2 Korintus 1 - Eipomek

Paulus arye, “Telebe” nyana ati, sekeibuk yupu

¹ Telebe, na kayapu, na Paulus ap, nun weit atonunye Timotius ap, nun bitinye arye asurat sekeipsiname. Ara, anggun Allah ati dib tenebuka Korintus mutuku ululum ninye ap, Akaya tam dib tenenyak ninye nirya ap ati, asurat sekeipsiname. Na Paulus ara, Allah arye tenyamnuk touk, Yesus Kristus el yupu dobuka peterelbana ati, deiyok kouna deiyoknye, Rasulnye wibuka deipnukura, apiluk tuba donune.

² Nun Ni Koprop Allah ap, nun Deiyoknye Yesus Kristus ap, sik bitinye arye anggun dib tenen ninye ati, sik kanye aryuk bico tenesurudakce, urdem aryuk melisururak ning ap, teleb una ati, kanye deibuka teleb una deiyok ning ap, ‘Abitinye pia arenamsirak’ tenen, Allah morosinyame.

Paulus arye Allah ati, “Telebe,” nyabuk yupu

³ Nun Deiyoknye Yesus Kristus, el li koprop ara, nun Ni Koprop Allah ati, “Anda pia telebe,” nyabuka el si pia erenyabe. Elda, ninye nirya ati kanye delisulule. Nun Deiyoknye, tonda nun ni koprop ulirye, kanye imun usilye talak nirya, nun talima kwa diprongobuka delina Deiyoknye bira, Allah ulule.

⁴ Nun ikin usilye talak noutamak nirya ara, elce kanye talima kwa diprongobuka melisulule. Kanye Talima kwa diprongobuka melisilya deiyok ara, ‘Yuk ninye ton ikin uplye talak ara, na mapu arye anang ati, talima kwa diprongobuka melinamak’ tenen, melisulule. Yuk ninye kanye imun upliba, ‘Yata wiribuka deice arye melipsitibye do?’ tenena kume. Ara, Allah arye nunti, talima kwa diprongobuka melisilya mikip deice aryuk, nunce yuk nang ati melinyabe. Yuk ton kume.

⁵ Ara talye ati kume. Kristus el kanye imun ulamuk ning ara, nun deice babye ton usilibuk, kanye imun kanye bobuka unyap touk, Yesus el yupu peterelbanyap talak ara, yuk nang arye, ikin ning nun nong deice delisinyakba, ikin usulule. Bukni, ikin weik usilye touk, Kristus ati dib tenebuka, el ap talima dukdongobuka unyaba deice arye, nun talima weik arye kwa diprongobuka melisulule. Yesus melisilya deice aniryuk, nunce yuk ninye ati, ikin unyak talak ara melinyabe.

⁶ Aning ati ara, nunda, ‘Se’ tenen, ikin upsilyopura, utenenyabe. Kume, ara nun kayapu nang, sik talima melina ap, sik lyena ap ati, ikin usulul bukni, aminyan talak ara, nun kayapu nang ton melinamabe. Allah arye nun talima kwa dipdanuka melipsilyopura, ara anggun talima melina ati winisulule. Kanye imun kanye boplum talak noutamak nirya babye, Allah arye anggun kanye talima kwa dibuka melisilya deice arye, pil batakna kum aryuk, pia pi dobuka, nimalye arye pil tuba dolulume. Ara, nun nong deice ikin usilye ning atonun, anggun nong deice aikin ninguk usilya babye, anggun dib teneplum ning adiparyuk kum batakalule. Pia pi deibuka, nimalye arye pil tuba dolulume.

⁷ Nun kele, nun ikin usilye ning, sik Akaya tam ninye babye atonun ikin unyaka anya arye, Allah arye nun talima kwa dibuka melisilye touk, Allah arye anggun babye talima kwa dibuka melinamsile. Aning ati ara, nun kanye teniltona kumce, anggun Akaya tam ululum ninye ap, Korintus mutuku ninye ap ati, ‘Anang ara, telebuk unamake’ tenen, kanye deibuka tenesinyabe.

⁸ Ara, Yesus dib teneluluma ati, nun du weit atonun ululum ninyeo, anggun sal babye, kilapu babye kekepnululume. Nunda, Provinsi Asia tam ulamnumu talak ara, ikin ulamsuk ning ati, ‘Kel bikna kumce, walwal asa upmunyak’ tenen, ayupu ton nyapnusine. Atalak ara, weik ikin ning weik ulamsukba, kanye imun kanye bomnumua ani, ‘Se, pil tuba kum doptinimnye. Nun pia kum winipmanto upsile’ tenen, ikin weik ulamsuk bukni, nunce ilil kanye bobuka, ‘Kume, nun dipnamnamca,’ tenelamnumu.

