2 Korintus 11 - Eipomek

‘Korintus mutuku ninye arye, tilila yupu talibuka malye bisik bicak’ tenen, Paulus arye nyabuk yupu

¹ Ara, na kayapu. Narye mitik anun walwal nang arye talye-talye nyaltakalamak touk nyapnyopura, ‘Talye lamapdongobuka kekepnamlum’ tenen, moropsine.

² Narye anggunti tenepnirye, ‘Anang ara, na tenen nang anya arye, yuk nang dam kipdobicopura, anang arye talebikceura, malye winibicak’ tenen, anggunti kanye deibuka, yukulosunune. Allah arye nun nirya ati bico tenepsilirye, kanye talima melisiliba, yukulosilye touk na babye tenepsirye winisunune. Ara, winipmanto yupu nyapnusine. Ara, tonok tam nang arye, tonok kil dobuka, yuk tam nang ati, “Akil ara, yuk nang arye kum dobik. Pia teleb kam kiluk ulule,” nyabuka, arelamak touk, wininune. Ara, sik kil arin nang arye nyalamak touk, narye anggunti utenyamsise. ‘Korintus ninye ara, Kristus el yupu uk dib tenebikcebuk, tonoknye binyuk, Kristus elcuk aninye talipnamle’ tenen, anggun Korintus mutuku ninye ati wipdeiamsise.

³ Utenyamsise bukni, winira na ilil upnile. Ara, Isa Mutuku Dongonye arye, tenepce arye yupu teleb-teleb kibuka nyabukba, Hawa arye, tilila yupu dib tenebuk touk, ‘Anggun Korintus ninye babye atonun winipnamlum’ tenen, nyapsine. Ara, deiyok kouna talak ara, anggunce yuk yupu tabakuka dib tenena kum arye, dipkoprop Kristus el tonok dib tenyamlum bukni, yuk nang arye, yuk yupu peterepsikca deice arye, ‘Anggun kanye tenen ning deice arye, yuk malye bisik kirikuka bimunyak’ tenen, ilil upnile.

⁴ Dipkoprop nunce Yesus el yupu peterelamsupu atonun kum bukni, yuk nang arye tilila yupu deice arye Yesus ati peterepsikceba, ‘Diba tenepnamlum’ tenen, nyapsine. Tonda, yuk nang arye, ninye lyena ati tilila yupu, peterepsikceba, ‘Tilila isa dib tenebuka dopropmunyak’ tenen, nyapsine. Anggunda, ‘Ayupu ara dib do, tilila do?’ tenen, moubuka tenena kum arye, yuk nang arye nyasikce yupu, adiparyuk kanam aryuk kekebuka dololulume. Winilulum ning ara malyeuka.

⁵ Yuk nang arye, atilila yupu peterena deiyok nang ati, nyanyake. “Se, sikda, Allah yupu dobuka peterena ati, deiyok kouna weik mambul deiyok nang unyake,” nyanyake. Yuk nang arye atilila nang ati, “Weik mambul nang,” nyanyak bukni, na kanye ara, sikda weik mambul kum unyake. Na kanye ara, ‘Sikda weik mambul, nauk ara, mitik mambule,’ kum tenenune. ‘Nara, mitik mambulnye, sik amutamuk unune,’ kum teneldanune.

⁶ Nara, weik sekolah kel nang arye kum peterepnikba, pia urasin teleb yupu, kekena pia teleb yupu, talye kanye bobuka kum nyanun bukni, dipkoprop Allah el yupu talibuka dobolbana deiyoknye bira na kele. Anggun ap neika ulamubu talak ara, nun winilamubu ning nirya deice arye, aning akunum laka ubukba, kel bikamsulume.

⁷ Atilila yupu peteren nang arye, “Nunce peterepsibyopura, anggun Korintus mutuku nang arye, yo bok arenamsulume,” nyabuka morosinyak bukni, narye, anggun Korintus mutuku ululum ninye ati, Allah yupu peterelamsise talak ara, ‘Peterepnibuk, yo bok arenamnulume,’ nyabuka, pia kum morolamsise. ‘Anggun Korintus mutuku ninye eipnirye, yo bok morona kumce, Allah el yupu peterenamne’ tenen, anggun amu tam atonun ulamsise. Winilamsa ara, malye ulamse do? Kume, na kanye ara, aning ara malye kum winilamse.

