ara, ninye deiyoknye Raja Daud dam, ton kum yanamukba, sik kum elilalamdik. Absalom birye, el li kopropa, sin kum elilamuk.

²⁹ Winilamdika ati, Absalom birye, ‘Na yupu nyaipneba, Yoab bira, na ni dam yupu nyalbinute’ tenen, Yoab biti yukubuk. Yukubukba, Yoab kekepmok bukni, ‘Absalom yukupmanil ning ara, kum kekebuka binune,’ tenebukce, kum yayuk. Kum yayuk ati, Absalom birye, Yoab biti tonap, like bitinye ning yupu nyapdeipmok bukni, atalak babye, Yoab birye, ‘Na kum binune,’ tenenmoka anya arye, Absalom dam kum yayuk.

³⁰ Winibukopura, Absalom birye, el talye pil melin nang ak nyabuk. “Yoab el wa win dam ara, na wa win damak wibuka ati, anggun kele anya arye, anggunda bimunce, eipmunyeura, el wa wibuka koulamuk ning, el si ara jelai, akunum dokamuk ning ara, uku dinipdongobuka yanamlulume,” nyabuk. Nyabukopura, el pil melin nang biyikce, Absalom birye nyapmok touk, Yoab el wa win dam noutam, uku dinipdongobuka yayik.

³¹ Dinibikopura, Yoab birye, Absalom aik yayukce, asipdeyuk. “Yata deiyok ati, an pil melin nang nyapdeipmalamba, na wa win damak uku dinipmak do?” nyabuk.

³² Absalom birye, tamubuka Yoab biti nyabuk. “Kume, aning ara, talye kum winipse. Deiyok ara, narye an yangana ati, ninye weik laka nyapsi bukni, ance na kekena kumce, na dam kum yaluma atia. Ara, urdem ati kume. Narye, ninye deiyoknye Raja Daud dam bana ati, wipdeipkiniba, bimince, Raja ati nyapnalyame. ‘An mi Absalom birye, anti nyapkile. Nara, yata ati Gesur mutuku arye batakuka, amutuku yanman do? Weik teleb ning ara, Gesur mutuku, oruk ulamtinirya.’ Ayupu ara, Raja Daud biti nyalbilyame. Wini talak ara, ‘Raja el nong ap epdatinimnye’ tenen, patapnile ati, el dam laka nyalbinulyame. Yupu laka nyapmimba, narye el dam binyeura, Raja arye, nati, ‘Elda malinye, malye winibuk ning ara, ani,’ nyabuka wenepnilirye, ‘Anye bira opdeipnululume,’ nyaplirye, wenebuka oplopnamnila babye, teleb uka,” Absalom birye, Yoab biti nyabuk.

³³ Nyabukopura, atalak aryuk, Yoab kekebukce, adiparyuk Raja Daud dam biyuk. Biyukce, Absalom nyapmok yupu laka nyalbiyuk. Nyabukopura, ninye deiyoknye Raja Daud birye, Absalom biti yukubukba, Absalom yayuk. Yayukce, Rajanye si erena ati, yanuka kisok kanupdongobuka, tukwak mabuk. Winibukopura, weik deiyoknye Raja birye, Absalom biti, “Telebe,” nyabuka kina ati, iribuka mutubuk.