⁹ Aning ara, dipkoprop nyapne. Nun kanye talima noutamak ara, ‘Nun dipkoprop dipnamname,’ tenelamnumu. Pia malye kanye bobuka, ‘Dipnamname,’ tenelamnumu bukni, aning pia ikin ulamsuka ara, talye ati kum upsuke. Deiyok ara, Allah arye nunti, utenebuke. Sikce, ‘Nun tukwak ninye, nun mikip deice aryuk apil doptinimnye, teneprikcak’ tenen, ikin ning arepsukbuk, ikin weik ulamsuke. Tonda, Allah arye nunti utenepsuke. Sikce, ‘Nun mikip deice aryuk kume. Allah ara, akunum dipmakce ninye kam bulilulnye, el mikip deice aryuk apil doptinimnye’ tenen, ‘Kel biknamake,’ tenepsukce ikin ning arepsuke.

¹⁰ Ara, nun ikin weik ulamsukba, dipmanto wamnumu bukni, Allah arye lyebuka lopdeipsukce, teleb kipdeipsuke. Tonda, aminyan talak babye ara, pia lyepnamsile. ‘Allah aryuk pia lyepnamsil’ tenen, nun kanye ara, el deiceuk deibuka, elti, dib tenebuka dinyame.

¹¹ Winibuka unanam talak noutamak nirya ara, anggun Korintus mutuku ninye arye nunti, Allah morosululuma deice arye melisululume. Winibuka anggunce nunti Allah morosumunyopura, yuk ninye weik arye nunti tenepsikirye, “Allah, anti ‘Telebe,’ nyapkiyabe,” nyabuka, el si erebuka nyanamake. Ara, ninye weik arye nunti, Allah morolamibyeba, Allah el kanye aniryuk bico tenepsilirye, melisilye ning ati ara, ninye weik arye Allah ati, “Naio, nun morobupe touk, Paulus ap, el melin nang ap, melyamluma ati, ‘Telebe,’ nyapkiyabe,” nyanamake. Na Paulus arye nyapsine.

Paulus arye, ‘Winipnamne,’ tenyamuk bukni, nong kum ubuk ning ati, laka nyabuk yupu

¹² Ara, na kayapu, nun kanye deibuka ayupu nyapsitibye. Nunce tenepce nyana kum aniryuk, nun kanye talima diksukumuk upsilirye, ayupu nyanyabe. Amutuku-mutuku nirya ulamubu talak ap, weik mambul ning anggun ap neika ulamubu talak nirya ap, malye una pia kumce, diksukumuk ulamubu. Tenepce nyana pia kum aniryuk, dipkopropuk ulamuburye, pil dolamubu. Adiksukum una ap, duknuna kumce dipkoprop una ap ara, Allah arye aresulule. Winibuka unyaba nirya ara, dib tenena kum ninye arye, ‘Nunda weik kel nang,’ tenekirye winilamak atonun, aning deice kum unyabe. Nunda, Allah el kanye aniryuk bico tenepsilirye, melisilya deice arye aresilye touk, pia diksukumuk unyabe.

¹³ Anggun kum nyapmanto yupu ap, kum kekebuka kel kipmanto yupu ap ara, kum sekuka dolisinyaba anya arye, nunda dib tenena kum ninye arye, ‘Aning ara weik kel ning,’ tenenyak touk, ayupu deice arye kum nyanyabe. Na Paulus arye nyapsine. Tonda, narye anggunti, ‘Se, aning winipting’ tenen, patapnil ning ara ani.

¹⁴ Ara, minop ara anggunce nunti, mitik kel bikamsulum touk, aminyan talak ara, weik arye kel biksumunce, bikamsulumce, nirya moubuka tenepsumunyopura, anggunce nunti, kanye deibuka, “Anggunda pia telebe,” nyabuka kanye deipnamsulume. Aning atonun, nun Deiyoknye Yesus arye, tukwak mutuku tamubuka yanamle talak ara, nunce anggunti, “Anang ara pia telebe,” nyabuka, kanye deipnamsiyabe.

¹⁵ Ara, arup nyapmasin yupu, kanye bokoltona kumce, ‘Pia dipkoprop winipnamle’ tenen, dib tenepsisa ati, winibuka tenyamsise. Ara, ‘Anggun Korintus mutuku ninye ara, anggun dam minopce uruna ati, yanuka binuka unmanya ani, sik batakuka yukak binmanya ani, aminyan talak ara, tuba tamubuka tonap, anggun dam yanyopura, like bitinye sum neika unamap deice arye, teleb kipdeipnamsile,’ tenepsise.

¹⁶ Ara, ‘Makedonia tam binamnarye, bisik noutamak benamne talak ara, sik dam binuka unamne,’ tenyamse. ‘Winipyopura, aminyan talak ara, Makedonia tam akunum binirye, ila tamubuka abisikuk yanamne talak ara, tuba tamubuka tonap, anggun Korintus mutuku nang dam yanamne,’ tenyamse. ‘Sik dam akunum yanyopura, na Yudea tam benamne talak, sik Korintus mutuku nang arye, Yudea tam bana ati, melibuka dopdeipniting,’ tenepsise.

