2 Samuel 10 - Eipomek

Daud birye Amon yala nang, ara sik Siria tam noutam ulamik nang ton, obukadakuk yupu

¹ Yata barye talak akunum ubukopura, Amon mutuku noutam ulamik nang ati, ninye deiyoknye kibuka, Raja ulamuknye dibuk. Ara, ninye si Nahas, elce deiamuknye dibuk. Ati, Amon nang ulamik tam noutam talibuka una ati, aRajanye akunum dibukopura, el mi Hanun birye punubuka, ninye deiyoknye Raja kibuk.

² Winibukopura, Raja Daud birye nyabuk, “Nahas elda, na ka koprop ulamuka ati, min talak ara, nun pia teleb ubuka, neika dukdongobuka, ulamnumunye ati, wini talak ara, na adiparyuk, Nahas el mi Raja Hanun bira, ‘Na ka kopropʼ tenen, elti, telebuk tenenamlarya. Eli ap, na ap, teleb ulamnumu touk, na ap, Hanun ap, pia teleb kibuka, neiktoto dukdongobuka unamnam ca,” nyabuk. Nyabuk ning ara, Raja Daud birye, ninye ton wipdeibukba, Hanun el li koprop Nahas, Amon mutuku taleamuka ani, dipmokba weipmik talak, el kanye kwadina ati, melina nang ton dopdeibukura, Amon yala nang ulamik mutuku noutam bukni, Raja Hanun dam biyik.

³ Daud birye wipdeipmuk nang, akunum Amon mutuku noutam biyikopura, amutuku noutam talibuka ulamik ninye deiyok nang nirya arye, Raja Hanun biti nyabik. “Se, nun deiyoknye Raja Hanun, anda Raja Daud elce wipdeipmalce, dopdeipmasilba, kanye barina yupu yanuka, nyapmasiyak nang ati ara, talye ati kum yanganmake. Nun deiyoknye ance, ‘E, telebe, na ni koprop Nahas dipmala ati, si dobuka melilyanganmaniyak caʼ tenen, pia kume. Dipkoprop ara, Raja Daud el mapu wipdeipmalba, nun dam yanmaka ara, ‘Amon yala nang sik mutuku noutam ara, yata wiribuka unyak do?’ tenen, maka melianmasiyake. Aning nirya, akunum eibuka kel kibikirye, ninye deiyoknye Raja Daud dam binuka, laka nyabikiba, kel kiplyeura, nun weik asik ap, amutuku ap yanuka, obuka sirya daksikirye, nun ning nirya alubuka dopropnamsil ati, kamo dilyanmasiyake,” nyabik.

⁴ Nyabikura, ninye deiyoknye Raja Hanun birye, ‘Diba,’ tenebuka ati, Daud wipdeipmokba yanmek nang nirya ara, tomobuk. Anang nirya tomubukce, ‘Pia alye weik unamakʼ tenen, sik ban potong dana tam ning ara, koplobuk. Tonda, sik ongopmek baju, der noutam arye diprongobuka, outam nirya ara, sekuka batakuk. Winibuka ati, sik bukuka tukwakuk kibukura, alye weik unmek. Winibukopura, anang nirya ati, “Wini talak ara, binululume,” nyabukba, weik tonun alye ubukura, sik mutuku tamubuka biyik.

⁵ Bukni, sik anang tamubuka, sik mutuku bana ara, sik alye weik ubukba, bisik banmek talak, ninye arye Raja Daud biti, aning nirya laka nyabikba, kekebuk. Ara, ayupu sik deiyoknye, Raja Daud dam, akunum binuka laka nyabikba, kekebuka ati, sik deiyoknye Raja Daud birye, sik abisik yanganmek nang ati ara, ‘Bisik noutamuk epedanubeʼ tenen, bisik noutam biyukce, epdanuka, “Sikda, adiparyuk nun mutuku tamubuka, yangana kume. Atam ulul asik, Yeriko mutuku asukumuk tiya ati, ulamunyebuk, anggun ban potong ara, tamubuka tiksilye, talakuk yanamlume,” nyapdeibukba kekebikce, Daud nyapdeipmuk touk winibik.

⁶ Aning nirya akunum winibukopura, atalak noutamuk, sik Amon yala nang arye, utenebik. ‘Kume, aning winipmaba ara, Raja Daud eiplirye, nunti yu upnamle. Nun ti tenepsilirye, yu upliba olyanamsile,’ tenebikce, tenebik ilil ubuk. Utenebika ati ara, sik Amon yala nang aryuk, Siria mutuku ap, tonda Zoba mutuku ap, ulamik yin talin nang yupa pia weik, dua puluh ribu (20.000) nang dekik. Ara, Bet-Rehob mutuku ulamik yin nang ap, Zoba mutuku nang ap ati, “Sikce nun mal olan nang, mal olbinamabe ati, yanuka melipnusulume,” nyabuka, nun kum melipsicak, arin yo bok arebikba doprobik. Tonda atonun, Maaka mutuku ninye deiyok kibuka ulamukce, amutuku taleamuknye, sik Raja ati dekna ning arebikura, elce el mutuku ulamik yin talin nang, seribu (1.000) arebuk. Tonda, Tob mutuku noutam ulamik nang kan-kan arye, dua belas ribu (12.000) yin nang ton, dekuka doprobik.

