2 Korintus 10 - Eipomek

Paulus el pil dolamuk ning ati, laka nyabuk yupu

¹ Ara, yuk yupu ton nyapnusine. Kristus el bidamnye kanye erena kumce, talima mitang ubuka una ap, ‘Na kwit malye kanye boplyak’ tenen, nimalye arye una ap arisilya deice arye, ayupu ton nyabuka moropnusine. Na Paulus arye nyapsine. Na kele, anggun kan-kan ton nang arye nyaninyake. “Kume, Paulus ara, neika bukuka dilanyap talak ara, ilil asa unyak nang atonun ulul bukni, nun neika kum unyap talak ara, mikip weik nang ulye touk, mikip arye nyasulule,” nyaninyake.

² Ton nang ara, nunti utenesinyake. ‘Kume, Paulus ap neika unyak nang ara, talye dib tenena kum ninye tenebuka ulamak touk unyake.’ Winibuka tenesinyak ninye ati ara, ilil kum asa ubuka mikip weik arye unamne. Bukni, anggunda aning atonun kum tenesululum ninye ara, narye anggun dam yanyopura, ‘Mitang aryuk yupu nyabuka pil dopsitinge’ tenen, moropsine. Na patapmanil ning ara, nimalye aryuk pil dopsitinye.

³ Yuk nang arye nunti, “Talye nang wininyake,” tenesinyak bukni, ayupu kekeplulume. Atukwak mutuku noutamak arye unyap bukni, talye dib tenena kum ninye arye tenebikirye winilamak touk kum wininyabe. Aning kum bukni, malye winin ning nirya malye kiyamika ati, Allah arye arisilye mikip ning arye pil donyabe.

⁴ Diba tenena kum ninye arye, ‘Opsilye ning malye kipnamap’ tenen, talye tukwak yin talibuka olbalamak touk kum unyabe. Sikda, talye tukwak yin talibuka olbalamak bukni, nun talinyap ning ara, pia yuke. Allah arye el im deice mikip ulul ning melisiliba, malye ning malye kina ati aning winibuka yanilongonyabe. Yin talin nang arye, anggunti opsikce ninye ati, sik domikce asik mikip asik uptu babye, anyasik nirya uluplobikirye amutuku ninye nirya obuka sirya daklamak touk, Allah melisilyeba, nunce im deice mikip ulye ning talibirye, Allah yupu yanina ninye nyanyak yupu nirya malye kibuka yaninyabe.

⁵ Winibuka unyap talak ara, Allah yanin ninye nyanyak yupu nirya ap, sikce, ‘Yuk nang Allah dib tenepnamak’ tenen, sik bidamang kanye erebuka tenepce arye nyanyak yupu ap nirya ara, bisibuka, kum kibuka delinyabe. Winibuka pil donyapa deice arye, nun kanye tenena ap, yuk ninye sik kanye tenena ap, tamupsilyopura, Kristus arye, ‘Wininamake,’ tenesilye touk, ansinibuka tenebibirye, el yupu kekebuka, aninguk talibuka elti, dobolbanyabe.

⁶ Ara, anggun Korintus mutuku ninye kan-kan, ton nang arye, sik malye wininyak ning batakikce, Kristus ati, pia teleb ubuka dobolbanyake. Ton nang ara, tuba malyeuk wininyake. Aminyan talak, Allah yupu yanibuka tuba malye winipnamlum nirya ara, akunum kintinyamipye arye, wenebuka yupu sekelongonamabe.

⁷ Anggunda, nong bola deice ninguk eipmunce, aninguk tenebuka yupu lipsisikuka bokolilulum ning ara, malye winilulume. Yatanye do nirya, “Nara, Kristus el mi unune,” teneplinye bira, tuba tamubuka tonap moubuka elcuk tenenamlule. Ara, elda Kristus mi ulye touk, nun babye atonun Kristus dib tenebuka dobolbipopura, el mapu kipsukbuk unyabe. Nunda neika atonun anya arye, sik yuk nang, talima erelakirye, nunti, “Sikda talye nang uka,” kum tenebuka nyapsitinge.

⁸ Allah arye pil dona deiyok ning arepsuk ning ara anggun dib teneplum ninye ati, kanye talima kwa dibuka melina ap, peterena ap, talima wisilina ap ati, areamsukce, ‘Peterena deiyok nang unamak’ tenen, akunum wipdeipsuke. Ara, ‘Sik Korintus mutuku unyak ninye, sik nong deice ikin ning debibyeba, sik talima, uk dinamle’ tenen, kum pil donyabe. Allah arye apil dona deiyok ning areamsuk ning ati, kanye lon yupu nyaptinya babye, alye kum dakdanamne.

