2 Peterus 2 - Eipomek

Allah arye tilila yupu peteren nang wenebuka opnamle ati, nyabuk yupu

¹ Allah el yupu laka nyalamik nang ara, talye nang arye, “Ayupu sekelulum,” nyalamika deice arye, kum seklamik bukni, minop talak unamik nang kan-kan noutamak arye, tilila yupu laka nyalamik nang ton ulamik touk, anggun wini talak ululum ninye noutamak babye, tilila yupu peterena nang, dipkoprop unamake. Anang arye, malye ulisulul yupu, duknubuka peternamsiake. Sikce, “Kume, Yesus Kristus ara, urtalinye ulule,” nyabuka, nun Weik Deiyoknye, aning-aning nirya talibuka lyeklobuka upnamlanye, Yesus ati, batakuka yanipnamake. Ayupu ara, pia malye yupu upmalya babye, ayupu babye nyanamake. Yesus arye, ‘Aninye babye lyepnamne’ tenen, dekuk bukni, anang arye Yesus batakuka, amalye yupu nyabikcopura, ayupu nyabikca deice arye, Allah arye sik ati minopce weneplirye, opnamle. Aning ati ara, deiyok sikca.

² Tonda, Allah diba tenen nang, sik kan-kan bukni, ton nang ara, atilila yupu peteren nang, pia malye-malye ulamice ning eibikirye, ‘Aninguk winipnuyabe,’ tenebuka, pia malye wininamake. Malye-malye ubicopura, yuk ninye ton eibikirye, Yesus el dipkoprop bisik ati nyanamake. “Kume. Anang ara, malye-malye ulamica ati, Yesus nyanyak yupu ara, talye yupu uka,” nyabikirye, malye yupu nyabuka deilinamsiake.

³ Atilila yupu peteren nang arye, ‘Aning-aning nirya weik doproptibye’ tenen, patalye ninye unyaka anya arye, sik badamnye kanye arye tenenyak ning, talye yupu uk, peteresinyak deice arye, ‘Sik ning weik dolonamap’ tenen, yum yupu nyabuka, anggun ning ubula dolonamsiyake. Minop talak ara, Allah arye, ‘Atilila peteren nang ara, wenebuka oplopnamne,’ tenyamukce, akunum kentenlamuk anya arye, aning ara lubakiplirye, kum bataknamle. Dipkoprop aminyan talak ara, aninye oplopnamlarya.

⁴ “Kum bataknamle,” nyapmasina ara, talya urdem ati kum nyapsine. Ayupu moubuka kekeplulume. Allah el im deice pil don nang, malaikat ulamik bukni, malye-malye winibik ning babye, mangkau kum kibuk. Amalaikat nirya tapu koubukabukce, uku din mutuku noutam bukni, pia kunuknak dongobuk. Dongobuk ara, ‘Sikda akunukak pum bisikuk daulamikce bukni, sirya daknamle talak ara wenebuka oplopnamne’ tenen, dongobuk.

⁵ Tonda, minop talak ulamik ninye, pia malye-malye ubuka ulamikbuk, Allah arye nyapdeibukura, weik mok pia celamukbuk, amutuku-amutuku nirya ara, weik mekwen welebukce dibuk. Dibukura, sik malye-malye ulamik ninye nirya dibik bukni, Allah arye pin barye ninyeuk lyebuk. Elce lyebuk ninye kan-kan arye, tonok telebnye diksukum un ning peterelamuknye, Nuh ulamuk.

⁶ Tonda, sik asik domikce, si nyalamik mutuku Sodom mutuku ap, Gomora mutuku ap ulamik ninye ara, pia malye ulamika anya arye, Allah arye nyapdeibukura, im deice arye uku sakukce, amutuku nirya dibukura, atu uka bukuk. Amutuku nirya malye kibuka oplobuka obuka deiyok, ara sik wenena ap, tonda yuk nang laka kilina ap ati obuk. Ara, Allah ati diba kum tenebikirye, pia malye unyak ninye ara, ‘Sodom mutuku ninye ap, Gomora mutuku ninye ap, opnyopura, adeice arye, bikilina ning atonun kipnyopura, yuk malye un winin ninye kel kipnamak’ tenen, obuke. Ara, tukwak mutuku unyak ninye nirya ara, ‘Allah arye malye un ninye ara, dipkoprop wenebuka oplopnamle, tenebuka kel kipnamak’ tenen, minop talak ulamik ninye obuke.

^7-8 Sodom mutuku ap, Gomora mutuku ap, ulamik ninye nirya oplobuk bukni, tonok diksukum ulamuknye, el si ara Lot, lyebuka doprobuk. Lot ara talima diksukumnye ulamuka anya arye, apia malye ninye kan-kan ulamu bukni, asum-asum nirya, sikce Allah el yupu yaniplobikce, pia malye ulamik ning elilamukce, sik malye nyalamik yupu kekelamuka ati, el kanye imun kanye bobuka ulamuk. Ara aninye arye, teleb un winin ning nirya yaniptabuka, pia malye-malye ulamik ati, Lot ara kanye imun kanye bobuka, talima noutam engenauk ulamukbuk, Allah arye Lot lyebuk.