⁸ Yuk mutuku nang mince akunum dib tenyamik ninye arye, na melina ati, yo bok melibuka arelamnika deice arye, anggun Korintus mutuku ululum ninye ati melibuka peterelamsise. Winilamse deice arye, yo bok arelamnik nang ati ara, mitik anun ubula dolona atonun winilamse.

⁹ Tonda, anggun ap ulamubu talak noutamak, na patalamnuk ning kum upnukbuk, ‘Na patan ning kum danil ati, anang moropneba, sik Korintus ninye, sik nong deice ikin ning deipnun’ tenen, anggunti kum morolamsise. Tonda sik dib tenebuka Provinsi Makedonia tam arye, Korintus mutuku yayikce, na patalamnuk ning arel yangalamnike. Minop talak babye, wini talak babye, aminyan talak babye, na patan ning kum morosununa anya arye, na winin ning deice arye ikin kum kilisunune.

¹⁰ Kristus el dipkoprop yupu na kanye talima noutamak unulule. Talye kum nyapsine. Aning dipkoprop ulye touk, anyapnusin yupu ara, talye kum nyapnusine. Ara, Provinsi Akaya tam noutamak unyak ninye kan-kan arye, yatanye birye yupu seknutuba, anyapmasin yupu bataknamne do? Kume, na patan ning ati, kum morolamsisa deice arye, ikin ning anggun nong deice kum deiamsise touk, tuba kum wininamne. Ara, na morona deice arye, ikin ning anggun nong deice kum delinamsine. Aning ara, na kanye delinulula ati, nyapsine.

¹¹ Allah arye nati, ‘Paulus ara, dipkoprop Korintus mutuku unyak ninye ati, pia bicoe tenelule’ tenen, akunum kel bikamnuke. Aning ara, talye kum nyapsine. Ati, “Paulus arye ayupu nyasilye ara, nunti kanye kum deipsuka anya arye, el peterena dekna ati, ‘Yo bok arepnululume,’ nyabuka kum morosulule,” nyabuka kum nyanamnulume.

¹² Na mince winilamse atonun tuba wininamne. Ara, na peterena pil ati, dekna ning kum moronamne. Winipnyopura, siktilila yupu peteren nang arye, sik bidamang kanye, weik erepdakirye, “Kume, Paulus arye peterepra winilamle atonun wininyabe,” nyabuka kum kwaliptinge. Na wininun ning yuk, sik wininyak ning yuk ati nyapsine.

¹³ Kume, sikce, “Paulus atonun unyabe,” nyabuka kwalinyak nang ara, tilila yupu peterena nanguk unyake. Sikda, “Allah el yupu dobuka peterelbana ati deiyok kouna deiyok nang, Rasul nang unyabe,” nyanyak bukni, dipkoprop kum unyake. Sikda tenepce aryuk talye pil donyake. Sikti lila yupu peterepra, talye pil donyaka deice arye, yuk nang mankau arye tilila yupu uk dib tenenyake.

¹⁴ Wininyaka ati ara, kum lukdatibye. Anang sik ni koprop Isa Mutuku Dongonye babye atonun, ‘Dirina arena im deice pil donanye, malaikat, tenepnamniyak’ tenen, malaikat nong ap, urasin ap atonun dalirye, ninye dam yangalule.

¹⁵ Winilul anya arye, laka akunum upsile. El amu tam unyak ninye, el mapu nirya ara, ‘Allah el diksukum ulye touk, diksukum una ati, pil melin nang, tenenamsiyak’ tenen, diksukum nong dem unyake. Winibuka tenepce arye wininyaka anya arye, sik malye-malye winilamak ning weik aulye touk, aminyan ara, Allah arye sikti, yupu bokuka lipsisiklirye, anang ati weik arye wenebuka opnamle.

Paulus el kanye ikin ulamuk ning ati, nyabuk yupu

¹⁶ Ara, tuba tamubuka tonap nyapsine. Yatanye do nirya, ‘Paulus ara, talye walwalnye, kanye bona kumnye ulule,’ kum tenenamnulume. Nara, walwalnye kum bukni, winibuka tenepnutuma babye, ayupu kekepnululume. Ara, sik walwal nang arye talye yupu nyakiba, yuk ninye arye, ‘Dawaplye, ayupu ara, danyapnyake’ tenen, lamapdongobuka talye kekelamak touk, kekepnululume. Sikti lila yupu peteren nang arye kwalin yupu nyalamak touk, na mitik tonun kwalin yupu nyapnusine.

