2 Korintus 12 - Eipomek

Paulus el mikip ara mitang asa ubuka, ikin ulamuk ning ati, nyabuk yupu

¹ Ara, erelana yupu atonun yupu nyanyaba deice arye, teleb kum ubuka deipsutu bukni, siktilila yupu peterena deiyok nang arye, erelana yupu nyakiba, sik yupu kekena nang ululuma anya arye, ayupu tonap nyapnusine. Allah arye nati lengdar deice nyapnuk ning ap, na talima tamupnukce, laka nyapnuk ning ap ati, laka nyapnusine.

² Allah arye winipnuk ning nyapnune. Diba tenebuka Kristus ap talima dukdongobuka ulamse talak, men keting tamun yupa weik odeikin tahun akunum ubuk bukni, winipnuk ning tuba tenenune. Allah arye na dobuka, im deice winilye ning noutamak deipnuke. Dobuka eidipnuka ara, nong kipman dobuka bobinuk do? Na kanyeuk dobuka bobinuk do? Na walwal bukni, Allah eluk ara, dipkoprop kele.

³ Ila tuba tamubuka tonap nyapsine. Allah arye na nong kipman im deice welebuka nyapdeipnuk do? Na kanyeuk dobuka im deice nyapdeipnuke do? Na walwal bukni, Allah el kele.

⁴ Allah dopropnukce, im deice malye ning tonok babye kum ulyak, pia teleb akuk nyapdeipnuke. Idipnukba, kekepse ning ara, ninye yupu deice arye kum laka nyaptinye. Tonda, na kekepse ning ara, tukwak ninye ara, dipnamak nang anya arye, ayupu kum kekeptinge. Ati, ‘Ayupu kekebikcak’ tenen, yupu akunum seknuka anya arye, aning ara laka kum nyapsitinye.

⁵ Ara, anyapmasin ning ati ara, erelana yupu nyapmanto ning bukni, naryuk, na bidamnye ati kwalina atonun yupu kum nyapnune. Na kwalina yupu deice nyanamne ning ara, na biyuk, mikipnye kum unune. Aning kum bukni, na talima mikip ara, mitang asa unilye atibuk, ayupu uk nyanamne.

⁶ Aning winipnuk ning ati ara, dipkoprop winipnuka ati, ‘Ayupu erelalarye nyanamne’ tenen, nyaptinya babye, ayupu nyaptinya deice arye, malye nang walwal arye nyalamak atonun kum nyaptinye. Aning dipkoprop winipnuka ati nyapsine. Bukni, akwalina yupu atonun yupu weik arye kum nyanyame. Aning kum bukni, na peterenye yupu ap, na wininun ning ap kekepmunce, eipnulum ning ara, mambul ning aupmanilyopura, ‘Paulus ara mambulnye,’ tenenamnulume. Mambul ning kum upmanilyopura, kum eipmunyopura, aning kum tenenamnululume.

⁷ Ara, yo tingkul opsilyebuk, nun nong bol weksilirye, uk weik dilamsil touk, Allah arye nati, ikin ning na nong deice deiamnuke. Deiyok ara, Paulus ara, weik mambul weik ning kekebuka eibuk ati, Paulus arye, ‘Nara, weiknye, teneplirye, kanye erepdalyak,’ tenepnukce, ikin ning na nong deice deiamnuke. Allah arye, “Dauptue,” nyabukba, Isa Mutuku Dongonye arye nati, ‘Ikin kanye bobuka unamle’ tenen, aikin ning na nong deice deipnukura, aunulule.

⁸ Winipnukba, like winilye talak deice arye, Allah ati moropse. “Naio, aikin unilye ning ara, ance aning dobuka, ila tuba tamubuka tonap teleb ubuka kipdeipnutume,” nyabuka moropse.

