2 Korintus 6 - Eipomek

¹ Nunda, Allah el pil nika melibuka donyap nang arye, anggun Korintus mutuku ninye ati mikip arye nyapsiyabe. “Allah el kanye aniryuk bico tenepsilirye, melibuka lyesulul ning ara, dib tenepmunce dopropmunyopura, talye-talye winina ap, talye tenena ap, malye winin ap kum wininamlulume. Allah arye tenyamsuk touk diksukumuk wininamlume,” nyapsiyabe.

² Anyapsin yupu deiyok ara ani. Ara, Allah yupu noutamak ara, Allah arye Israel ninye ati nyapdeibukba, nabi Yesaya arye sekuk yupu ani. ‘Allah arye nyabuk, “Narye, ‘Aninye melipnamne’ tenen, kanye deipse talak akunum ubukba, anggunce moropnulumba, kekepsirye melipsise. Narye, ‘Ninye lyena talak atia,’ tenyamsi talak akunum ubukba, anggunti melibuka lyepsise,” nyabuk.’ (Yesaya 49:8) Ati, Yesaya arye sekdeibuk yupu nyasilye touk, na Paulus arye anggun Korintus ninye ati nyapsine. ‘Aning nirya ara, yuk talak aryuk tenenamabe’ tenen, kum unamlulume. Wini talak ara, Allah arye kanye delisilye talak akunum upsile. Wini talak ara, Allah arye lyesilye talak akunum usulula ati, adiparyuk dib tenebuka teleb ubuka wininamlume, nyapsine.

Paulus arye, “Diba tenena kum ninye arye, nun nong deice ikin ning delisinyake,” nyabuk yupu

³ Ura, yuk yupu ton nyapnusine. Nunce Allah el pil donyap ning nirya ati, ‘Yuk nang arye malye nyapsikcak’ tenen, kanye moubibirye pil pia moubuka donyabe. Ara, yuk nang arye, “Aning ara, malye wininyak ning ara ani,” nyapsiting ning nirya ara, dipkoprop kum wininyabe. Malye winiptipyopura, yuk nang eibikirye, ‘Malye kanye bobikirye, dib kum tenepnamak’ tenen, malye kum wininyabe. Aning kum winibirye, pia moubuka diksukumuk wininyabe.

⁴ Malye winina pia kum aniryuk, nunda Allah el amu tam ubirye, el pil melinang unyaba anya arye, yuk ninye nirya arye, nun wininyap ning nirya eipsikirye, ‘Anang ara, teleb nang uk’ tenen, kel biknamaka ati, yatato winin ning noutamak do nirya, diksukumuk wininyabe. Ikin usilya babye, batakana kum, pia pi dobuka pil tuba donyabe. Ikine usilye ning ara ani. Kanye eito-uto winina ap, ikin upsiliba talima sukuna ap, kanye imun ning usilibuk, kanye imun kanye bobuka una ap,

⁵ Malye nang arye nun nong deice kama arye donokuka osinyaka ap, tapu koubuka wenena aik dongosinyaka ap, ninye weik arye yu upliba waldanyak ning ap, pia ikin pil donyak ning ap, lukunyan mana kumce kam berenga debuka pia bulamap ning ap, din kum upsiliba din bulang bulamap ning ap, anirya awabsilya babye, nun pil kum batakanyabe.

⁶ Yuk nang nirya arye, ‘Anang ara teleb nanguk unyake, tenenamsiyak’ tenen, wininyap ning ara, ani. Nun kanye talima noutamak ara, malye winina pia kum, diksukumuk una ap; ‘Deiyok ani’ tenen, moubuka kekena ap; kel bikna ap unyabe. Tonda, ikin usilye ning do, malye winisinyak ning do, aning ati pola-pola yu una kumce, nimalye arye winina ap; yuk ninye sik patana ati melina ap wininyabe. Tonda, Allah El Dib Kanye mikip deice winina ap; tenepce arye winina kum bukni, yuk ninye ati dipkoprop bico tenebuka melina ap wininyabe.

⁷ Tonda, tilila yupu kum nyanyap bukni, pia dipkoprop ninguk nyana ap; Allah el mikip arisilibuk, adeice arye moubuka pil dona ap; aning-aning nirya wininyabe. Anirya ara, yin nang arye, taruk dana-dana tam yin talibuka olbalamak touk, malye winina pia kum, diksukumuk unyaba deice arye, Allah el pil donyabe.

⁸ Yuk ninye arye nunti, kanye deibuka kibuka si erenamsiak talak babye, yuk nang arye nunti, yu upliba malye yupu nyasikce talak ababye, apil kum batakanyabe. Telebuk unyabe. Tonda, yuk nang arye nunti, malye yupu nyabuka lululisinyak talak babye, nun wininyap ning ati teleb yupu nyasinyak talak ababye, Allah el pil kum batakanyabe. Nunda, duknuna kum, lakak aryuk nun pil dobuka teleb wininyap bukni, yuk nang arye nunti, “Kume, sikda tilila nanguk unyake,” nyasinyake.