¹⁷ Ara, sik kwalina ninye arye, ‘Nunda, weik kel nang’ tenen, kanye erepdakirye, talye-talye nyalamak touk nyapnusin ara, nun Deiyoknye Yesus arye nyalamle touk kum nyapman bukni, sik alye una ap, wenena ap ati, walwal nang nyalamak touk nyapnusine.

¹⁸ Ura, siktilila yupu peteren nang ap, yuk ninye ap arye, sik bidamnang kanye erepdakirye, nyalamak touk, narye ton, mitik tonun nyapnusine. Ara, siktilila yupu peterena deiyok nang arye, anggun dam yanuka, erelana yupu atonun nyanyake. Ati na babye mitik tonun kwalina atonun yupu nyapnusine.

¹⁹ Anggunda, ‘Nun Korintus mutuku ninye ara, weik kel nang akunum unyabe,’ teneluluma anya arye, pia walwal nang arye anggun dam yanuka tilila yupu peterepsikcopura, anggunce talye kanye deibuka kekenauk ululume. Anggun wenena ati nyapsine.

²⁰ Aninguk kum bukni, yata nang do nirya, anggun dam yakirye anggun Korintus mutuku nang ati, “Winiplulume, winiplulume,” nyabuka, anggun yanipsikirye, sik amu tam kilisinyak nang ap, anggun teleb ning nirya ubula dolosinyak ning ap, tenepce arye talye yupu nyapsikirye, anggun yanisinyak ning ap, sik badamnye erepdakirye, “Nunda anggun deiyok nang unamabe,” nyasikce nang ap, anggun dam yanuka, anggun urasin sik taruk arye oplopsikce babye, Anggun Korintus mutuku ululum ninye ara, yupu kum sekelulume. Talye lamapdongobuka ululume. Winimunya ara, yata ati do?

²¹ Anggun ap, nimalye arye ulamubu talak ara, aning kum winipsuka anya arye, winimunya ara, yata ati do? Anggunce nunti, ‘Sikda, mikip kum nang,’ tenesululum do? Nara, walwalnye birye talye-talye nyalamle touk nyapmasina ara, anggun alye dakaldana ap, wenena ap ati nyapsine. Sikti lila yupu peterena deiyok nang arye sik badamnye kanye erepdakirye, erelana yupu nyalamak touk, na babye atonun nyapnusine.

²² Sikti lila yupu peterena deiyok nang dipdakirye, weik yupu nyanyak ninye ara, “Nunda Ibrani yala ninye unyabe,” nyabuka nyanyak do? Na babye Ibrani yala kopropnye unune. Sikda, Israel yala ninye arye deiamik ninye unyak do? Na babye Israel yalanye birye deipnukura, aunmane. Na babye, Abraham bira, na deipkirik dopnye ulamuke.

²³ Na kayapu, nara motona talin nang nyalamak yupu atonun nyapmasina ara, anggun wenena ati nyapsine. Ara, siktilila yupu peteren nang dipdakirye “Nunda Kristus el pil dona ati melinang unyabe,” nyanyak do? Sik talye nyanyak bukni, nara, Kristus el pil melinanye, dipkoprop deiyoknye, anggun deice tam unune. Sikda, mitik anun arye pil domik bukni, nara pil weik arye dolamse. Sikda, yu nang arye tomobikce, wenena aik dongobikba, like mitik anunuk ulamik bukni, nara atalak-atalak weik arye tomopnikce, wenena aik dongopra balamnikba, like yupa weik ulamse. Sikda, yu nang arye kama dobuka, sikti, mitika aryuk kulabik bukni, nati ara, pia weik arye olamnike. Tonda, nara atalak ton, atalak ton, ikin weik ulamnukba, like yupa weik arye dipmanto ulamse.

²⁴ Sik Yahudi yala deiyok nang arye, malye winin nang wenena ati, kama arye yupa weik 39 nukuka bongobuka olamak touk, sikce na tomopnikce, like pangu barye talak yuk-yuk deibuka, kama arye yupa weik 39 nukuka bongobuka opnin balamnike.

