2 Samuel 12 - Eipomek

Natan birye Raja Daud biti, “Yata deiyok ati malye winipmom do?” nyabuka wenebuka ati, nyabuk yupu

¹ Allah el si Yahweh arye, el yupu laka nyalamuknye, Natan dopdeibukba, Natan Raja Daud dam yayukce, nyabuk. “Ninye bitinye nang ton, tonok mutuku ulamdik bukni, tonoknye bira, sisinanye, tonoknye bira, bona utotoa talina kumnye ulamdik.

² Sisinanye bira, domba basam ap, sapi basam ap, weika arye weilamuk.

³ Bukni, bona utotoa talina kumnye, elda aning nirya kum bukni, domba kil basam mi, mitik ning tonok dekropmokce, weilamuk. El ap, el mapu silip ap, damak aryuk nebuk. El mapu silip ap, tonok ulamikce, dina tabuka arepnaba, amitik kil domba basam mi ara, ninye mapu atonun ubuka iribuka, el kilmapu atonun ulamukce, el aik pum bisik adomba basam ap, el dam kopropuk malamdik.

⁴ Tonok sum sisinanye, el ninye asiknye tonok, el aik yayukba, ‘Yata domba basam obuka yupnirye, arepneba, aninye asiknye dipnul do?’ tenebukce, el domba basam weik bukni, aning kum obuk. El ning kum obuk bukni, bona utotoa talina kumnye, el mitik kil domba basam tonok ning, aninguk dobuka obukce, yubuka el ninye asiknye biti, arebukba dibuk.” Natan birye Daud biti nyabuk.

⁵ Natan nyabukba, Daud ayupu kekebukce, sisinanye ati weik yu ubukba, Daud birye Natanak nyabuk. “Na ni Allah, kam pia ululnye, el si deice arye nyapkine. Amalye upmal sisinanye bira, dipkoprob teleb ning ara, anye bira, wenebuka oploptibye.

⁶ Domba basam kil ning opmala ara, adiparyuk punupnamle pununa ati ara, like dumbarye, 4 kali lipat, yo bok weik arye areplirye, punupnamle. Ati ara, sisinanye winibuk ning ara, pia malye winibuk. Tonda, bona utoto talina kumnye ati, bico pia kum tenebuk ati, nyapkine,” Daud arye nyabuk.

⁷ Nyabukba, Natan birye, Daud biti nyabuk. “Arup nyapmakin yupu ara, winipmanto yupu deice nyapmakine. Bukni, asisinanye, dipkoprob ara, an atia,” nyabuk. Nun ni Allah, el si Yahweh arye, Israel ninye melisulul Allah arye nyapkile. “Nara, ninye deiyoknye Saul birye, ‘Daud opnamne,’ tenelamkuk talak ara, lyepromkise. Na taruk deice arye wipdeipkinirye, ‘Israel nang, sik deiyoknye kipnamle,’ nyabuka wibuka erepdeipkise. Erebuka tekeipkisinye bira, na uka.

⁸ Saul taleamuk mutuku ap, ninye ap, tonda el kilapu yupa nirya ap, anti areamkise. Winipkisirye, Israel ninye ayala-yala nirya ap, Yehuda yala ninye ap, ‘Sik deiyoknye kipnamle’ tenen, wipdeipkise. Aning nirya winipkise bukni, ‘Aning ara mitike,’ teneptum toura, weik arye tonap arepnamkitinye.”

⁹ “Yata deiyok ati, na nyapdeiamkise yupu ati, yu upkukce, na yupu yaniplobuka, na dam pia malye winipmom do? Awinipmalam ning nirya ara, na kanye ara, ‘Aning ara, pia malye,’ tenekunune. Aninguk kum bukni, tonda winiplume, Het yalanye Uria ton, ance nyaplumba, sik Amon yala yin talin nang arye, Uria obikba dibuk. Ance nyapluma deice arye, anye bira obikopura, anda Uria, el kil ubula doplume.

¹⁰ Aning nirya winipluma ara, ance nati, kum dib tenebuka, na yupu yanina atonun kipnulume. Winiplumce, Het yalanye, el si Uria dibukce, batakuk kil dobuka, an kil kiplume. Ati ara, an mapu delinalam nirya ara, yuk nang ya arye obikiba, dibinamake. Ance dipminye buk, dadeipdanin banamak nang nirya noutamak ara, yu kanye boldana ap, ya arye oldana ap, pia unamake.” Allah arye, Raja Daud ati, nyabuka wenebuk.

¹¹ Nyabukce, ayupu ton nyabuk. “Na Yahweh arye, dipkoprob nyapkine. Tulum ning ap, kanye imun ning ap nirya ara, an tam ninye, adiparyuk ikin ning, an nong deice delinamkiyake. Winipkikiba, an asing dinmaminyak arye, an damak ulamlinye birye, an kilapu nirya dobuka arepneba, anye birye akilapu nirya, yuk nang dinmacakuk, keting noutam neika mapnamake.