⁹ Morolamse bukni, Allah arye ikin unilye ning ara, kum dopropnuke. Ayupu nyapnune. “Kume. Pauluso, aning tuba upmakil ikin wapkilya ababye, na bico tenepkinirye, na kanye aryuk melibuka arekunun ning dopropmince, telebuk unalame. Akunuma. Deiyok ara ani. Na mikip aresunun ning ara, sik badamnye mikip mitang wininyak ninye ati ara, na mikip weik arye arepsitinyeura, pia teleb wininamake. Mikip mitang winimunya noutamak arye, na mikip arenamsin ning ara, laka upnamlarya,” Allah arye nyapnuke. Nyapnuka ati ara, na mikip ara mitang upniliba, ikin unilye ning nirya ati, talye kanye deibuka weik arye, “Telebuka,” nyanamne. Deiyok ara, na mikip kum upnilirye, pia mitanguk unilye talak nirya ara, ‘Kristus el mikip weik arye arepnilibuk, adeice aryuk teleb wininamne’ tenen, kanye deibuka unamne.

¹⁰ Aning ati ara, Kristus eluk talibuka, el pil donamne talak noutamak arye, mikip mitang unilye talak ap, yuk nang arye nati malye yupu nyabuka deilininyak talak ap, kanye imun kanye bonun talak ap, na dib tenepsa ati yu nang arye, ‘Nun lik’ tenen, na nong deice ikin ning deilininyak talak ap, anirya aupmanilya babye, ‘Aning telebuka’ tenen, kanye delilnamne. Ara, na mikip ara mitang upniliba, ikin unilye talak ara, dipkoprop Kristus mikip deice aryuk mikip unamna ati nyapne.

Paulus arye, Korintus mutuku nang ati, “Ilil upnile,” nyabuk yupu

¹¹ Ura, na kayapu. Erelana yupu atonun yupu nyapmasina deice arye, walwalnye atonun ubuka nyanmanu bukni, anggun malye-malye wininmaluma deice ati nyapmasine. Ara, dipkoprop nara weik mambulnye kum unun bukni, ton nang arye, nyapnikcake. “Wini talak yakirye, peterenamsiyak nang ara, sikda weik mambul bukni, Paulus ara, mitik mambuluk ulule,” nyaninyake. Bukni, na kanye ara, sik talyeuk nyanyake. Nara, atilila yupu peterena deiyok nang, mitik sik amuak babye kum unune. Ati, anggunce, “Paulus ara, telebnye ulule,” nyapnamnutum bukni, kum nyanululume.

¹² Allah elce wibuka dopdeipsiliba, el yupu dobuka peterelbana ati, deiyok kouna deiyok nang, dipkoprop Rasul nang pil donyakba, mambul ning laka usulul ning ara, anggun kele. Ara, ninye kum winipmanto ning ap, weik mambul pil, winipsekmanto kum pil ap, dolamubu. Ara Allah arye, ‘Dipkoprop Allah el mikip deice aryuk pil donmake, tenepnamak’ tenen, mambul pil dosilye ap, anirya ara anggun dam peterelamsupu talak ara, awinilamukba elilamlume. Ikin ning aupsuk bukni, batakana kum, pia pi dobuka, apil-apil nirya dolamububa, amambul ning ulamsuk.

¹³ Anggunce, ‘Se, Paulus arye, yuk mutuku dib tenyamik nang ara, sik mambule,’ tenelul bukni, ‘Paulus arye nun Korintus mutuku nang ati ara, mitik mambuluk tenesulule,’ tenelulum do? Kume. Neika ulamubu talak anggun ning kum morolamsise deiyok ara, yuk kume. ‘Na patan ning arepnikce deice arye ikin ning sik nong deice deipnun’ tenen, kum morolamsise. Bukni, ‘Aning kum moropsuka ati, malye ubuk,’ tenepnumunyopura, ‘Mangkau kibuka monoknamlulum’ tenen, moropsine.

¹⁴ Min arye like bitinye talak anggun dam yanuka peterelamsise. Wini talak ara, ‘Like winilye ning sik dam binuka peterenamne’ tenen, akunum kintinipmane. Na patapnile ning ara, anggun bona ning ati kum bukni, anggunti bico tenesunune. Ati, ‘Anggun nong deice ikin ning kum deipnun’ tenen, na patana ati anggun ning kum moronamsine. Ara, anggun ton tenipdelulume. Mapu arye sik ni yapu ap, sik nin yapu ap ati, aning-aning nirya bulubuka kum inibikirye, aminyan bokuka arenyak do? Kume. Sik ni yapu arye sik kintinibuka delinyak ning bokuka sik mapu ati arinyake.