⁹ Anang nirya arye nunti kel bikisinyak bukni, “Anang ara, mambul kume, sikda talye nang uka,” nyasinyake. Sikce nunti, “Kume, anang ara, dipnamakca, ati sik dauplye,” nyasinyak bukni, kum omsikceba tuba kam unyaba ara, anggunce ton elisululume. Nun nong deice ara, kama arye weik bongobuka osinyak bukni, min kum oplopsikba, kum dibupa anya arye, anggun kele, nun tuba kam unyabe.

¹⁰ Tonda, nunce, ‘Se’ tenen, kanye imun kanye bobuka engenyap bukni, aning awabsilya babye, atalak nirya nun talima ak kanye deibuka unyabe. Nunda, aning-aning kum upmasilibuk, talye bona utotowa talina kum ninye unyap bukni, nun mambul pil donyapa deice arye, yuk ninye arye weik mambul ning doprobikirye, bona weik talinanye atonun unyake. Ara, nunda tukwak mutuku noutamak talye auplye ning ati, bona aning-aning nirya talibuka kum unyap bukni, dipkoprop ara nun akunum dopropbupe ning ara, weik mambul ning anya arye, nun kanye ara, bona weik talin nang atonun unyabe.

¹¹ Ara, na kayapu, nunce anggun Korintus mutuku ululum ninye ati, nun talima weik arye arisilibuk, yupu talye kanye bobuka lakak anyuk nyanmasiyabe. Dungnubuka kum nyasinyabe. Ara, ‘Aninye ap kanye talima dukdongobuka neika uptibye’ tenen, lakak anyuk nyasinyabe.

¹² Nunce anggunti, telebe nyana ap, kanye delina ap, bico tenena ap weik arye winisinyap bukni, anggun Korintus mutuku ululum ninye ara nunti, aning atonun kum tenesulume. Tonda, nunti kanye deibuka, bico kum tenesulume.

¹³ Aning ati, narye anggunti, ‘Na mapu atonun unyake,’ tenesununa anya arye, na mapu awamnutu ak, narye na mapu koprop ati, nyaptinye touk, anggunti nyapsine. “Ninye arye yuk nang ati teleb kibuka arelalamak touk, anggun adiparyuk nunti, ‘Kanye talima dukdongobuka neika unamabe’ teneplumce, kanye deibuka anggun kanye talima delisululume. Teleb ning ara, aninguka,” nyapsine.

“Diba tenen ninye arye, diba tenena kum nang ap, neika dolona ap, pile ansinibuka ap kum unamlulume,” nyabuk yupu

¹⁴ Na kayapu, anggun dib tenen ninye arye, kilapu do, sal do, dib tenena kum ninye kum dolanamlulume. Tonda anggun dib tenen ninye ap, dib tenena kum ninye ap, pil tonok kum donamlulume. Anyapmasina ara, talye ati kume. Anggun tenipdelulume. Diksukum winin ninye ap, pia malye winin ninye ap, sik kanye talima insinibuka ulul do? Yuk-yuk ulul do? Aning atonun, kunuknak ap, dirina ap neika una teleb do? Kume, aning ara kum winipmanto.

¹⁵ Aning atonun, pia diksukumnye Kristus ap, pia malye ululnye Isa Mutuku Dongonye, tonda el si ton Belial ap, neika teleb kibuka uptiring do? Kume, aning ara, kum upmanto. Aning atouk, Yesus ati dib tenenyak ninye ap, Yesus ati dib kum tenenyak ninye ap, sik kanye talima neika ulul do? Kume, aning ababye kum upmanto. Ati anggun dib tenelulum ninye ap, dib tenena kum ninye ap, neika doldana ap, pil tonok dona ap meme.

¹⁶ Tonda, Allah el si erena ati, weik mambul aik ap, talye ning isa si erenyak aik ap, neika atonun ning do? Kume. Nun kanye talima ap, nong ap ara, Allah el wekna aik atonun unyabe. Allah arye nyabuk. ‘Na ap, anggun ap neika ubirye, anggun ap neika banamnyabe. Nara, sik Ni Koprop Allah unamne. Sikda na mapu unamniyake.’ (Imamat 26:12) Allah arye nyabuk yupu nyapsine. Tonda, Allah yupu noutamak sekik yupu ton ani.

¹⁷ Allah arye nyabuk. “Aning ati ara, talye ninye, dib kum tenenyak ninye kan-kan una batakuka, yukak kilonamlulume. Amalye wininyak nang ap, anggun ap neika ansinibuka una pia malye weik ati, anggun yuk-yuk unamlume. Na Allah arye nyapsine. Narye anggunti, ‘Aning ara, malye ning anya arye, talina meme,’ nyapdeiamsise ning, tonok ning babye kum talibuka winimunyopura, nara anggun dam yanuka dopdopsinirye neika unamabe. (Yesaya 52:11; Yehezkiel 20:34, 41)

¹⁸ Dopropsinirye, nara anggun ni koprop unamsine. Anggunda na mapu ap, na kil mapu ap unamnulume. Nara, aning-aning nirya bisibuka, deice tam mikip weik ununye birye nyapsine,” na Allah arye nyapsine. (2 Samuel 7:8) Allah arye nyapdeibukba, Samuel arye sekeiyamsuk yupu ara, na Paulus arye nyapsine.