¹² An malye winipmom ning ara, lukunyan noutam arye, dungnubuka winiplume. Winibum bukni, nara anti, wenepnamkina ara, Israel nang noutamak, lak dinmacak arye, malye unamkiyaka deice arye, wenenamkine. Israel nang nirya arye eipnamake,” Allah arye, an Daud ati nyapkile. Natan birye, Daud biti nyabuka wenebuk.

¹³ Nyabukopura, Daud arye Natan biti nyabuk. “Se, dipkoprob na akunum malye winipse. Na ni koprop Allah, el si Yahweh ati, pia malye wininune,” nyabuk. Nyabukba, Natan birye tamubuka nyabuk. “Allah, el si Yahweh arye, an malye winipmom ning nirya, kum kipdeipmakile anya arye, wenepnamkil bukni, kum dipnalame,” nyabuk.

¹⁴ Nyabukce, ayupu ton nyabuk. “Kum dipnalam bukni, ance malye winiplum deice arye, Allah ati, ‘Nun lik’ tenen, yaninyak ninye nirya arye, nun ni koprop Allah ati, ‘Elda talya, mikip pia kumnye,’ tenenyake. Ati ara, an wenena ati, Batsyeba deipnamkil mi dipnamle.” Natan birye, Daud biti nyabuk.

¹⁵ Akunum nyabukopura, Natan tamubuka, el mutuku koprop biyuk. Daud el yin talinanye Uria, el kil youwak dakmokce, deipmok mi, Allah arye tenebuka uk, weik arebukba, uk pia weik dinmok.

¹⁶ Daud el mi uk deiyok koubukura, ‘Allah moropneba, na mi kam buknule,’ tenibukce, din dina kum, lukunyan nirya, man aik wekuka, amsuna deice anyuk, makmokba berekuk.

¹⁷ Winipmoka ani, talak weik arye winipmok bukni, el aik ulamik nang, wisi-wisi nang anirya bulubuka yanganmekce, “Buklyame,” nyanmekbuk, sik yupu ton kum kekepmokce, “Na like, tonda anggun ap, neika din kum dipnuyabe,” tuba nyanmok. Winibuka tuba unmokce, nakub barye (6) sum kibuk.

¹⁸ Ami uk dinmoka, inina tekbarye (7) sum ara, dibuk. Akunum dibukopura, Daud el pil don nang arye, “Nun ilil atia, el li Daud laka lepnuyap do, kum do?” nyabuka, yupu talildanmek. “Ati ara, ami kam tuba unmok talak babye, nunce nyapne yupu, Daud kum kekepmanto ulamsuke. Ati, atonun el mi akunum dipmal talak ara, kum kekepnamsile. Tonda, aning nyabipyopura, Daud arye, el nong opdeipdalyak do?” nyabuka, yupu talildanmekba, Raja Daud kekebuk.

¹⁹ Daud, el pil don nang, sik diamuk amul pum nyaldongoldanmekce, sisikinmekba, kekebuk. Aning kekebukaura, bukukce, moubuka tenibuk. ‘Se na mi ara, akunum dipmale’ tenen, kel kibukce, weik imun kanye bobuk. Tenibukce, el pil don nangak asilbiyuk. “Ami ara, akunum dipmal do?” nyabukba, “Naio an mi ara, akunum dipmale,” nyabik.

²⁰ Nyabikura, Daud tuku deice mapmoka bukukce, mek kekukopura, nintong teleb mek likdayukce, potong kobuka, cang baju yuk ning, punubuka ongobukura, Allah el si Yahweh, el si eren aik biyukce, Allah si erebuk. Akunum winibukopura, tamubuka el aik yayukce, “Na din ning boyalulume,” nyabuka moropbukba, el melin nang arye, din ning boyanuka, arebikura, din dibuk.

²¹ Daud el pil don nang arye, sik ni koprop Daud biti, nyabik. “An winipmoma deiyok ara, yata ati winipmalam do? Nun bita kum bikmakiyabe. Ara, an mi kam tuba unmok talak ara, din dina kum, lukunyan nirya engenauk upmom bukni, ami dipmalopura, bukuka, din mangkau asa dipmalama ara, yata ati do?” nyabuka, asipdeyikce nyabik.

²² Nyabikura, Daud arye tamubuka nyabuk. “Diba ami kam tuba unmok talak ara, din dina kumce, si tebuka engenmasirye, mapmase. Ara, ‘Allah kekepnilirye, bico tenebuka, Allah el si Yahweh arye, na mi kam bukeipnamale,’ tenepmasirye winipse,” nyabuk.

²³ “Bukni, na mi akunum dipmala anya arye, nara, yata ning ati, din dina kumce, si tebuka winiptinye do? Winiptinye deice arye, ami tamubuka kum kam buktue. Na babye dipnyopura, el biyukakuk binamnarya. Atonun, wini talak el babye tamubuka, na dam kum yatue,” nyabuk.

