2 Korintus 3 - Eipomek

Allah arye, ninye lyena ati, winiryuk nyalilamsil yupu pil dona ati, nyabuk yupu

¹ Ura, ayupu nyapmasina ara, ‘Sikce teleb nang tenenamsiyak’ tenen, nun si ereipdanmapce nyanmap do? Kume. Tonda, yuk nang peterelbinuce talak ara, sik yupu kekepnamak ninye ara, ‘Diba tenenamsiyak’ tenen, deiyok nang arye surat rekomendasi noutamak arye, “Anang ara, teleb nang anya arye, sik yupu kekeplulume,” nyabuka sekeipsikiba, adeice aryuk peterepra banyake. Bukni, ato surat rekomendasi ning ara, anggunce nunti seksetuma babye, yuk nang arye sik kekena ati seksitinga babye, dipkoprop kum patasulule.

² Kume, kertas bok deice sekenyak yupu ara, kum patasulule. Deiyok ara ani. Anggun babye nun laka nyan surat atonun ululume. Aning ara, kertas bok deice sekna kum bukni, nun talima deice ak sekna atonun ululumba, ninye mutuku-mutuku nirya eipsikirye, kel bikisinyake. Ara, ‘Paulus ap, el mapu silip ap arye, teleb pil donyak do, kum do?’ tenen, anggun Korintus mutuku ninye ati peteryamububa, dib teneplumce, teleb umunyak, ninye nirya eipsitingce, nunti, kel biksitinge.

³ Anggun dib tenebuka diksukum umunya deice arye, akunum laka usulule. Anggunda, Kristus arye surat sekeipsuka atonun ululume. Nunce Allah yupu peteren pil dolamububa, nong ulamuk ning ara, anggun dib tenelamlumce akunum aululume. Bukni, alaka winisululum ning ara, sekna ning ap, tinta bolpen mek ap, arye kum sekupu. Aning kum bukni, Kam Ulya Deiyoknye, Allah El Dib Kanye arye anggunti, anggun talima noutamak pil dolamsukba, wini talak ara, laka nyan surat atonun ululume. Elce surat sekna atonun pil dolamsuk ning ara, pala keil deice kum sekuk bukni, anggun ninye talima noutamak pil dopsuka ning ara, sekna atonun laka usulule.

⁴ Ura, anyapmasin yupu nirya ara, kanye teniltona kum, pia dipkoprop tenenyabe. Aning pia lamapdongobuka dib tenenyaba ara, Allah dinmasilibuk, Kristus ap talima dukdongobuka, neika unyabbuk, Kristus deice aryuk unyaba ati, nun kanye kum bokoltonmasile.

⁵ Ara, ‘Nunda pia moubuka teleb pil don ninye unyaba anya arye, aning-aning nirya upmasilibuk, nun mambul nang unyabe’ tenen, kum nyaptibye. Bukni, Allah elcuk arisilyak pia moubuka teleb pil dona deiyok ning arisilibuk, teleb ubuka doptipyopura, nun mikip deice aryuk kume. Ara, Allah el mikip deice aryuk wininyabe.

⁶ Allah arye ninye lyena ati, “Wininamsine,” nyabuka nyalisilye yupu ara, ‘Winiryuk yupu dobuka, peterepra banamak’ tenen, nunti wipdeipsuke. Wipdeipsukce, pia moubuka teleb pil dona deiyok ning aresulule. Ayupu ara, ninye lyena ati, winiryuk yupu ara, mem yupu surat sekenyak yupu deice arye kum ulule. Aning kum bukni, Allah El Dib Kanye deice aryuk ulule. Deiyok ara ani. Mem yupu surat deice sekenyak yupu ara, ninye arye, ‘Anyuk talibuka dobolbayapya deice arye wininamap’ tenen, pirinyak bukni, teleb ubuka kum dobol binmanto kum unyaka anya arye, ayupu ara ninye osiliba, derelamak ning atonun ulule. Bukni, Allah El Dib Kanye ara, el pil dosilya deice arye, ninye kam una deiyok ninguk aresulule. Aning ati ara, Allah el ninye lyena yupu, nyalilamsil yupu, winiryuk ning ara, el Dib Kanye arye kam una deiyok ning arisilye ning deiceuk ulule.

“Allah arye ninye lyena ati, winiryuk nyalisulul yupu ara, pia teleb ulule,” nyabuk yupu

⁷ Ara na kayapu, anggun ton tenipdelulume. Minop talak Allah arye nyapdeibukba, Musa arye pala keil dobuka, akeil deice mem yupu sekdeibuk ning ara, ninye arye ayupu talibuka pia diksukumuk kum dobol binmanto ulamika ati, ninye dipna ning atonun upsuke. Upsuk bukni, ayupu yayuk talak babye, pia teleb ubuka dirina weik deice arye yayuk. Dirina weik ap, yayuk talak ara, Musa eibukba, el urasin ababye dirina weik ubuk. Dirina weik ubuk bukni, mitik kum danin balamuk talak babye, sik atalak elilamik ninye, Israel ninye arye Musa el urasin dirina weik tuba ulamuka anya arye, tuba-tuba kum elilamik. Deiyok ara, ayupu yayuk talak ara, dirina weik ubukura, mambul weik ulamuka ati, tuba eipmanto kum ulamik. Bukni, aminyan talak ara, Musa el urasin deice ubuk dirina ara, kum danin balamuk.

