2 Korintus 9 - Eipomek

^1-2 Ara, na kayapu, na kele. Anggunce, ‘Kume, bona utotowa talina kum ninye melina ati, nun ton yo bok bulubuka arepnamabe’ tenen, kanye deibuka kintinipdeiplum ning ara, narye Provinsi Makedonia tam ninye ati akunum laka nyalamse. Winibuka laka nyalamse. “Kume, sik Provinsi Akaya tam ninye ara, min keting tamun arye akunum deiyok koubuka, ‘Nun adiparyuk yo bok bulubuka arepnamabe’ tenen, akunum kintinibik. Sikda pia teleb wininyake,” nyabuka, anggunti kanye lon yupu, teleb yupu nyalamsike. Ayupu nyalamsik bukni, sik Makedonia tam ninye kekelamikce, ‘Kume, sik Akaya tam nang arye, kanye deibuka arepnamaka anya arye, nun babye, atonun wininamabe,’ tenebikce kintinibik. Ati, anggun Korintus ninye arye, deiyok koupmunya deice arye, yuk mutuku ninye kekebikirye, sik babye kintinibikirye, arenamake. Aning ati ara, anggun Korintus ninye ara, Akaya tam noutam ulalumce, Allah dib tenenyak ninye, sik bona utotowa talina kum ninye melina ati, yo bok bulubuka arepnamap ning ara, akunum kel bikluma anya arye, weik arye tonap kum nyapnusine.

³ Bukni, narye, “Sik Korintus mutuku ninye ara, dipkoprop yo bok bulubuka kintinipnamake,” nyabuka, kanye lon yupu nyapsise touk, dipkoprop kintinipmunyeba, nun dopdeipnamap nang, anggun dam aminyan yanamake, nyapsine. Tonda, nunce anggunti teleb yupu nyalamubu ning ara, ‘Nong kum uplyak’ tenen, ayanamak nang anggun dam dopdeipnamsine.

⁴ Ara, deiyok ton ani. Ara, Makedonia tam ninye ap, na ap anggun dam yatibyeura, anggun dipkoprop kum kintinipdeipmunce, talye demuk ulamunyopura, nara mitik alye dakanamne bukni, anggun Korintus mutuku nang ara, weik arye alye dakdanamlume. Ara, narye, “Kume, anggun Korintus ninye ara, dipkoprop kintinipnamake,” nyapsise ning ara, ‘Nong kum uplyak,’ tenena ati nyapsine.

⁵ ‘Alye upsilyak’ tenen, narye utenepse. ‘Teleb ning ara, nun du weit atonun nang, sik Korintus ninye dam dopdeipnibuk, ninye melina yo bok min kum arepmace talak, kintinina pil ati melibicopura, ayo bok bulubuka dipkoprop kintinipnamake,’ tenepsise. Ara anggunce, “Yo bok weik arye bulubuka arepnamabe,” nyabuka nyalina yupu nyapdeiyamlum touk, ‘Dipkoprop kintinipnamake’ tenen, anang dobuka anggun dam dopdeipnamsine. Winipniba, anggun dam yanuka melipsicopura, aminyan talak ara, ayo bok weik akunum kintinipdeipmamunye arye, kanye deibuka arepnamlume. Min kum yanmapye talak, kum kintinipmunyopura, ‘Aminyan talak ara, mikip arye nyabibya deice aryuk arepsikibuk, aminyan talak ara, lik kanye bobuka arebiyak,’ tenena ati, na Paulus arye nyapsine.

“Ninye melina ati, weik arye arena telebe,” nyabuk yupu

⁶ Anyapnusin yupu deice, mambul ning kel biknuluma ati, pia tenenamlulume. Ayupu ara, ani. Yatanye do nirya, mitik anun arye koulamlinye bira, aminyan talak ara, mitik anun aryuk lipnamle. Weika arye koulamlinye bira, aminyan talak ara, weik arye lipnamle.

⁷ Ayupu nyapmasin touk, ninye nirya ara, sik talima noutamak arye, ‘Winibuka arepnamne,’ tenebikce touk, yuk ninye melina ati, bokuka arenamake. Kanye bokoltoliba, ‘Arepnun do, kum do?’ tenena ap, yuk nang arye anggunti, “Sik adiparyuk areplulume,” nyapsikce ning ap, deice arye arena kume. Sik kanye deibuka pin-pin asa arye arenyak ninye ati, Allah arye, kanye deilisulula ati, nyapsine.

