2 Samuel 11 - Eipomek

Daud ap, tonok kil, el si Batsyeba ap ati, sekik yupu

¹ Keting tamun winiryuk ning kibukba, wa wiamik wala ara, amutuku-amutuku nirya, talibuka ulamik Raja nang ap, sik mapu yin talin nang ap, nirya bulubuka, sik oldan nang ati, olbalamik bukni, atalak ara, Raja Daud el yin talin nang ap, kum olalbiyuk. Raja Daud arye, el yin talina deiyoknye Yoab biti nyabuk. “Na amu tam unyakce, na melin nang ap, an kayapu Israel yin talin nang nirya ap, sik dam bimince nyapmimba, Amon yala nang nirya olbinamlume,” nyabuk. Nyabukba olbiyikce, Amon yala nang obuka, sirya dakikopura, Raba mutuku asik domik ning, binuka antanap dongobik. Ara, ‘Amutuku nang, yukak pia kum binamak’ tenen ati, winibik. Winibik bukni, Daud tonok ara, sik ap, neika kum biyuk. Elda Yerusalem mutuku uk, talye unmok.

² El yin talin nang yukak, tuba oldanmek talak ara, like tonok sum, Daud mapmoka bukukce, sintam keting ara, el aik deice, kat ning arye amsuna, teleb ubuka domik deice arye, bayukce dinmokba, pia urasin teleb kil tonok, mek kekenmokba eibuk.

³ Ebukopura, akil ati, kanye deibuka anya arye, ninye yuknye ak nyabuk. “Akil dam bimince asipdelyame,” nyabuk. Nyabukura, anye birye tamubuka nyabuk. “Kume akil ara, el si Batsyeba. Ara, Eliam el kilmu, tonda tonoknye el si Uria, el kil ulule. Uria bira, Het yalanye ulule,” nyabuk.

⁴ Nyabukura Daud kekebukce, akunum bikuk bukni, Daud arye ninye yuk nang damak yupu nyapdeibukce, “Akil ara, na dam boyanamnulume,” nyabukba, dobuka, el damak boyayik. Akunum yayukopura, asum lukunyan, Daud ap mapmarika, berekuk talak ara, Batsyeba tamubuka, el aik biyuk. (Ara, sik kabul mapmarik talak ara, Batsyeba el ining ubuk ning ara, akunum mek ilikukba teleb ubuk).

⁵ Sik bitinye mapmarika ani, akil tuba tamubuka, el aik biyukopura, dabinuka unmoka ani, aminyan wala akunum ubukopura, mi bobuk. Mi bobukopura, yuk nang damak nyapdeibukce, “Na akunum mi bopse. Ati, Daud dam nyalbinamlume,” nyabukba, nyalbiyik.

⁶ Daud akunum kekebukopura, el pil don nang ati, “Na yin talin deiyoknye, Yoab dam binuka nyapmunyeura, elce Uria nyapliba, Uria na dam yanamale,” nyapdeibuk. Anang arye, Yoab dam binuka nyabikura, Yoab birye Uria biti, “Daud dam bilyame,” nyabukba, Uria bira, Daud dam biyuk.

⁷ Uria akunum yayukopura, Daud arye, Uria biti asipdeyuk. “Yoab bira, teleb unmal do? Tonda, el mapu, sik yin talin nang ara, teleb unyak do? Sik nirya ara, yata wiribuka, yuk mutuku nang mal oldanyak do? Obuka bisipmak do, kum do?” nyabuka asipdeyuk.

⁸ Nyabukce, Daud arye, ‘Uria biti, el aik tamubuka bilyopura, el kil ap neika maptiring’ tenen, Uria biti nyabuk. “Tamubuka, an aik bimince, yan mek likminyopura, an aik unamalyame,” nyabuk. Nyabukura, Uria bira, Raja Daud, el weik deiyoknye aik batakuka, bayuk talak ara, Daud birye bona weik arebukba, el mapu arye bobuka, Uria dam melibuka bobiyik.

⁹ Bukni, Uria bira, ‘Kume, na kwit capu nirya, yuk mutuku unmakce, nun oldan nang oldana uk unmaka ati, na aik talye una ati, kum binune,’ tenebuk. Utenebuk anya arye, Daud el weik aik bublan dam asukumuk, Daud el aik pil don nang ap, mapmeka anya arye, Uria ap, anang ap, neika mapmek. Asukumuk mapmeka arye, Uria el aik tamubuka, kum biyuk.