⁹ Ura, narye anggun malye winilamlum ning ati, yupu sekelisunun surat ara, “Anggun ilil una ati seknune,” kum tenenun anya arye, anggun babye aning kum tenenamlulume.

¹⁰ Sik talima erelakce nang ara, nati nyanyake. “Kume, Paulus arye yupu sekesulul surat deice ara, mikip arye nyasiliba, ikin usulul yupu nyasulul bukni, el bidamnye nong nun dam yalyopura, elda talinye atonun ulule. Elce nyasilye yupu ara, talye yupu anya arye, nong kum upnamle. Elda, pia mambulnye kume,” nyabuka nyaninyake.

¹¹ Ayupu atonun yupu nyaninyak nang ara, adiparyuk tonap tenepnamake. Anggun ap, neika kum unyap talak ara, nun surat deice arye mikip arye nyanyap touk, aminyan talak ara, anggun dam yapyopura, asurat mikip yupu sekupu touk, mikip weik nang unamsiyabe. Ati, ‘Mikip arye wenepsilyak’ tenen, kanye moubuka unamlulume.

¹² Ton nang ning ara, sikce sik bidamnye ati, “Nunda pia mambul nang,” nyabuka talima ereldanyak bukni, nunce aninye ati, “Nunda anang atonun unyabe. Sik babye, nun babye mambul atonun unyabe,” kum nyanamabe. Sikce sik bidamnye wininyak ning ati, winipdandekirye, ‘Se, nunda pia mambule. Nun mutuku nang unyak atonun, nun babye atonun teleb unyabe’ tenen, kanye erelace ning ara, sik pia walwal arye wininyake. Aning ara, weik kel bikna ning deice arye kum wininyake. Ara, walwal winina atouk wininyake.

¹³ Sikce sik bidamnye ati, talima erepdakirye, kanye lon yupu nyaldalamak touk kum nyanamake. Allah arye nunti, “Amutuku noutamak pil donamake,” tenyamsuk touk lo arepsukbuk, pil dolamubu mutuku ati, kanye lon yupu nyaptibye bukni, nun binuka pil kum dolamubuak ati, yupu kum nyapnune. Allah arye areamsuk mutuku noutamak ara, anggun mutuku Korintus mutuku ton aubuke.

¹⁴ Nunce anggun dam kum yanuka peterepmasitibyetoura, sik Korintus mutuku unmeka ati kanye lon yupu kum nyaptibye bukni, nunce Kristus el laka teleb yupu, ninye lyena yupu dobuka peterepra balamuburye, anggun mutuku ton peterelamsupu. Minop talak yanuka anggun mutuku peterena deiyok kouna deiyok nang ara, nun uka. Ati nun talye ati kum nyanyabe.

¹⁵ Aning atonun, yuk nang arye pil dolamik ning ati, kanye lon yupu atonun yupu kum nyanyaba anya arye, sikce nunti, “Sik malye nyanyake,” kum nyapsitinge. Nunce anggunti, ‘Se, winiptinge, winiptinge’ tenen, patapsilye ning ara, ‘Anggun dib teneplum ning ara, weik upnin baliba, wisiplyopura, anggun Korintus ninye noutamak pil weik tonun tonap doptibye’ tenen, patasiliba, tuba tenesinyabe.

¹⁶ Sik mutuku noutamak pil weik tonap doptipyopura, aminyan talak ara, nunce ninye lyena ati, laka teleb yupu dobuka, anggun ululum mutuku anyapce, otam yuk pera mutuku ton peterepra banamabe. Yuk nang arye, sik pil donyak mutuku noutamak akunum pil dolamik ning ati, yupu kum nyanamabe. Aning ara, nun patana kum ati, ‘Yuk pera mutuku peterepra bitibye’ tenen, patasulule.

¹⁷ Bukni kanye lon yupu nyana ati ara, teleb ning ara, atonok nyapnusine. Ara, kanye lon yupu nyanamlanye bira, nun Deiyoknye Yesus el tonok, kanye lon yupu nyaptu. Yuk ning ati, kanye lon yupu nyana kume.

¹⁸ Anyapmasin yupu ara, talye ati kum nyapsine. Allah arye, “Anye bira dipkoprop teleb ulule,” nyabuka erepdeipnamlanye bira, ara elcuk el bidamnye ati ereipdalinye bira kum bukni, nun Deiyoknye Yesus arye, “Elda telebe,” nyabuka ereipnamlanye binyuka. Aning ati ara, kanye lon yupu nyana ara, Yesus el tonok nyana telebe nyapmasine.