2 Korintus 2 - Eipomek

Korintus mutuku ninye asurat eibikirye, ‘E Paulus dipkoprop bico tenesulule, tenepnamak’ tenen, sekeibuk yupu

¹ Aning ati ara, narye utenepse. ‘Kume, mince sik Korintus mutuku ninye dam binamsirye, pil dolamsiba, sik ikin kanye bolamik touk, tonap kum wininamake,’ tenepsirye anggun dam tuba tamubuka tonap kum yase.

² Ara, narye anggunti wenepsiniba, anggun malye kanye bobuka, ‘Se’ tenen, engepmunyopura, yata mutuku ninye ton, teleb uptingba, na kanye deiptinye do? Yuk nang ton kum ati, ‘Na wenepsiniba engenmace nang arye, na kanye delina ati, kum winipdeibniting’ tenen, ‘Sik wenena ati, sik dam min kum binamne,’ tenepsa ati nyapsine.

³ Atalak arye ikin surat sekeipsina deiyok ara, nyapnusine. Ara ‘Kume, na kanye delina ati, teleb uptingba, na kanye deiptinye,’ tenenun ninye ara, anggun Korintus mutuku ululum ninye anya arye, ‘Sikce malye ubikiba, narye sikti, ikin kanye bonune’ tenen, minop talak ara, surat tonok sekuka dopdeipsise. Ara, ‘Malye winibicak’ tenen, yupu sekelongona ati, mince asurat sekeipsise. Tonda, utenepsise. ‘Kume, sik Korintus ninye nirya ara, na teleb kanye bonun touk, anggun babye atonun teleb kanye bobuka, neika unamabe,’ tenepsirye kanye teniltona kumce, aninguk dib tenepsise.

⁴ Minyuma surat sekeipsise talak ara, pia ikin kanye bona ap, ‘Se’ tenen, malye kanye bobuka, talima sukuna ap, engelamsirye, asing maka weik ulamnuka deice arye, asurat sekeipsise. Ikin surat sekeipsise surat ara, ‘Anang asurat eibikirye, malye kanye bobuka engenamake’ tenena ati kum sekse. Aning kum bukni, ‘Asurat eibica deice arye, narye sik Korintus ninye ati, pia weik arye bico tenenun ara, kel biknamak’ tenen, asurat sekuka dopdeipsise. Narye anggunti bico tenesununa ati, asurat sekuka dopdeipsise.

“Malye winibuknye biti, ‘Telebe daupmalye,’ nyabuka, namin kipnamlulume,” nyabuk yupu

⁵ ‘Mikip weik arye nyapnyopura, ikin kanye bopnamak’ tenen, kum nyapsine. Bukni, mince malye winibuknye malye winibuka deice arye, na malye kanye bobuka engepse bukni, ara mitik mambule. El malye winibuka deice arye, anggun Korintus mutuku ululum ninye nirya ati, malye kipdeipsuke. Winipsuka ati, malye kanye bobuka engepluma ara, weik mambule.

⁶ El malye winibuk ning ati, anggun yupa weik arye, el nong deice ikin ning akunum wenebuka deiplum ning ara, akunuma, tenepne. Yuk wenena ning ton tabakuka, el nong deice kum delinamlulume.

⁷ Wini talak ati ara, anggun adiparyuk el malye winibuk ning ati namin kipmunce, el talima moubuka melipnamlulume. Wininamluma deiyok ara, elce, ‘Se, na pia malye winilamse’ tenen, pia engena ap, tenena ap, ilil kanye bobuka ulamlya deice arye, ‘El bouku tonap sukuplyak’ tenen, nyapsine. Anggunce elti, akunum wenepmunyopura, akunuma nyapsine.

⁸ ‘Anye bira, malye kanye bobuka, el bouku sukuplyak’ tenen, ati ara, na mikip arye nyapsine. Anggunce elti, “Amio, aning ara, akunuma. Nunce anti tuba bico tenebuka melinamkiyabe,” nyabuka, adiparyuk anye biti nyanamlulume.

⁹ Asurat sekeiyamsise deiyok ara, ton nyapnusine. Ara, ‘Ujian kilamaka atonun, anggun Korintus mutuku ninye ati winipdesiniba, yata teleb winin ning do nirya, na nyanye yupu nirya kekebuka, teleb winipnamak do, kum do? Ton ning ara, bataknamak do?’ tenen, asurat sekeipsise.

¹⁰ Wini talak ara, yata ninye ati do nirya, malye ubikiba, anggunce anang ati namin kipmunyopura, narye ton atonun, anang ati namin kipnamne. Malye ubikiba, namin kipmanto ning aublyopura, na namin kinuna ara, anggun teleb kilina ati, anang namin kinune. Nun Deiyoknye Yesus Kristus arye, dinululba, anggun teleb kilina ati, sik malye ning namin kinune.