⁸ Mininop talak ninye dipna atonun yupu, mem yupu yayuk talak ara, dirina weik ubuka anya arye, Allah El Dib Kanye arye pil donamsil ning ara, pia teleb ubuka, dirina weik ap, mambul una pia weik ap unamle. Minop ning ara el mambul una ap, dirina ap ara, mitikuka. Wini talak akunum yanmasiraka ara, mambul pia weik.

⁹ Musa arye mem yupu sekamuk ning ara, ninye arye ayupu nirya kekebuka diksukum kum winipmanto ati, ayupu deice Allah arye winipdesilyopura, dipkoprop dipnamabe. Bukni, aminop talak mem yupu ara, teleb ubuka dirina weik arye yayuke. Winiryuk yangalye yupu ara, Allah arye nun malye wininyap ninye ati, bico tenepsilirye, “Anggun ap, na ap neika una ati, ‘Anggunda diksukum winin ninye ululume,’ nyabuka akunum deipsine,” nyalisulule. Nun malye winin ning kilibuka kum danalisulul ati, el kanye aniryuk ayupu nyasulule. Nyasulula ati, ayupu ara pia teleb ubuka, weik mambul weik ulule. Ati, na kanye ara, minop yupu ara dirina ap, mambul una ap ara, mitika aryuk yayuk. Winiryuk yanmasil yupu ara, weik mambule nyapsine.

¹⁰ Minop talak yayuk yupu, mem yupu yayuk talak ara, dirina weik kibukba, “Ayupu ara, mambul weik,” tenelamik bukni, wini talak yangalye yupu ara, pia teleb ubuka, weik mambul ulula anya arye, minop yupu ap, wini talak yupu ap, neiktoto tenipdepyopura, ‘Winiryuk yanmasil yupu ara, weik mambul anya arye, minop mem yupu yayuk ning ara, mitik mambul uka,’ tenenyabe.

¹¹ Tonda, minop mem yupu yayuk ning ara, tia talakuk ulamuk bukni, teleb ubuka weik dirina ap arye yayuke. Bukni, wini talak yangalye yupu ara, tia talak kume. Ayupu ara, pia unamle ning anya arye, ayupu ara pia teleb ubuka, weik mambul yupu ulule. Minop ning ara, mitik mambul uka.

¹² Aning ati ara, winiryuk yangalye yupu ara, ‘Pia aunamle,’ akunum tenenyaba anya arye, nun kanye ayupu deice deibuka, nun ilil kanye bona kum arye, pia mikip asa deice aryuk ayupu peterenyabe.

¹³ Musa ara, Allah arye amem yupu arebukba eibuk anya arye, el urasin deice dirina weik ulamuk bukni, adirina kum danin balamuk talak ara, ‘Israel ninye arye na urasin dirina kum danin balamuk ning ara, eipnecak’ tenen, el urasin deice baju kwilikdoba arye lilibuka balamuk. Musa ara, winilamuk bukni, nunda aning atonun kum wininyabe.

¹⁴ Bukni, sik Israel nang ara, Allah arye sik kanye tenena ati ara, kanye bokolton ning aribukba, teleb kanye ubuka kum tenelamik. Kanye bona kum winin ninguk winilamik. Aning aribuk talak arye diprongobuka, atalak noutamak nirya ap, wini talak ap, sik Israel ninye arye Musa sekamuk yupu, mem yupu peterebikibuk, moubuka kum teneptinge. Musa arye el urasin baju arye lelibukura, el urasin dirina moubuka kum eipmanto winilamik touk, wini talak babye Israel yala ninye Musa sekamuk yupu kekenamak talak ara, kanye bokoltonauk unyake. Kristus dib tenebibibuk, el talima dukdongobuka deipsilya deice aryuk, kanye bokolton ning kum uptua ati, sik Israel ninye ara, tuba moubuka kum teneptinge.

¹⁵ Wini talak babye, Musa sekamuk yupu peterebikibuk, Israel yala ninye kekebikirye, ‘Deiyok ani’ tenen, moubuka kum teneptingce, kum biktinge. Ninye urasin baju kwilikdoba arye lelibicopura, yuk nang kum eiptinge atonun, Israel ninye sik kanye talimak ara, luba talina deiyok ning tuba ulule.

¹⁶ Kanye luba talina ning tuba aulyeba, sik Israel ninye moubuka kum teneptinge. Bukni, Israel yala nang do, yata nang do nirya, nun Deiyoknye Yesus biti, dib tenebikcopura, adiparyuk sik kanye bokolton ning kum ulule. Atalak aniryuk laka biktinge.

¹⁷ Ara, Nun Deiyoknye Kristus ara, Allah El Dib Kanye, eluk ulule. Tonda dan mutuku do nirya, Kristus el Dib Kanye ulirye, pil dolyak nirya ara, tapu kousulul ning nirya lobuka lyesulule.

¹⁸ Tonda, nun nirya ara, nun urasin lelina kum, kimilana deice arye ninye urasin elilamak touk, nun ubya deice arye, yuk ninye arye, Yesus el winilul ning elinyake. Ara, nun Deiyoknye Yesus Kristus, el pia teleb ulye touk eibikirye, kel bikinyake. Nun Deiyoknye Yesus ara, Allah El Dib Kanye eluk ulule. El pia teleb ulya deice arye, nun talima pum tam pil dosilirye, el teleb ulye touk, nun babye atonun teleb ulisulule. El ulye touk teleb winilisilye talak nirya ara, teleb winipnin balamibya ani, aminyan ara pia teleb wininamabe. Anirya ara, Yesus Kristus aniryuk, teleb ulisulule.