2 Korintus 8 - Eipomek

“Yuk ninye melina ati, anggun taliplum ning bokuka, weik arye arena telebe,” nyabuk yupu

¹ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Allah el kanye aryuk bico tenebukce, sik Makedonia tam dib tenenyak ninye, sik mikip kilina ati areamuk ning ara, ‘Kel biknamlum’ tenen, ayupu ton nyapnusine.

² Sik Makedonia tam ninye ara, pia ikin weik ulamik bukni, aning-aning nirya pia kum uamukba, bona nirya kum talyamik noutamak ababye, weik arye kanye deibuka pin-pin asa arye ulamika anya arye, yuk pera mutuku ninye melina ati, yo bok weik bulubuka arebik.

³ Narye ton eipse anya arye, na dib nyapsine. Sikce arebik ning ara, mitik anun kume. Sik talyamik ning awamuk touk, sikce arepmanto ning bukni, aning deice dukdongobuka weik arye tonap kum arepmanto ning tonap tabakuka arebik. Winibuka arebik ning ara sik kanye tenena deice aryuk arebik. Yuk nang arye, “Tabakuka areplulume,” nyana deice arye kume.

⁴ Sik Makedonia ninye arye nunti, pia pi dobuka mikip arye moropsike. “Kume, Allah el dib tenebuka diksukum unyak ninye, sik aning-aning pataplye ninye melina ati, nunce ton tabakuka arepsitibye. ‘Aning ara pia mambul anya arye, winipnuyabe’ tenen, weik arye patasulule,” nyabuka moropnik.

⁵ Nunce sik Makedonia tam ninye ati, ‘Winibuka wininamake,’ tenelamubu touk kum winibik. Kume. Sik Makedonia ninye arye, minop talak sik bidamang kanye talima ap, sik badamnye nong ap bobuka, ‘Allah el amutamuk unamap’ tenen, Allah ati arebik. Sikce nong Allah ati arebik, aminyan talak ara nunti arepsik. Aning nirya winibuka winibik ning ara, Allah arye, ‘Amutuku nang arye wininamake,’ tenyamuk touk akunum winibik.

⁶ Aning ati ara, Titus arye akunum deiyok kouamukba, anggun Korintus mutuku ninye yo bok bulubuka arena ati kintiniamlum bukni, nunce Titus ati nyabupu. “Sik Korintus mutuku ninye ara, Allah arye bicoe tenebuka melisilya deice arye, yuk ninye melina ati, ‘Yo bok bulubuka arepnamap’ tenen, akunum kintiniamik. Ati, ance ayupu nyabuka melilbimemba, sik yo bok buluce ara sirya daknamake,” nyabupu.

⁷ Na kayapu, nun kele. Yata teleb winin ning do nirya, anggun Korintus ninye ara, mitika arye pil kum dolulume. Anggun dib tenelulum ning ap, anggun yupu nyalulum ning ap, anggun kel bikilulum ning ap, anggun na tenen kumce dipkopropuk winilye ning ap, anggunce nunti talima melisululum ning ap, weik arye winilulume. Nun kele, aning-aning nirya noutamak arye, anggunda pia pi dobuka, teleb ubuka winiluluma anya arye, nun kele, yuk ninye melina ati ara, yo bok melinamlum ning ababye, teleb ubuka wininamlume. Yuk nang arena ati, Allah arye melisilya deice arye, talima noutamak bico tenen ning arisilibuk, yuk ninye ati, bokuka arinyabe.

⁸ Narye anggunti, “Adip aryuk sik bona utotowa talina kum ninye melina ati, adiparyuk yo bok areplulume,” nyabuka mikip arye, kum nyapmasi bukni, na kanye tenepman ning ara ani. ‘Ara, sik yuk mutuku nang arye, ‘Bona utotowa talina kum ninye melinamabe,’ tenen, weik arye patalamukba, pia pi dobuka pil teleb ubuka dolamik touk, anggun Korintus ninye babye, yuk nang ati, pia dipkoprop ubuka, bico tenebuka melibuka arenamak do, kum do?’ tenen, nyapsine.