¹⁷ Ara, ayupu nyapmasin touk tenipdesirye, ‘Winipnamne,’ tenepse talak ara, anggunce, ‘Paulus ara, talye una ati winipsuke,’ tenepnulum do? Tonda, anggunce nati, “Wininamne, wininamne,” nyabuka teneplye talak nirya ara, sik dib tenena kum ninye arye winilamikce touk ulule. Ara, sikce, tonok talak aryuk, “Diba, wininamabe,” tonda “Kume, kum wininamabe,” nyabuka, talye tenepce, na tenen arye nyaltakalamak touk ulule. Aning atonun tenepnulum arye do?

¹⁸ Kume. Allah arye, “Wininamne,” nyabuka nyasilye touk, pia batakana kumce, dipkoprop aninguk winilamle touk, nunce anggunti nyasinyap yupu ara, atonun ulule. Kanye bokoltona deice arye, tonok talak aryuk ton ning ara, “Diba,” ton ning ara, “Kume,” kum nyasinyabe. Moubuka tenebibirye, dipkoprop ninguk nyasinyabe.

¹⁹ Ara, talye ati kume. Na Paulus ap, Silas ap, Timotius ap, nunce anggun kan-kan arye peterelamubu yupu ara, ton ning ara, “Diba,” ton ning ara, “Kume,” nyabuka, kanye bokoltona deice arye kum nyalamube. Allah el Mi Koprop ara, Yesus Kristus, el nyasilye yupu ara, ‘Diba nyanun do? Kum nyanun do?’ tenebuka kum ulule. Yesus el yupu ara, apia nirya talak nirya, dipkoprop yupu uk, nyasulule.

²⁰ Anyapmasin yupu deiyok ara ani. Allah elce nunti, “Wininamsine,” nyabuka nyalilamsuk yupu weik aupmalya babye, Kristus el pil dosilya deice arye, Allah anyalilamsuk ning nirya ara, dipkoprop ulule. Ayupu nirya ara, nong dipkoprop upnamle. Tonok ning babye kum bataknamle. Aning ati ara, nun ap, Kristus ap, talima dukdongobuka unyaba deice arye, ‘Allah nyalilamsuk yupu nirya ara, Kristus arye pil dosilya deice arye, dipkoprop nong unamle’ tenen, “Diba,” nyanyabe. Tonda, ‘Aning ara dipkoprop nong upnamle’ tenen, “Amin,” nyanyabe. Winibuka nyanyaba deice arye, Allah el si erebuka elti, kibuka si erenamabe.

²¹ Ara, nun ap, anggun ap, Kristus ap, talima dukdongobuka neika una ap, dib tenena ap ati, el mikip arisilyopura, pia kanye talima lamapdongobuka unyabe. Winina ati, talima mikip kilina deiyok ning arisilye deiyoknye bira, Allah eluk ulule. El bidamnye aryuk nunti, ‘Aninye ara, na tenen ninye unyakce, na piluk donamniyake’ tenen, wipdeipsuke.

²² Winipmanto ning ara, basam amul sekikceba, yuk nang eibikirye, ‘E abasam ara, el ning’ tenen, kel biklamak touk, Allah arye nunti lakilin ning arepsuke. Ara, yuk ninye arye, nunti, ‘Anang ara, Allah el ning, tenepnamak’ tenen, Allah arye el lak kilin ning nun deice deipsuke. Winipsukce, ‘Aminyan talak ara, winipnamle ning, dipkoprop winipnamsile, tenepnamak’ tenen, kil taruk muruna atonun ning ati, minopce el Dib Kanye dobuka, nun talima ak dongopsuke. Ara, minopce areamsuk ning ati nyapsine.

²³ Ara, yuk yupu ton nyapnusine. ‘Diba tenepnamnulum’ tenen, Allah dinmasil deice arye, ayupu dipkopropuk nyapsine. Na minop arye anggun dam Korintus mutuku tamubuka kum yase deiyok ara, ‘Ikin ning anggun nong deice kum deipnamne,’ tenepsa ati, anggun dam tamubuka kum yanamse.

²⁴ Anyapmana ara, ‘Nunce weik ninye deiyok nang atonun ubuka, anggun dib tenelulum ninye ati, anggun deice yaniptibye’ tenen, kum nyapsine. Aning ara, kum bukni, anggun dib teneluluma deice arye, kanye bokoltona kumce, pia lamapdongobuka ululuma anya arye, nun ap, anggun ap, neika pil dolamibye bukni, anggun kanye deibuka, pin-pina asa arye wininamlume. ‘Wininamlum’ tenen, ayupu arup nyapmasine. Na Paulus arye nyapsine.