2 Samuel 1 - Eipomek

Saul dibukba, Daud biti nyabik yupu

¹ Saul akunum dibukopura, Daud birye Amalek mutuku nang, obuka kum danaibukce, tamubuka Ziklak mutuku dam yanuka, like bitinye mabuk.

² Like bitinye akunum mabukopura, like winilye sum ara, Saul el tamnye yin talinanye tonok, imun kanye bopmuka anya arye, el baju kwiliklobukce, el kisok deice, atu sice likdeipdayukce, Daud dam yayukopura, gutam tuku diprongobuka, Daud biti kibuk.

³ Kibukopura, Daud birye, anye biti asipdeyuk. “Anda dan mutuku arye, yalam do?” nyabuk. Anye birye, tamubuka nyabuk. “Nara, Israel yin talin nang kan-kan arye, bai sakukapna arye, yanmananye,” nyabuk.

⁴ Nyabukopura, Daud birye, anye biti asipdeyukce, nyabuk. “Yata wiripmoba bai sakuka, yanmalam do? Ton nukminba, na kekepnune,” nyabuk. Nyabukba, anye birye nyabuk. “Saul el tam yin nang nirya, bai tam sakuka, bindopmak bukni, amutuku ulamek nang, sik olamsik nang arye, ton nang weik arye opmakba, nirya dipmake. Aninguk kum bukni, Saul ap, el mi Yonatan ap, sik bitinye ton, opmakba dipmarake,” nyabuk.

⁵ Nyabukopura, Daud birye, el dam yupu boyanmoknye biti, asipdeyuk. “Ance yata wiripmalak eipmalamce, ‘Saul el mi Yonatan ap, opmakba dipmarake,’ nyaplam do?” nyabuk.

⁶ Ayupu boyanmoknye, kamnye birye, Daud biti nyabuk. “Na dipkoprob Gilboa mutuku deice unmanurye dimanubuk, sik Pilistin mutuku yin nang arye, ‘Saul opnuyap’ tenen, kereta basam balye deice bukuka, bikbik abuka yanguba, Saul bira, minopce bindopman kum upua ati, el ninye on kama taice ketebuk ning, talibuka tekmoba eipmanue.

⁷ Sik Pilistin nang arye, ‘Saul opnuyap’ tenen, ‘Dobolbanmek ati bindopnun’ tenen, bindeyukbuk, el dam akunum yayik ati, Saul tamubuka dipdenukce, na eipnukopura, yukupnukba, na bisirye nyapse, ‘Naio yata wiribuka melipkitinye do?’ nyapse.

⁸ Nyapsiba, elce tamubuka asipnuk, ‘Anda yata mutukunye do?’ nyapnuk. Nyapnukba, narye tamubuka, ‘Nara, Amalek mutukunye,’ nyapse.

⁹ Nyapsiba, elce tamubuka nyapnuk, ‘Nara, akunum opmaniakba, dipnamana akunum dam upmala ati, dipnaman tenepmane. Bukni, isin tuba upmanile ati ara, ance na dam tikmince, obuka isin kum kipdeipnilyame,’ Saul birye nyapnuke,” awelnye birye, Daud biti nyabuk.

¹⁰ Nyabukce, ayupu ton tabakuka nyabuk. “Saul birye nyapnukba, akunum kekebuka bikse. Sikce, Saul akunum opmakba, tukwak sakmo talak ara, dipna dam akunum upmala ati, ‘Tuba kam kum buktue’ tenen, kel kipse ati, el dam yasirye oplopse. Ati opmance, sik Raja weik nang ongolamak ning, el kisok deice kalulamuk ning, el si ara mahkota ap, tarukak dongolamuk ning, el si ara, toupne ap ara, aning dobuka na ni, an dam boyanmakine,” akamnye birye, Daud biti nyabuk.

¹¹ Nyabukba, Daud kekebukopura, Daud ap, el neika unmek nang ap nirya, Saul opmek ning ati, bico ubukba, ikin kanye bopmeka ati, sik baju kwiliklobikce, engebik.

¹² Malye kanye bobuka engebikopura, Saul ap, el mi Yonatan ap, tonda Israel mutuku nang bukni, Allah el si Yahweh, el Israel tam yin nang ap, tonda Israel mutuku ulamik ninye nirya ap ati, ‘Se, Pilistin nang arye, nun kayapu Israel nang weik, ninye olamak ning parang ya arye obuka sirya dakmakba, weik arye dipmake’ tenen, Daud ap, el mapu ap, din dina kumce, engebuka dinmeka ani, asum ara keting kum ubuk.

¹³ Aning akunum winipmek ani, Daud birye tamubuka, ayupu boyanmoknye kamnye biti, asipdeyuk. “Anda dan mutukunye do?” nyabuk. Akamnye birye Daud ati, tamubuka nyabuk. “Israel yala nang arye, kum deipnik bukni, wini talak ara, Israel ninye tam noutam unune. Bukni, nara, Israel yala kopropnye kume. Nara, yuk mutuku talye-talye upra bananye, Amalek mutuku nang arye deipnikba, Amalek yalanye unune,” nyabuk.

¹⁴ Nyabukopura, Daud birye, awelnye biti nyabuk, “An taruk arye erebuka, Allah arye, ‘Naʼ tenen nang, Israel nang talipnamle’ tenen, minop talak arye wipdeiamuknye, Saul obuka bataklumnye bira, yata ati do? Anda ilil kum asa aryuk, talye kanye bobuka Saul oplum do?” nyabuk.

¹⁵ Nyabukce, Daud el mapu tonoknye bak nyabuk. “Yamince, Amalek mutuku kamnye bira, ya arye sekloplyame,” nyabukba anye birye, ya sekukba dibuk.