⁷ Winibikopura, yuk nang arye yanuka, Raja Daud biti, laka nyabikura, ayupu akunum kekebukce, Raja Daud birye, Yoab ap, el yin talin nang nirya ap ati, nyapdeibukba, sik adiparyuk, ‘Mal olbinuyapʼ tenen, mal olanak kintinibuka biyik.

⁸ Winibikopura, sik Amon mutuku ulamik nang babye, sik nebuka tikina ati, sik weik asik aruma dolamik. Amutuku deiyok ara, Raba mutuku weik asik aruma dolamik bisik bublan wekelbalamik dam, anyakuk binuka, kintinibuka tikikce, “Winipnamabe,” nyabuka, yupu talibik. Raba mutuku yin nang arye, winilamik bukni, sik Siria mutuku nang ap, Tob mutuku nang ap, tonda Maakha mutuku noutam arye yayik yin nang ap, sik nirya ara, Raba weik asik aruma dam kum bukni, mutuku kata yanuka, kintinibuka tikikce, “Winipnamabe,” nyabuka, yupu talibik.

⁹ Wininmekba, Yoab birye dinmokba, el urasin tam babye, el amnyok tam babye, el mal olan nang aryuk, yanuka langdibuka kalikukabikce, warikmekak eibuk. Eibukopura, Yoab birye, sik Israel yin talin nang noutamak arye, mal olana pia teleb kibuka, kel bikamik nang ton, wibuka deibukce, Siria mutuku yin nang, sik urasin deipmek dam tamuk, kintinibuka deibukba, “Winipnamabe,” nyabuka, yupu talibik.

¹⁰ Tonda, Yoab birye, Israel yala yin talin nang weik tam ara, bokukabukce, na weit birye anang talibuka, “Winipnuyabe,” nyabuka, ‘Yupu nyapdeipnamleʼ tenen, el weit koprop Abisai tam ton, yin nang yupa weik arebuk. Winibukba, Abisai el deiyok kouna ara, Amon mutuku yin talin nang, sik urasin deimik tamuk, kintinibuka tikikce, “Winipnamabe,” nyabuka, yupu talibik.

¹¹ Yoab birye, anang bokuka, yuk-yuk deibuk ning ara, Yoab birye el weit koproba Abisai biti nyabuk. “Winipmanto, narye sik Siria mutuku yin talin nang ati, kum winipmanto upnyeura, mitang upnilye ati, eipniminyeura, an adiparyuk na tam yanuka melipnamnilyame. Tonda aning atonun, winipmanto, na weit koprop, an babye, Amon yala yin talin nang malye kina ati, kum winipmanto upminyakarye, mitang upkilyeura, na eipkinarye, an dam yanuka melipnamakine,” Yoab birye nyabuk.

¹² Winipnamnam talak ara, an ap, na ap, kanye moubuka mikip kipnimirye, ilil kum diparyuk, ding abuka unamaname. Nun yala nang nirya ap, tonda nun ni koproba Allah, el tenena ati, ‘Areamsuk asik aruma ap, amutuku tuku ap nirya ara, ‘Kum dasilyak,’ tenena ati, kama dobuka, mikip asa unmanbe. Tonda, nun ni Allah Yahweh ati, moronamaname. Ara, Allah arye, ‘Aning winipnamne, ‘Naʼ tenen nang arye winipnamake,’ teneplye touk, ‘Aninguk winipnamsil caʼ tenen, Allah ati moronamlulume.” Yoab birye, Abisha biti, nyabuk.

¹³ Nyabukopura, Yoab ap, el yin talin nang ap, sikce, Siria mutuku yin talin nang, sik unmikak binuka warikikce, olana uk unmek. Winibikba, sik Siria mutuku yin talin nang nirya ara, ‘Se sik opsikirye, sirya daknamsiyakʼ tenen, ilil weik ubukba, bai sakikce, bikbik abuka, yukak bindobik.

