2 Korintus 13 - Eipomek

Paulus arye Korintus ninye ati, ayupu sirya dakna ati, wenebuka nyabuk yupu

¹ Min arye like bitinye talak anggun dam yase bukni, aminyan tam yanamne ning ara, like winilye ati dilyanamsine. Allah yupu noutamak sekeipsik yupu nyapnusine. ‘Ton nang arye, yuk nang ati, “Winibuka, winibuka malye wininmake,” nyabikcopura, anggun adiparyuk dib tenebuka yupu lipsisikmunce, kum wenepnamlulume. Aning kum bukni, yuk nang tonap bitinyeto, winiliyeto tabakikirye, “Kume, nun bidamnye asing eipmabe. Sik dipkoprop amalye ning winipmangue,” nyabuka ansinibuka nyaptingopura, adeice aniryuk, ‘Diba, anang malye winipmake’ tenen, anang wenepnamlulume. Yuk nang ap tabakuka, “Nun ton dipkoprop eipmabe,” kum nyabikcopura, anang kum wenepnamlulume.’ (Ulangan 19:15)

² Ara, like bitinye talak anggun dam yanuka neika ulamubu talak arye, sik malye winilamik ninye ati, “Kanye mouplulume,” nyabuka wenyamse touk, wini talak ababye atonun, yukak unman bukni, tuba tamubuka tonap, anang ati nyapnusine. Narye anggun dam Korintus mutuku tamubuka yanyopura, anggun minop talak peterelamsise bukni, tuba tamubuka malye wininyak ninye ap, yuk malye wininyak ninye ap, ‘Dauplye’ tenen, “Nun malye wininyabe,” nyabuka, sik malye winin ning kum batakanyak ninye tuba winikibuk eipnyopura, “Dauplye,” nyabuka nimalye arye kum wenepnamsine.

³ Ura, anggunce nati, ‘Kume, Kristus arye Paulus ati, el mikip ariliba, dipkoprop Paulus arye Kristus el yupu dobuka peteresulul do? talyeuk ulul do?’ tenen, ‘Nong auptuba, eiptibyopura, dib tenepnamabe,’ tenenululume. ‘Dip do, tilila do?’ tenenululuma anya arye, anggun dam yanirye, sik mince malye-malye winilamik ninye eipnyopura, nimalye arye kum, mikip arye wenebuka yupu lipsisikuka bokeipsiniba, adeice arye kel kipnamnulume. Deiyok ara, Kristus arye anggun kan-kan noutamak pil dosilya ara, mikip ara nimalye arye kum pil dosulule. Anggun kanye talima noutamak ara, mikip arye pil dosulule.

⁴ Ara dip, sikce Yesus tongobuka, wanwanun yo deice arye obik talak ara, Yesus mikip naminuk ulamuk bukni, wini talak ara, Allah el mikip deice arye, kam bukdeibukba, mikip arye ulule. Aning atonun, Kristus ap, kanye talima dukdongobuka neika unyap bukni, nun mikip ara mitang nanguk unyabe. Bukni, Allah el mikip arisilya deice arye, nun ap, Kristus ap neika ubirye, anggunti melibuka pil donamsiabe.

⁵ Anggunce anggun bidamnye ati, moubuka kalikdamunce, tenelanamlulume. Winilanamluma deiyok ara ani. Ara, ‘Nunda dipkoprop Kristus ap, kanye talima dukdongobuka neika unyap do? Talye yupu uk peterenyap do?’ tenen, winipdamunce, anggun winin ning nirya ara dilalinamlulume. Diba tenyamluma deice arye, Kristus anggun talima ak weksukce, el ap kanye talima dukdongobuka akunum ululum ning ara, moubuka min kum tenipmalum do? Ayupu nyapman bukni, anggunce anggun bidamnye ati, winipdamunyeba, nong kum winipsilirye, dipkoprop Kristus ap, anggun ap, kanye talima dukdongobuka kum umunce sakmunyopura, anggunce, “Kristus ara, nun talima noutamak ulule,” kum nyaptume.

⁶ Ara aning atonun, na kele. Nun unyap ning tenepsulumce, bikinamsulume. Nunda winildena ning deice arye kum sakupue. Dipkoprop Kristus ara, nun talima noutamak usulula anya arye, nong lakak usulule. Telebuk unyabe.