⁹ Ura, arup anyapmasin ning nirya ara, Allah aning nirya ubuka deice arye, bitinye ning lakak upsiliba, diba tenebuka kele kiptume. Tonok ning ara, diksukum un nang, kanye imun ning ap, talima winin winildena ning ap upsile talak noutam, ikin kanye bobikcopura, Allah arye aninye, sik lyen ning ati ara, el kele. Bitinye ning ara, elti, diba kum tenebikirye, pia malye wininyak ninye ara, Allah arye sikti, atalak noutam babye wenelul bukni, sirya daknamle talak, ninye bokuka oplopnamle talak, aning ati ara, ‘Sirya talak arye, pia malye kibuka oplopnamne,’ tenelule. Bukni, wini talak ara, tia talak ati, anang sik weik wenena ning tenepce delina ara, el kele.

¹⁰ Ninye arye, sik ‘Na’ tenen ning, delilamak touk, weik wenena ning tia talak ati, tenepce deililul bukni, ‘Aminyan ara pia oplopnamne’ tenen, pia weik arye malye ning tenenyak ninye ati ara nyapnusine. Ara sik nong pataplye ning, malye ninguk tenebuka, talima ap, nong ap, pia malye winin ninguk unyake. Winibuka unyakce, sik deice tam unyaka deiyok nang nirya ati, ‘Nun like,’ tenebuka yaniltanyake. Aninye ara, pia lik tenebuka, sik kanye weik arye erenyaka anya arye, sik ilil-ilil una kum arye, Allah el im deice pil donyak ninye malaikat ap, yuk ninye deiyok nang atouk, im deice unyak ninye ap ati, talye luba kibuka, sik nong deice malye yupu nyabuka, ikin ning sik nong deice delinyake.

¹¹ Atilila yupu peteren nang arye, weik mambul un ning nirya ati, malye yupu nyabuka, sik nong deice delinyak bukni, im deice pil don nang malaikat ara, aning atonun kum wininyake. Sikda, mikip pia weik unyak bukni, Allah el dam unyakce, “Amalye winin ninye ara, sik malye winilamice ning ara, ani, ani,” nyabuka, laka nyanyak talak arye, sik malaikat arye amalye winin ninye ati, talye luba kibuka, malye yupu sik nong deice kum deilinyake. Sik malaikat ara, aning kum wininyak bukni, sik pia malye wininyak ninye arye, mambul nang ati, malye yupu nyanyaka anya arye, sik pia yuke.

¹² Ara, sikda, talye tukwak kam ulul ning nirya ara, kanye bona kum arye, talye luba kibuka, ulamaka atouk, atilila yupu peteren nang babye, unyake. Sikda, mambul ning bukni, bita kum tenebikirye, pia kum kel bikamice ning ati, “Aning ara talye ning uka,” nyabuka, malye yupu uk deilinyake. Wininyak ning ati ara, ninye arye talye tukwak kam ulul ning, tomobikirye, kanye bona kum ning, talye merekukua olamak touk, Allah arye atilila yupu peteren ninye nirya ati, talye luba kibuka oplirye, sirya daknamle. Aninye ara, Allah yaniptabuka, pia malye-malye wininyaka ning ati ara, Allah arye sikti, obuka, sirya daknamlarya.

¹³ Sikce yuk nang ati, malye kipdeilinyak ning ati ara, Allah arye anang ati, kwa dakuka, wenebuka opnamle. Sik kanye deililul ning ara, nyapnusine. Ara sikce, ‘Nun patapsilibuk malye wininamap ning ara, keting duduk noutamak babye, talye luba kibuka winina telebuka,’ tenebuka wininyake. Tonda, lek ongon baju bukni, malye ning duplirye, nininga ulamle touk, sik tilila yupu peterena ninye arye, malye kilisinyake. Ara, sik ap kwalina ning neika dimunye talak ara, amalye nang sik nong patalye ning, malye winin ninguk tenebuka, malye wininyakura, anggun diba tenelulum nang arye, kwalibuka dilulum ning ara, anang arye malye kiilisinyake ati, nyapsine.

¹⁴ Sikti lila yupu peteren nang arye, yuk nang kilapu eibikirye, ‘Se, akilapu ara, dalubuka yoptibye’ tenen, pataplibuk, pia tenenauk unyake. Malye winina pia tuba-tuba wininyakce, sik kanye teniltonauk unyak ninye ara, ‘Nun tam kipropsiting’ tenen, sik nyanyak yupu deice arye, benbenepdongbuka lilonyake. Atilila yupu nyanyak nang ara, ‘Yuk ninye, sik ning weika arye dalubuka doproptibye’ tenena ning ara, weik arye kel kiyamik bikamik. Anang atonun wininyak ninye nirya ara, Allah arye dipkoprop wenebuka oplopnamle.

¹⁵ Aninye ara, diksukum un bisik batakuka, yuk malye-malye un bisik akunum banyake. Wininyaka ara, minop talak ulamuknye el si ara Beor, el mi Bileam arye, malye winilamuk touk wininyake. Bileam arye, ‘Malye pil dopnebuk, yo bok weik arepnitinge’ tenen, patanmokura, malye pil dobuk touk wininyake.

