2 Korintus 5 - Eipomek

Im deice upnamapak ati, nyabuk yupu

¹ Ara, yuk yupu ton nyapnusine. Nun nirya kele. Tukwak mutuku unyap talak ara, nun nong ara, baju aik, el si ara tenda, atonun tia ninguk ulule. Nun nong ara, tia talakuk ulula anya arye, malye upliba dibibyopura, anong kum upsilyopura, yuk ning dopropnamabe. Wininamap ning ati, winipmanto yupu ara, aik nyapnune. Allah arye akunum dipkoprop pia aupnamle aik kintinipsuk ning ara, aupmale. Anyaik ara, ninye taruk deice kum dobik. Anyaik ara im deice ulirye, pia atalak nirya aupnamle.

² Im deice kintinipsuk ning aupmal bukni, tuba tukwak ning noutam akuk unyap talak nirya ara, ‘Se, winiryuk baju ongonyak touk, Allah arye im deice nong kintinipsuk ning ara, akunum dobuka ongoptibye’ tenen, pia patasiliba, malye nyabuka unyabe.

³ Ura, im deice ning ongopdeipsilyopura, talye nong demuk kum unamaba ati, nyapsine. Dibibyopura, nong demuk, ninye kanyeuk kum unamabe. Allah arye winiryuk nong, im deice ning arepnamsile.

⁴ Anyapmasin yupu ara, deiyok ani. Ara, tukwak mutuku unyap talak nirya ara, tia nonguk ubirye, ‘Se, ikin usulul’ tenen, malye nyabuka engenyabe. Ara, ‘Nun tukwak nong kum dasutuba, talye demuk ulamtibye’ tenena kum bukni, ‘Nun nong tia talak ati upsuk ning kum uptu ura, im deice nong dobuka, anong dongobuka ongopdeipsutue. Winipsilyopura, nun tukwak nong bol dibibyopura, kum dalirye, pia kam unamap deice arye, im deice nong dobuka pia kam utibye,’ tenena ati nyapsine. Tonda, ‘Dipna deiyok ning kum datopura, pia kam uninguk aunamle’ tenen, patana ati nyapsine.

⁵ Ara, arup nyapmasin yupu ara, nun Ni Koprop Allah arye nunti, ‘Aninye ara, pia kam unamake,’ tenyamsukce, kwepdeipsuka deiyok ara, akunuma. Tonda, winipmanto yupu nyapnusine. Ara, ninye arye, kil dona ati, aminyan talak ara, aning-aning weik arye arepnamaka ati, dopropnamak ninye, ‘Diba tenepnamak’ tenen, deiyok koubuka minop kil akulamak touk akupsuke. Aning atonun, Allah arye el Dib Kanye minop arepsuk bukni, daulamibya ani, aminyan talak ara, kam pia unamabe. Ara, aminyan talak ara, yanamsil ning nirya, ‘Dipkoprop winipnamle, tenepnamak’ tenen, el Dib Kanye minopce arepsuk bukni, aminyan ara, pia kam un ning ton arepnamsile.

⁶ Aning ati ara, atalak-atalak nirya ara, kanye teniltona kum aniryuk, ‘Pia dipkoprop unamsile’ tenen, lamapdongobuka pi dobuka unyabe. Tonda, nun kele, tukwak deice ninye nong noutamak tuba unyap talak ara, nun yuk mutuku unyabe. Tonda, nun Deiyoknye Yesus yukak ulule.

⁷ Nunda, asing arye elinyaba deice aryuk kum unyabe. Aning kum bukni, dib tenena deice aniryuk unyabe.

⁸ Arup nyapmasin touk, nun kanye teniltona kum aniryuk, dib tenebuka lamapdongobuka unyabe. Nun kanye patapsilye ning ara, tukwak ninye nong unyaba ara, dawaptubuk aning batakuka, nun Deiyoknye Yesus ulyak neika uptibyetoura, ‘Aning ara, pia telebe,’ tenenyabe.

⁹ Winibuka tenenyabe. Aning ati ara, ‘Nun ninye nong tuba ubirye, tukwak kam unyap talak do, aning batakuka, im deice mutuku unamap talak do, weik mambul tenenyap ning ara, Allah arye kanye deipsutue’ tenen, el tenesilye touk aninguk talibuka, diksukumuk wininamabe. Yuk ning ton patasiliba, kum wininyabe.