²⁵ Aninguk kum bukni, like winilye talak, kat yo kama dobuka bobikce, na balye tam opnike. Tonok talak ara, keil dobuka na nong deice dobuka opnike. Winipnikura, dipmanto upse. Like winilye talak, mek lia yo weksirye, laut mekwen deice balamse bukni, nun mek lia yo mekwen pum wekukba, dipmanto ulamse. Ulamse talak ara, tonok lukunyan nirya ap, keting noutam nirya ap, weik laut mekwen deice bobuka balamnuk.

²⁶ Na peterepra bana pia ulamse ati, obinmana, ayanamana kinauk pia wininune. Na asik pia ubuka unak ton kum upnuke. Opmanto ulamnuk ning ara ani. ‘Weik balul mek koubuka, otam binun’ tenen, pirilamse talak ara, mek dipmanto ulamnuke. Tonda, ‘Ubula dopropnamap’ tenen, obuka dalulonyak nang ap, na mutuku koprop nang bukni, yu nang ap, Yahudi yala kum nang dib kum tenenyak nang ap, “Nunda dib tenenyaba anya arye, anggun weitcapu atonun unyabe,” nyanyak bukni, dipkoprop Yesus dib tenena kum, tilila yupu nyanyak nang ap, aning-aning nirya, ikin ulamnuk deice arye opmanto ulamnike. Tonda, opmanto ulamnik mutuku ara, weik asik domikba, ninye weik ulamikak ap, ninye kum ak bai tam mutuku ap, laut mekwen deice balamse ap, amutuku-amutuku nirya balamse talak noutamak ara, opmanto ulamnike.

²⁷ Pia pi dobuka pirilamsirye, ikin pil weik dolamse. Asum-asum nirya, mana kum pil donauk winilamse. Winilamse noutamak ara, like yupa weik ning ara, mek ap, dina ap kum uamuka ati, talye patanuk ulamnuk. Tonda, baju kum wamnuk talak ara, nong bananguk ulamsirye, aruklamnuke.

²⁸ Aning-aning nirya ikin ning weik aupmal bukni, aninguk kume. Asum-asum nirya ikin kanye bobuka, ‘Se, Allah dib tenenyak ninye mutuku-mutuku nirya ara, teleb ubuka wininyak do, kum do?’ tenen, kanye imun kanye bobuka ulamsirye, tuba unune.

²⁹ Ara, yata dib teneplinye do nirya, sik kanye talima mitang upliba, ikin asa ubicopura, na babye atonun sik anang ati tenepnirye, ikin kanye bobuka mikip ara mitang upniliba, wininune. Aning atonun, malye winin ning arye sik talimak lildaliba, malye winibicopura, na talima noutamak arye, ‘Se’ tenen, malye kanye bobuka unune.

³⁰ Sikti lila yupu peterena deiyok nang kanye erepdakirye, erelana yupu nyalamak touk kum nyapnune. Nara, na mikip ara, mitang asa unilye ning ati, erelana yupu mitik anun atonun nyabikirye, lak akuk nyapnamane. Na mikip ara, mitang asa ulamnye ning ati, kanye delinune.

³¹ Nun Deiyoknye Yesus, el Li Koprop Allah ara, el kele, anyapmasin yupu nirya ara, tilila kum nyapsine. Dipkopropuk nyapne. Ninye mutuku-mutuku nirya, nun Ni Koprop Allah el si ati, adiparyuk erenamake.

³² Damsyik mutuku ulamse talak winipnuk ning ara, nyapnusine. Ara, amutuku nirya talibuka ulamuknye sisinanye Raja Aretas, el amu tam ninye deiyoknye Gubernurnye birye, ‘Paulus tomobibirye, tapu koupnamabe’ tenen, Damsyik mutuku ulamik yin nang nirya ati, “Damsyik mutuku dana-dana nirya ara, Paulus ati, kalikmunce, eipmunyopura, anye bira tomoplulume,” nyapdeibuk.

³³ Nyapdeibuk, kalekuka dinmeka anya arye, ‘Tomopnamap’ tenen, piripdeyik bukni, anyasik dana-dana nirya weik cang keil poka domika noutamak jendela kin-kin uamuka arye, na kwit capu arye weik tapu keranjang atonun wiyamika arye, aning pum bisik lipdongopnikce, tapu kirikdongobuka batakdongopnin banmanika ani, tukwak bai tam dopkwetepnikba, loplobuka bindopsa ati, aGubenur arye kum tomopnuke. Na Paulus arye nyapsine.