¹⁵ Aning ati ara, na aupmanil ning nirya kiklipdenyopura, anggun melina ati arepsitinya babye, telebuka. Aninguk kum bukni, anggun melina ati, pil weik dolamni bukni, na mikip nirya kum danutu ababye, ‘Aning telebuka’ tenen, kanye deiptinye. Narye anggunti weik tonun tonap talima melipnilyopura, anggunce nati bico tenelulum ning ara, mitik kipnin banmanil do?

¹⁶ Na kayapu walwal bukni, bico kum tenepnumunya babye, na kele. Neika ulamubu talak ara, ikin ning anggun nong deice kum deililamsise. Aning kum winilamse bukni, ton nang arye, “Kume. Paulus ara, tenebuka arye nyalamsuka deice arye, malye winilamsuke,” nyaninyake.

¹⁷ Anggun ton tenipdelulume. Na kwit capu dobuka, ‘Korintus mutuku ninye peterepnamak’ tenen, anggun dam dopkwetepsisa deice arye, anggun ning ubula dololamsik do?

¹⁸ Na kwit Titus ati, “Korintus mutuku unyak ninye ati peterelbilyame,” nyabuka mikip arye nyapdeipsiba, el ap, tonoknye nun weit atonunye ap, neika yarik. Titus ap, anggun ap neika ulamlum talak noutamak arye, Titus tenepce arye talye nyabuka, anggun ning ubula dololamsuk do? Kume. Elda kanye talima diksukumuk winilamuknye bira anggun kele. Nun ap, anggun ap neika ulamubu talak, teleb ubuka winilamubu touk, Titus babye atonun, anggun ap neika ulamlum talak ara, diksukumuk winilamuk.

¹⁹ Ara, ayupu nirya nyapmasin talak ara, yata tenepmanulum do? “E, Paulus ara, ‘Ayupu nyapnyopura, telebnye tenepnamak’ tenen, nyapsine.” Yata tenepmanulum do? Kume, adeiyok ati kum nyapsine. Nunda, Kristus ap talima dukdongobuka unyabbuk, Allah arye nun wininyap ning nirya, dipdebuka yupu lipsisikuka bokeipnamsile ati, tenebuka arye talye kum nyaplopsine. Na kayapu. Na wininun ning nirya ara, ‘Anggun Korintus mutuku ninye anggun talima melipdanuka, mikip kilinamne’ tenen, wininune.

²⁰ Na ilil upmanil ning ara nyapnusine. Narye anggun dam yanyopura, min arye ‘Winibuka, winibuka winiptinge,’ tenyamse touk kum upmunyopura, malye kanye donamne do? Aning atonun, anggunce nati, ‘Paulus ara, winibuka, winibuka winiptue,’ tenenululum touk kum winipnyopura, anggunce ton malye kanye bopnamnulum do? Tonda, na yanyopura, yupu deice waldana ap, kanye talima wililana ap, yu weik upliba, weik arye yupu nyana ap, yuk-yuk tenelamunce, yuk-yuk kilongona ap, lululina ap, kanye erelana ap, kwalina ap, yuk nang arye, ‘Anang ara, malye nang tenepnamak’ tenen, ‘Malye yupu nyalina ap, winipnamlum do? Na yanamne talak ara, sik Korintus mutuku ninye tuba malye winibicak’ tenen, ilil unulule.

²¹ Tonda, anggunce amalye ning tuba winilamunyebuk, eipnyopura, ‘Se’ tenen, malye kanye bopnyopura, adeice arye, ‘Allah arye kanye imun kanye arepnilibuk, alye dakdanamne do?’ tenen, ilil upnile. Sik Korintus mutuku noutamak unyakce, malye-malye winilamik ning ati, “Se, nun malye wininyabe,” nyabuka, sik malye winin ning kum batakik ninye eipnyopura, malye kanye bopnirye, na talima ikin unamnile. Sik malye unyakce kum batakanyak ning ara, ani. Ara, talye ubula yolana ap, Allah el winilul ning tenena kumce, pia malye-malye winina ap ati, ‘Mambul’ tenena kumce, talye kanye bobuka wininyaka anya arye, na alye dakdanamne.