⁹ Aning ara talye ati kum nyapsine. Deiyok ara ani. Nun Deiyoknye Yesus arye nun nirya ati, bico tenelamsukce, weik arye melyamsuk touk, ‘Nun babye atonun wininamap’ tenen, nyapsine. Ara, anggun kele, nun Deiyoknye Yesus, el kanye aniryuk bico tenenyamsukce, melipsuka deice arye, teleb kipdeipsuke. Elda im deice pia weik sisinanye ulamuk bukni, nun melina ati ara, talye bona utotowa talina kum nang atonun dayukce, tukwak mutuku yayuk. Winibuka ulamuk ning ababye, deiyok aupmale. Ara, el talye bona utotoa talina kum nang atonun dayukce, pil dopsuka deice arye, ‘Sik tukwak ninye ara, bona utotowa talina kum ninye atonun unyak bukni, narye aninye lyepnyopura, sikda bona weik talilamak ninye atonun unamake,’ tenebuka wipsuke.

¹⁰ Ara, yuk ninye melina ati, yo bok bulubuka arenamluma ati ara, na kanye tenepmana ara nyapnusine. Anggunce teleb wininamlum ning ara ani. Min keting tamun deice ara, ‘Nunce areptibye’ tenen, patana babye, dipkoprop anggun ning bokuka arena ababye, anggun Korintus mutuku ululum ninye arye, minopce deiyok koulamlume.

¹¹ Winibuka kilamluma anya arye, ‘Yo bok bulubuka, bona utotowa talina kum ninye melibuka arenamabe,’ tenen, deiyok kiyamlum pil ara, wini talak ara sirya dakanamlume. Ara, anggun aning-aning talibuka ulalum atonun, arepnamlume. Ara, anggun minop talak, ‘Nun ton areptibye’ tenen, patalamsukbuk, kanye deibuka kintiniamlum touk, wini talak babye, sirya dakana ati, pia pi dobuka kanye deiplumce, arepnamlum ning ap, ‘Wininamlum’ tenen, nyapmasine.

¹² Ara, nun kanye talima noutamak ara, ‘Se, bona utoto talina kum nang melina ati, aning-aning bulubuka areptibye’ tenen, patana weik awabsilyopura, Allah el kanye ara, ‘Kume, anggunce auplye ning talibuka ulamak touk, arena ababye telebe. Bona weik talinyak nang arye, weik arye arenamake. Aning atouk mitika aryuk talinyak nang ara, mitika aryuk arenamake. Sik dipkoprop kum uplye ning kum arepmanto anya arye, aning ara, kum nukuka tenipnune,’ tenesulule. Ati, ‘Anggunda auplye ning taliplum atonun, bona utotowa talina kum ninye melina ati, bokuka arepnamlum’ tenen, nyapmasine.

¹³ Nunce anggunti patapsilye ning ara, ‘Korintus mutuku nang arye, yuk ninye ati weik arye arepmakibuk, ikin upnamake. Sik dopropnamak ninye ara, kanamuk unamake. Korintus mutuku ninye ikin ubuk deice arye, sik dopropnamak ninye ara, kanye deibuka kanamuk unamake,’ tenenyaka ara, dipkoprop kum patasulule. Aning kum bukni, nun tenepmapa ara, ani. ‘Anggun ap, yuk nang ap arepdakirye, neika atonun telebuk unamake’ tenen, patasulule, nyapmasine.

¹⁴ Aning atonun, wini talak ara, anggun Korintus mutuku ninye arye aning-aning weik taliplum ning ara, bokuka arepmunyeba, sik yuk ninye aning pia kum ubukba, ikin ululbuk unyaka ara, kanam upnamle. Winipmunyopura, aning atonun yuk talak ara, sik yuk ninye arye aning-aning weik talinamak talak ara, anggun Korintus mutuku ninye talilum ning kum dasilyeura, sik yuk mutuku nang arye tuba tamubuka anggunti melibuka arepnamsiyake. Anggun ap, yuk mutuku nang ap, winibuka arepdamunyopura, anggun insinip danuka neika unamlume.

¹⁵ Ayupu nyapmasina ara, deiyok ton aupmale. Ara, Allah yupu noutamak sekamik yupu ani. ‘Weika arye bulubuka libuknye bira, pia weik kum ubukba, ton ning ara, kum batakuk. Tonda, mitik bulubuka libuknye bira, kum sukukura, tonap kum patabuk.’ (Keluaran 16:18) “Allah yupu sekamik ning dobuka akunum nyapmasine,” Paulus arye nyabuk.

Paulus arye Titus dobuka Korintus mutuku ninye peterena ati, dopdeibuk ati, laka nyabuk yupu

¹⁶ Narye anggunti bico weik tenesinye touk, Allah arye Titus el talima noutamak bico weik tenena deiyok ning aribukba, el Titus ababye anggun Korintus mutuku ninye ati bico weik tenesulule. Aning ati ara narye Allah ati, “Telebe,” nyanune.