¹¹ Tonda, narye, yuk ninye sik malye wininyak ning namin kinuna ara, urdem ati kum wininune. Wininuna deiyok ara, ‘Isa ‘Mutuku Dongonye arye, nun mankau kanye bopmabye talak, malye kipdeipsilyak’ tenen, wininune. Ara, Isa Mutuku Dongonye arye nun nirya ati, ‘Anang ara, malye winilinamak’ tenen, dungnubuka malye-malye ulisulul ning ara, nun akunum kel bikamubu. Aning ara, walwal kum usulule. Na Paulus arye nyapsine.

Teroas mutuku noutamak arye, Paulus ikin ubuk ning ati, nyabuk yupu

¹² Ara, yuk yupu ton nyapnusine. ‘Kristus el pil dona ati, ninye lyena yupu, laka teleb yupu peterenamne’ tenen, Teroas mutuku binamse talak ara, Allah arye el yupu peterena ati, lo teleb ning akunum kintinibdeipnuk ning ara, eibuka kel kipse. Ara, ninye wekna ati, buplan weik arye kukulilamak atonunuk, pia teleb lo arepnukura, ‘Amutuku ninye petereptinye’ tenen, akunum kel kipse.

¹³ Kel kipse bukni, na weit atonunye Titus ara, Teroas mutuku kum ulamukba, kum eipse ati, ‘Se tenen, na kanye talima noutamak teleb ulul do, kum do?’ tenen, na kanye talima noutamak ara, teleb ubuka kanye kum darapnuke. Titus kum eipse anya arye, sik Teroas mutuku ninye ati, “Telebe daulalume,” nyabuka, sik mutuku bataksirye, kirikuka Makedonia tam bise.

¹⁴ Allah ati, “Telebe,” pia nyanune. Ara, ton tam ninye arye, ton tam ninye ati obisibikirye, anang tomobikirye, kanye deibuka, lubuka, anang bolbalamak touk, nun Ni Koprop Allah arye, nun nirya ati, akunum talisulule. Talisiliba, ‘Yesus Kristus, el amu tam unamak ninye, elce bobaliba, sikda el aminyan tam yangakirye, ninye nirya eipnamak’ tenen, Allah arye nun dib tenenyap ninye dopropsukce, Kristus el amu tam akunum deipsuke. Teleb kita ning arye tong teleb ning balibuk, ninye kekelamak touk, Allah arye menekuka balirye, nunda el aminyan tam yangapyopura, elce melisilyeba, nun ap, Yesus ap talima dukdongobuka unyaba deice arye, ninye mutuku-mutuku nirya eipsikirye, Kristus ati kel bikinyake.

¹⁵ Tonda, nun ap, Kristus ap, talima dukdongobuka ubirye, el yupu peterebibya deice arye, Allah arye kanye delisulule. Allah arye tong teleb ning kekeplirye, kanye deililul touk, Kristus arye, nun dib tenenyap ninye dobuka el Li Koprop Allah ati ariliba, Allah arye nunti kanye delisulule. Bukni, Yesus el teleb yupu peterenyaba deice arye, daunyak ninye kekenyak bukni, sik kanye yuk-yuk tenenyake. Ton ninye ara, kam unamake. Ton ninye ara, dipnamake.

¹⁶ Aning ati ara, ton ninye ara, Yesus el yupu kekebikirye, ‘E, ayupu ara, pia teleb yupu ulula anya arye, aning kekebibyopura, Allah lyepsiliba, kam pia unamabe. Aninye ara, yun ning siltong teleb nyasilye touk wininyak,’ tenenyake. Bukni, ton ninye ara, dipnamaka anya arye, anang ara, Yesus el yupu kekebikirye, ‘E, ayupu ara nun like. “Allah arye wenepsiliba dipnamape,” nyanmasiyaka ara, nun like. Sik dib tenenyak ninye ara, akunuma oltakana ning lyulamle tong nyasilye touk wininyake. Anang ara, nun like,’ tenesinyake. Ati, Yesus yupu kekenyak ninye ara, sik kanye yuk-yuk ulula ati, yata ninye sik bidamang mikip deice aryuk, amambul pil dopting do? Kume, aning kum winiptibye.

¹⁷ Aning nyapmasina ara, urdem aryuk kum nyanune. Ara, yuk ninye weik arye, ‘Allah yupu peterenmabya deice arye, ninye kekebikirye, yo bok weik arepsikibuk, yo bok weik doproptibye’ tenen, tenepce arye nyaltakanyake. Bukni, nunda aning atonun kum wininyabe. Aning kum bukni, nunda Allah dilesiliba, nun ap, Kristus ap, talima dukdongobuka neika ubirye, duknuna ap, tenepce arye nyana ap, kum aniryuk, dipkoprop yupu uk laka nyanyabe. Wininyaba ara, Allah arye dopdeipsuk ning unyaba atia. Tonda, Yesus el yupu nyanyap talak nirya ara, ‘Allah dam tikuka nyaptibye touk, wininyabe,’ tenenyaba anya arye, Allah arye disulula ati, aning moubuka tenebibirye, pia dipkoprop yupu uk nyanyabe.