⁸ Tonda, Allah el kanye aniryuk, bico tenepsilirye, pia weik arye melisilya deice arye, atalak-atalak nirya, anggun aning-aning nirya patapsilye touk, ayala ning nirya aupmasile. Tonda, Allah arye melisilyeba, nun patasilye touk aning-aning nirya arepsilyopura, yata teleb winin ning do nirya, pil weik arye teleb ubuka donamabe.

⁹ Allah yupu noutamak sekik ning ton aupmalak eibuka tenenamlulume. Ayupu ara ani. ‘Allah el urdem aryuk arisilye ning ara, amutuku-amutuku unyak ninye bona utotowa talina kum ninye ati, bokuka arilule. Allah el malye winina pia kum, pia diksukum ulya ara, oyanamle talak nirya pia aunamle. Aning ara, kum winipmanto.’ (Mazmur 112:9)

¹⁰ Aning ati ayupu ton nyapsine. Sik wa koun ninye yala ning nirya arilula deiyoknye bira, Allah arye nun patapsilye kwaning din ning nirya aresulule. Anye biryuk, sik yala ning nirya arisilibuk, anggun yala ning weik upliba, kum ekuka dililum ning babye, weik arye arenamsile. Elcuk melisilyeba, anggun diksukum winin ning pil domunyeba, nong weik unamsile.

¹¹ Allah arye winibuka melisilyeba, yata ning do nirya, weik arye arepsilyopura, anggunce tuba tamubuka yuk ninye melina ati, bokuka arenamlume. Aning nirya ati weik arye arenamsil ning deiyok ara ani. Ara, aminyan lo uplye talak nirya ara, ‘Sikce yuk nang melina ati, bokuka weik arye arenamak’ tenen, aning-aning nirya arenamsile. Anggun Korintus mutuku ninye arye, yuk nang ati bokuka nun deice deipsumunyeura, yuk mutuku bobinuka arebibyopura, aning dolonamak ninye arye Allah ati, “Na ni, telebe,” pia nyanamake.

¹² Ninye melina ati, yo bok bulubuka arenamlum ning ara, Allah ati dib tenenyak ninye, bona utotowa talina kum ninye sik patan ning ati melipnamlulum bukni, aninguk kume. Tonda, aning arepmunyopura, mek langdiplirye, dikilsaklamle touk, aninye weik arye Allah ati, “Telebe,” nyanamake.

¹³ Ninye melina ati apil dopluma deice ara, yuk nang arye anggun Korintus nang ati, ‘Kume, anang ara, telebuk wininyak’ tenen, laka biknamake. Apil dolulum talak ara, ninye weik arye nyanamake. “Anggun Korintus ninye ara, ‘Kristus el laka teleb yupu dib tenenyape,’ nyalamak touk dipkoprop ayupu uk talibuka dobolbanyake. Tonda, sikce nun ap, yuk mutuku ninye ap ati, sik ning weik arye bokuka aresinyake,” nyanamake. Aning ati ara, ninye weik arye, nun Ni Koprop Allah ati, “Telebe,” nyanamake.

¹⁴ Tonda, aninye nirya arye, anggun Korintus mutuku ninye ati, Allah morosinyak talak arye, sik talima melipliba, Allah moronamsiyake. Allah moronamsiyaka deice arye nyanamake, “Kume, Allah el kanye aniryuk Korintus ninye ati, bico tenebukce melyamuka ara, mitika aryuk kume. Allah arye sikti, weik arye melyamukba, pia telebuk unyake,” nyabuka Allah moronamsiyake.

¹⁵ Na Paulus arye ayupu ton nyapne, “Allah, ance aresilyamnye bira, weik mambulnye bira, nun ninye nyalamap yupu deice aniryuk teleb kibuka kum laka nyaptibye. Elti tenebibirye, anti, ‘Nun ni Allah, anda pia telebe,’ nyabuka an si erekinyabe.” Na Paulus arye nyapne.