¹⁴ Atalak ara, sik Amon mutuku yin talin nang babye, aning dinmekba, Siria mutuku yin talin nang ara, bai sakuka bikbik abikce, banmekak eibik. Eibikopura, sik Amon mutuku yin nang babye, ‘Se, Abisai ap, el yin nang ap arye, nun opsikirye, sirya daknusiyakʼ tenen, el dam arye, bai sakuka bikbik abuka bindobik. Ara, tamubuka, sik weik asik aruma dolamik mutuku noutamuk, tamubuka biyik. Ura, aning nirya akunum winibukopura, Yoab ap, Abisha ap arye, sik Siriya mutuku nang ap, Amon mutuku yin nang ap binuka, obuka sirya dakikura, Yoab elda, amutuku batakukce, tamubuka, Yerusalem mutuku uk biyuk.

¹⁵ Bukni, sik Siria mutuku nang ara, Israel yala ninye arye obuka, sirya dakik ning ara, akunum moubuka bikik. Ati ara, Siria mutuku ulamik yin nang nirya ati, “Anango, anggun nirya tamubuka bulupnulume,” nyabuka yukubik.

¹⁶ Tonda ninye deiyoknye, Raja Hadadezer arye, ninye ton wibuka deibukce, “Siria mutuku bukni, keting yangan tam, weik balamuk mek, Efrat mek tam oulamik nang ati, “Anggunda, na dam yanamlulume, nyabuka morolbinamlulume,” nyabuka, yupu deibuk. Nyabukura, ayupu laka nyalbana nang kekebikce, laka nyalbiyikba, otam nang arye kekebik. Kekebikopura, Raja Hadadezer, el yin talin nang, sik weik deiyoknye, el si Sobakh, ara Zoba mutuku ulamuknye, elce deiyok koubukba, sik otam yin talin nang nirya, Helam mutuku yayik.

¹⁷ Atalak babye, ninye ton aning eibikce, laka nyalbiyikba, ninye deiyoknye Raja Daud birye, ayupu akunum kekebuk. Kekebuk ning ara, el yin talin nang, Israel mutuku noutam ulamik nang nirya ati, “Wini talak bulupnulume,” nyabuka deibukba, sik adiparyuk, el dam yayikce, sik nirya Yordan mek koubuka, otam banmika ani, Helam mutuku biyik. Abiyik mutuku ara, sik Siria mutuku yin nang babye, amutuku bulubuka yayikopura, ‘Raja Daud, el yin nang ap opdanamapʼ tenen, sik kintinibuka tikmikce, sik nirya anang ap, Daud tam nang ap arye, olana uk unmek.

¹⁸ Olanmika ani, Daud el tam yin nang arye, mikip weika arye, sik Siriya tam nang ati obikopura, sik Siriya yala nang ap, sik yin talin nang ap arye, ‘Se, obuka sirya daknusiakʼ tenen, ilil ubukba, bai sakuka, yukak bikbik abuka, bindobik. Daud el yin nang arye, sik Siriya tam nang dobolbiyikce, binuka obisibikce, Daud ap, el yin nang ap, sikce Siria mutuku yin talin nang weika arye obik. Ara, sik yin nang bukni, kuda basam dobuka, tapu kirikdongobuka lipdopneba, tuku deice ban ning, el si Kereta perang, aning deice tikuka, mal olalaban nang ara, tujuh ratus (700) nang obik. Tonda, sik kuda balye deice bukuka, ban yin nang ton empat puluh ribu (40.000) nang obik. Aonmika aryuk, sik yin talin weik deiyoknye, el si Sobakh babye, mal arye yaribuka obikba, olanmika aryuk dibuk.

¹⁹ Ura, aning nirya akunum winibukba, atam nang arye dilamik ning ara, atalak ara, Raja Hadadezer arye, dekna ning areamukba, sik dana-dana tam weik deiyok nang kibuka taleamik bukni, Hadadezer el amu tam kipdobikce, el melina ati, mal olyanmik nang, deiyok nang nirya ara, ‘Se, Israel yala nang, yin nang aryuk, nunti akunum opmasiyakeʼ tenen, akunum eibikce, kel bikik. Ati ara, sik adeiyok-deiyok nang nirya yayikce, Israel yala nang ati, nyabik. “Kume, sikcuk, akunum malye kipmasulama ati, angguncuk talipsumba, nun ap, sik ap epdanuka, kanye deibuka, telebuk neika unamabe. Nunda, anggun amu tam ubirye, anggun pil melina nanguk unamabe,” nyabuka, yanuka morobikce, nyalin yupu deice arye nyabik. Nyabika ati, sik Siriya mutuku noutam ulamik nang nirya ara, Israel nang aryuk talibik. Talibika ati ning ara, Siria mutuku ulamik yin talin nang arye, ilil ubukba, sik Amon mutuku ninye arye, ‘Israel tam nang mal olbana ati, sik ton yanuka melipsululume,’ nyabuka, morolamika babye, kum kekebikce, sik Amon yala nang ati, ton ap kum melilamik.