¹⁰ Ayupu nyapmasin ara, urdem ati kum nyapsine. Kume, ninye mutuku-mutuku nirya aminyan sirya talak ara, Kristus arye ninye nirya yupu bokona ati, weik ninye deiyok nang arye bulamak ning takta kursi bulamak ning deice buklibuk, el dam binamabe. Kristus arye, ninye nirya dipdesilirye, ninye yuk-yuk bukni, nirya, sik pil dolamak ning ap, yupu nyalamak ning ap, nirya awinilamak touk, yupu lipsisikuka bokeipnamsile. Ara, ninye nong ubuka pil dolamubu ning ati, teleb ning babye, malye ning babye dipdesilirye, yupu lipsisikuka bokeipnamsile. Ati, ‘Yata pil doptibyeba, Allah arye kanye deipsutu do?’ tenenauk unamnyape, nyapsine.

Allah yuk, nun yuk ulamubu bukni, teleb kipdeipsukce, ansinibdeipsuk ati, nyabuk yupu

¹¹ Aning ati ara, Allah arye yupu lipsisikuka bokeipnamsil talak ara, ‘Malye winibupu ati wenepsilyak’ tenen, ilil una ara, usulula anya arye, nunce yuk ninye nirya ati, ‘Sik malye ning bataktingce, Yesus ati dib teneptinge’ tenen, pia pi dobuka peterenyabe. Nun winilamap ning ara, Allah el kele. Tonda, na patapnil ning ara, sik Korintus mutuku ninye, sik kanye talima noutamak ara, nun wininyap ning nirya laka upliba, ‘Kel biksutume’ tenen, patanulule. Nunda tenepce arye, talye yupu kum nyanyabe.

¹² Nunce, ‘Korintus mutuku ninye arye, nunti, teleb tenenamsiyak’ tenen, ayupu kum nyababe. Nunce nun bidamnye ati nun si kum ereipdanmabe. Aning kum bukni, ton ninye ara, ninye talima ak uplye ning kum tenebikirye, nong bol deice ning, nun asing arye elinyak ning, urasin awapsilye ninguk tenenyake. Aning atonun tenenyak ninye arye, nunti malye nyapsicebuk, ‘Anggun Korintus ninye arye yupu tamubuka nyaptum’ tenen, ayupu nirya laka nyapmabe. Tonda, ‘Aning laka nyabibibuk, moubuka kel kipnamsulum’ tenen, nyapmasiabe.

¹³ Ara, ton ninye arye ara nunti, “Sik wininyak ning ara, teleb nang arye wininyak atonun wininyake,” nyasinyak. Luba talin nang kum unyap bukni, teleb nang atonun uptibya babye, ‘Yuk ninye nirya arye, Allah el pia teleb winilya ara, moubuka kel bikting’ tenen, Allah el pil donyabe. Kanye bobuka, moubuka wininyak ning atonun winibibyopura, aning ara, anggun Korintus ninye, anggun melina ati wininyabe.

¹⁴ Aning-aning winibya nirya ara, deiyok tonokuk ulule. Ara, Kristus elce nun nirya ati, bico tenepsilirye, melisilya deice arye, el mikip arisilibuk adeice arye el pil donyabe. Aning babye, talye ati kume. Kanye teniltona kum usilyeba, pia dipkoprop tenenyabe. Nun kele. Yesus arye, ‘Ninye mutuku-mutuku nirya dipnamak’ tenen, tukwak mutuku ninye nirya sik lyena ati, elda tonoknye birye, nun malye ning nirya pununa ati dipsuke. Aning ati, nun kele. Kristus dipsuka deice arye, nun malye ning nirya punupsuka ati, Kristus dipsuka deice arye, nun nirya akunum dibupe.