²⁴ Nyabukopura, Daud el kil Betsyeba ati, kanye teleb kipdeibukura, aminyan talak ara, Betsyeba ap, neika malamdika ani, sal mi tonok deipdikopura, Daud ap, Batsyeba ap arye, ami si sipdik. Ara, Salomo nyapdik. Tonda, Allah el si Yahweh arye, anye biti, bico tenebukce, kanye deibuk.

²⁵ Allah el si Yahweh arye, ami ati kanye deibuka anya arye, yupu dopdeibukba, Natan deice deibuk. Natan birye, Daud dam binuka, “Allah arye nyapkile. ‘Ance ami, el si Yediya, si dopnalyame,’ nyabuka, Allah arye nyapkile,” nyabuka, Natan birye, ami si laka nyalbiyuk. Sik Ibrani yupu deice, el si ara, Yediya nyabuk deiyok ara, ‘Allah arye anye biti, pia bico tenelule,’ tenen, nyanyake. Ati, asi sipdik.

Daud birye, Raba mutuku doprobuk yupu

²⁶ Atalak noutamuk, Yoab bira, Amon yala nang, sik weik asik, sik mutuku deiyok dam dobuka ulamik mutuku, ara Raba mutuku ulamik nang ati, tuba olbanauk ulamika ani, amutuku ulamik nang nirya, obuka sirya dakikce, amutuku babye, alubuka doprobuk.

²⁷ Ati ara, Yoab birye, Raja Daud el dam nyalbana ati, el mapu ton wipdeibukce, ayupu nyabuka deibuk. Ara ani. “Wini talak na Yoab birye, weik asik, Raba mutuku dobuka unyak ninye, akunum obuka, sirya daknirye, sik mek dina ati, dobuka memepdeibika ara, akunum alubuka dopdopmane.

²⁸ Ati wini talak ara, ninye deiyoknye Raja Daud, ance nun yin talin nang weik anun, aunmak nang nirya, bulubuka deipminyak arye, deiyok kipmince, amutuku asik dobuka unyakak bimunce, warikuka opmunce, amutuku alubuka dopropnamlulume. Ance aning kum winipminyopura, na Yoab biryuk, amutuku alubuka dopropnyopura, dolyanamle talak ara, yuk ninye arye, ‘Amutuku ara, Yoab elce alubuka dopromuk mutuku ati, el siuk sisibibirye, anyasik aruma si ati, el siuk nyanamabe, tenebuka nyabicak,’ tenena ati nyapkine,” nyabuka, Yoab birye nyabuk. Nyapdeibukura, elce, ‘Anang na yupu laka nyalbinamakʼ tenen, wipdeibuk nang arye, ayupu bobuka, Daud dam binuka, laka nyabik.

²⁹ Nyabikopura, Raja Daud kekebukce, el yin talin nang nirya ap, el mutuku nang weik tonun ap, adiparyuk bulubuka deibuk. Bulubuka deibukura, Raba mutuku biyikce, amutuku ulamik nang nirya ati ara, sikce binuka obisibikce, amutuku babye, alubuka doprobik.

³⁰ Israel nang, sik ninye deiyoknye, Raja Daud birye, Amon yala nang, sik ninye deiyoknye Raja kina ati, el kisok deice kalulamuk ning, el si mahkota doprobuk. Winibukce, Daud el kisok deice kalubuk. Amahkota, el puturubuka delina ati ara, emas el ikin ara, 35 kilo gram bobuka, aning arye memebuka deiamik. Tonda, amahkota deice ara, pia dekna weik teleb keil, ‘Permata keil,’ nyanyak, pia urasin teleb ning arye, memebuka palibuka deimik ning uamuk. Tonda, Daud birye, amutuku ulamik nang nirya obukabukce, sik minop talak taleamikce, ulamik ning, bona ning yala-yala nirya ara, weika arye alubuka dobukabukce, el mutuku tamubuka bobiyuk.

³¹ Winibukopura, ninye deiyoknye Raja Daud birye, Raba mutuku ulamik nang nirya doprobukce, sikti, ikin pil aruklamuk. Ara, sikda yo cakne ning gergaji ap, tuku palina ati kat besi ning lingkis ap, pikwel ap, tonda yo wena ati besi kapak ya ap, arebukak arye, “Aning bobuka, na pil ati melipnumunba binuyabe,” nyabukce, bobuka biyuk arye, el mutuku tamubuka biyik. Tonda ikin pil ton, “Batu telel ato ning, keil memebuka delina ati, pil donamlume,” nyabuka, binuka dibukba, ikin pil dolamik. Tonda, sik amutuku ulamik ninye uk kum bukni, Amon yala nang ulamik mutuku-mutuku nirya, noutam ulamik nang babye, ‘Batu tela atonun ning, memen piluk donamakʼ tenen, ikin pil dilamukba, apiluk dolamik. Apil dibukba, domikopura, Daud ap, el yin nang ap, sik nirya ara, atalak tamubuka, sik mutuku koproba, Yerusalem mutuku uk biyik.