2 Korintus 7 - Eipomek

¹ Na kayapu, Allah arye nun nirya ati, ‘Wininamsine,’ nyabuka, arup nyapmasin yupu nyalilamsukba, aupmasila anya arye, yata malye winin ning ap, malye tenen ning ap do nirya, nun nong malye winisilye ning ap, nun kanye talima malye winisilye ning ap, adiparyuk batakibirye, diksukum ninyeuk unamabe. Ara, ‘Nun Ni Koprop Allah ara, pia mambule’ tenen, el si erena ati diksukumuk unamabe. Aning wininamaba ati, na Paulus arye nyapsine.

Paulus arye, “Anggun malye ning batakmunce, telebuk unamluma ati, na kanye deipne,” nyabuka, laka nyabuk yupu

² Na kayapu, anggunce nunti, kanye deipsumunce, bico tenepsululume. Nunce yuk ninye nirya ati, malye kum winililamubu. Tonda, nunce yuk ninye nirya ati, tilila yupu kum peterelamupebuk, siktilila yupu dib kum tenelamik. Tonda, ‘Yuk nang sik ning ubula doproptibye’ tenen, tenebuka arye kum nyalamuburye, ubula kum dolamubu. Tonda, ikin ning yuk nang deice kum deililamubu.

³ ‘Nun kayapo, kanye deipsululume,’ nyapmasina ara, ‘Anggun Korintus nang ara, malye nang unyake,’ nyabuka, ‘Anggunti malye yupu nyapnusine’ tenen arye, kum nyapmasine. Aning kume. Min arye nyapsise touk, nunce anggunti pia bico tenenyap anya arye, ‘Korintus mutuku nang sik melina ati, pia wininamabe. Tonda, anggun melina ati, nun dipna ababye telebuka,’ tenesinyabe.

⁴ Kume, na Paulus arye anggunti, pia teleb kanye deipsisirye, teniltona kumce, ‘Aninye ara teleb nang,’ tenesunune. Yuk mutuku ninye ati, ‘Sik Korintus ninye ara, pia telebe,’ nyabuka laka nyanune. Anggun winimunya ati ara, tenepnirye, na teleb kanye bobuka unune. Tonda na talima melibuka kwa dinululume. Ikin ning usilya noutamak babye, narye anggunti, tenepnirye, pia teleb kanye bobuka, pin-pin asa arye unune.

⁵ Aning ara, talye ati kum nyapsine. Kume, nun Makedonia tam yapu talak ara, atalak-atalak nirya dana-dana tam arye ikin ning wamsukba, imun kanye bobuka ulamubu. Atalak nirya noutamak ara, malye nang ara nun yupu ati, yu kibukba yupu sekeldongona ap, waldana ap winilamsikba, nun babye kanye talima noutamak ara, ‘Se, yata upnamsil do?’ tenen, ilil ulamsuk. Atalak nirya ara, talye kanye bobuka dikdik sena talak, mitik anunuk kum wamsuk. Ikineuk tuba ulamubu.

⁶ Kanye imun ulamsuk bukni, ikin ulamle ninye nirya ati, kanye talima melibuka kwa dakuka melinanye bira Allah arye melipsuke. Ara, nun kwit Titus ara, nun dam yasuk deice arye, Allah arye nunti kanye talima melibuka kwa dakuka melilamsuke.

⁷ Talima kwa dakuka melipsuk ning ara, Titus arye nun dam yayuk deice arye winipsuke. Tonda, anggunce Titus ati meliplum ning laka nyapsukbuk, kekebupu deice arye, nun ton kanye talima melibuka kwa dipsuke. Titus arye nati nyapnuke. “Kume, sik Korintus mutuku ninye arye an Paulus ati, ‘Se, el ap epdatibye’ tenen, patalibuk, tenekinyake. Tonda, ‘Paulus ikin upliba, Se, yata wiriptibya deice arye, Paulus meliptibye do?’ tenekinyake. Tonda, sik Korintus mutuku ninye arye, ‘Malye winilamububuk, Paulus arye wenepsuk ning ati, talima bouku sukubuka unyabe,’ nyapkike. Ayupu nirya ara, Titus arye laka nyapnuke. Kanye deibuka ulamse bukni, ayupu nirya nyapnuka ati ara, anggun Korintus ninye ati, na kanye deipsirye, pin-pin asa arye upse.”

⁸ Ara, yuk yupu ton nyapnune. Narye anggunti, wenena surat minop ning sekeipsise. Asurat eipluma deice arye, malye kanye bobuka engeplum ning ati, ‘Se, aning ara, kum winiptinye’ tenen, malye kanye bopsi bukni, wini talak ara, aning tuba kum tenenune. Winira na kel bikse. Na surat deice arye, tia talakuk malye kanye bobuka engeplum bukni, aminyan ara, ila tuba tamubuka ton teleb ning winiluluma anya arye, wini talak ara, na kanye deipne.