¹⁰ Winipmoka ani, berekna talak ara, Daud el mapu arye, “Uria bira, el aik tamubuka kum binmoe,” nyabik. Nyabikba, aning kekebukce, Daud arye, Uria biti asipdeyuk. “Pera mutuku arye, kum yanmalam do? Ati, yata ati an aik tamubuka, kum binmalam do?”

¹¹ Nyabukba, Uria birye, Daud ati nyabuk. “Kume na nio, Allah arye nyapdeibuk yupu liamik marikna ap, Israel ninye, sik yin talin nang ap, tonda Yehuda yala ninye ap ara, yuk mutuku ninye olbiyika ati, bai tam talye doltakna aik pum unmake. Atonun tonda, nun yin talin deiyoknye Yoab ap, na nio an mapu yuk yin talin nang ap, bai tam talye doltakne tenda aik dobuka manyake. Ati ara, na yata deiyok ati, tamubuka na teleb aik bitinirye, mek ap, dina ap, diptinye do? Tonda, na kil ap, neika maptininye do? Aning winipnyopura, pia malye ning winiptinye. Ati na nio, ‘Aning ara, pia kum winiptinye,’ tenepmanua ati, an asik damuk mapmane. Tonda, dipkoprob nyapkine. An tuba kam uminye talak ara, aning atonun kum winiptinye,” Uria birye nyabuk.

¹² Nyabukba, Daud arye tamubuka, Uria biti nyabuk. “Yin nang oldan mutuku min kum binulyame. Sumuda amapmaminya ani, ambusumuk, narye nyapkiniba, amutuku batakuka, ninye oldanakuk, tamubuka binamalame,” nyabuk. Nyabukura, Uria Yerusalem mutuku uk mapmoka anya arye, tonok sum ton amutuku mapmok. Daud arye nyapdeipmok touk, winibuk.

¹³ Winibuk talak ara, Daud arye, Uria biti, “Na aik yanulyame,” nyabuka yukubukba, yayukopura, neika din dinmarik, akunum diprikura, Daud arye Uria biti, kanye wangalamak mek, weik arye arebukba, dibukce, Uria el kanye wangabuk. Winiryuk bukni, atalak babye, Uria el aik bana kumce, Daud el aik pil don nang ap, mapmek.

¹⁴ Mapmekba berekukura, Daud arye Yoab biti, surat sekukabukce, Uria arebukce nyabuk. “Asurat ara, Yoab arepnulyame,” nyabukba, bobiyuk.

¹⁵ Asurat ara, elak ona ati, surat sekuka arebukba, Uria birye Yoab dam bobiyuk. Asurat noutam sekuk ning ara, Raja Daud arye, Yoab biti nyabuk. “Anggun olan ati binamamunye talak ara, Uria menekdipmunba, weik arye oldanmacak balyopura, el abatakuka, anggun memebuka, yukak bindopnamlulume. Bimunyeura, Uria el yuk upliba, yuk mutuku oldan nang arye, Uria biti, talye opnamake,” nyabuk. Ara, Raja Daud arye, ‘Uria opnamak’ tenen, ayupu nyabuka sekmok.

¹⁶ Ara, Daud arye nyabuka, sekuk ati ara, Yoab birye Raba mutuku benduka, warikuk talak ara, ‘Na oldan dam nang weik, mikip nang weik unmakak ara, Uria biliba talye opnamak’ tenen, menekeibukba, biyuk.

¹⁷ Biyukopura, Raba mutuku nang arye, yin dobuka yayikce, Yoab ap, el mapu ap oldanmeka, Daud el yin talin nang ton, mitik anun arye obik. Tonda, Het yalanye Uria babye, Raba mutuku nang arye, obikba dibuk.

¹⁸ Akunum oldanmeka sirya dakikopura, Yoab birye, ‘Nun oldanmap ning nirya ara, Raja Daud kekepnul’ tenen, Daud dam bana ati, ninye dopdeibukce, yupu nyabuk.

¹⁹ “Nun oldanmapak arye winipmap ning ati, Raja Daud dam laka nyalbinamlume.