¹⁶ Daud el yin talinanye birye, awelnye oplobuka, deiyok ara, Daud birye, Amalek mutukunye biti nyabuk. “Aning ara, ance omlumnye ining arye, dekdanmalame. Ati ara, an bidamnye si bam bol arye nyamlume. Ara, ‘Allah arye wipdeiamuknye, Saul oplopmane,’ nyapmoma deice arye, opnukiyabe bukni, dipkoprop, an damnye opdalame. Saul opluma ati, an damnye ining, an kisok deice upkile,” Daud birye nyabuk.

Saul ap, Yonatan ap, diprikba Daud birye, engebukce nyabuk yupu

¹⁷ Daud engena asa deice arye, Saul ap, Yonatan ap ati, tenibukce, mot senmok.

¹⁸ Daud amot senmok talak ara, yuk nang nirya ati nyabuk. “Weipnusin mot ara, na mapu ap, Yehuda yala nang nirya ap, kekebuka biknamake. Anggun deipkirik danin, yangan ninye nirya, peterepmunba, kekebikirye biknamake,” nyabuk. Amot ara, Allah dib tenen nang, sik buku noutam sekeibik. Abuku si ara, Yasar buku nyanyake. Amutuku yupu ara, ani.

¹⁹ “Se, Israel mutuku nang, sik weik mambulnye ap, sik yin nang ap, mutuku konak dabinuka, oplobikbuk dibikba, tuba aulule. Se, mikip weik nang ulamik bukni, bicoe. Mal deiyok nang arye, nirya obikba dibike,” nyabuk.

²⁰ “Ayupu ara, Kat mutuku ninye ap, Askelon mutuku unyak ninye nirya ap ati, kum nyalbinamlume. Nyapmunba kekebikcopura, sik kanye deipnamak tenena atie. Ara, sik den mouse bol kum sekenyak nang, Pilistin nang nirya ap, sik kilmapu ap, kanye deipnamak tenen atie,” nyabuk.

²¹ Ayupu ton nyabuk. “Se, na kwit capu, Gilboa mutuku dam umunye ninye ati, nyapnusine. ‘Mok ap, mok puru ap, anggun dam pia kum sakanamle’ tenen, moropne. Tonda, ‘Mok kum ceplirye, anggun wa win dam malye upliba, batakikcopura, tuku nirya, kel-kel abuka mikdopnamle. Ninye din lilamak ning, pia kum danamle’ tenen, moropne. Aning nyapsin yupu deiyok ara, ‘Sik mutuku noutamak ara, mikip weiknye, Saul, el ting atonun ning, akunum malye kiplobik. Tonda, Saul el ting atonun ning ati, tuba tamubuka, tonap basam meta dobuka, kum liknamake. Aning babye, akunum singnibikba, sisilya arang burubuk’ tenen, nyapsine. Anya arye tamubuka, kum teleb kipdeiptinge.”

²² “Yonatan bira, mikip dobuka, mal bobiyukce, mikip weik nang ton oplomuk. Aning atouk, Saul el ninye olamak ning, parang ya arye dobuka, ninye tup weik arye, seklobukba dibik ati, el parang ya babye, urdemuk kum bobinmoka ara, talye dem kum bobuka yayuke. Elce ton ninye obuk. Ati, Saul ap, el mi Yonatan ap arye, ninye weik oplopdik.” Daud birye nyabuka, mot deice arye, weibuka sebuk.

²³ “Saul ap, Yonatan ap ara, teleb nang ulamdikce, ninye tenepne touk, winilamdikce, yuk nang ati melilamdikba, yuk ninye nirya arye, sikti, bico tenebuka, kanye delilamik. Kanye delilamik nang anya arye, sik unak babye, tonok sukumuk ulamdikce, dina babye tonok sukumuk dilamdik. Bip maka ara, pola lakuka balamla ara, mitik bukni, sik abitinye nang ara, bikbik abuka, balamdik ning ara, pia pola weik balamdik. Tonda, ‘Singa kus,’ nyalamak ning ara, el mikip mitik bukni, sik abitinye nang ara, sik mikip ara, pia weike.”

²⁴ “Se Israel mutuku kilmapu nirya ara, Saul biti engepnamalume. Deiyok ara, Saul birye anggunti, kain urasin pia teleb ning ap, bi ning ap, dekukapsukce, kitililamak atonun winyamsuke. Tonda, anggun baju deice dekna weik ning, emas kat ning taplakalilamaka atonun arelamsuknye, Saul atia. Winilamuk bukni, akunum dibuka ati, engenamlulume.” Daud birye nyabuka, mot deice arye sebuke.

²⁵ “Se, sik mikip weik nang babye, mal arye obikba, akunum dipmake. Olalamika deice arye, mal deiyok nang nirya obuka, sirya dakdobike. Winilamika deice arye, sik mutuku dup deice, Yonatan babye, obikba dibuke.

²⁶ Ati, na ni ka Yonatano, anti teninmakina arye, kanye imun upnile. Ance nati, weik arye, ‘Bico,’ tenelamnulum atonun, narye anti, weik arye, ‘Bico,’ tenelamkise. Ara, sik nang susuk kanye delilalamaka atonun, tenepkise. Sal arye, kilapu ati weik arye, kanye delilamak bukni, aning ara mitike, nara weik arye kanye deiamkise.

²⁷ Se, sik mikip weik nang babye, mal arye obikba, akunum sakuka dipmake. Atalak ara, ninye olana deiyok nang arye, talibikirye ninye olamak deiyok ning babye, nirya kum upnule.” Daud birye nyabuka, mot deice arye sebuke.