⁹ Na kanye deipmana ara, ‘Sik malye kanye bobuka engebike’ tenena ati kum bukni, ‘Sik malye kanye bobuka engebika deice arye, sik malye winin ning nirya batakikce, tuba tamubuka telebuk winibike’ tenen, kanye deipsine. Allah arye, ‘Na mapu malye ubikiba, mambul kanye bopnamake,’ tenyamsuk touk, mambul kanye bobuka engepluma anya arye, nunce asurat sekuka nyapsupu yupu deice arye malye kum kipdeipsupe.

¹⁰ Allah arye mambul kanye arisilya deice arye, engenyap bukni, aning deice arye malye unyap ning nirya batakibirye, lyena ning ati dib tenebibyeura, Allah arye lyesulule. Lyepsilyopura, nun aminyan talak ara, “Se, aning kum winipmatibye,” tenebuka malye kanye pia kum bonyabe. Allah arye wenesilya babye, aminyan ara malye ning batakibirye, telebuk ubirye, kam unamabe. Bukni, sik talye unyak ninye, Allah dib tenena kum ninye ara, sik mambul kanye bobuka engelamikca ani, aminyan talak ara, sik bouku sukuplirye, dipnauk unyake.

¹¹ Ara, anggun Korintus ninye ton tenipdelulume. Wenen surat dopdeipsukba, Allah arye anggun talima noutamak pil dobukba, anggunda mambul kanye bobuka engepluma deice arye winipsuk ning ara, telebuka. Ara ani. Anggunce nati, ‘Anang ara, teleb nang tenepnamsil’ tenen, pia pi dobuka yupu nyalamnulum ning ap, tonda, ‘Malye winipsuk ning kum daneiptibye’ tenen, pi dobuka pil dolamlum ning ap, tonda, ‘Se, yata ati malye winin ning nun noutamak tuba upmasil do?’ tenen, ilil kanye bobuka ululum ning ap, tonda, ‘Malye winin ning batakuka, teleb ninguk wininamabe’ tenen, patana ap, ‘Malye usilye ning batakuka, teleb kibuka mupdeipnamap’ tenena ap, tonda, malye usilye ning ati, “Dauplye,” kum nyanamap bukni, malye ning nirya ati ‘Yupu bokeibibirye, lipsisiknamap’ tenena ap, anirya ati ara, na kanye ara, telebuka. Adeiyok nirya ati ara, anggunce apil nirya dolamluma deice arye, ‘Anang ara, teleb winin ninyeuk unyak’ tenen, laka upsilaba akunum kel kisinyabe.

¹² Ati na kayapu, na surat sekeipsise ning ara, malye unanye bitibuk kum sekeipsise. Aning atonun, amalye winibuknye birye, malye winibukura, elce malye kibuka deibuk ninye bitibuk kum sekeipsise. Anirya kum bukni, Allah arye dinmasilibuk, anggun Korintus mutuku ninye arye, na ap, na neika pil donyap nang ati kanye deibuka talima arisilibuk, mambul tenesinyap ning ara, ‘Laka upliba kel biknamak’ tenen, asurat sekeipsise.

¹³ Aning-aning nirya ati ara, nun kanye talima melibuka kwa dakuka melisilyeba, kanye deibuka unyabe. Aninguk kum bukni, anggun Korintus mutuku ninye arye, anggun winilamluma deice arye, nun kwit Titus el kanye talima kwa dibuka melilamlume. Ara, Titus arye, anggunti, ‘Malye tuba winipnamak do? Malye ning batakuka diksukumuk wininamak do?’ tenyamuk bukni, winira akunum teleb winipluma anya arye, el kanye deibuka pin-pin asa arye ulamukba, nunce aning eibupurye, kanye deibupe.

¹⁴ Ara, Titus arye anggun dam min kum yayuk talak ara, narye anggunti, “Korintus ninye ara, pia teleb wininyake,” nyabuka kanye lon yupu nyapdeipsiba Titus kekebuk. Titus ap ulamlum talak ayupu nyapse touk, winilamlumba eibuk anya arye, narye elti, nyapsise yupu dipkoprop winibuka anya arye, na alye kum dakdase. Ara, nunce, anggun Korintus mutuku ninye ati, nyalamubu yupu nirya, dipkoprop yupu uamukba, peterebupu touk, nunce Titus el kekena ati, “Korintus ninye ara, pia teleb kibuka unyake,” nyabuka kanye lon yupu nyabupu nirya, aning atonun winilamlumba, akunum laka kibuka ati, aning ababye dipkopropuk ulule.

¹⁵ Tonda, Titus arye anggun ap, neika wamlum talak ati, kanye arye teneplirye, ‘E, sik Korintus ninye ara, na yupu nirya moubuka kekelamnikce, ‘Titus ap, el yupu ap ara, weik mambul’ tenen, ilil una deice arye moubuka kekelamnike,’ tenesulule. Winibuka tenesilye ning ara, Titus arye anggun Korintus ninye ati, weik arye kanye deibuka talima aresulule.

¹⁶ Teleb kibuka ulamluma anya arye, narye anggunti kanye bokoltona kumce, ‘Sik Korintus ninye ara, dipkoprop teleb unamak,’ tenesunune. Ati na kanye deipsine.