²⁰ Na tenipmana ara, ance aning akunum laka nyapmimba, ‘Daud kekepkilirye, yu upnamale,’ tenepne. Yu uplyeura, asipdenamakil ning ara, ani. ‘Yata deiyok ati, Raba mutuku aik domikak, mining damak binmalum do? Sik asik dana-dana weik keil poka dibuka, domik ning deice arye, mal pibitingce, kum opsitinge’ tenen, walwal arye banmalum do?”

²¹ “Tonda, minop talak winibik ning ara, kum bikalum do? Akunum luba kiplum do? Ara, Yerub-Beset, el mi Abimelek obuk ning ara, tuba kum tenepmalum do? Atalak ara, ninye deiyoknye Abimelek, anyasik si ara, Tebes mutuku, amutuku domik keil poka damak biyukba, tonok kil arye, apoka deice weik keil pikipkwetebukba, Abimelek obuk. Ara, sik gandum kwan keil dobuka pikipkwetebukba, Abimelek nong deice, sakuka oplobukba, Tebes mutuku dibuk. Ati, anggunda yata deiyok ati, Raba mutuku cang keil poka damak banmalum do? Walwal arye banmalum do?” nyabuka, asipdenamakil. “Asipkilyeura, nyapnamalyame. ‘An amu tam melinanye Uria, Het yalanye ton, akunum opmakba, dipmale,’ nyapnalyame.” Yoab birye, ayupu nirya nyapdeibukba, el yupu laka nyalbinamoknye kekebuk.

²² Nyapdeibukopura, Yoab el melinanye tonok, adiparyuk ayupu nirya bobuka, Daud dam nyalbiyuk. Ara, Yoab birye nyapdeipmok touk, laka nyabuk.

²³ Ayupu laka nyalbimoknye birye, Daud dam binuka nyabuk. “Amutuku nang ara, mikip weik nang anya arye, mikip arye opmasiakba, sik aik batakuka, bai tam yanuka, pata mutuku arye dobonmasiakba, tuba tamubuka mikip aryuk oldanmap bukni, sik asik damak bikbik abuka binmake. Binmakba, nun dobolyaburye, sik aik bisik bublan damuk, yanuka batakmabe. Ara, keil poka angnabuka domik damak yanmabe.

²⁴ Sik aik dam bukni, keil poka damak unmapu talak ara, Raba mutuku mal olan nang arye, cang poka alip tam arye tikuka, onmasiak talak ara, an yin talin nang ton opmake. Tonda, onmasikop arye, an melinanye, Het yalanye, el si Uria babye yin arye opmakba dipmale.” Yoab dopdeibuknye birye, Raja Daud biti, laka nyabuk.

²⁵ Yoab birye nyapdeiamuk yupu, laka nyalbinmoknye ati, Daud arye nyabuk. “Yoab el kanye imun bopmal ning ara, ‘Teleb upnamal’ tenen, anyapdeipnuk yupu ara, Yoab dam nyalbinulyame. Yoab dam ara, tamubuka binuka nyapnamalyame. ‘Kao, Raba mutuku nang arye, awinipmakiyak ning ati, Yoab an ilil una kume. Tonda, oldanak ara, teleb nang babye, talye nang babye, oltakanyake. Ninye winibuka oldanyak ning anya arye, aning ati ara, kanye imun bona kume. Aning kum bukni, an adiparyuk, mikip dopmince, mikip aryuk Raba mutuku asik babye, amutuku ninye babye, obuka sirya daknamalyame,” nyabuka, lak nyaplyame,” Daud arye ayupu deibukba, Yoab birye dopdeibuknye kekebukce, tamubuka laka nyalbiyuk.

²⁶ Ura, ayupu akunum binuka, laka nyabukopura, yuk nang arye, Uria opmekba dipmok ning ati, el kil Batsyeba benduka nyabikba, kekebukce, bico ubukba, engebuk.

²⁷ Anye bira dipmok ning ati, mambul kanye bobuka, engenmek ning ap, anirya ulamika akunum ubuk talak ara, Daud arye, el mapu ati nyabukba, sikce Batsyeba bobuka, el dam boyayik. Boyayikura, Daud arye Batsyeba dobukba, ulamdika ani, sal mi deipdik. Bukni, Allah el si Yahweh arye, Daud awinibuk ning nirya ati ara, ‘Raja Daud bira, weik malye ning akunum winipmale,’ tenebuk.