⁷ Wini talak ara nunce anggunti, Allah pia moronyaba ara, nyapnusine. Ara, ‘Sik Korintus mutuku ninye arye, tonok malye winin ning ababye kum wininamake’ tenen, morosenyabe. Ara, yuk nang eipsikirye, ‘E, Paulus arye peterelamuk ninye, Korintus mutuku ninye telebuk unyaka anya arye, Paulus ap, el neika peterenyak nang ap, telebuk unyake. Sik winildena ning atonun kum sakik, tenenamsiyak’ tenen, kum nyapsine. Aning kum bukni, yuk nang arye nunti, ‘Kume. Paulus ap, el ap peterenyak nang ap, urdemuk pil donyaka ati, winildena ning atonun sakik,’ tenepsetinga ababye, aning ara mambul kume. Mambul ning ara, ‘Anggun Korintus mutuku ninye arye, diksukum ninguk talibuka pia unamlum’ tenen, Allah ati morosenyabe.

⁸ Nun wininyap ning nirya ara, Allah el dipkoprop yupu ati, kum sekuka yaniptibye. Aning kum bukni, nunda, ‘Allah el dipkoprop yupu teleb upnin baliba, duk weik moupnin banamle,’ tenen, pil donyabe.

⁹ Yuk nang arye nunti, ‘Sikda mikip kum nang unyake,’ tenepsikirye, nyasinyak babye, aning ara mambul kume. Anggun Korintus mutuku ululum ninye arye, Yesus ati mikip arye talibuka, tuba teleb winimunyopura, nun kanye ara, ‘Telebuka,’ tenenyabe. Nunce anggunti Allah morosinyap ning ara ani. Ara, ‘Allah arye sik malye winin ning nirya kum kipdeipturye, pia teleb kipdeiptuba, sik talima wisiptue’ tenen, Allah ati morosenyabe.

¹⁰ Adeiyok ati ara, na ap, anggun ap neika kum unyap talak noutamak arye, asurat deice nyapmasin touk, ayupu wenebuka sekeisunune. Tonda, ‘Na yupu kekebikirye, sik malye winin ning nirya bataktingopura, narye sik dam binuka unamap talak ara, nimalye aryuk utinyeba, talye kanye deibuka neika unamap’ tenen, ayupu atonun yupu sekuka surat dolkwetesunune. Nun Ninye Deiyoknye Yesus arye, ‘Na ti dib tenenyak ninye ati, deiyoknye unamle’ tenen, pil areamnuka deiyok ning ara, ‘Aripniba, elce sik dib tenenyak ninye ati, sik talima mikip kipdeipliba kanye talima wisipnamle’ tenen, arenulule. ‘Anggun nong deice ikin ning deiplibuk, sik kanye talima sukunamle’ tenen, pil dona deiyok ning arepnilibuk, kum pil donune.

Asurat sirya dakna ati, nyabuk yupu

¹¹ Ara, Yesus dib teneluluma ati, nun du weit atonun ululum ninyeo, anggun sal babye, kilapu ababye kekepnululume. Narye anggunti, ‘Se, winibuka, winibuka winipting’ tenen, patapnil ning ara nyapsinibuk, anggun kekebuka wininamlulume. Ara, ‘Allah arye nun malye winin ning nirya kum daneipsuturye, pia diksukumuk updeipsilibuk, kanye talima wisipnamsile’ tenen, patasilibuk, unamlulume. Tonda, tonok kanyeuk tenebuka, teleb ubuka neika unamlulume. Walana ap, oldana ap, malye winilana ap kumce, nimalye arye teleb ubuka neika unamlulume. Aning-aning nirya akunum upmunyopura, nun Ni Koprop Allah ap, anggun ap kanye talima dukdongobuka unamlulume. Anggunti bataksilirye, el Allah yuk kum unamle. Allah elda, yuk nang ati bico tenebuka melildana deiyok ning aresulule. Tonda, nun ap, yuk nang ap, kanye talima namin ubuka teleb ubuka neika una ati, deiyok ning aresulule. ‘El ap, anggun ap neika unamlum’ tenen, Allah morosunune.

¹² Anggun ap, yuk dib tenena nang ap, eipdamunyopura, taruk talipdamunce, “Telebe,” nyanamlulume.

¹³ Tonda, Allah ati akunum dib tenebikce, na unun mutuku unyakce anggun Korintus mutuku dib tenelulum ninye ati, “Telebe,” nyasinyake.

¹⁴ Narye anggun Korintus mutuku ululum ninye ati Allah morosunun ning ara ani. Ara, ‘Nun weik Ninye Deiyoknye Yesus bico tenepsilirye, el kanye aryuk talye melibuka arisilye ning ara, weik arye arenamsile’ tenen, Allah moronune. Tonda, nun Ni Koprop Allah arye bico tenepsilirye, melisilye ning ap, Allah El Dib Kanye arye nun talimak usilirye, melisilyeba, ‘Anggun ap, yuk dib tenenyak nang ap, kanye talima dukdongobuka unamlum’ tenen, Allah morosunune. ‘Anirya ara pia unamsil’ tenen, Allah morosunune. Ati, na Paulus arye telebe nyapsine. Asukumuk deipsine.