¹⁶ Bileam ara, ‘Yo bok weik arepniting’ tenen, patabuk bukni, tilila yupu nyabuka, malye pil dobuka ati, Allah arye Bileam wenebuka yupu sekuk. Allah arye Bileam ati wenebuk ning ara, nyapnusine. Ara, talye keledai basam ara, ninye yupu kum nyapmanto ning bukni, Allah el mikip aribukura, akeledai basam arye, nabi Bileam malye winibuk ning ati, wenebukce, yupu sekuk. Ara, Allah meilyamuk deice arye, akeledai basam arye ninye yupu nyalamaka atonun yupu deice arye nyabuka, nabi Bileam ati wenebuk.

¹⁷ Ura, atilila yupu peteren nang ati, winipmanto yupu ton nyapnusine. Ara, mek pu awamlya awamuk ati, ‘Dipnuyap’ tenen, ninye arye dilbikibuk, mek cepromliba, mek kum dipmanto unyaka atouk, atilila yupu nyanyak nang ton wininyake. Tonda, mok cepnulya ati, dua deiplibuk, ‘Mok yanule,’ tenebikcebuk, kumanya mikip arye dopliba bindoplyeura, dou maplyeak mok kum celul touk, siktilila yupu nyanyak nang atonun wininyake. Atilila yupu nyan nang arye, talye yupu nyaplobikibuk, sik nyanyak ning nong pia kum ulul ning ati, arup nyapmasin ning atonun wininyake. Wininyaka anya arye, Allah arye, ‘Amalye nang wenebuka, malye sukum dongopnamne’ tenen, pia kunuknak akunum kintinibuk.

¹⁸ Allah arye anang dobuka, pia kunuknak dongopnamla ara, talya urdem ati kume. Ara, atilila yupu nyaninye arye, “Nunda weik mambul ning winipnamabe,” nyabuka, talye yupu uk nyaltakanyakce, sik kanye erebuka kwalinyake dilanyaka atia. Tonda, talye tukwak ninye nirya ara, talima noutamak malye ning aupsuka anya arye, yuk ninye malye winin ning pataplibuk, tenenyak ning ati ara, atilila nang arye, nyanyake. “Kume. Winina ara, telebe uka,” nyanyake. Nyabica deice arye, yuk nang sik kanye lilonyake. Sikce talima lolonyak ninye ara, winiryuk deiyok kibuka diba tenepmak bukni, kanye min kum wisibuk nang ati nyapne. Anang arye, sik malye nang winilamak ning batakuka, ‘Diksukumuk unamap’ tenen, winiryuk deiyok kipmak bukni, talima wisina kum ninye ati nyapne.

¹⁹ Sikti lila yupu peteren nang arye, aninye ati nyanyake. “Kume, yuk peteren nang arye nun nirya ati, ‘Winina meme,’ nyanyak yupu ara, tenena kum arye, talye kanye bobuka, nun tenenyap ninguk, talye luba kibuka wininamabe. Yuk nang nirya arye, nun yupu kum seksitinge,” nyanyake. “Nun kanye aryuk talye unamabe,” nyanyak bukni, yata ning do nirya, bisipsilirye, nun kanye talima talisulul ning nirya ara, nun deiyoknye atonun usulule. Aning ati ara, atilila yupu nyanyak nang babye, atonun, pia malye winin ning arye, sik kanye talima bisibuka akunum talilule.

²⁰ Sikti lila yupu nyan nang ara, nun Deiyoknye Yesus Kristus, nun Lyenanye kel bikika deice arye, diba tenena kum ninye malye wininyak ning bataklamik bukni, ila tamubuka tonap aninguk talibuka, wininmacebuk, aning arye sik talima koupdongoplirye, bisibuka pia malye-malye wininyake. Ara, diba min kum teneabik talak ara, mitik malye winilamik bukni, wini talak ara pia weik malye-malye wininyake.

²¹ Sikti lila yupu peteren nang arye, diksukum un ning nirya kum kel bikamtingtoura, “Malye unyak ara, mitik malyeuk,” nyaptibye bukni, Allah arye, “Wininamlulume,” nyapdeibukura, sikti, peterelamikbuk, diksukum winin ning akunum kel bikamik bukni, ila tamubuka tonap akekelamik ning nirya, yaniltanyaka anya arye, wini talak ara, weik malye-malye wininyake.

²² Aning ati ara, nun domon yupu deice nyanyap yupu ulye touk, sik dipkoprop wininyake. Adomon yupu ara ani. Kam arye dukna dukuka, yukak binaplye bukni, ila tamubuka yalirye, el duklopmalye duknauk, ila tamubuka dilule. Tonda, basam pirye dabuka mek bina kekaplye bukni, ila tamubuka pirye dalyangalamle touk wininyake. Aning atonun, anang arye sik malye winin ning bataklamik bukni, ila tamubuka tonap aninguk talibuka, wininyaka ati nyapsine.