¹⁷ Nunce Titus ati, “Korintus mutuku nang dam melilbinulyame,” nyabuka morobupuba, elce, “Telebe, na kanye deibuka melilbinamne,” nyabuk. Tonda, aninguk kume. El kanye aryuk, ‘Na pin-pin asa arye sik dam melilbinamne,’ tenelula anya arye, nun kele, elce anggunti weik arye bico tenesulule.

¹⁸ Tonda, Titus ap anggun dam neika yanamlanye bira, elda Yesus el laka teleb yupu, ninye lyena yupu ati, pia teleb ubuka peterelula anya arye, Allah dib tenenyak ninye mutuku-mutuku nirya elti, akunum kel bikikirye, “Elda pia teleb peterenanye,” nyanyake. El ap, Titus ap anggun dam yanamdake.

¹⁹ Tonda, sik yuk mutuku dib tenenyak ninye nirya arye anye biti, “Kume. Nun bulubupu yo bok ara, sik arel binul talak ara, anye ap neika benamlume,” nyabuka wibuka deiamik. Ara, ayo bok ara, ninye melina ati arepnamap ning ara, nun Deiyoknye Yesus el si erena ati arepnamabe. Tonda, ayo bok arebibya deice arye, nunce, ‘Se, bona utoto talina kum ninye meliptibye’ tenen, kanye deipsuk ning ara laka upliba, yuk nang ton kel biktinge.

²⁰ Yuk nang arye, “Kume, ninye melina yo bok bulubik ning ara, arepmek talak ara, sikce malye winipmek,” nyabuka, ‘Malye yupu nyapsikcak’ tenen, anggun Korintus mutuku ninye arye bulubuka arepnamlum yo bok, libibirye arel binamap talak ara, pia moubuka arepnamabe.

²¹ Aning ara talye kum nyapsine. Kume, Allah ap, ninye yuk mutuku ninye ap, arye dinmasikirye, ‘Teleb winipnamak do, malye wininamak do?’ tenen, moubuka dinmasiyak anya arye, pia moubuka tenebibirye, teleb ubuka arenamabe. Allah ap, yuk ninye ap, anggun nirya arye, ‘Ayo bok bokuka arena ati, teleb winina ara ani,’ tenelamaka atonun, ‘Aninguk winipnuyabe’ tenen, pi dobuka pil teleb ubuka donyabe. Ara, aminyan yata ninye do nirya, “Sikda malye winipmake,” ‘Kum nyapsiting’ tenen, nyapsine. Ati, na ap, si sipmanu nang ap, neika bibirye, ayo bok arepnamabe.

²² Ara, sik yo bok bokuka aredelbana ati, deiyok nang yanamak talak ara, tonoknye ton dopdeipnamabe. Elda, minop talak pil teleb ubuka dolamukbuk, nunce elti, ‘Anye bira dipkoprop pi dobuka, teleb pil dolulnye’ tenen, kel bikupu. Bukni, wini talak ara, elce sik Korintus mutuku ninye ati, ‘Anggunda teleb nang’ tenen, pia dib tenelula anya arye, weik arye tonap pi dobuka teleb pil donamsile.

²³ Ara, Titus ati ara, elda, na kanye talima delinunye. El ap, na ap, ‘Sik Korintus mutuku ninye kan-kan pil donamname’ tenen, neikauk pil tuba donyame. Ara, el ap neika yanamak nang nirya ara, Yesus ati dib tenelamika ati, nun du weit atonun unyake. Sikda, talye nang kume. Anang arye pil teleb ubuka donyaka deice arye, Kristus ati si erebuka, el si kinyake. Tonda, yuk-yuk mutuku ninye, Allah dib tenenyak ninye arye, ninye melina yo bok bokona ati, ‘Nun nirya kum binmanto anya arye, anang ara nun si deice arye arilbinamake’ tenen, wibuka deibik nang unyake.

²⁴ Aning ati ara, ‘Allah dib tenenyak ninye, mutuku-mutuku nirya kel biknamak’ tenen, anggun dam yanamak nang ati, laka arye bico tenebuka melinamlulume. Winipmunyopura, nunce anggunti kanye deibuka, ‘Anang ara pia teleb,’ tenesinyaba deiyok ara, laka upliba, ninye nirya eibuka kel kipnamake.