¹⁵ Tonda, Kristus arye ninye nirya sik malye ning pununa ati dipsuka ara, ‘Sik kam unamak talak ara, sik bidamang patan ning atibuk tenebuka, talye-talye unamak’ tenen, kum dipsuke. Aning pia kum bukni, Allah arye tenebuka ara ani. Ara, ‘Aninye nirya, sik yok pununa ap, sik lyena ap ati, Yesus dibuk.’ Dibuk bukni, Allah arye kam bukeibuknye, ‘Yesus elti, dib tenebikirye, eltibuk tenebikirye, eluk talibuka, el piluk dobuka unamak’ tenen, Yesus arye el punupsukce, dipsuke.

¹⁶ Aning ati ara, wini talak arye diprongobuka oyanamle talak nirya ara, sik dib tenena kum nang arye, yuk nang ati tenelalamak atonun, nunce yuk nang nirya ati, aning atonun kum tenenamabe. Minop talak nunce Kristus ati, talye ninye tenelamak touk, ‘Anye bira talinye,’ tenebupu bukni, wini talak ara, aning tuba kum tenenamabe.

¹⁷ Aning atonun tuba kum tenenyaba anya arye, ayupu nyapsine. Yatanye do nirya, Kristus ati dib teneplirye, kanye talima dukdongobuka neika urikcopura, elda pia winiryuknye atonun ulule. El kanye tenena ap, el talima ap, el ulul ning ap nirya ara, Allah arye, anye bira minop arye winilamuk ning nirya kum daneiplirye, winiryuk ninguk arilule.

¹⁸ Aning nirya ara, Allah elcuk pil dosilirye, aresulule. Minop arye Allah yuk, nun ninye nirya yuk-yuk ulamuburye, el ap neika kum upmanto ulamubu bukni, Allah arye nun lyena ati, Kristus dopdeipsukba, el pil dopsuka deice arye, el ap ansinibdeipsukce, teleb kipdeipsuke. Ati wini talak ara, el ap neika uptibye. Allah arye wipdeipsukce, ‘Aninye nirya arye, na Allah ap, ninye ap ansinibuka neika teleb una ati, na laka teleb yupu nirya laka nyabuka peterepra banamake,’ tenepsukce, wibuka deipsukce, apil arepsuke.

¹⁹ Nun peterenyap yupu ara, ani. Allah ap, ninye ap insinibuka teleb una ati deiyok yupu ani. “Ara, Allah arye tukwak ninye nirya, sik malye wininyak ning ati, ‘Namin kibuka kum daneipnirye, ila tamubuka ton kum tenepnirye, sik malye ning ati kum wenebuka opnamne’ tenen, Kristus dopdeipsukba, Yesus arye el ninye lyena pil dopsuka deice arye, Allah arye ninye mutuku-mutuku nirya ap, el ap ansinibuka neika teleb ulisulule.” Ayupu nirya laka nyabuka laka peterelbana ati, Allah arye nun wibuka deipsukbuk, apil talibuka donyabe.

²⁰ Aning ati ara, nun Allah yupu peterena deiyok kouna deiyok nang ara, Allah el si deice arye, ninye lyena ap, el laka teleb yupu peterelbana nang unyabe. Ara, Allah elcuk anggunti mening dam yanuka nyapsuk touk, nun deice nyasilyeba, ayupu dobuka anggun dam nyalyanganyabe. Aning ati ara, Kristus elcuk anggun mening dam kum nyapsutue anya arye, nunda el si deice arye anggunti nyasinyabe. Nunce anggunti nyanyap yupu ara ani. “Allah arye ninye lyena ati, insinibuka teleb ubuka delisilye ning ara, anggun ton dib tenebuka dolonamlume,” nyabuka nyasinyabe.

²¹ Ara, Allah arye nun lyena ap, yok pununa ap ati, malye winin ning tonok ning babye kum ulamukce, pia diksukum ululnye Yesus ara, Allah arye dobuka, tukwak ninye nun malye winin ning nirya el nong deice deibukba, nun malye ning nirya dobuka kum kipdeipsuke. Ara, nun malye winin ning pununa ati, winipsuke. Winibuka deiyok ara ani. Allah arye utenyamuk, ‘Tukwak ninye nirya, malye winin nang unyak bukni, nara Allah pia diksukum unye touk, Kristus ap aninye ap talima dukdongopniba, Kristus deice arye, aninye diksukum kipdeipnamne,’ tenebukce, Allah arye apil dopsuke. Na Paulus arye nyapsine.